You are here

مقالات بالعربي

proper blog posts and not just announcements or two line rants.

used to create the Other Posts block

مكتوب و مستقبل مجمع المدونات المصرية

زي ما أنتوا عارفين الموقع ده مش بس مدونة كمان عليه مجمع المدونات المصرية المجمع عبارة عن برنامج بيزور كل المدونات المصرية المعروفة كل كام ساعة بحثا عن تدوينات جديدة، لما بيلاقي تدوينات جديدة بيعيد نشرها في مكان مركزي.

المجمع

بالاضافة للمدونات بنجمع كام موقع اخباري كمان. المجمع متقسم باللغة أساسا لكن كمان بيسحب التصنيفات من المدونات و الناس تقدر تتصفحه بالتصنيف (و ان كان أغلب المدونات المصرية مبتستخدمش نظام تصنيف).

المجمع مكانش أول جهد لتجميع المدونات المصرية، البداية كانت مع حلقة المدونات المصرية اللي علمها حلمي و لحد النهاردة الحلقة هي المصدر الأساسي اللي بنكتشف عن طريقه مدونات مصرية جديدة (لكن كمان الناس بتقدر تضيف مدونتها للمجمع مباشرة).

الزوار

أقدر أجزم أن المجمع كان ليه دور أساسي في نمو التدوين المصري و في ظهور المدونين اعلاميا و في اتساع دور المدونين سياسيا خصوصا اللي بيمارسوا الصحافة الشعبية، المجمع بيزوره من 2000 الي 3000 زائر يوميا أغلبهم بيزوره ثلاث مرات في اليوم على الأقل، في تقديري الغير علمي بالمرة فيه حوالي 30000 شخص بيتعامل مع المجمع على أنه وسيلته الرئيسية ان لم تكن الوحيدة في تصفح المدونات المصرية. و وفقا لتقديري الغير علمي برضه المجمع هو المصدر الأساسي للزوار (referrer) بالنسبة لثلث المدونات المسجلة عليه على الأقل. في الأوقات اللي بيحصل فيها أحداث كبيرة (عنف يوم الاستفتاء، الانتخابات، مجزرة اللاجئين السودانيين، غرق العبارة، اعتقالات المتضامنين مع القضاة) عدد الزوار بيزيد بشكل سريع جدا.

المدونات

المجمع مسجل بيه 1377 مدونة و أرشيفه فيه 63886 ألف تدوينة، معدل نموه سريع جدا، قمثلا في أول نوفمبر 2005 كان مسجل بالمجمع 372 مدونة فقط يعني بنتضاعف بمعدل مرة كل نصف سنة (مشابه لمعدل نمو المدونات العالمي).

مجمعنا و الحلقة يعتبروا حالة شاذة في وسط فضاء التدوين العربي، كل المجمعات العربية الأخرى بلا استثناء عندها معايير ما غير المعيار الجغرافي للمدونات اللي بتربط ليها، لدرجة أن المدونة التونسية الأشهر فكرة لجأت سياسيا الي مجمع المدونات المصرية بسبب رفض كل حلقات التدوين التونسية الربط لها.

يعني أهم هدف عندنا هو أننا نكون شاملين لكل المدونات المصرية (تحت تعريف فضفاض جدا للمصرية). و أنا كنت داير فعلا أدعي أن المجمع و الحلقة بيعبروا عن كل فضاء التدوين المصري.

مكتوب

لحد كده و جميل المصيبة بقى أن طلع المجمع مش بدرجة الأهمية اللي أنا متصورها خالص، أكتشفت مؤخرا أن خدمة مدونات مكتوب بها 1546 مدونة مصرية مش مسجلة على المجمع ولا على حلقة المدونات المصرية و ولا عمرنا سمعنا عنها، ده معناه مئات من المدونات اللي مفيش ولا مدون من اللي نعرفهم بيربط ليهم و غالبا معناه فئة من القراء مفيش تقاطع كبير بينها و بين قراء المجمع.

ميم التحرش عقبال ميم المنطق قادر يا كريم

روابط اليوم تحت خالص (بعد ما تدوس Read More)

موضوع حفلة التحرش الجنسي الجماعي بقى موضوع ملحمي، يمكن تكون من أقوى الميمات اللي هتعدي على فضاء التدوين المصري و تدوينة مالك هتكسر الأرقام القياسة بتاعت تدوينة منال الشهيرة. التعليقات عند مالك خلاص وصلت مرحلة البلالا و صعب متابعة المناقشة، لكن برغم ده كله رصدت كام فكرة متكررة في التعليقات و المناقشات أحب أعلق عليهم

جريمة عنف

قبل كل شيئ خلينا نفهم البشر البضينة اللي زي السيد بيسو ليه الناس مستغربة، التحرش الجنسي بالنساء في شوارع المخروبة سلوك شائع بقاله زمن طويل و حدته و كثافته بتزيد و القبول المجتمعي ليه بيزيد لحد ما بقى استحالة تتكلم عنه على أنه جريمة. لكن حادثة وسط البلد مختلفة اختلاف جذري.

التحرش أشكال، الدارج أنه بيكون سرقة على الماشي، يعني واحد لازق في واحدة في الأوتوبيس ولا مد ذراعه بسرعة و جري كده يعني، أو بيكون معتمد على سلطة/قوة زي مدير يتحرش بالعاملات (و أسطى يتحرش بالصبيان) أو عم يتحرش بطفلة، حد بيستغل مركز قوة للتحرش الجنسي و دي نماذج منتشرة جدا.

أما الأقل انتشارا فهو التحرش العنيف، و في المعتاد يرتبط في ذهننا بالخطف و الاغتصاب، أن عصابة عفوية من الشباب تستخدم العنف لهتك عرض عدد مش قليل من البنات في الشارع فده ظاهرة غريبة و كونها متكررة ده ظاهرة مقلقة جدا، الغصب بالعنف و القوة الجسدية ده اغتصاب جماعي و أظن واضح أحنا ليه مذعورين.

لو حقيقي أن الموضوع متكرر بالشكل ده يبقى ده أقرب لحالات العنف الجماعي الطائفي منه للتحرش اللي بندلعه و نسميه معاكسة.

أما السلوك العجيب بتاع اهانة الناس عشان مستغربين مع أن ده حصل في حفلة منير و نهائي كأس الأمم، مش عارف أقول ايه، حادثتين في السنتين اللي فاتوا، حضارتكم مش واخدين بالكم أن البلد أكبر شوية من أن الكل يكون شارك في الحادثتين دول و أكيد واخدين بالكم من أن مكانش فيه (ولا هيكون فيه) تغطية اعلامية جادة تخلي اللي محضرش يعرف، مفيش حاجة بديهية ولا واضحة في الموضوع بلاش تنطيط على البشر مش ناقصاكم.

لوم النظام

روابط اليوم عن موضوع حفل التحرش الجماعي بوسط البلد

لو معندكيش خلفية ابدأي بالقراءة عن حفل هتك العرض الجماعي اللي حصل في وسط البلد أول يوم العيد

حسام محمد دياب مشكور جدا نزل عمل حوارات قصيرة مع العاملين في المحلات حوالين سينما مترو لتقصي الحقائق بنفسه، و نشر نص حواره مع العاملين في 5 محلات مختلفة. (يا حسام متعملك مدونة عشان نعرف نتابعك)

فيه ناس اعتبرت الحوار ده دليل على أن كان فيه تهويل، الحوار فيه كلام خمس أفراد و المدونات عليها شهادات من مالك و شرقاوي و جيمي هوود و وائل عباس و معت نقلت شهادة أصدقاء لها بالاضافة لشهادة من رضوى عن أحداث مشابهة ثاني يوم، ده من غير ما أتابع التعليقات. دي كلها مصادر معلومات قرر أنت هتثق في مين أكثر أنا شخصيا هثق في المدونين أكثر.

الأهم هو أن فيه اتفاق على وجود تحرش جنسي جماعي و فيه شواهد على أن دي حاجة متكررة و دارجة و في أماكن ثانية كمان.

الخلاف على أصابع الشباب وصلت لفين بالظبط و هل تم تعرية الثديين أم ثدي واحد خلاف عبثي لو كان كل اللي حصل تقفيش من فوق الهدوم هل ده يخليها مشكلة أقل من لو حصل من تحت الهدوم؟؟ ده عامل زي اللي يقولك متهولوش محصلش تعذب ده يادوبك الظابط لطشله و ضربه على القفا، أو اللي يقولك لأ الأبله كويسة بتشتمنا بس. خليكوا فاكرين التلطيش تعذيب و التحسيس تحرش و الشتيمة اهانة

ما علينا روابط اليوم

رمضان

بسم الله الرحمن الرحيم، أبدأ حكايتي بشهادة أن لا اله الا الله و أن محمد رسول الله

حكايتي عن بغداد، التي كانت في عهد أمير المؤمنين هارون الرشيد جوهرة المدن.

لم يكن هناك مثيل لبلاط هارون الرشيد الذي اجتمع حوله حشد من الرجال العظماء من شتي بقاع الأرض. جمع حوله العلماء و الحكماء و الكتاب و المعلمين.

كان بالبلاط أعظم معلمي اليهود أولى أهل الكتاب و أحكم قساوسة النصاري آخر أهل الكتاب و أفضل حفظة القرآن و أفقه فقهاء السنة النبوية.

و لذا كان قصره قصر الحكمة.

كان بحريمه جواري من كل أرض، من أراض المؤمنين و أراض الكفر، نساء ذوات بشرة بيضاء كرمال الصحراء، و نساء ذوات بشرة بنية كالجبال في المساء، و نساء ذوات بشرة صفراء كدخان البخور، و نساء ذوات بشرة سوداء كالأبنوس. كلهن متمرسات في فنون الفراش.

و كان بقصره غلمان رائعي الجمال، ذقونهم لم تنبت بعد، عيونهم واسعة و مليئة بالرغبة و أجسادهم كثمرات مشمش قطفت و هي مغطاة بالندى.

و لذا كان قصره قصر المتعة.

كان بقصره فلكيين و منجمين يمكنهم تفسير مشيئة الله بقرائة النجوم و عرافين من بلاد الصين و المغول يلبسون فراء محمل بالأسرار، و سحرة من الأعراب يحفظوا سر الجن و الانس.

كان بقصره شعراء و مغنيين و عازفين ذوي موهبة كاملة و روح مرحة.

كان بقصره غرائب لا علم لأحد بمصدرها، رجال برؤوس حيوانات و وحوش تتحدث كما الرجال و آلات تشبه الأحياء ترقص و تغني اذا أمر الخليفة.

لذا كان قصره قصر العجائب. و كانت أيامه أيام العجائب.

من بلاد تركب الجنو

تأخير ساعتين في مطار الخرطوم، تأخير ستة ساعات في مطار نيروبي، يوم الأحد محدش شغال في المطار و محدش بيرد على الايميل، بيات ليلة اضافية في جوهانسبرج، تأخير أربع ساعات في مطار جوهانسبرج، تأخير ساعتين في مطار بورت اليزابيث، عادي أنت في أفريقيا.

يومين من غير نوم أو أكل، لكن ساعة واحدة في بالعربية من بورت اليزابيث لجراهامس تاون كافية لأني أنسي كل الملل و التعب.

تخيل معايا تلات عالية فيها أحراش و صبار و أشجار من عصور ما قبل التاريخ بتزهر ورد ملون أصغر وردة قد رأسي. تحت التلال العالية تلال ثانية كلها عشب أخضر مطعم بمساحات من الورد البري الأصفر و البنفسجي. و التلال دي مراعي خيول مفتوحة، تخيل عشرات ان مكانش مئات الخيول بتجري وسط العشب و الورد بحرية. عادي أنت في أفريقيا.

خيار نجم الصباح

أقرأ

الرجل و الست بيتعلموا الجنس، و الست هي اللي بتبقى فوق، فبينزل الملاك صاموائيل على شكل ثعبان كبييييير و يتفرج عليهم لحد ما يخلصوا.

و بعدين يقول للراجل، عجبتك؟ يقوله اه؟ يقولوا نفسك تعملها ثاني؟ يقوله اه؟ قاله و لو كنت بتوجعها و لو كان مش عاجبها نفسك برضه تعملها ثاني؟

الراجل معرفش يرد

قام الثعبان قاله ده الدرس الأول: "لا تثق في رغباتك"

و يقعدوا على كده أسبوع كل يوم ينزل الثعبان و يعلم الراجل دروس في الصح و الغلط و الخطيئة، لحد ما يقنعه أنه مفهمش الصانع و أن أكيد الصانع بيطلب منه مجهود اكثر و ألم أكثر عشان يرضى عنه.

و كل يوم الست تحاول تغوي الراجل ترجعه في حضنها، حتى عرضت عليه يبقى هو اللي فوق.

لحد ما الصانع يرجع الجنينة يلاقي الست قاعدة وحيدة و يلاقي الراجل نايم على شوك.

الصانع قاله، أنت مش موجوع؟ قاله موجوع بس مش قد وجعي من جهلي، ليه يا صانع صنعتني عبيط ليه مشرحتليش الخير و الشر، مفهمتنيش الصح و الغلط، معرفتنيش الفضيلة و الخطيئة.

الصانع قاله العشر ألاف سنة اللي فاتوا مسببوش ليك ألم، ملوش لازمة العشر تلاف سنة اللي جاية يوجعوك و شاور بايده كده و اتحول الراجل لعظام ثم تراب في ثانية.

اتلفت للست و قالها متخافيش أنت نجحتي في الاختبار، هعملك رفيق ثاني أحسن منه.

قالتله لا متشكرة، و لو تسمح أنا عايزة موتي دلوقتي.

ذهل الصانع و قالها، ايه ده طلع عندك أجندة؟ و ابتسم بسعادة و قال ماشي واحد من اثنين نتيجة مش وحشة. و دي موتك أنت فعلا مش ملك حد ثاني و موتك حقك، و شاور بايده.

قبل ما يسيب الجنينة راح للثعبان و قاله مكنتش أعرف أنكم ليكم في ما بعد الحداثة، الثعبان كانت لمسة غريبة شوية. الثعبان أتحول لملاك ثاني و قاله بنشوة أنا برضه قلت أنت هتقدر اللمسة دي ضحك مواهاهاهاها.

الصانع قالله، عموما كويس وفرت علي، لو مكنتش نزلت كنت حضطر أصنعك، ايه فايدة الصنيعة لو مش هتقدر تقاوم المرض الأصلي.

و رجع لصاحبته.

مغامرة نجم الصباح

و في اليوم السابع ريح و اتفسح مع صاحبته و رجع في اليوم الثامن و صنعهم

و وقف قدامهم و قال

أنتم الراجل و الست و الجنينة دي جنينتكم

و شكروه و سألوه "أنت مين؟"

فقالهم أنا الصانع --- أنا صنعت كل ده و صنعتكم، أنا اللي بمنح الحياة و الموت.

فسألته يعني ايه الموت؟

فقالها الموت هو البعد عن ده كله، الموت هو الضلمة و غياب التفكير للأبد.

فقالتله ياااه ده شكله وحش قوي. لازم تدينا الموت؟

فقالها هحوش عنكم الموت بشرط تنفذي أمري الوحيد؟

"متركعوش لأي حد، متعبدوش أي حاجة، ولا حتى أنا!!"

فاهمين؟

قام قاله بسرعة و حماس "أيوه يا صانع فاهمين"

فقالهم حظ سعيد، استمتعوا بالجنينة دي "تقريبا" مفيش شبهها.

تعرف ايه اللي حصل في نيويورك يوم 11 يونيو 2000???

في كل مرة يتفتح فيها نقاش عن التحرش الجنسي بالنساء في شوارع الموكوسة مصر ألاقي الناس يا أما بتتكلم كأن الموضوع موجود في كل حتة في العالم يا أما تلاقي الناس بتتكلم على أن المشكلة موجودة في مصر فقط (أو الدول العربية فقط) و ده برضه مش صح.

المشكلة أن التحليل بناء على مشاهدات خاطئة نتيجته دائما اقتراحات بحلول لا علاقة لها بالواقع.

فمثلا افتراض أن كل ستات العالم بيمروا بده بيقود للتصور اللي بيقول أن الرجالة غلابة مش عارفين يمسكوا نفسهم و بالتالي لازم الستات تلم نفسها.

و طبعا اللي أي بني أدم مختارش خيار الغباء عارفه أن الستات في بلاد كتير جدا مبتقابلش التحرش و المعاكسات و التقفيش اللي بتواجهه نساء مصر و بيلبسوا براحتهم (و بمعايرنا المحلية بيقلعوا براحتهم)، و كمان الكل عارف أن في دولة كل حاجة فيها متغطية زي السعودية التحرش الجنسي طايل الستات و الأطفال و السمك و أي حاجة بتتنفس.

و كمان افتراض أن دي حاجة بتحصل في الموكوسة بس أو في الموكوسة و الدول العربية بس برضه مبني على معلومات ناقصة أو مغالطة و نتيجته تفسيرات خاطئة.

يعني مثلا في كل مناقشة من دول تلاقي واحد بيقولك الغرب معرفش ماله ، و صعب علينا جدا فهم أن الغرب ده مش حاجة واحدة و التفسير الجاهز دائما هو الكبت الجنسي في بلدنا، صحيح أن في أغلب دول أوروبا التحرش بالنساء في الشوارع نادر لكن ده لا ينطبق بالمرة على الولايات المتحدة الأمريكية مع أنهم مقارنة بينا معندهمش كبت جنسي خااااااالص.

و لو مكانش البني أدم مننا ذاكرته أخرها اسبوعين كنتم افتكرتم أحداث مسيرة يوم بورتوريكو في نيو يورك في يونيو 2000، و اللي تعرضت فيه ما لا يقل عن 20 امرأة لتحرش جنسي شديد و هتك عرض يخلي أجدعها فسل من بولاق يحس بالغيرة، و زي في بلدنا بالظبط البوليس طنش و الاعلام حاول يبرر و يتعامل مع المسألة على أنها شقاوة شباب و ناس تانية تغلط الستات.

الطريقة الدارونية للتخلص من التحرشات الجنسية أو يللا نخصي الرجالة

بصي يا أختي المسألة بسيطة جدا و حلها في ايدين الجدع اللي أسمه دارون.

بيقولك أن مهمة أي فصيلة البقاء و أكبر مؤثر على التطور هو الرغبة في البقاء و التكاثر، و الكلام ده ممكن يتعمم بره علم الأحياء من غير ما يبقى مخل قوي (يعني يبقى مخل حبتين بس).

المشكلة أن الردالة المصريين شغالين تحرش و هتك عرض و تقفيش و لا مؤاخذة معاكسة في البنات و الستات و العجائز و اللي in between كمان و ما سابوش غير الرضع، و الأدهى أنهم مقتنعين تماما ماما ماما أن ده حقهم و أن الولايا هي اللي غلطانة، و زي ما التجربة التدونية الملحمية الخالدة أثبتت مينفعش تقنعيهم بالمنطق.

سيبك بقى من ميتين أم المنطق عشان ده مبينفعش في أي حاجة أصلا.

خلينا في غريزة البقاء.

دلوقتي لو ربينا الرجالة زي ما دربنا كلب بافلوف كده على أن التحرش الجنسي بجميع أنواعه يكافئ العقم كلها جيلين و يبطلوا الموضوع ده خالص. كل اللي مطلوب أنكن تخصوا اللي يهوب ناحيتكم.

... النضال هو النضال

معلش، اسمحولي أستخدم كلمات مجعلصة من نوع نضال عشان مش لاقي كلمات أفضل.

النضال كفعل أناني

لما الواحد بيختار أنه ينخرط في عمل سياسي معارض للي في ايديهم القوة و يمشي على طريق النضال ضد سلطة غاشمة لازم يكون مستعد يدفع الثمن، لكن مش هو لوحده اللي بيدفع الثمن، لما تتحبس أو تتعذب أو تنقتل أهلك بيتبهدلوا معاك، و أهلك مش بالضرورة اختاروا اختيارك و لا بالضرورة موافقين عليه، و ساعات كمان بتلاقي ناس أهلها مبتكتشفش خيار النضال و تبعاته غير بعد المصيبة ما تحل.

تخيل كده أم بتسمع فجأة أن بنتها في الحبس رغم أن تصورها عن بنتها أنها ماشية جنب الحيط.

بلاش الأم، اختيارك ده ممكن نتيجته تبقى على أولادك، لو اتحبست هيعيشوا من غير أب أو أم، و ممكن الأسوأ، مثلا حكومتنا الرشيدة اعتادت أنها تعذب و تعتقل الأهل لما تبقى مش قادرة توصل للشخص المطلوب. و مثلا في العريش عذبوا الأطفال و العجائز و النساء زيادة كده لحسن يكون تعذيب الشباب مجابش نتيجة.

مش بس الأهل اللي في خطر، في المعتاد المستبد بيلوش يمين و شمال، بيستخدم وسائل قمع جماعية أوسع بكتير من الأهل و ميفرقش معاه العواقب ولا النتائج، مثلا في مظاهرات التضامن مع القضاة انقلبت عربية أمن مركزي و مات فيها عشرات الجنود، عربيات و واجهات محلات اتكسرت بسبب عنف الأمن، فيه ناس ملهاش دعوة بأي حاجة انضربوا و فيه ناس ملهاش دعوة بأي حاجة اتحبست زي ابراهيم اللي كان محبوس معانا و كان كل يوم بيبكي من القهر.

كل دي ناس دفعت ثمن أفعالنا أحنا و اختياراتنا أحنا، غالبا لو عدينا اللي دفعوا ثمن و عدينا اللي اختاروا النضال يطلع اللي دفعوا ثمن النضال عددهم أكبر بكتير من اللي خدوا قرار النضال و جهزوا نفسهم لدفع الثمن.

مش ده ممكن يتفسر على أنه فعل أناني؟ مش أنت كده بتفرض على ناس أنهم يدفعوا ثمن اختياراتك أنت؟ بتفرض على أهلك نمط حياة و مخاطر و بهدلة هما ملهمش دخل بيها؟!

ناس كتير بتدعي أنها ممكن تشارك في العمل السياسي لولا بس خوفها على أهلها و أحبابها. ناس كتير بتنتقد المظاهرات و ما شابه بسبب الخسائر اللي بيسببها للآخرين. اللي خد خطوة مش بيخاطر بنفسه و بس، مع ذلك أغلبية اللي اختار النضال مش شايف أنها أنانية و لا ضميره بيعذبه، مش أنا اللي اخترت بهدلة أهلي، الظالم اللي أنا بحاربه هو اللي اختار و هو المسئول.

القوة كمعيار أخلاقي

رغم أني مش مقتنع بأنانية المناضل لكن ممكن أتفهم اللي يشوف الدنيا كده، الغريبة اللي شايف أن قوتك كمناضل تفرق في خيارك ده أناني ولا لأ!

ادارة سجن طرة تحقيق تمنع المحامين من زيارة الشرقاوي رغم تصريح النيابة بالزيارة

هل تحاول ادارة السجن اخفاء جريمة؟

التعدي على كريم الشاعر بمطواة هل كان بتحريض من ظباط المباحث

تصريح من مكتب النائب العام "قرار الافراج عن الشرقاوي و الشاعر اليوم"

بالأمس (الأثنين 17) منعت ادارة السجن المحامي جمال عبد العزيز عيد من زيارة محمد الشرقاوي رغم حصوله على تصريح زيارة من نيابة أمن الدولة و سمح له بعد عناء بزيارة كريم الشاعر فقط.

وفقا لجمال عيد فكريم مصاب في ذراعه الأيمن بجرح غائر نتيجة تعدي أحد المساجين الجنائيين عليه بمطواة، و يشك كريم في أن ظباط المباحث قاموا بتحريض المسجون الجنائي، يذكر أن كريم محتجز في زنزانة 12أ و هي زنزانة سيئة السمعة و عانى فيها الزملاء الذين احتجزوا بها في الأسابيع الأولي و كان قرار الاضراب عن الطعام أساسا محاولة لنقل الزملاء من تلك الزنزانة.

معلش يا شباب، معلش يا أسد خيرها في غيرها

معلش يا شباب مظاهرة السفارة الاسرائيلية فشلت.

أبدأ بقراءة وصف أسد لليوم

اعتذار واجب

أولا لازم نعترف أن التنظيم مكانش كويس، و ده مش خطأ صاحب المبادرة لأنه عمل اللي يقدر عليه، التقصير كان من الآخرين اللي عجبتهم الفكرة و معملوش حاجة (و أنا أولهم)، كان مفروض ناس تبذل مجهود في الاتصال بالحركات و الكيانات السياسية، كان مفروض ماس تبذل مجهود في الاتصال بالاعلام و كان مفروض ناس تبذل مجهود في نشر الدعوة بشكل أوسع من كده بكتير. الدعاية على المدونات فقط مش كفاية.

آخر تدوينات علاء من طرة - تحيا الثبات على المبدأ

تحيا الثبات على المبدأ

كمبظ مسئول توزيع التعيين من ضمن الجنائيين اللى ضموهم علينا فى الأيام الأولى للحبسة (قبل أنا ما أشرّف) كعقاب للمجموعة.

سياسة الضم جابت نتيجة عكسية تماماً مع أغلب الجنائيين لدرجة أن كمبظ لما جم ينقلوه تاني زنزانته الأصلية بعد نجاح الإضراب عن الطعام هتف

عمر النقل ما غير فكرة

عاش كفاح الجنائيين

علاء يدون من طرة: افرجها علينا يا رب

السجن طره تحقيق
والمتهم المفروض برئ حتى تثبت إدانته
بس عند النيابة
المتهم محبوس حتى تثبت برائته
السجن عقاب و طره تحقيق عقاب للبرئ

كل ليلة و تقريبا من كل ربع أصوات بتصرخ

افرجها علينا يا رب

كل مسجون عنده أمل في افراج قريب أو حتى حكم يكون قريب من المدة اللي قضاها في الحجز الأحتياطي (احتياطي باين عليه ستراتيجي)

كل ليلة عشرات يصرخوا "افرجها علينا يا رب"

في عنبر قديم زنزانة 5/1 أ

افرجها علينا يا رب
افرجها علينا يا رب
افرج

علاء يدون: مركز شباب طره

كالعادة تبدأ تدوينتي بوصف صعوبة الكتابة من السجن وبإستخدام تكنولوجيا بدائية زي الورقة والقلم. وطبعاً السجن غير أفكار كتير وإلخ.

المشكلة المرة دي إن حالتي المعنوية تحسنت فجأة كده وزي ما كان صعب أستوعب وأشرح حالتي السيئة صعب برضه أشرح حالتي الكويسة.

إبراهيم صحاري (اللي إترقى من درجة زميل حبسة لدرجة زميل زنزانة) كل شوية يقولنا على قصيدة لمحمود درويش بيقول فيها "حريتي ..

تالت خمستاشر - علاء يكتب بعد مرور شهر على حبسه

يا أحمد يا ماهر ....
خدنا خماستاشر ....
ومفيش إفراج ....

النهارده خدت 15 يوم كمان، ومع ذلك كنت متماسك في النيابة أكتر من أي مرة.

بقالي 30 يوم بحاول احلل وأنظر عشان اتوقع هيُفرَج عني امتى. كل نظرية نطرحها يطلع ملهاش معنى.

لما بدأ الإفراج قلنا كل يومين هيخرجوا مجموعة. طلع غلط..

تحقيقات: السبت 3 يونيو

التحقيق مع مجموعة 24 أبريل النهارده، و كمان التحقيق مع الشرقاوي

التحقيق مع علاء و مجموعة 7 مايو بكرة

قلق و عياط من غير أسباب واضحة..مغص..حاسة أني مش قادرة أتنفس

مش عارفة لو علاء مخدش إفراج بكرة هيجرالي أيه..قلقانة عليهم كلهم

..

غالبا ملخبطة كل اللي حواليا بالحالات اللي أنا فيها..دوارات متكررة من هدوء و خروج و أنطلاق..بعديها أنهيار تام

زهقت من التقلبات دي .. زهقت من عدم قدرتي على التحكم في نفسي .. زهقت من عدم قدرتي على تخمين حالتي هتبقى عاملة أزاي كمان ساعة

من علاء إلى المدونين: تست تست

الأصدقاء المدونون: وصلتني تدويناتكم فوجدتني مسرور البال لها مش عارف ايه ..

علاء يحكي عن يوم القبض عليه

الأحد 7 مايو

بعد ما رجعنا من الغردقة خدنا يومين خمول وبعدين قررت أبدأ اتحرك فى موضوع المعتقلين بأني أكون موجود يوم عرض أول دفعة على النيابة لتجديد الحبس "الاحتياطي".

قضيت ليلة لطيفة مع منال ورتبت يومى، هيبدأ اليوم بوقفة قدام النيابة ونظرة على جلسة الطعن بتاعة القضاة وبعدين اجتماع مهم في الشغل وبعد الشغل هيبقى فى طبيخ وأفلام ودلع.

!!

من علاء إلي عبير العسكري

"أنا أستشهدت قبل كده تلات مرات" وضحكت، يوم 1 مايو كان مزاجك رايق ونازلة تريقة علينا وعلى الحركة و الحكومة وعلى نفسك.

أحداث مظاهرة التضامن مع القضاة و المعتقلين - 7 مايو

يتظاهر الآن أمام محكمة جنوب بباب الخلق أمام دار الكتب 17 (تحديث: 2330) فرد بعد منع الأمن دخولهم المحكمة، بعضهم جائوا للتضامن مع القضاة و البعض شهود (عرض أول دفعة من المعتقلين أما النيابة اليوم).

يحاوطهم المئات من عساكر الأمن المركزي..بيضربوهم و يفعصوعهم بإشراف من لوائات الشرطة و على رأسهم البطل المغوار اللي أشرف على أحداث 30 يوليو 2005 (مظاهرة ضد ترشيح حسني مبارك لفترة خامسة)، و كمان بيهددوهم بالقبض و الأعتقال.

مظاهرة عيد العمال 2006

من قبل مانروح و التليفونات شغالة..عربيات أمن كتير و فرق كاراتيه ملية وسط البلد!!

المظاهرة كانت المفروض قصاد عمر أفندي طلعت حرب..أول متخش شارع طلعت حرب من ميدان التحرير. رايحيين أنا و علاء و طنط ليلى مع عمو سيف في العربية، هينزلنا و يطلع على المركز علشان لو حصل أي حاجة يبقى في محاميين يتحركولنا. ميدان التحرير ناحية طلعت حرب حوالي دستة عربيات أمن مركزي. مفيش حد واقف قصاد عمر افندي غير شوية لوائات و كوردون من العساكر. نكمل في شارع طلعت حرب و نبتدي نلمح وشوش من المتظاهرين تلاتات و اربعات متنتورين بطول الشارع و مجموعة قصاد مدخل العمارة اللي فيها الحزب الناصري. ننزل قبل كافيه ريش بشوية و نبتدي نتجمع مع الناس و نعدي للمجموعة اللي واقفة تحت الحزب.

يا كفاتسة يا مفتريين، فين الاضطهاد ده

فيه ناس بتتسائل عن مصدر الاحساس بالاضطهاد عند المسيحيين المصريين، فكرت ألم شوية روابط بتحكي عن الاعتداء على أرواح و دور عبادة المسيحيين، و لقيت المهمة صعبة جدا، تقارير حقوق الانسان المصرية بدأت تتجمع على النت من منتصف 2003 فقط، الصفحات الاخبارية العربية برضه جديدة، و كالعادة صفحات الوب العربية معمولة بشكل سيئ جدا و صعب على محركات البحث اللي زي جووجل أنها تلاقي المحتوى (كفاية أن نسبة كبيرة من المواقع العربية مش بتعلن الencoding مظبوط).

حتى حادثة رئيسية زي الكشح مش عارف ألاقي تقارير عدلة ليها. حد عنده نسخة من تقرير المنظمة المصرية لحقوق الانسان عن الكشح؟ عموما فيه كتاب اتكتب يوثق أحداث الكشح (اللي هما على مرتين تلاتة مش حدث واحد أصلا).

المهم دي قائمة قصيرة بالحاجات اللي لاقيتها، يا ريت لو حد عنده روابط تانية يقول، أنا تجاهلت تقارير الاضطهاد اللي من قبل أجهزة الدولة على أساس أن الدولة مطلعة ميتين أبونا كلنا، لكن لازم ناخد بالنا أن بالنسبة لكتير من المسيحيين الاحساس ميفرقش لما يبقى الاضطهاد موجه ليهم بسبب ديانتهم، و تفاديت كمان الأحداث اللي مرتبطة بأن أفراد غيروا ديانتهم بما أن كل الأطراف (و بالذات الكنيسة) بتتعولق في الموضوع ده و متفقة تقمع حرية الفرد (و خصوصا لو كان الفرد ده واحدة ست).

يا مسلمين أرحموهم بس عندي سؤال

عن اخناتون

الدم يغلى فى العروق. هى الناس عايزة ديه إيه؟ عايزة أنهار دم؟ عايزة تنتقم من حد؟ عايزين إيه؟ سيبونا فى حالنا. ما إحنا عايشين ومبنتكلمش. بيسألونا فيه إضطهاد نعوض على شفايفنا ونقول لأ، الدين لله والوطن للجميع. "المسلمين إخواننا ونحن نعيش فى حب ووحدة وطنية والإسلام دين سلام..."

هو مش الحكومة قالبة الكنائس حصون عسكرية و حاطة عندها حراسة و امن من أيام الارهاب؟ ازاي بقى الحيوانات اللي دخلت قتلت دي هربت؟ فين الأمن اللي حوالين الكنيسة؟ ما هو مش منطقي يكون الأمن بياخد أجازة أيام القداس.

يعني المرة الأولانية في مار جرجس و قلنا الهجوم كان من كتلة كبيرة من المسلمين المخابيل، لكن دول تلات أنفار، مش غريبة دي برضه؟

يمكن ده بس لخبطة من التغطية الاخبارية، هنشوف عرفوا يمسكوهم ولا لأ.

عمر أفندي و الدالة المستمرة

أنا مبفهمش في الاقتصاد لكن بحاول أجتهد عشان أفهم اللي بيجرى حواليا، لو حد شايف غلط في كلامي يا ريت تصحيح و توضيح.

عندنا مشكلة في الحوار في بلدنا و أظن الاعلام (بما في ذلك المعارضة و المستقل) مسئول عنها بشكل كبير، المشكلة تجاهل التفاصيل و التعامل مع الدنيا على أنها بسيطة و مباشرة.

فالدنيا فيها حلوين و وحشين، أبطال و أشرار و بس، و الصح واضح و الغلط واضح و اللي يقول غير كده يبقى بيستهبل. خد مثلا موضوع الدنمارك، كل حد بيكلمك كأن فيه تعريف واحد لحرية التعبير و الصحافة و كأن التعريف ده متثبت في العالم كله و واضح، أي محاولة لشرح أن فيه فضاء من المواقف و الاختيارات أن المبادئ زي الدالة المستمرة فيها لا نهاية من النقط اللي ممكن تقف عندها يبقى استهبال.

نعم يا حبيبي هي دي بقى الحرية؟؟!!! أصلا كل الناس عارفة أن الحرية معناها كذا و كذا الخ.

نفس الشيئ فيما يخص أي مناقشة عن الاقتصاد، و تعالوا نبص على موضوع عمر أفندي.

أولا موضوع عمر أفندي ده مش موضوع واحد ده مواضيع لكن مرتبطة ببعض، أول موضوع هو يبقى فيه قطاع عام ولا لأ، و تاني موضوع هو لو فيه قطاع عام يبقى ايه و شكله عامل ازاي و تالت موضوع لو هنبيع حاجة من القطاع العام نبيعها ازاي.

أسمحوللي أخدهم بالترتيب العكسي

كيف تبيع شركة قطاع عام

الناس ماشية تقولك تخيل فيه تفاوت مليار جنيه ما بين السعرين، أكيد الموضوع فساد و الخ الخ الخ. طيب أولا موضوع الفساد ده مسلم بيه لأنها الحكومة المصرية ممكن نتكلم كلام مفيد شوية؟

اللوبي الصهيوني القادم

الكلام ده كان تعليق عند الكافر الزنديق الكخة بن عبد العزيز

الحقيقة كلامي مخلصش و كنت ناوي أكمل عليه، بس لقيت الموضوع مينفعش، لو بتكلم بغرض أني أفش غلي و أفضي شحنة جوايا فلأول مرة هلاقي نفسي بعمل رقابة ذاتية و بمنع نفسي من أني أقول كس أمين أم .... ولا بلاش

لو بتكلم بغرض التوعية بمشكلة هلاقي تدوينة واحدة متقضيش و على المهمة أكبر مني بكتير، للأسف عشان نفهم ايه اللي بيجرى حوالينا محتاجة محاولات دئوبة لمتابعة و تمحيص الاقتصاد و التكنولوجيا و الحركات السياسية الجديدة و و و و. و الكلام ده أنا أصلا معرفش فيه غير القليل يعني لازم عشان نفهم نفهم مع بعض، نتناقش و ندور مع بعض. يمكن بعدين ألاقي وقت أكتب حته من اللي أعرفه و يمكن بعدين حد تاني يلاقي وقت يكتب حته تانية و بالراحة بالراحة كده نوصل لحاجة.

المهم دلوقتي التعليق أهه زي ما هو و خليها كده أحسن:


أنا بقى اللي مضايقني و قالقني من الموضوع ده كله جملة واحدة، جملة تدل أولا على جهل عميق و تكشف نوايا مستقبلية منيلة بنيلة

من الآخر المسلمين مش هيرتاحوا الا لما يتحولوا للوبي صهيوني تاني يرعب الدنيا و ينحر في الحريات و يلغي أي فرصة للحوار العقلاني

شوفوا الفسل بيقول ايه

> حتى ولو نجحت بعض هذه المحاولات في إقناع الشركة المستضيفة للموقع بإغلاقه فإننا لاحظنا أن الموقع لا يعجز عن إيجاد شركات أخرى مستضيفة طالما أن هذه الشركات لا تسعى سوى إلى الربح المادي بالدرجة الأولى .

مش عارف أبتدي منين، من أول طول ما الشركات غرضها الربح؟ حقيقي علامة أعاد أكتشاف أهم ثوابت الاقتصاد سيادته؟ سيبنا من دي عشان دي منقشة طويلة في طبيعة الرأسمالية و البتنجان.

خلينا في لاحظنا أن الموقع لا يعجز عن إيجاد شركات أخرى مستضيفة.

حد فاكر الدرنكة

من كام يوم بتكلم مع حد عن موضوع العبارة و بنتكلم عن ازاي دي بقيت حادثة طبيعية و ازاي مكتوبلنا حادثتين خرافيتين في السنة، حادث خرافي على مستوى عدد الضحايا و على مستوى تفاصيل الاهمال اللي بتوصل للحدث و على مستوى الفشل الذريع في التصرف بعد الكارثة ما تبدأ و انقاذ الناس و على مستوى التعامل مع نتائج الكارثة و تعويض الضحايا و على مستوى التغطية الاعلامية و التحرك السياسي حوالين الحدث و على أي مستوى ممكن تفكروا فيه.

حاجة تخليك حاسس أن البلد دي بلد كارتون، بيقع فيها المواطن من عاشر دور فجسمه يتبطط شوية و بعدين يقوم عادي ولا كأن حاجة حصلت.

و طبعا احساس غريب بأنك مسئول لأن كل حادثة من دول بتموت أساسا ناس أفقر منك و حالهم أصعب منك و أنت عارف غلبهم و عارف عايشين ازاي و معملتش حاجة و أديك عرفت بيموتوا ازاي و برضه معملتش حاجة.

رسالة مفتوحة الي حركة كفاية

خطاب مفتوح الي الحركة المصرية من أجل التغيير "كفاية"

من منتصف 2005 و أنا مشارك فعال نوعا في تظاهرات و فعاليات الحركة و من أحسب نفسي من أشد مؤيديها و المتحمسين لها.

من حين لأخر كنت أرصد مشاكل في الحركة و أعترف أني في أوقات كنت أظن الحركة غير قادرة على الاعتراف بتلك المشاكل و أبرر هذا بكلام عن الأجيال و عدم ممارسة الديمقراطية داخليا، و في كل مرة تذهلني و تسعدني الحركة بتدارك المشاكل و مواجهتها بصراحة و تقديم محاولات جادة لضمان عدم تكرارها. و من بعدها اعتبرت أي مشكلة تنظيمية أرصدها جزء من ألام المخاض ففي النهاية لا يملك أي منا خبرة حقيقية في الممارسة الديمقراطية فبلادنا في حالة قمع مستمر دام طويلا و لا أظن أن أحد منا يعرف أو يتذكر كيف كانت الحياة بدون قمع.

باختصار أفخر بانتسابي للحركة و تعلمت منها الكثير و أرجوا أن أكون قد قدمت لها القليل.

و لكن أقلقني ما قرأت اليوم على موقع الحركة

من جانبها نظمت الحركة المصرية من أجل التغيير "كفايه" وقفة احتجاجية بوسط القاهرة. وردد المتظاهرون هتافات تدعوا الرئيس المصري لإغلاق السفارة وسحب السفير المصري من الدانمرك ومقاطعة المنتجات الغربية، كما رددوا هتافات تحث شيخ الأزهر على أخذ موقف حازم لنصرة النبي الكريم.

المصريين مش بيشخوا في الشارع بيشخوا في دماغهم

ده أخري، مش هعرف أكتب عدل عن مظاهرات الاعتراض على مجزرة نهاية العام، المظاهرتين كانوا صغيرين جدا رجال الأمن كانوا متعجرفين و عندهم استعداد رهيب للعنف، نصيبي كان لكمة صغيرة في فكي و الظابط الأهبل ابن الهبلة قاللي لو كنت لوحدك مكنتش تستجرأ تعمل كده (أصل أحنا كان عددنا يجي 70 و هما كانوا 200 و معاهم تلات عربيات امدادات فقط، طبيعي يخاف مني و أنا مش لوحدي).


المصيبة أن الناس طلعت بتصدق كلام الجرايد

في المظاهرتين اللي عملناهم احتجاجا على المجزرة عملنا مناقشات كتير مع الناس اللي في الشارع، و قعدوا يرددوا نفس كلام الاعلام لدرجة أني في الأول افتكرتهم كلهم مخبرين

و بعدين سألتهم بتصدقوا التليفيزيون و الصحافة لما بتنقلكم و تجملكم وعود الحكومة؟ لما بتتكلم عن أحوالكم؟

و طبعا الاجابة كانت لأ قاطعة

أومال بكس أمكم بتصدقوهم ليه لما بيتكلموا عن اللاجئين.

المشكلة كمان في التعود على الغباء، واحد من الناس دي قاللي دول فتحوا بطن أمين شرطة

بمجرد اللمس

حلوة قوى يا سقراط

حاسة اللمس بالنسبة لي خاصة جدا في أنها بتسمح بخلق علاقات مع حاجات تانية غير الناس. اللعب مع الحيوانات أساسا باللمس، كمية من التواصل مع القطط بس بأطراف صوابعك. تحسس حوالين ودنهم، يرفعوا رأسهم و تهرش تحت دقنهم يحركوا راسهم و يلمسوا ايدك، يتمسحوا فيك، يشدوا انتباهك بلمس رجلك بجسمهم، أو بلمس وشك بمناخيرهم. الكلاب تحضنهم تحاول تلمس الجسم كله بايدك، تدعك حوالين الودن برضه، يلحسوك و يلمسوك بمناخيرهم.
Touching cats

مش بس الحيوانات حاسة اللمس بتفتح الباب لتواصل و علاقات مع الجمادات. لمس آلة موسيقية، و يا سلام لو كونترباص، لازم تحضنه و الا هيقع، و الكونترباص حميمي قوي مش بس بيسيبك تلمسه ده بيردهالك و هو في حضنك بيرسل ذبذبات قوية في جسمك لحد ما كل نوتة ترن فيك و تطلع من جواك. ما جربتش قبل كده ألمس هارب بس الفرجة على العازفين ملهمة، لمسة بسيطة جدا و رقيقة جدا، مداعبة بس بس بيجي منها كلام كتير.
Alaa plays the bass

Pages

Subscribe to RSS - مقالات بالعربي