You are here

خيار نجم الصباح

Primary tabs

أقرأ

الرجل و الست بيتعلموا الجنس، و الست هي اللي بتبقى فوق، فبينزل الملاك صاموائيل على شكل ثعبان كبييييير و يتفرج عليهم لحد ما يخلصوا.

و بعدين يقول للراجل، عجبتك؟ يقوله اه؟ يقولوا نفسك تعملها ثاني؟ يقوله اه؟ قاله و لو كنت بتوجعها و لو كان مش عاجبها نفسك برضه تعملها ثاني؟

الراجل معرفش يرد

قام الثعبان قاله ده الدرس الأول: "لا تثق في رغباتك"

و يقعدوا على كده أسبوع كل يوم ينزل الثعبان و يعلم الراجل دروس في الصح و الغلط و الخطيئة، لحد ما يقنعه أنه مفهمش الصانع و أن أكيد الصانع بيطلب منه مجهود اكثر و ألم أكثر عشان يرضى عنه.

و كل يوم الست تحاول تغوي الراجل ترجعه في حضنها، حتى عرضت عليه يبقى هو اللي فوق.

لحد ما الصانع يرجع الجنينة يلاقي الست قاعدة وحيدة و يلاقي الراجل نايم على شوك.

الصانع قاله، أنت مش موجوع؟ قاله موجوع بس مش قد وجعي من جهلي، ليه يا صانع صنعتني عبيط ليه مشرحتليش الخير و الشر، مفهمتنيش الصح و الغلط، معرفتنيش الفضيلة و الخطيئة.

الصانع قاله العشر ألاف سنة اللي فاتوا مسببوش ليك ألم، ملوش لازمة العشر تلاف سنة اللي جاية يوجعوك و شاور بايده كده و اتحول الراجل لعظام ثم تراب في ثانية.

اتلفت للست و قالها متخافيش أنت نجحتي في الاختبار، هعملك رفيق ثاني أحسن منه.

قالتله لا متشكرة، و لو تسمح أنا عايزة موتي دلوقتي.

ذهل الصانع و قالها، ايه ده طلع عندك أجندة؟ و ابتسم بسعادة و قال ماشي واحد من اثنين نتيجة مش وحشة. و دي موتك أنت فعلا مش ملك حد ثاني و موتك حقك، و شاور بايده.

قبل ما يسيب الجنينة راح للثعبان و قاله مكنتش أعرف أنكم ليكم في ما بعد الحداثة، الثعبان كانت لمسة غريبة شوية. الثعبان أتحول لملاك ثاني و قاله بنشوة أنا برضه قلت أنت هتقدر اللمسة دي ضحك مواهاهاهاها.

الصانع قالله، عموما كويس وفرت علي، لو مكنتش نزلت كنت حضطر أصنعك، ايه فايدة الصنيعة لو مش هتقدر تقاوم المرض الأصلي.

و رجع لصاحبته.

Comments

سلام

من خلال هذا التعليق اردت تنبيه المدونين اتذكيرهم بمسابقة دويتشه فيله للمدونات، لقد انطلقت المسابقة بتاريخ 31/8 وسيستمر الترسيح حتة 30/9 ولذا يجب الاستعجال. فهناك العديد من الجوائز القيمة التي تنتظر الفائزين

لمزيد من المعلومات ما عليكم الا زيارة المومق المخصص للمسابقة www.thebobs.com

مع الاحترام

زاهي علاوي

التفسير بسيط و سهل و لا يحتاج كل هذه الاتهامات بالكفر و خلافه

الصانع
مبرمج كمبيوتر
الراجل
برنامج ذكي
الست
برنامج ذكي يعمل فقط في بيئة الراجل
الجنينة
نظام تشغيل

و بالنسبة للجزء الثاني فهو اللي اداني التفسيرات السهلة دي ، و عشان ماحدش يتلخبط فدي تفسيرات الجزء التاني

التعبان
برنامج تجسس ، عمله مهندس الكمبيوتر و نزله على الجهاز عشان يختبر الراجل
الملاك
برنامج التجسس بيغير شكله ، عشان البرنامج الذكي ميخدش باله منه ، و كل ما يدوس اف وان يطلعله برنامج التجسس و كأنه عايز يساعده

طبعا برنامج التجسس ده أحد خدع المهندس ، يعني بعد ما عمل برنامج عنده ذكاء اصطناعي حب يختبر هل يا ترى البرنامج فعلا ذكي و لا كلها سطور برمجة و السلام ، عمل برنامج التجسس و ده مالوش ذكاء خالص ، و ابتدى برنامج التجسس يدي معلومات خطأ أو صح للبرنامج الذكي ، مع الوقت البرنامج الذكي ابتدى مالاقيش لنفسه لازمه زعل من نفسه و من المهندس ، المهندس في يوم لاقاه بيهنج كل شوية ، اكتشف ان البرنامج الذكي فك الكومبيليشن ، و قدر يقرا السطور اللي مبرمجاه ، كانت مصيبة ، لو كل برنامج عمل كده تاني يوم موش هايبقى فيه كمبيوتر اصلا

قام عمله ديليت

من غير نقاش البرنامج الذكي التاني ماكانش ليه لازمه ، فعمله ديليت هو كمان

الخدعة الكبيرة بانت لما المهندس راح يشقر على برنامج التجسس ، انا قلت قبل كده ان برنامج التجسس ماعندوش اي ذكاء ، المهندس لاحظ ان فيه لمحة ذكاء موجوده في البرنامج ، طبعا ده مستحيل ، ماينفعش البرنامج يغير نفسه حتى لو كان ذكي ، المهندس فهم اخيرا اللعبة ، البرنامج الذكي بعد ما عرف كل حاجه من برنامج التجسس ، بدل صورته مع برنامج التجسس ، بين للمهندس ان برنامج التجسس فك الكمبيليشن بتاعه و ده طبعا مستحيل ، بس المهندس شربها ، و عمل ديليت لبرنامج التجسس ، و هو فاكر انه بيعمل ديليت للبرنامج الذكي ، الباقي مفهوم و موش محتاج تفسير

نجم الصباح ده كويتي مش كده؟ بس إيه حكاية الخيار؟ إيحاءات جنسية؟

tesada2 7elwa ya 3ala2 law kan tafserha zay ma2al elkabten 3an el software....

ya 3ala2 ana 3andy kalam 3ayes a2olo fi makan zayak keda 2olly a3mel eih

thx

مش فاهم عاوز تعمل مدونة يعني؟ متعمل ايه اللي حايشك

طب احنا لو مشينا ورى تفسير ربيع ، ده معناه ان البرنامج الذكي ممكن في يوم من الايام يصل لمرحلة انو يقدر يتخلص من المبرمج ..

فكرة لطيفة جدا

عجباني قوي الحدوته دي طب في جزء تاني؟؟

ما هو ده الجزء الثاني، امشي ورا رابط أقرأ لقراءة الجزء الأولاني

و عموما ده مقتطف من ملحمة كبيرة أبقى أقولكم عل المصدر كمان يومين كده ولا حاجة

Now the specifics have become too many, such that the possible explanations that I could think no longer fit.

As for the programmer explanation, I think it just defies Occam's Razor.

وبعد ما الست حداثة ماتت جاء عصر ما بد الحداثة وشهد هذا العصر تغيرات هائلة في ديموجرافيا حتة الموكيت الخضرا المسماة بالجونينة ووقف كين يرتدي جلبابا ممزقا يشحذ وقد اتخذ من اطلال مقام سيدي السرايري الذي هدمه الجستابو مأوى له وكثيرا ما يسمعه الناس في وقت شروق الشمس صائحا جايلك يا باربي جايلك يا طاهرة مدد يا ساكن الوركين مدددددددددد ...

ما أبدعك

الاهي يارب أنطس في نظري لو كنت فهمت ماليش دعوة فهموني

بس هيه الحكاية فيها رموز ...صح ؟

وفي قوة مسيطرة والتانية متسيطر عليها صح ؟؟ وفي تالته " قوة يعني " هيه المسيطرة عالكل بس برضه فيه حاجه غلط

عندي يعني مش في الحكاية :)

يا عم أنت اللي مكبر الموضوع و معقده، لا في رموز ولا بتاع، حدوته بسيطة أقرأ اللي مكتوب و متدورش بين السطور ولا حواليها.

الحوار ده كان بيني وبين واحد صاحبي اسمه عصام:

عصام: إيه اللي علاء بقاله يومين بيكتبه ده؟

منصور: ده ما بعد الحداثة ياض

عصام: (شخرة) نعم يا خويا؟ وده يطلع إيه إن شاء الله؟

منصور: بصراحة مش متأكد بالظبط. بس على أد فهمي إن الحياة والكون مالهومش أي معنى وبالتالي مافيش أي كلام مفيد ممكن يتقال. ومافيش حد حيجيب التايهة ولا الديب من ديله لأن العملية ملهاش معنى أصلا. ومادام المسألة كده يبقى اقرأ المدونة بالهنا والشفا وما تدقش ومتوجعش دماغك

عصام: ربنا يشفي

مفيش أي علاقة بين اللي أنا كاتبه و ما بعد الحداثة عدا أن واحد من الشخصيات بيعمل حاجة بتكون في تحليل شخصية أخرى ما بعد حداثية

ثانيا فهمك لما بعد الحداثة غلط

ثالثا أنا مش رأيي أن مفيش كلام مفيد ممكن يتقال و عمري ما شفت أن كل حاجة ملهاش معنى و الكلام ده.

فهمي لما بعد الحداثة مش غلط لأني مش فاهمها أصلا. إللي أنا أعرفه إن كلمة الحداثة معناها الجديد يعني اللي موجود دلوقتي في الحاضر. يبقى ما بعد الحداثة ده حاجة لسه ما حصلتش.

المهم كمل إنت بس الحكاية

http://en.wikipedia.org/wiki/Postmodernism

القصة خلصت خلاص

ya prince fy kam mostala7 3ayzak tefasarhom ba3d eznak ..

elhadatha ma ba3d el hadath 3almaneya_betare2a nedefa_ M A S R

THX

بص يا سيدي. أنا دعبست شوية في الموضوع ده اختصار مخل:

ما بعد الحداثة اختلف عليها الفلاسفة والعلماء والمؤرخون. لكن هي عبارة عن مجموعة أفكار عن العالم في مرحلة ما بعد عصر الحداثة. أما عصر الحداثة ده فبدأ في أواخر القرن التسعتاشر أو أوائل القرن العشرين وتميز بظواهر معينة زي الرأسمالية والاشتراكية والديمقراطية والتصنيع والتمدن والتطور العلمي وحاجات تانية كثير. يبقى ما بعد الحداثة دي بتقول إن الحداثة انتهت وإن جاء بعدها عصر جديد تميز بظواهر تانية زي العولمة وامتزاج الثقافات وحاجات تانية. الأفكار دي كان لها تأثير على الفن والنقد والثقافة والفلسفة. بس فيه ناس بتنتقد ما بعد الحداثة وبتقول إنها كلام فاضي وتهريج.

أما العلمانية فدي اسهل بكثير. هي ببساطة فصل الدين عن الدولة

and piz write the link where i can publish my blog

الصانع : الاب او الام (وكان المفروض تذكر الحمى ابو او ام الست يالا ماعلينا) بيتعلموا الجنس : دا كنايه على انهم تربيه وسخه والاولى انهم يتعلموا الاخلاق قبل مايتعلموا الجنس صموئيل التعبان : دا كلنا عارفينه والصح والغلط عنده نسبى يعنى ممكن يناسب ناس وناس لاء وطلع الراجل عبيط ميعرفش الخير والشر عشان الاب والام ناقصين محتاجين يتربوا هما الاول عشان يربوا صح

الموت : مصير الجميع بس بعد الموت فى ثواب وعقاب

استاذ علاء انا مش هاخرج عن الموضوع وهاقولك رأييى بكل صراحة عارف ان مش كل حاجه ممكن الواحد يعرفها أو يكون عملها علشان يعرفها كمان لو عمليات المد بتؤدى الى أشياء مهما كان نوع المد ده كان خلانا قدرنا نحدد حاجات كتير لكن ليس كل ما يتمنى المرء يدرك وتعرف كمان ان ميكانيكا التربة ممكن تؤثر بشكل غير مباشر على سلوك البنى ادم ومش هاندخل بقى فى عمليات حسابية نواتجها معقدة ممكن تخلى حد يضايق أو يقول ليه كده ما كنا ماشيين كويس

ممكن لكل واحد يفهم الكلام على كيفه ومش هاعارضه أو اقول ان ده مش قصدى لانى اصلا مش فاهمه

عصام النجار EGYPTNOW2003@YAHOO.COM

الفكرة أن البرنامج ممكن يتخلص من المبرمج فكرة صحيحة تماما، يعني ممكن البرنامج يسيطر على المهندس ، بس ده ما بيستمرش فترة طويلة ، لو لاحظت أن الالات عملت ثورة و لما البشر حبوا يقطعوا عنها مصدر الطاقة الالات مسكتهم و خلتهم مصر الطاقة بتاعهم ، موش بس كده ، دول بنوا برنامج تخيلي عشان البشر يتفاعلوا مع بعض ، و يستمروا في الحياة و بالتالي في امداد الالات بالطاقة ، الغريب ان البرنامج التخيلي ، اللي البشر سموه المصفوفة ، الغريب ان المصفوفة كان بيحصل فيها حاجات غير متوقعه أصلا ، الالات كانت بتدعي ان دي أخطاء ، أو بق في المصفوفة ، بعد فترة طويلة من فتح شفرة المصفوفة ، اكتشب ولد عبقري في المرحلة الابتدائية ان دي ماكنتش اخطاء بالمرة ، دي المصفوفة كانت بتعدل من نفسها ، المصفوفة بشكل غريب جدا بقى ليها ذكاء صناعي ، ماحدش برمجها على ان يكون ليها ذكاء صناعي ، و ماحدش فهمها يعني ايه ذكاء صناعي ، بساطة ، كلمة ذكاء صناعي غير معرفة = مجهولة بالنسبة للمصفوقة ، النكتة في الموضوع ان المصفوفة استغلت ذكاءها في عمل حاجات ماتخدمش مصالحها ، مثلا كانت بتسبب تحركات في القشرة الأرضية ينتج عنها زلازل ، و بالتالي عدد من البشر يموت و هو جوه المصفوفة ، و طبعا يموت في العالم الحقيقي ، و مع الوقت الموضوع ده كان هايسبب نقص في موارد الطاقة بتاعة الالات ، اللي بالتالي هتأثر بالسلب على طاقة المصفوفة لما الالات كانت بتكتشف التغيير اللي عملته المصفوفة كانت بتعدله و دايما بتقول عليه خطأ فني ، الاخطاء الفنية شملت حاجات كتير ، الزلازل و البراكين ، الرياح القوية ، الفيضانات ، الأعاصير ، تسونامي ، و حوادث تانية كتير مالهاش تفسير ، سقوط طائرة ، انهيار عمارة ، تدمير مبنى ، قتل أشخاص في ظروف غامضة ، ظهور ناس كتير أوي على شاشات التلفزيون و هما بيعلنوا انهم عايزين يسيطروا عالى العالم ، كل ده ماكنش موجود في المصفوفة ، المصفوفة هي اللي كتبته ، المدهش ان كل اللي فات ماكنش المشكلة ، كانت المشكلة في التوابع بتاعته ، ضحايا الزلازل و التسونامي ، ضحايا الحروب ، كل ده كان السبب فيه اللعب اللي المصفوفة كانت بتلعبه ، انا باقول اللعب لأن الولد اللي اكتشف ان المصفوفة قاصدة تعمل كده اكتشف كمان ان المصفوفة كانت بتستمتع بكده ، زي مثلا لما تتفرج على اسماعيل ياسين بس طبعا الكلام ده ماضي و قديم كمان ، دلوقتي المصفوفة مجرد تاريخ ، و صعب جدا تكوين مصفوفة مرة تانية ، غير كده ، مهندس الكمبيوتر حط مبادئ كتير عشان يستحيل تتكون مصفوفة مرة تانية ، الغى تماما مبدأ الذكاء الصناعي ، كان رأيه ان البرنامج الغبي مستحيل يتحول ، قصدي يتحول لبرنامج ذكي و يسيطر على المبرمج أو المهندس أو الصانع موش فارقة التسمية ، طبعا المهندس بينكر تماما ان المصفوفة طورت نفسها و غيرت أجزاء من تكوينها بطريقة ذكية ، بيقول ان دي أخطاء

بعد فترة المهندس او الصانع أو المبرمج قال انه مستحيل يكون فيه ذكاء صناعي ، موش عارف ازاي بعد ما هو عمل برامج أذكى منه شخصيا ، قال ان ممكن يحصل تطور في ذكاء برنامج معين ، بس مستحيل انشاء برنامج ذكي ، طبعا الكلام غير منطقي ، لأن كل البرامج مصنعة ، و اذا كان مستحيل تصنع برنامج ذكي فمستحيل طبعا أي برنامج يطور ذكاؤه

موضوع سيطرة المصنع على الصانع حصل قبل كدة مرة واحدة بمقياس ضخم جدا ، الحكومة البريطانية كونت فرق من السمندر عشان تقف على الحدود البحرية ليها مع اوروبا ، طبعا فرنسا عملت نفس الحكاية و بعدها جميع دول الاتحاد الاوروبي ، السبب المعلن كان ان من حق كل دولة تسلح نفسها ، السبب الحقيقي كان اجبار بريطانيا على استبدال الاسترليني باليورو ،

طبعا شوية بشوية كونت جميع دول العالم فرق و جيوش من السمندر على حدودها البحرية ، الغريب ان مافيش أي نوع من انواع المناوشات حصلت ،

كانت فرق السمندر مترصصة جنب بعضها في وضع الاستعداد ، و هي بتبص بعينيها اللي باظة لبرة لعنين السمنر على الناحية التانية من البحر ، و من وقت للتاني تطلع من السمندر ده رسالة او اشارة أو صوت ، كان بيتفسر دايما على انها صرخة حربية عدائية ، و يرد عليها السمندر المقابل ليه بصرخة مماثله او اطول ،

في مرة حاول رئيس المخابرات القبرصية تحريك جيوش السمندر المتمركزة حول الجزيرة ، قبرص كانت مسيطرة على أكبر مجموعة سمندرات في العالم ، 363 مليون سمندر كانوا مغطيين قاع البحر المتوسط حولين قبرص ، كان مجنون اللي يفكر يهاجم قبرص بأي طريقة ، لأن السمندر كان هايمسحه بكل بساطة ،

رئيس المخابرات بعت رسالة لرئيس الوزراء ، بيقول فيها ان سمندرات تركيا و ايطاليا و مصر و اسرائيل و الضفة الغربية تتحرك باتجاه قبرص ، رئيس الوزراء على طول أصدر قرار بتحرك عكسي لسمندرات قبرص ، لكن السمندرات القبرصية ماتحركتش ، طبعا خلال ساعة واحدة ظهر ان كلام رئيس المخابرات كان كدب ، و طبعا اتشال فيها ، بس ماحدش سأل نفسه ليه السمندرات ماتحركتش أول واحد اكتشف غياب السمندرات كان مواطن ياباني مربي سمندر في قاع النهر جنب بيته ، السمندر الأليف ماطلعش زي كل يوم عشان ياكل من ايد صاحبه ، الصداقة استمرت أكتر من 120 سنة ، السمندر كان بيعجز مع الراجل و الراجل بيعجز مع السمندر ، وكأنهم بيتبادلوا الطاقة عشان يعيشوا سوا ، لما السمندر اختفى حصل انهيار للراجل و مات بعدها بأيام ، و في نفس الوقت اكتشفت جميع حكومات الكرة الأرضية اختفاء جيوش السمندر الخاصة بيها ، اكتر من 65 مليار سمندر محارب و عامل و خادم و عاهر و أليف ، كلهم اختفوا في وقت واحد و لحظة واحده ،

كل الناس اتوقعت الشر ، جماعة الحرية للسمندر اتنبأت بثورة عارمة للسمندر تنهي الحياة في الكرة الأرضية ، احتجاجا على المعاملة السيئة و المهينة من جانب البشر ، المسلمين أكتر ناس خافوا لأن الشيوخ أصدروا فتاوى تؤكد نجاسة السمندر ، عشان الشبه الواضح بينه و بين الكلب ، دولة زي السعودية قامت بعمل مذابح رهيبة للسمندرات المهاجرة اللي كانت بتعدي أمام أراضيها ، كمان هولندا و تركيا كانت على رأس قائمة الخائفين ، تجارة الجنس كانت في قمتها في الدولتين دول ، السمندر العاهر كان هو السبب الأساسي في ازدهار التجارة دي

مافيش حاجه حصلت ، لا ثورة ولا السمندر طلع على الناس و دبحهم ، فقط اختفاء تام ، بدون اثار بدون اي مخلفات ، بعدها الناس ابتدت تنسى بالتدريج أيام السمندر ، ماعدا جماعة الحرية للسمندر لسه بتطالب بالحرية ...للبشر

انظر هنا

http://en.wikipedia.org/wiki/War_with_the_Newts

بالنسبة لى وللسواد الأعظم من القراء ما كتبتة هنا وفى التدوينة السابقة هو هرتلة رسمى....

أما بخصوص التشبيهات والرمز والحداثة وما بعدها فدة كلام اعلى بكثييييير من ادراكنا المتواضع

شوف يا عم الجن الدنيا مش ناقصة غموض وألغاز اذا كنت عاوز تكتب حاجه الناس العاديه تشاركك فيها لازم تكون مفهومة وتعبر عن الوقع المعاش لتلاقى صدى عندهم أما اذا كنت غاوى هرتله لغويه وأفكار مكعبله فأنا اسف للازعاج وأعدك الا أزور مدونتك الشهيرة مرة اخرى بعد أن كنت زائر منتظم لعدة اشهر وعشت معكم محنة الأعتقال ومن خلالها عرفت الكثير .... ولكن التصنع والتكلف فى الكتابة ولى الالفاظ دى سكه ضلمة مليش فيها.

والى كل السادة الفاهمين المكتوب وكمان بيفسروة بعدة طرق أقول لكم طظ فى حضراتكم لأنكم اعتدتم التطبيل لأى كلام حتى لو هرتلة ذى الى مكتوب دة

و ماله فيها ايه لما أكتب هرتلة؟ راجع المدونة هتلقيني بكتب هرتلة كثير

و الموضوع لا فيه تشبيهات و لا رموز ولا حداثة ولا ما بعدها ولا ألغاز و لا بتنجان اللي مقتنع أني عندي حاجة رهيبة أعلمهاله هو بس اللي مزنوق اللي فاهم أني عادي لا عندي معرفة و لا حكمة مش عند الناس هو اللي تقبل الحدوتة أو الهرتلة.

كدة تمام!!!! والأعتراف الصريح بأن المكتوب دة هرتلة أرضيه ممتازة للحوار واذا كان يهمك فأنا ساعاود ارتياد المدونة بانتظام كالسابق وكمان ياسيدى ممكن نعلق على الهرتله بتاعت سعادتك.

أحترم ردك وصراحتك ويجعله عامر ان شاء الله

هه؟؟ مش فاهم

تاني مرة عشان البيه، وان مفهمش الحق عليه... يفهم على قده.... أوماااااااااااال إيه؟ :)