You are here

يا ترى أنت فين يا مسعد؟؟

Primary tabs

خلفية و تفاصيل:

  • مسعد أبو فجر أخصائي معلومات بهيئة قناة السويس، كاتب و مؤلف رواية 'طلعة البدن'، و من قادة و منظمي حركة ودنا نعيش المهتمة بحقوق بدو سيناء
  • قبضوا عليه من بيته في الاسماعيلية يوم 26 ديسمبر، و حرزوا جهاز الكمبيوتر و اسطونات (و منها اسطونات أطفال تعليمية بتاعة بنته اللي في الحضانة) و شرائط مرسيل خليفة (يا ترى حد هيرجعهمله لما يتأكدوا من خلوها من الشبهات؟؟)
  • رحلوه على شمال سيناء و عرضوه على النيابة اللي امرت بحبسه و وجهتله التهم دي:
    • تخريب و اتلاف و تجمهر
    • احراز و توزيع منشورات
    • احراز سلاح ناري و ذخائر بدون ترخيص
    • الحض على التجمهر
    • التعدي على موظفين عموميين
  • جددوله الحبس 15 في 15تانيين
  • محكمة جنايات الأسماعيلية اخلت سبيله يوم 12 فبراير
  • نقلوه قسم رفح و هناك وجهوله تهم جديدة: (14 فبراير)
    • تجمهر
    • شروع في قتل 'مواطن'
    • احراز سلاح ناري و ذخيرة
  • خد إخلاء سبيل تاني يوم 16 فبراير
  • فضلوا حبسينه في قسم أول العريش و مانعين مراته تشوفه مع أنه خد إخلاء سبيل
  • حاولت مراته تزوروه النهارده (24 فبراير) فقالولها أنه خرج!!!

يا ترى بقى خرج على فين و مع مين؟؟ و هو فين دلوقتي؟؟

Comments

هع هع الحاجات دي مبترجعش

دي فلوس حكومة

:)

كنت و ما زلت أتمنى تكوين ( شكل ثابت ) و دائم و له أفرع فى كل محافظات و مدن المحروسة يتكون من : 1- الحقوقيين . 2- لجان الحريات بالنقابات . 3- مكاتب المجتمع المدنى . 4- الصحافة الحرة . 5- المدونين . 6- اإعلام ( media ) . 7- النشطاء : الذين يقومون بالغزل و التنسيق بين كل ما سبق . تكون مهام هذا ( الشكل الدائم ) الدفاع عن كل المظلومين و المحبوسين فى قضايا الرأى و الاستبداد الحكومى و بذلك يمكننا مساندة " مسعد أبو الفجر " .. أو أى فجر محجوز

انا اقولك يامنال خرج على سجن برج العرب وما كنا نعرف الا بعد حوالى اسبوعين من اعتقاله ودورنا عليه فى امن الدوله وقالوا مانعرف مكانه دورنا عليه وماحد عايز يقول وين مكانه وبالاخر عرفنا انه فى سجن برج العرب وعلى فكره يامنال سجن برج العرب شكلهم لما فكروا يعملوه قالوا ده هانعملوا للبدو لان معظم المعتقلين من بدو سيناء فى السجن ده وهو الى الان معتقل يا منال اكثر من 45 يوم غير الشهرين الى قبل كده وانا لى 55 يوم ماشفته والله معه ومع كل انسان مظلوم الحريه لهذا الرجل الجميل الذى تسال عنه ابنته يوميا . وحشتينى يامنال بس انتى عارفه الظروف