You are here

Archive for October 2005

تنتخبوا مين؟ و حبيبكم مين؟...احنا!!

The BOBs - BEST OF THE BLOGS - Deutsche Welle International Weblog Awards 2005

يا جماعة البلوج بتاعنا اترشح لجائزة صحفيين بلا حدود لأحسن بلوج في مجال حرية التعبير، ودي جائزة خاصة من ضمن جوائز مسابقة أحسن بلوج في مجالات و لغات مختلفة.

ياريت لو عاجبكم الموقع تروحوا تدونا صوتكم لأننا متبهدلين خالص، نازل قصادنا بلوجات نشطاء جامدين قوي و طبعا ليهم جماهير كتيرة..لكن أنا متهيألي أن الموقع بتاعنا مختلف شوية..مايعتبرش بلوج و بس، فيه حاجات تانية كتيرة.

برضه ياريت تدوا صوتكوا لواحد من البلوجرز/المدونين المصريين في جائزة أحسن بلوج عربي لأنهم متبهدلين برضه، مترشح للجايزة دي: طي المتصل و حوليات صاحب الأشجار و الوعي المصري و طق حنك و لنتعد الطبيعي و العدالة للجميع

برضه تقدروا تنتخبوا Our Media و Global Voices

رسالة من أهالي المعتقلين

لماذا يفتخر ضباط الداخلية المصرية بضرب النساء و الأطفال أمام وزارتهم ؟

أمهات المعتقلين المصريين

[email protected]

الساعة الثانية عشر يوم25أكتوبر2005 كان موعد الاعتصام الذي قررت أمهات المعتقلين المصريين تنظيمه أمام مقر وزارة الداخلية، كما كان متوقعاً حاصرت قوات الأمن النساء المشاركات بالاعتصام من بداية تجمعهن أمام مقر نقابة المحامين بشارع رمسيس و أمام أقرب محطة مترو لمكان الاعتصام – محطة سعد زغلول ، عندما تجمعت الأمهات أمام مقر الوزارة بعد ساعة كاملة من موعد بدء الاعتصام- برفقة عدد من الشباب المتعاطفين مع قضيتهن و مطالبهن حاصرت الشرطة الجميع (باستخدام الحواجز الحديدية و صفوف متوالية من العساكر و الضباط ) حاصورا السيدات على الرصيف المقابل ، لحد أن الحركة داخل هذا المكان- السجن كانت صعبة للغاية خاصة في ظل وجود مسنات و أطفال.

مدير أمن القاهرة نبيل العزبي و رتب أخرى كبيرة و قوات و سيارات أمن مركزي و قوات و سيارات شرطة كلهم كانوا موجودين ، لماذا ؟ لحصار 25 سيدة و 5 شباب !،اعتدى الضبط – بأنفسهم- و منهم لواء و رائد شرطةو رتب أخرى ، أكثر من مرة على النساء و الشباب المشتركين بالاعتصام و حاولوا خطف أحد هؤلاء الشباب ممن كانوا يقومون بالهتاف ، و أكثر من مرة يوجهون لهم الحديث "روحوا بقى لبيوتكم انتوا بتتعبونا كده معاكم" و وصل الأمر إلى ضرب الأطفال و منهم الطفل عبدالله يحي11 سنة الذي أصيب بعينه اليسرى و أخته خديجة 10 سنوات ، هجوم الضباط في الحيز الضيق الذي كانت تقف به النساء أدى لجرح البعض منهن، و إحدى السيدات المسنات كانت تعاني من صعوبة شديدة في التنفس و رفض الضباط أن تخرج لأي مسجد قريب لتغسل وجهها أو تستخدم المرافق ، العصا التي استخدمها احد الضباط في ضرب احد الشباب سقطت و التقطتها سيدة من المعتصمات و لدينا صور عديدة لهذه المهزلة إهداء لوزارة الداخلية المصرية عن الطريقة التي يتعامل بها منتسبوها مع النساء و المدنيين ، كذلك طاقية احد العساكر الذين كانوا يحيطون بالمعتصمين سقطت ايضا عند هجومهم المظفر، جن جنون الضباط من هذا و أخذوا يكيلون الشتائم للجميع !!!، بالطبع استرد الضباط العصا و الطاقية بعد أن هجموا على النساء عدة مرات لاستعادة ما فقدوه !!!!، لكن ألم يفكر هؤلاء أنهم فقدوا شيئا أهم عندما صورتهم كاميرات الاعلام و هم يهجمون على النساء و الأطفال أمام مقر وزارتهم ؟ هل هذه حقوق الانسان و حفظ كرامة المواطن التي يتحدثون عنها ؟؟

رفض الضباط أي طلب للخروج من الكردون الذي أحاطونا به حتى للذهاب للمسجد و الوضوء ، لك أن تتخيل نساء و اطفال مسجونين على رصيف و ظهورهم لحائط لمدة 12 ساعة متواصلة و في رمضان !! أكثر من مصور فوتوجرافي و فيديو من وزارة الداخلية تفرغوا لتسجيل اليوم و تصوير الشباب المتعاطفين مع أمهات المعتقلين ،و استمر الاعتصام و رفضوا انضمام شخصين حاولوا الانضمام للاعتصام ، و رفضوا خروج أحد من النساء أو الشباب لإحضار إفطار – لا تنسوا نحن في رمضان و صائمين، الاعتصام استمر كسابقه في الثلاثاء الماضي حتى منتصف ليل القاهرة تقريبا ، رفض اللواءات استلام مذكرة قانونية و رفضوا حتى أن تقابل أي سيدة مسئول بالوزارة ، ضباط وزارة الداخلية كانوا يطلبون إنهاء الاعتصام و الخروج فرادى و بين كل شخص و الآخر نصف ساعة ! و كان 2-3 ضباط يسيرون وراء أي شخص يخرج من الاعتصام ، للمراقبة و التأكد أننا لن ننقل المظاهرة لمكان آخر - و وصل بهم الأمر أنهم طلبوا من أحد الشباب ممن كانوا يقومون بالهتاف أن يقبل حذاء ضابط حتى يسمح للنساء بالعودة لمنازلهن و هددوا الجميع بالاعتقال، الكردون الأمني و التضييق الشديد على حركة النساء لم يمنع الإعلام المصري و الأجنبي من التقاط صور و مشاهد الضرب .. للأسف لم يكن هناك مشاركة في الاعتصام من القوى و الحركات المصرية ، ساندنا بعض الإعلاميين الشرفاء و محرري مواقع الانترنت في نشر ما حدث أولا بأول و اتصالهم بنا دوما عبر الهاتف، و كانت هناك مساعدة مشكورة من مركز النديم للتأهيل النفسي لضحايا العنف ، و الأستاذ أحمد سيف المحامي و الدكتورة ليلى و الدكتور ماجدة عدلي من مراكز حقوق الإنسان.

النساء استخدمن طبلة المسحراتي اثناءالهتاف ، و هناك طفلة صغيرة في الثالثة كانت تقود الهتاف أحيانا ، و رفع المعتصمون لافتات لا للطواريء أفرجوا عن أولادنا .. و كان الضباط سعداء جدا عندما سقطت إحدى اللوحات منا فأخذوها و احتفظوا بها!! و في هذا اليوم رددت هتافات أهمها :

إحنا أهالي المعتقلين
يوم ورا يوم معتصمين
لجل ولادنـــــا المعتقلين
طلعوهم م الزنازين
إحنا أهالي المعتقلين
ع الفطار مقهورين
ع السحور حزانين
و آدي حالتنا في رمضان
فين هيه حقوق الإنسان

و اللي ها يظلم في رمضان
بكرة يحصل غازي كنعان

رمضان جانا رمضان جانا
و أهالينا في الزنزانة
رمضان جانا .. و لا فرحنا به
اصل الابن طال غيابه
اصل الأب طال عذابه
أصل الأخ راح مكانه
رمضان جانا .. و لا فرحنا به
و أهالينا في الزنزانة

قول قول يا مسحراتي
قول قول قول
أمن الدولة اعتقلوا اخواتي
يا عزيز عيني و أنا بدي أروح بلدي
بلدي يا بلدي .. و السلطة أخدت ولدي
اشهد يا ربي .. شوف يا شعبي
أنا حقي راح ف بلدي

لما تلاقي جوع مع ظلم
لما تلاقي ظلم و قهر
لما تلاقي عشة و قصر
معتقلات مالها حصر
يبقى أنت أكيد ف مصر
يبقى انت أكيد ف مصر

همه مين و إحنا مين
إحنا الشرفا المصريين
إحنا أهالي المعتقلين
و همه الفسدة و الظالمين
معتصمين معتصمين
ضد القتلة و الظالمين
طول الليل هنا قاعدين
لا كراسي و لا بطاطين
على أرض وطنّا قاعدين
حتى خروج المعتقلين

همه يصيفوا في مارينا
و إحنا الجوع والفقر هارينا
همه يشتوا في منتجعات
و إحنا ولادنا ف المعتقلات

يا مصور الداخلية سيبك بقى م الكاميرا دي
دا إحنا اخوات في الإنسانية

و لا بد من يوم معلوم
تترد فيه المظالم
أبيض على كل مظلوم
أسود على كل ظالم

مع الشكر

أمهات المعتقلين المصريين

اللي عاوز الحل

اللي عاوز العلاج

يقول ورايا

ااااااه ااااااه ااااااه

عادل امام - النوم في العسل


البيان ده مجرد اقتراح، مجرد بداية، اللي مش عاجبه يقترح تعديل أو حتى يكتب بيانه، المهم نبدأ نتكلم بجد، نبوس على راس بعض و نفتح دواليبنا و نبطل نخبي و نستخبي، المهم نقول اااااااااه اااااااه ااااااه

ااااااه ااااااه اااااه

عمي كمال خليل

عمي كمال خليل مرشح نفسه عن دايرة امبابة و موقع الحملة على النت http://www.imbaba2005.net

يعني المرة دي الانتخابات فيها مرشحين محترمين بجد، و مش في دايرة امبابة بس، يعني ضروري كل اللي يقدر يشارك و يصوت يشارك و ينتخب أي حد من المعارضة.

يا شباب جيلي يا مواليد 1982-1986 أنتم أخطر ورقة سياسية في البلد دلوقتي، أغلبكم مسجل في جداول الناخبين تلقائيا و من حقكم تشاركوا (يا بختكم، مكنتش أتولد سنة متأخر).

بس زي ما كتير منكم اكتشف في انتخابات الرئاسة الهزلية من غير البطاقة بلطجية الحزب الواطي اللا ديمقراطي هيتوهوكم.

الحل أنكم تروحوا السجل المدني اللي تبعكم و تطلبوا استخراج بطاقة انتخابية، المفروض ده يكون اجراء روتيني بسيط لأنكم مسجلين بالفعل.

كلمة صوتك أمانة دي مش نكتة، فكر كام واحد مش مسجل بسبب فساد نظامنا و فقدان أغلبنا الأمل، صوتك مش ليك لوحدك، كل واحد مسجل كأنه بيمثل مئات محرومين من التصويت.

و لو من امبابة متنساش تنتخب عمي كمال خليل.

يا رمم حرام فيكم النت

شكرا شنكح هبللو على تنبيهي لمصدر المقال الأصلي واضح أني لازم أدي الحاجة 24 ساعة قبل ما أدور عليها في جوجل

يا ريت البشر التلمة اللي مقضية حياتها copy و paste ترحم شوية، التعليقات موجودة عشان الناس تتناقش و تضيف جديد من عندها مش عشان تتكلموا في مواضيع لا علاقة لها بالموضوع الأصلي، لو كل اللي عاوز تضيفه أنك تذكر مقال أتنيل ابعت رابط و بطلوا غباء يا غفر ميتين أم الأنترنت بتشتغل بالروابط

لأ و المصيبة الهبل اللي يبقى عندهم موقع فعلا و يجي برضه يبعت مقاله في تعليقات عند ناس تانية، ده غير اللي بيغرقونا بالسخام عشان نروح بنفس المقال اللي موجود على الموقع

أنا لقيت التعليق ده مستني موافقة على النشر تحت موضوع المؤتمر التأسيسي لطلاب من أجل التغيير، في الغالب التعليقات اللي لا علاقة لها بالموضوع الأصلي و مجرد محاولة من الكاتب لنشر مقاله عندنا بلطجة (زي الكابتن بتاع طائر من الشمال) بمسحها، لكن عجبني كلام لمياء و معرفتش ألاقيه في أي حتة تانية على الوب

المقال الأصلي

سرتن سرتن في أي مكان..صحرا ان كان أو بستان

ما هو أصله يوم باين من أوله

يبتدي يومي المنيل اللى لا باينله أول من آخر بصحيان بدري علشان اكمل اوم البرزنتشن..بوادر دور برد من يوم الجمعة لا عايزة تيجي و لا عايزة تغور، بس منكدة عليا عيشتي و مخلياني مش عارفة اركز..البرزنتشن لسه مخلصتش، احساس بايخ اوي ذي اللي عنده امتحان و ما ذكرش من أول السنة..يا ربي هو احنا مش هنخلص من الحكاية دي بقه.

ميعاد الطيارة 2 الظهر، مسافرة على الإيطالية، ترنزيت صغير في روما (50 دقيقة) و بعدين صوفيا (بلغاريا) اوصل هناك على 9 بالليل واخد قطر أو أتوبيس 7 ساعات لفارنا.

اوصل مطار القاهرة متأخرة شوية، مش مهم المهم أن الطيارة بتاعتي هتطلع متأخرة و 95% مش هلحق طيارة صوفيا.

بعد محاولات عديدة فاشلة لتحويل سفري على أي خط طيران تاني، ينصحني مسئول أليطاليا أني أروح و اجي الفجر اخد طيارة تانية عن طريق ميلانو. أوافق ما فيش حل تاني. بس على بال مانخلص الحكاية دي و يشوفولي توصيلة على بيت امي (في مدينة نصر..ما أنا مش هرجع الهرم تاني)، يكون دور البرد تعمق و تفشى و توغل..اروح اكلم المنظمين و اقولهم على معاد وصولي الجديد، يوعدوني أنهم هيحجزولي طيارة من صوفيا لفارنا و اخش انام. اصحى اعمل البرزنتشن بعد ما يطلع عيني مع اوبن اوفيس امبريس..أول مرة استخدمه، و يبعتولي أن ما فيش أماكن على رحلات صوفيا - فارنا..اشمعنى يعني حظي هيتغير دلوقتي

اروح المطار، زكام فظيع، صداع عنيف و مغص بالمرة,,مش عارفة ازاي هستحمل ضغط الطيارة. اوصل المطار و اقابل واحد من موظفين وردية الضهر، يحاول يعوضني بأنه يقعدني على صف بوابة الطوارئ علشان بيبقى بعيد عن الصف اللي اقبله و مريح، و يسيبني اختار الكرسي اللي يعجبني..جنب الشباك عاليمين.

واحد مصري قاعد جانبي، ضخم الجثة عريض المنكعين، يسند عالمسند اللى ما بينا و لا كأني حاطة إيدى، اشيل إيدي..بالتأكيد مش قصده حاجة

نشتغل فالأزرق بعد ما الوجبة تخلص و يطفوا أنوار الطيارة. كل ما أنعس أفوق على دراعه ملامس دراعي..كل مرة حاجة زي كده تحصل اقول لنفسي انني حساسة زيادة عن اللزوم و عندي بارانويا، و احاول اعدل وضعي و انام تاني..لكن ما فيش فايدة، و بعد شوية تتضح الصورة و اخد بالي ايديه فين..اتاري الراجل شغال مع نفسه من الصبح، هما مش طفوا النور يبقى خلاص

حتى الطيارات بقيت مواصلات عامة لازم الواحدة تبقى مصحصة فيها لكل واحد جنبها و لا واراها. يصعب علي الراجل: هتنزلهم خلاص علشان دراعك لازق في دراعي؟؟

احاول اطنش بس مافيش فايدة..مش عارفة استريح و انام، جسمي متخشب و حاسس بكل حركة بسيطة حواليه. يا عم ارحمني حرام عليك دا أنا ادامي يوم مش باينله آخر..يا ربي مش عايزة اتخانق. أعدل قعدتي بشكل مفاجئ ياخد باله أني صحيت و يشيل إيده من على بتاعه لاكن ما يبطلش محاولات أنه يفضل لامس دراعي.

ما أطيقش و أطلب منه يوسع شوية، يوسع و يحاول يرجع تاني كل شوية..مافيش دم خالص. لحسن الحظ ينوروا الطيارة و يطلبوا عدل الكراسي علشان حننزل خلاص..

ميلانو 4 أكتوبر - 8:40

من القناع الأسود الي رفيقه بقصر العروبة

عصابة القناع الأسود بتمسي على الريس بمناسبة نجاحه بأسلوب الحل الجماعي (متسموهوش غش يا جماعة حرام عليكم، أحنا بنساعد بعض بس) و بتقوله:

دلعنا يا ريس دلعنا

عصابة القناع الأسود بريشة دون روسا

download

و متنسوش تبصوا على الأصدارات السابقة

القناع الأسود حائز على جائزة بهية لعام 2005 في مجال الهرتلة السياسية.

البحث عن مثقف منفوخ

ده ابتدى تعليق على البسطاء و المنافيخ بس وسع مني شوية، الجزء الأخراني مشافتهوش منال و بالتالي غالبا ممل، و بعدين الكلام ملخبط في دماغي فأخترت أوقف و خلاص من غير ما يبقى فيه ختام واضح.


أنا أصلا عمري ما فهمت المناقشات اللي مبنية على مصطلحات غامضة

يعني ايه مثقف؟

الكلمة جاية من ثقافة صح؟

يعني في حد عنده ثقافة و حد تاني لأ؟

يعني ايه معندوش ثقافة عمره ما سمع أغنية أو شاف فيلم أو قرأ كتاب و سمع قصة أو نكتة أو شاف صورة أو رسمة؟ عمره ما حكى و لا غني و لا قرى و لا رسم؟ عمره ما سأل ولا ناقش و لا رد؟ مظنش البني أدم ده موجود

يبقى ازاي معندوش ثقافة؟

أكيد المقصود أن المثقف عنده ثقافة أحسن (أو على الأقل ليها طباع مختلفة) عن غير المثقف

طب مين بيحط معيار أنهه ثقافة اللي كويسة و مهمة و أنهه اللي مش مهمة؟

مش فاهم بالمرة، يا أما الكلمة لا معنى لها يا أما المثقف هو اللي بيقول عن نفسه أنه مثقف، أو اللي الأخرين بيقولوا عليه أنه مثقف أو اللي المثقفين بيقولوا عليه أنه مثقف

لكن لما هو الموضوع غامض كده ازاي بنقدر نرصد و نعمم و نقول المثقف مش عارف ماله و الغير مثقف ماله.

أنا مقصدش عاوزين تعريف واضح و محدد جدا، صعب مثلا تعريف هاكر لكن عموما الكلمة تستخدم للاشارة لمجموعتين من البشر واضحي المعالم، لما بقول عن نفسي أو عن غيري هاكر بأبقى فاهم جدا أنا أقصد ايه (طبعا ممكن يكون مثقف كده برضه و أنا بس اللي مش فاهم، أكيد وضوح كلمة هاكر بالنسبة لا يشاركني في ناس كتير، و أكيد كون الكلمة بتشير لجماعتين مش جماعة واحدة ده بيلخبط أكتر).

نفس المشكلة مع كلمة بسطاء، أبسط من ايه بالظبط؟ ده كلام عن تعليم ولا عن خبرات حياتية؟ و لا عن قدرة على التحليل و دراسة الذات؟ ولا ده انتماء طبقي ما ؟

بلاش دول نفترض جدلا أن واضح مين هو المثقف و كلنا فاهمين معناها ايه، ايه بقى أزمة المثقف دي؟

يعني أحنا عارفين من هو المثقف و كمان عارفين هدف لحياته و رصدنا أزمة عنده في أنه ينفذ الهدف ده؟ ولا ده مثلا عشم نفسنا المثقف يعمل كذا و الأزمة انه ما بيعملش؟ و لا المثقف ده تأثيره خطير على غيره و الأزمة أن التأثير مش عاجبنا؟

بعيدا عن الناس تقصد ايه بمثقف و مش مثقف حاولت أدور هل أنا عندي تصنيف ما للبشر مرتبط بالثقافة اللي هما مطلعين عليها؟

لقيت أن لحد قريب كان عندي أقتناع أن فع معرفة cannon، حاجات لو الواحد ميسمعش عنها يبقى في نظري حمار و مبيفهمش، زي مثلا المعلومات الأساسية اللي عن الفيزياء الكونية في كتاب "موجز تاريخ الزمان"، أو أبسط مفاهيم الاحصاء و حساب الاحتمالات و التفاضل و التكامل، أو أفلام الدوجما 95 أو حركة الزاباتستيون الجدد و غيره.

و بعدين لقيت العملية مش كده، صحيح باستريح أكتر للناس اللي مشاركاني الاطلاع و الحد الأدني من المعرفة بالحاجات دي لكن قابلت ناس كتير محسيتش أنهم حمير ولا يسمعوا عن الكلام ده، منهم اللي طلع يعرف عن حاجات أما حمار فيها و منهم حتى اللي مهتمتش أكتشف بيعرف ايه و مبيعرفش ايه.

بطلت أصنف الناس بالشكل ده، في المقابل بصنف الناس بمدى تنوع الثقافات اللى هما مهتمين بيها أو مطلعين عليها، حد مهتم و متابع كل ألعاب الكمبيوتر و الأدب و السينما الاستهلاكية (هو الواحد لما يعوز يحط صفة على كلمتين معطوفين نوعهم مختلف بيخلي الصفة مذكر ولا مؤنث؟)، و الكوميكس و برامج التلفزيون، و مطلع على حاجات مندي من أكتر من بلد و أكتر من فترة زمنية يفرق ايه عن اللي قاري فلسفة بتاعت ثقافات و حضارات مختلفة و له في الفن التشكيلي ال"راقي" و الموسيقي الكلاسيك؟

لسه عندي شوية cannons لو متعرفش هاري بوتر و مشفتش الليمبي يبقى فيك حاجة غلط، لما يبقى في حاجة كل الناس بتتكلم عنها و مأثرة فيهم جدا بحس أن لازم تنضم للقطيع (مش في الرأي لكن في الاطلاع على الحاجة) غير كده يبقى في معرفية أساسية فايتاك.

طبعا أنا مفتري أكتر من كده كمان، زيادة الاهتمام بمواضيع معينة ممكن يقلل من نظرتي للبني أدم، يعني أي حد مهتم بالغيبيات جدا بستتفهه (مين عير ما أدي لنفسي فرصة حقيقية أني أفهمه).

بس كل الكلام ده لا علاقة له بكلمة مثقف، في المعتاد اللفظ بيستخدم عشان نصنف الناس لمجموعة المفروض دورها السياسي و تأثيرها يكون أكبر من التانيين، لا الcannons و لا التنوع الثقافي اللي بقول عليه يفرقوا في دورك السياسي و وزن رأيك.

حتى التقسيم البسيط الواضح بتاع متعلم غير متعلم أو أمي غير أمي ما لوش قيمة سياسية كبيرة لو أخترت الديمقراطية، ما هو اللي مفروض جاهل ده له رأي في مصير نفسه برضه و زيه زي رأيك المتعلم بالظبط. الموضوع أعقد لما تدخل في رأيهم في مصائر بعض، لكن مينفعش برضه نقول مثقف من حقه يدلي بدلوه في مصالح كل حد، بسيط يبقى يقول رأيه في الحاجات اللي تخصه و يسكت.

سيبك من ده كله، يا ريت كل حد بيستخدم كلمات زي مثقف، بسيط، مواطن عادي، نخبة، صفوة، مهمش الخ يشرحلي يقصد ايه بالظبط