You are here

Archive for October 2006

ميم التحرش تصيب برنامج العاشرة مساءا

أنا كنت ناوي أبطل كلام في ميم حفل السعار الجنسي الشهير بما أن ورايا كلام مهم متأجل بقاله زمن، لكن بما أن الميم صابت التلفزيون أخيرا فيجب التنويه

الأستاذة نوارة نجم مشكورة استغلت فرصة ظهورها في برنامج العاشرة مساء بقناة دريم و حكيت لهم على اللي حصل في وسط البلد أول و ثاني يوم العيد، و البرنامج مشكور برضه نزل عمل حوارات في الشارع و اتكلم عن الموضوع ثاني يوم على طول، و وائل عباس مشكورا برضه حمل فيديو فيه المقطع اللي تناول الموضوع على youtube.

أدي شهادات من عاملين في المحلات بالاضاف لشهادات المدونين و التحقيق اللي عمله حسام، أظن مفيش مجال للانكار بقى.

روابط اليوم

مكتوب و مستقبل مجمع المدونات المصرية

زي ما أنتوا عارفين الموقع ده مش بس مدونة كمان عليه مجمع المدونات المصرية المجمع عبارة عن برنامج بيزور كل المدونات المصرية المعروفة كل كام ساعة بحثا عن تدوينات جديدة، لما بيلاقي تدوينات جديدة بيعيد نشرها في مكان مركزي.

المجمع

بالاضافة للمدونات بنجمع كام موقع اخباري كمان. المجمع متقسم باللغة أساسا لكن كمان بيسحب التصنيفات من المدونات و الناس تقدر تتصفحه بالتصنيف (و ان كان أغلب المدونات المصرية مبتستخدمش نظام تصنيف).

المجمع مكانش أول جهد لتجميع المدونات المصرية، البداية كانت مع حلقة المدونات المصرية اللي علمها حلمي و لحد النهاردة الحلقة هي المصدر الأساسي اللي بنكتشف عن طريقه مدونات مصرية جديدة (لكن كمان الناس بتقدر تضيف مدونتها للمجمع مباشرة).

الزوار

أقدر أجزم أن المجمع كان ليه دور أساسي في نمو التدوين المصري و في ظهور المدونين اعلاميا و في اتساع دور المدونين سياسيا خصوصا اللي بيمارسوا الصحافة الشعبية، المجمع بيزوره من 2000 الي 3000 زائر يوميا أغلبهم بيزوره ثلاث مرات في اليوم على الأقل، في تقديري الغير علمي بالمرة فيه حوالي 30000 شخص بيتعامل مع المجمع على أنه وسيلته الرئيسية ان لم تكن الوحيدة في تصفح المدونات المصرية. و وفقا لتقديري الغير علمي برضه المجمع هو المصدر الأساسي للزوار (referrer) بالنسبة لثلث المدونات المسجلة عليه على الأقل. في الأوقات اللي بيحصل فيها أحداث كبيرة (عنف يوم الاستفتاء، الانتخابات، مجزرة اللاجئين السودانيين، غرق العبارة، اعتقالات المتضامنين مع القضاة) عدد الزوار بيزيد بشكل سريع جدا.

المدونات

المجمع مسجل بيه 1377 مدونة و أرشيفه فيه 63886 ألف تدوينة، معدل نموه سريع جدا، قمثلا في أول نوفمبر 2005 كان مسجل بالمجمع 372 مدونة فقط يعني بنتضاعف بمعدل مرة كل نصف سنة (مشابه لمعدل نمو المدونات العالمي).

مجمعنا و الحلقة يعتبروا حالة شاذة في وسط فضاء التدوين العربي، كل المجمعات العربية الأخرى بلا استثناء عندها معايير ما غير المعيار الجغرافي للمدونات اللي بتربط ليها، لدرجة أن المدونة التونسية الأشهر فكرة لجأت سياسيا الي مجمع المدونات المصرية بسبب رفض كل حلقات التدوين التونسية الربط لها.

يعني أهم هدف عندنا هو أننا نكون شاملين لكل المدونات المصرية (تحت تعريف فضفاض جدا للمصرية). و أنا كنت داير فعلا أدعي أن المجمع و الحلقة بيعبروا عن كل فضاء التدوين المصري.

مكتوب

لحد كده و جميل المصيبة بقى أن طلع المجمع مش بدرجة الأهمية اللي أنا متصورها خالص، أكتشفت مؤخرا أن خدمة مدونات مكتوب بها 1546 مدونة مصرية مش مسجلة على المجمع ولا على حلقة المدونات المصرية و ولا عمرنا سمعنا عنها، ده معناه مئات من المدونات اللي مفيش ولا مدون من اللي نعرفهم بيربط ليهم و غالبا معناه فئة من القراء مفيش تقاطع كبير بينها و بين قراء المجمع.

المادة المظلمة

مش بس كده خدمة جيران عندها 27000 مدونة (و ان كان أغلبهم غير ناشط بما أن متوسط عدد التدوينات في المدونة 3) و قد ايه منهم مدونات مصرية دي حاجة في علم الغيب لأن جيران دي خدمة بايظة و مش عارف أعمل فيها بحث بالبلد.

و عندك كمان خدمات زي livejournal و xanga و myspace اللي أكيد عليها مصريين بالهبل و أكيد نسبة منهم عندها مدونات على المواقع دي و عمرهم ما اتصلوا بالمجمع ولا بالحلقة و و صعب جدا التوصل ليهم لأن تصميم البتوع دول ضايع (في علاقة طردية ما بين مدى شعبية التكنولوجيا و سوء تصميمها كما أثبتت مايكروسوفت).

و ده يخلينا نسأل هو ايه تعريف المدونة و هل الهدف بتاع المجمع ده هدف له معنى و يمكن تحقيقه؟ و هل يا ترى ده هدف يهم زوار المجمع؟

الفضاء

أقدر أتجاهل جيران و livejournal و xanga و myspace على أساس أن اللي مستحيل على الوصول اليه غالبا ملوش أي جمهور غير أصدقاء المدون و بالتالي نقدر نقول عليه مش جزء من فضاء التدوين المصري، لكن من الواضح تماما أن كل ادعائاتي عن تمثيل كل التدوين المصري خاطئة و هتفضل خاطئة لحد ما أضيف مدونات مكتوب على الأقل. و من الواضح برضه أن حجم التدوين المصري أكبر بكتير من تخيلنا.

و مش بس كده قبل كده كنت متصور أن الفضاء المصري هو أكبر فضاء تدوين عربي و أن الفرق في الحجم شاسع، لكن مكتوب عليها فوق ال9000 مدونة من دول عربية أخرى (و برضه أغلبهم خارج نطاق التشبيكات و التربيطات بين المدونات العربية).

المستقبل

طيب أنا مش بحكي الكلام ده كله كدرس في التواضع المسألة أنه غالبا الجهاز اللي شغال عليه manalaa.net (اللي هو السيرفر يعني) ميستحملش اضافة الكم ده من المدونات و ده معناه صرف فلوس أكثر (و أحنا أصلا مش قادرين على الوضع الحالي و بقالنا سنة معتمدين على تبرعات و العملية هتقلب شحاتة). أنا كاتب ده كله عشان أسمع أراء في نتصرف ازاي.

يا ترى فيه اهتمام فعلي بمجمع يجمع كل المدونات المصرية ولا الناس عايزة حاجة مختلفة؟ و نعرف كلمة المدونات المصرية دي بأوسع تعريف ممكن ولا لأ؟

خدوا بالكم أني تفاديت تماما الكلام عن جودة المحتوى، فيه ناس بتشتكي أن المجمع دلوقتي بقى أغلبه حاجات متستاهلش تتقري و كلام من ده، انحيازي العنصري ضد التكنولوجيا السيئة بيخليني مقتنع أن ال1546 مدونة على مكتوب أغلبهم زبالة لكن أنا مقتنع أن الزبالة جزء لا يتجزأ من التدوين و أن أحنا ظالمين الزبالة قوي و بعدين زبالة قوم عند قوم درر.

كمان يومين هكتب عن الصعوبات التقنية و المادية اللي بتواجه المجمع و نديها شحاتة ولا نشوف هنعمل ايه في المستقبل.

ميم التحرش عقبال ميم المنطق قادر يا كريم

روابط اليوم تحت خالص (بعد ما تدوس Read More)

موضوع حفلة التحرش الجنسي الجماعي بقى موضوع ملحمي، يمكن تكون من أقوى الميمات اللي هتعدي على فضاء التدوين المصري و تدوينة مالك هتكسر الأرقام القياسة بتاعت تدوينة منال الشهيرة. التعليقات عند مالك خلاص وصلت مرحلة البلالا و صعب متابعة المناقشة، لكن برغم ده كله رصدت كام فكرة متكررة في التعليقات و المناقشات أحب أعلق عليهم

جريمة عنف

قبل كل شيئ خلينا نفهم البشر البضينة اللي زي السيد بيسو ليه الناس مستغربة، التحرش الجنسي بالنساء في شوارع المخروبة سلوك شائع بقاله زمن طويل و حدته و كثافته بتزيد و القبول المجتمعي ليه بيزيد لحد ما بقى استحالة تتكلم عنه على أنه جريمة. لكن حادثة وسط البلد مختلفة اختلاف جذري.

التحرش أشكال، الدارج أنه بيكون سرقة على الماشي، يعني واحد لازق في واحدة في الأوتوبيس ولا مد ذراعه بسرعة و جري كده يعني، أو بيكون معتمد على سلطة/قوة زي مدير يتحرش بالعاملات (و أسطى يتحرش بالصبيان) أو عم يتحرش بطفلة، حد بيستغل مركز قوة للتحرش الجنسي و دي نماذج منتشرة جدا.

أما الأقل انتشارا فهو التحرش العنيف، و في المعتاد يرتبط في ذهننا بالخطف و الاغتصاب، أن عصابة عفوية من الشباب تستخدم العنف لهتك عرض عدد مش قليل من البنات في الشارع فده ظاهرة غريبة و كونها متكررة ده ظاهرة مقلقة جدا، الغصب بالعنف و القوة الجسدية ده اغتصاب جماعي و أظن واضح أحنا ليه مذعورين.

لو حقيقي أن الموضوع متكرر بالشكل ده يبقى ده أقرب لحالات العنف الجماعي الطائفي منه للتحرش اللي بندلعه و نسميه معاكسة.

أما السلوك العجيب بتاع اهانة الناس عشان مستغربين مع أن ده حصل في حفلة منير و نهائي كأس الأمم، مش عارف أقول ايه، حادثتين في السنتين اللي فاتوا، حضارتكم مش واخدين بالكم أن البلد أكبر شوية من أن الكل يكون شارك في الحادثتين دول و أكيد واخدين بالكم من أن مكانش فيه (ولا هيكون فيه) تغطية اعلامية جادة تخلي اللي محضرش يعرف، مفيش حاجة بديهية ولا واضحة في الموضوع بلاش تنطيط على البشر مش ناقصاكم.

لوم النظام

ثاني حاجة تفرس الناس اللي بتتخانق مع اللي يلوم النظام و يقوللك متعترفوا أن مش كل حاجة غلطة الحكومة دي غلطة الشعب. أولا فيه مغالطة منطقية، الشعب ده يعني كل حد و بالتالي الحكومة و المجرمين و الشرطة و أمن الدولة من مكونات الشعب، و في بلد فيها الحكومة موظفينها بالملايين و داخليتها عندها ثلاث أربع مليون عسكري و ظابط و شاويش و صول و مجند و ما شابه الفصل بينهم أصعب، يسهل الفصل في نقاش عن حاجة المصالح فيها واضحة، يعني في كلام عن اصلاح ديمقراطي مثلا، لكن لو اتكلمنا عن مشكلة مجتمعية بتواجه الكل (زي مثلا مشاكل نظافة المياه و الصرف الصحي) الوضع مختلف و الفصل هنا مش ما بين أفراد لكن ما بين مؤسسات.

أي مشكلة مجتمعية قطاع ما من الشعب بالضرورة مسئول عنها (الا المشاكل اللي المسئولية كاملة فيها على قوى خارجية زي الأعاصير أو اسرائيل). فبلاش تضييع وقت.

نيجي بقى للوم النظام، ممكن أفهم لو أنت ابنك في حضانة و زميل ليه فقع عينيه هتلوم ابنك ولا زميله ولا العاملين بالحضانة؟ هتلوم العاملين بالحضانة طبعا لأن شغلتهم يتأكدوا أن مفيش حاجة زي كده تحص، لو أبنك أكبر شوية و في مدرسة يبقى المشئولية مشتركة على العاملين في المدرسة و أهل الطفل اللي خزق عين ابنك و لو أكبر شوية في ثانوي يبقى اللي خزق مسئول و كمان هتتسائل ابنك عمل ايه عشان يوصل الموضوع لكده. لكن مفيش في أي مرحلة هتقول فيها ادارة المدرسة و المدرسين ملهمش دعوة.

نفس الحكاية بالنسبة للحكومة و الشرطة، عندي ليكم خبر بمليون جنيه واحد من أسباب اختراع موضوع الدولة و الحكومة و الأجهزة الأمنية هو حمايتنا من النوع ده من الحاجات، الحفاظ على النظام و السلام و الأمان، لما ده ميحصلش يبقى فيه تقاعس من الدولة و يبقى طبيعي نلوم الدولة.

و بعدين هو انتم ناويين تخصخصوا مكافحة الجريمة؟ يعني مين المسئول عن منع الجرائم (أيا كان الآلية)؟ مين اللي يحاسب لما تتفشي الجريمة ولا يتم مواجهة المجرم؟

أظن لوم النظام هنا طبيعي، ممكن تقول أنه مش كافي، ممكن تقول أن المشكلة بقيت عميقة لدرجة أن تغيرر النظام لوحده مش كفيل بحلها و ه يبقى كلام عاقل لكن تستغرب أو تتخانق مع من يلوم النظام دي جديدة.

الشعب كخة

و دي كمان حاجة تفرس الناس اللي فاكره المنادين بالديمقراطية حصلتهم صدمة فزيعة فزيعة لما شافوا الجماهير بترتكب جريمة!!

لا يا شيخ، أولا محدش قال أن غالبية الشعب المصري موافق و مشارك في جريمة هتك العرض الجماعي، عندنا شكوك أن الغالبية العظمى الساحقة لا تجرم التحرش الدارج الغير عنيف و عنده شواهد قوية أن الغالبية مستعدة تدين الضحية.

لكن مظنش حد فينا أهبل و مش واخد باله من قدرة الشعوب على المشاركة في جرائم أو التغاضي عنها فتاريخ العالم مليئ بالأمثلة (النازية و الفاشية كان ليهم دعم شعبي، اسرائيل و أمريكا بتحتل دول بمباركة الناخبين، الحروب الأهلية، جرائم العنصرية و الكراهية و الطائفية، الثأر و جرائم الشرف، سعار ما بعد الثورة الفرنسية، قتل العلماء و الفنانين الخ).

استعداد جماعات ضخمة للقيام بجرائم فظيعة و استعداد الأغلبية للتغاضي عن الجرائم دي و في لحظات نادرة المشاركة فيها واحدة من خواص المجتمع البشري، أتصور أن المشاريع اللي من نوع الأديان و الحضارة و التنوير واحدة من أهدافها تخطي ده لكن محدش فينا عنده تصورات رومانسية أن ده خطر مش موجود أصلا. و اللي معتبر ده فيه تعارض مع المطالبة بالديمقراطية يروح يتنيل يذاكر تاريخ البشرية مش ممكن هنقضي عمرنا بنتناقش مناقشات الناس بتتكلم فيها بقالها 3000 سنة على أنها مناقشات جديدة منزوعة التاريخ و السياق.

التناقض الأمني

أخر حاجة في طابور الأفكار الذكية اللي دايرة في التعليقات التريقة على من يطالب بتدخل أمني على أساس أن ده متعارض مع محنته كمعارض في مواجهة قمع الأمن.

حلوة دي، انا شايف ان الجامعة فاسدة تماما و منيلة بنيلة فبدل ما أطالب بأن الجامعة تقوم بدورها أنا بطالب بالغاء التعليم من أساسه و خلينا كده أحسن. لا يا شيخ.

حتى من يرفض المؤسسات التعليمية النظامية بيطرح بدائل لأنه فاهم أننا مخترعناش المدارس و الجامعة من باب الغتتاتة اخترعناهم لاحتياج حقيقي. ممكن أقعد أتكلم معاك في تصورات يوتوبية عن آليات بديلة لحفظ الأمن و السلام الاجتماعي بدلا من أجهزة شرطة تحت قيادة مركزية لكن في النهاية مش هتعامل على أن الدور اللي المفروض يتنيلوا يلعبوه مش مطلوب خالص.

دي أول حاجة ثانيا لا تساوي بين المطالبة بتواجد شرطة و تدخلها و ما بين القمع، جهاز شرطة مدرب جيدا قادر على احتواء الغالبية العظمى من النوع ده من الجرائم العفوية و أحيانا مجرد تواجده بالكثافة الصحيحة كافي.

طبعا فيه سؤال حقيقي عن مدى جدوى مطالبة جهاز الشرطة الحالي بالتدخل بسبب تاريخه الوسخ لكن دي مناقشة و هتتفاوت فيها الأراء و مفيهاش موقف غبي مبدأيا و حتى اللي هيقول بلاش الشرطة تتدخل لحد ما يبقى عندنا جهاز شرطة على درجة ما من الجدية لازم يطرح بدائل.

هيفاء وهبي هي السبب

أتصور أن لوم الفيديو كليب و ما شابه مهواش موقف عبثي تماما، صاحب هذا الرأي رصد أن دي ظاهرة جديدة (أو خدت شكل جديد) و بيبحث عن معطيات جديدة، و لقى أن الفيديو كليب و الانترنت من المعطيات الجديدة الممكن لومها.

بعيدا بقى عن ده صح ولا غلط ايه تصور الناس دي عن حل؟ هل بيقترحوا رقابة؟ طيب هتعمل رقابة على أقمار صناعية خارج تحكمك و مواقع انترنت خارج تحكمك ازاي؟ و هل فكرتم في عواقب الرقابة الشاملة المطلوبة لحجب المحتوى الجنسي بجميع أنواعه و درجاته عن الناس؟ و هل شايفين أن ده هدف ممكن تحقيقه (يعني أنتم شايفين تجارب السعودية و الصين وايران ناجحة و يقتدى بيها مثلا؟).

أخيرا

الأخوة المدونين اللي هزقوا البنات اللي تكلمت عن التحرش قبل كده و بهدلوني أنا و منال على أساس اننا بنهول أو ماسكين في موضوع ميهمش و دلوقتي بيكتبوا بذعر عن الموضوع و مهتمين، يا ريت شوية اعتذارات و اعتراف بالخطأ و قول أنا حمار و كده يعني عشان أرضي غروري.

روابط اليوم

Eid a festival of sexual harassment

Sexual harrasement of women in public spaces has been discussed several times before in the Egyptian blogosphere, everybody knows it's prevalent but denial flows like a river in Egypt, any woman dares open the topic has to face an avalanche of abuse on anonymous comments sometimes even from fellow bloggers. blaming the victims is the most common response but sometimes they even deny it happens at all, with the abuse also comes more accounts and stories of how it's like to be female in urban Egypt.

Last tuesday was the first day of Eid El Fitr the streets are typically full of people celebrating and enjoying their time, downtown Cairo is full of cinemas and Eid is the main cinema season, this year Malek, Wael Abbas, Mohammed Sharkawy, Ma3t, GemyHood and Radwa Osama witnessed a mob attacking and sexually harassing women in downtown cairo, their reports sparked heated discussions on the blogosphere, with no shortage of theories everything was blamed at one point or another as being responsible, music videos, sheikhs, israel, drugs, mubarak, class dynamics, you name it.

One topic that always pops out when discussing sexual harassment is the veil since the veil is sometimes promoted as a way to protect women from sexual harassment, yet it's as common to hear complains from veiled women as from unveiled ones, the molesters do not differentiate they attack anything that might be female.

This time the question of policing was brought to the front, downtown Cairo is where most political protests happen it's common to see thousands upong thousands of police officers and anti riot soldiers attacking a few hundred (and sometimes a dozen) protesters yet on a day like the first day of el Eid they failed to show up and protect the women.

As with any interesting discussion it was mostly in Arabic, but we had a few English posts on the topic.

3arabawy wrote a short post focusing on the role (or lack of) of police. Mechanical crowds did a great job of trying to summarize and dissect all the eyewitness accounts and some of the discussions, a must read. Zenobia searches for a reason and Tarek offers an explanation based on identity and culture while chris finds it hard to believe. Hope links the incident with Sheikh Taj el-Din al-Hilali's sermon that offered the metaphor of women as uncovered meat and men as hungry alley cats.

To my knowledge the incident was not mentioned in any traditional/mainstream media outlet, it's being discussed in webforums too, Hossam Deyab did 5 interviews with shop owners in the area, they confirmed the incident but played it down (And also mentioned it's been happening every Eid for a while now).

Welcome to Egypt, if you're visiting bring your taser, pepper spray or body-guard along, we are a warm people and we've got millions of shebab who are eager to show you just how warm we can be.

update: more links

روابط اليوم عن موضوع حفل التحرش الجماعي بوسط البلد

لو معندكيش خلفية ابدأي بالقراءة عن حفل هتك العرض الجماعي اللي حصل في وسط البلد أول يوم العيد

حسام محمد دياب مشكور جدا نزل عمل حوارات قصيرة مع العاملين في المحلات حوالين سينما مترو لتقصي الحقائق بنفسه، و نشر نص حواره مع العاملين في 5 محلات مختلفة. (يا حسام متعملك مدونة عشان نعرف نتابعك)

فيه ناس اعتبرت الحوار ده دليل على أن كان فيه تهويل، الحوار فيه كلام خمس أفراد و المدونات عليها شهادات من مالك و شرقاوي و جيمي هوود و وائل عباس و معت نقلت شهادة أصدقاء لها بالاضافة لشهادة من رضوى عن أحداث مشابهة ثاني يوم، ده من غير ما أتابع التعليقات. دي كلها مصادر معلومات قرر أنت هتثق في مين أكثر أنا شخصيا هثق في المدونين أكثر.

الأهم هو أن فيه اتفاق على وجود تحرش جنسي جماعي و فيه شواهد على أن دي حاجة متكررة و دارجة و في أماكن ثانية كمان.

الخلاف على أصابع الشباب وصلت لفين بالظبط و هل تم تعرية الثديين أم ثدي واحد خلاف عبثي لو كان كل اللي حصل تقفيش من فوق الهدوم هل ده يخليها مشكلة أقل من لو حصل من تحت الهدوم؟؟ ده عامل زي اللي يقولك متهولوش محصلش تعذب ده يادوبك الظابط لطشله و ضربه على القفا، أو اللي يقولك لأ الأبله كويسة بتشتمنا بس. خليكوا فاكرين التلطيش تعذيب و التحسيس تحرش و الشتيمة اهانة

ما علينا روابط اليوم

متنسوش أن دي مش أول مرة موضوع التحرش الجنسي في الشوارع يطرح على المدونات، أظن المرة دي التعليقات اللي بتلوم النساء أو تنكر أصلا أن فيه تحرش أقل بكثير من اللي شفناه قبل كده.

كل سنة و أنتم طيبين بدأ عيد هتك العرض بداية موفقة

أيوه هتك العرض

أصل حضرتك ده جزء جديد في الفلكلور المصري احتفالا بنهاية رمضان الشباب المصري بينزل وسط البلد و بدل البمب و المراجيح و الكحك و الحاجات بتاعت زمان دي بيبقى فيه حفلة هتك عرض جماعي.

مش مصدقني؟ أقرأ مالك و معت و جيمي هود و وائل عباس

مش قلنا

تحديث روابط لمدونين ناقشوا الموضوع! شهود عيان

مناقشات

يا جماعة الموضوع جد فيه عصابة هجمت على النساء وسط البلد قدام سينما مترو و هتكوا عرض أكثر من بنت في وسط الشارع و أعداد كبيرة شاركت.

و مع ذلك لسه فيه ناس بتلوم الضحية و تقولك البنات هي اللي غلطانة.

أنا قاعد قدام لوحة المفاتيح بقالي ربع ساع أهه و مش عارف أكتب ايه تاني، يا ريت اللي حضر يا جماعة يكتب الصور متبينش حاجة و الناس عمدها استعداد تنكر أن ده حصل و أكيد الاعلام ولا هياخد باله، يا ريت اللي حضر يكتب يمكن لما يكثر عدد الشهادات يكثر عدد اللي هيصدقوا.

و اللي ناوية تخلف بنات تهاجر أحسنلها.

اعتصام 52 موظف و عامل بجامعة عين شمس

على خلفية الصراع الطبقي اللي محتدم في البلد بقاله 5 سنين و اللي وصل ذروته السنة دي كع اقتراب موعد انتخابات المقابات العمالية بدأ النهاردة اعتصام من نوع مختلف شوية

وفقا لكفاية قررت ادارة جامعة عين شمس تخفيض أساسي مرتبات بعض العاملين من 220 جنيه الي 134 جنيه (معنديش فكرة بعد حساب الاضافات و المافئات الموظفين دول بياخدوا كام لكن المؤكد أنك لو عندك عبد هتصرف عليه أكثر من 134).

المهم حاولت مجموعة من العمال أنها تقابل رئيس الجامعة و رفض مقابلتهم فبدأوا اعتصام بالجامعة، تابعوا موقع كفاية لمزيد من الأخبار (و الموقع بيحاول يتابع كل أخبار الاضرابات و الاعتصامات العمالية مؤخرا).

52 Ain Shams University workers on strike

جماعة 30 فبراير تبدأ دورة مكثفة في الباركور

تعلن كتائب الشهيد مالك مصطفي الجناح العسكري لجماعة ثلاثين فبراير المجيدة عن فتح باب التسجيل للثوريين العرب في فنون الباركور و الجري الحر.

لنتحرر من قيود المدينة، لنتخطى معا كل العقبات

بعد نجاح تجربة جماعات الفوضويون بفنزويلا و ليثوانيا في استخدام الباركور في التغلب على قوات الأمن الفاشية صار من الواضح ضرورة أن الباركور مهارة أساسية لكل مناضل ثوري.

و كما قال الشهيد مالك مصطفي في ظهوره الرابع بعد محنة طره علموا رفاقكم الرماية و الباركور و ركوب الباجي.

موعدنا السبت 18 نوفمبر بعد صلاة المغرب أمام جراج الأوبرا. بالقاهرة.

للمناضلات ضروري ارتداء سراويل واسعة و حذاء رياضي.

Web Designers of the World, Unite!

Same suffering, same fears (IE 7)

/me running and hiding under the table

via Yet Another Tech Blog