You are here

علاء: عيد بأي حال عدت يا عيد

Primary tabs

English Translation by Sarah Abdelrahman & Sarah Carr

بقالي تلات سنين بقضي العيد بعيد عن الأهل بسبب الغربة، كان بيعدي كأنه يوم عادي نروح الشغل الصبح و نروح متأخر. لولا مكالمة يتيمة نعيد فيها ممكن مناخدش بالنا أنه عيد أصلا.

كنت عامل حسابي على العيد ده، أول عيد نقضيه مع الأهل بعد رجوعنا، بس العسكر قرروا أن مش من حقنا نفرح. قضيت العيد في الزنزانة و أهلي قضوه في طابور زيارة دام نهار العيد كله عشان في الآخر يدخل عينة منهم فقط زيارة لدقائق معدودة بحضور عدد مخبرين ضعف عدد الأهل.

ما بين الاطمئنان على أمي اللي بدأت اضراب عن الطعام للافراج عني و ما بين توتر الحرمان من تبادل الجوابات مع منال راحت دقائق الزيارة و عدى أول يوم العيد.

الموظفين و الشوايشة و بتوع المباحث لازم يعيدوا و ده معناه السجن يشتغل بنص طاقته. يبقى أقفل الزنازين بقى أربع أيام متواصلة لا فسحة و لا زيارات و لا جرائد و لا أكل من بره و لا أي حاجة أنت عايز المجرمين تعيد لا سمح الله؟

لولا تويتاتكم اللي وصلت في صورة برقيات تهنئة بالعيد ما كنت حسيت أن بره فيه عيد من أصله. شكرا لكل اللي تعب نفسه و شكرا لأصحاب الفكرة.

عدى العيد و راح خلاص، و جاي بقى دور عيد ميلادي، عيد ميلادي بقى بقالي أربع سنين بحتفل بيه بعيد عن العائلة. بس المرة دي كان مفروض مرة خاصة جدا، عيد ميلادي الثلاثين، أول إدراكي و اعترافي أني دخلت عالم الكبار بلا رجعة. قبل ولادة خالد بأيام. في يوم 18 نوفمبر يوم عودتنا للتحرير. كنت ناوي أحتفل مع رفاق الثورة في الميدان و مع الأهل بالليل. و طبعا لأنه يوم جمعة لا هينفع يجي فيه زيارة ولا حتى هيتفتح لينا الباب.

يالا بقى ابقوا احتفلولي في الميدان، لما بتوصلني أخبار تضامنكم معايا بتبقى اللحظات الوحيدة اللي بفرح فيها. من المظاهرات قدام سجن الاستئناف (اللي للأسف محستش بيها لأني كنت محبوس في الناحية التانية بس سمعت بيها من باقي المساجين)، للمظاهرات ضد المحاكمات العسكرية اللي بطول و عرض البلد من الأقصر للأسكندرية، و كمان في أوكلاند و سان فرانسيسكو اللي زرتهم زيارة قصيرة بس دخلوا قلبي بعد ما حضرت اعتصاماتهم و اجتماعاتهم.

طيب العيد و عدى، و عيد ميلادي و هيعدي اتعودت اقضيهم بعيد عن الأهل. لكن ولادة خالد، ابني البكري هفوتها إزاي؟ هستحمل إزاي مبقاش جنب منال في الوقت ده؟ هستحمل إزاي استنى الأخبار و أعرف هما بخير ولا لأ؟ هستحمل إزاي مشوفش وشه؟ مشوفش وش أمه لما تشوف وشه؟ و هستحمل إزاي ابص في وشه لما أطلع و أنا وعدته أنه هيتولد حر؟ سميناه خالد وفاء لجزء من دين كبير مديونين بيه لخالد سعيد. و بدل ما نحبس اللي قتلوه نتحبس إحنا؟

Comments

الله يعينك ياعلاء يابنى ومنال هتقوم بالف سلامة وهيجى البطل خالد وهو فخور جدا بيك متخافش على منال ولا على خالد ولا ماما وبابا ولا منى ولا اى حد لانهم جوا عينينا كلنا - فى كل صلاة بنفتكرك ياعلاء ربنا يفرج كربك وفى كل مكان بنولع لك شمع ربنا يعينك ونشوفك حر فى اسرع وقت

علاء ابني الحبيب انت وحشني جدا بالرغم اني مشفتكش من 20 سنه ده طريقك الطبيعي انت مش بتدافع عن حقك بس. انت محامي لكل المصريين انت الشراره الباقيه في نار الثوره اللي عايزين يخمدوها وانت خارج خارج دي مسألة وقت بيحسبوا ان كده هتلين عزيمتك وتابعينك هيقلوا ولكن دي معادلة النظام الفاسد ديما القمع . بالعكس من يؤيدك اصبحوا اعداد غير طبيعيه وكل يوم بيتأخروا في انهم يكرموك بدل ما يعملوا كده هيدفعوا تمن ميقدروش عليه واصبر ان غدا لناظره قريب شد حيلك يا بطل وسيبك من موضوع وجودي جنب خالد هو طبعا حقك بس 2خالد هيتولد ويعرف في التاريخ ان ابوه بطل زي ما مني اتولدت وعرفت ان ابوها كان بطل بيدافع عن مباديء وشرعيه وحقوق انسان شد حيلك وصدقني انت حر وهمه اللي محبوسين ما اعظم انت تكون حر الفكر ام سجن الجسد فلا يهم انا جربت وضعك ولماما ليلي كلمات عظيمه ربنا يكرمها يكفيك فخرا ان لك ام اسمها ليلي سويف واستاذة ومعلمة ومربيه

احنا متاسفين يا علاء احنا السبب ، احنا اللى سيبنا الميدان بدرى سيبناه للعسكر. سا محنا احنا السبب. يسقط الظلم وتعيش الحرية ، الحرية لعلاء ........ الحريه لعلاء

كل اللي الواحد يقدر يوعدك بيه انه ينزل يوم الجمعه و يكمل مشوارك في حملة لا للمحاكمات العسكرية للمدنيين .... ربنا يفك اسرك و اسر مصر كلها يا رب

والله انا رسالتك قطعت قلبي ربنا معاك وان شاء الله تشوف خالدوتفرح بيه

Dear Alaa & Manal, I had my first son alone away in another country,his father couldn't follow me. The first time we met was when my son was five month old! Now my son is 9 years old a copy of his father. It was not a choice to leave Egpyt but sometimes we have to assume our destiny. May God Help both of you and bless your beloved son. PS: my daughter birthday is 18th november so we will celebrate Alaa's birthday in our small familly.

ربنا يفك سجنك يارب.. الله يسامحك بقي وجعت قلبي

فصبر جميل والله المستعان على ما تصفون ..ربنا معاك ومعانا .. رب ضارة نافعة ....متعرفش الخير فين؟ سيدنا يوسف اراد له اخوته مح اثره فخرج وعلا شأنه ..انا لحد ما انت دخلت السجن من اسبوعين كنت اعرفك شكلا لكن دلوقتى اعرف كل حاجة عن عيلتك مراتك واخواتك ومامتك باباك.. ربنا يفرج كربك قريب ويقر عينك برؤية ابنك ان شاء الله

خالد هيتولد حر يا علاء حتى لو العسكر حاصرونا خالد هيتولد حر

بدل مايتحبس اللي قتلوه، نتحبس احنا!

انا عمرى ما كنت ثورجية ولا ليه فى السياسة.بس اللى بيحصل لعلاء ده منتهى الظلم.ربنا يفك اسره ويجمعه مع طفله على خير..ويخسف باللى بيظلموا مصر واهلها الارض ان شاء الله

Dears manal and alaa

Today I was giving a lecture about the arabic spring in a secondary school near copenhagen. you should have seen the faces of the students hearing your story and seeing your picture together. The respect in their eyes for what you are willing to give to support a cause is difficult to explain and it is difficult to carry to you in a comment! your act inspires them beyond the imagenation of any member of SCAF.

I am sad that Alaa risks not attending khaled,s birth, but be assured that you inspired us all just to give a bit more so that khaled would be gauranteed a real free life.

انا كنت بحج السنه دي و دعيت لك كتير و دعيت كمان على كل كلب ساهم في دخولك السجن ربنا ان شاء الله هينصرك يا علاء عشان انت ضحيت بنفسك عشان المحاكمات العسكريه متتكررش

U made me cry,, I'm pregnant so I can feel ur words , Yaaa Raab ya kareem tetla3 abl wladet khaled w tshoof el la7za dy :) I'll pray 4 u

يا علاء اعرفك من زمان انت و منال .... و يكفي اقولك اني فخوره بصدقتي بيكوا اكتر من الأولكمان عشان قد ايه انتوا صدقين و ربنا معاك انشالله و خالد هيفتخر طول عمره انه ليه اب بطل و يرفض انه يعيش بهيمه يجري ورا لقمة العيش و متقلقش انا و نور و داليدا بنتي بنقول معاك (لأ لأ لأ لأ لأ لأ لأ(

دقيقة صمت أمام محبس علاء عبد الفتاح علاء .. كان لازم يتحبس لأنه متربي طاهر .. مش نجس فلما خيروه بين الكلام والحبس .. قال أتحبس ورغم إن الكلام لعبته .. فضل أنه يتخرس كلام علاء يفهمه الاحرار .. فأزاي يكلم السجان كلام علاء وصايا شهيد .. وشهاده ع اللي كان كلام علاء مش مكانه .. تحقيق من الجاني كلام علاء هوا نتنفسه .. ونعود نردده تاني سكوت علاء مش عشانه .. ده عشاني .............. علاء لمن لا يعرفه مش بس موقف .. لا ده معنى تلقاه ف الاعتصام وف الاضراب وف الزحمه تلقاه يترجم دموع أم ف ثانيه شعار ويلمح غضب عيون الناس ف مظاهره فيصرخ ف الجموع ويحول الكلام لشرار ما فكرش يخش خناقة الدستور ولا انتخابات بدون معنى علاء أختار يكون بينا .. علاء منا فروح يا علاء .. أنت م الاحرار ............ واقفين قدام محبسك بمنتهى الصمت وعارفين إنك بتسمعنا بنعرف بعضنا .. رغم إننا من قبل ما اتجمعنا فهمنا المعنى وأترجم خشوع بيجمعنا ورغم الصمت .. وصل الصوت وأبشرك إننا كل يوم بنزيد وإننا واحد ومن صلبك جاي خالد ف بكره جديد ...............................................................................................

علاء ربنا معاك وانشاء الله تخرج بالسلامة لزوجتك العظيمة ولوالدتك الصبورة العظيمة ولوالدك المناضل وان شاء الله تحضر ولادت ابنك البكرى خالد .علاء خليك ثابت وبشر الصابرين انشاء الله سيادة المشير قلبة يحن على شاب مصرى لم يقصد الا كل خير لبلاده

تقابلت مع عائلة سيف عبد الفتاح فى منتصف التسعينات عن طريق أخى الأكبر صديق العائلة محمد سعد شحاته، لا تزال تعلق بذهنى صورة هذا "الولد" بالأول الثانوى وشعره وأفكاره التى أذهلتنى، بعد سنوات شعرت بالحرج من نفسى حين رأيته فى صورة أيام أزمة القضاة ، وعرفت كم سيحرج الكثيرين هذا الولد الشقى بشعره المثير ودماغه الغريبة، حتى تواترت أخباره ونشاطه السياسى فكنت أزداد احراجا من نفسى،...

حتى كانت ثورة يناير ورأيت فيديو يذاع على السى إن إن الفرنسية، حيث كنت محتجزا بمطار دولة اخرى فعرفت انها الثورة التى صنعها مثل هؤلاء الشباب الذين تعودوا احراجنا بشجاعتهم حين فضحوا خوفنا ، لم أعرف الوجه الذى ظللت احفظ ملامحه النحيفة منذ رأيته لمرة واحدة فى حياته وحياتى، لكننى عرفت " دماغه" والتقينا كثيرا فى طرق كثيرة وغن لم نتذكر بعضنا البعض، لكن اكثر الطرق التى تمنيت وقتها ان نتعرف بالأسماء كان طريق هذا الوطن فى هذه الثورة التى جمعتنا فى طريق واحد نعرف بعضنا فيه، بالسمت لا بالشخص، بالروح لا بالجسد، بالحب الذى ملا شغافنا نحو هذه المسماه بنت الإيه "مصر"...

علاء وغيره ممن تعودوا فضح شعيرات الخوف التى بدأت تزين فروة رأسنا فى سنواتنا، اعلم أن خالد ولدك فخور بك وبكل مصرى حقيقى مهما دفع او قدم من كبرياء الانفرادى والاحتياطى والاستئناف، لكن لا تنس أنها "بنت الإيه" تستحق وان خالد - ربنا يجيبه بالسلامة - وكل أولادنا، لن يستخف بهم كتاب التاريخ بالصف الاول الاعدادى او الثانوية العامة، فهم وحدهم من يملك إجابة حقيقية فى ذكرياتهم للتاريخ الحقيقى لهؤلاء الذين أحبوا وأخلصوا لبنت الإيه ست الكل، مصر..

علاء..وآخرون اعرف سمتهم ..أعرف أن شكرى وحده لا يخفف عنكم محبسكم، لكنه لا شك يفيدنا الكثير فى توطيد إيماننا بهذه القضية ويزيدنا شغفنا بهذه المحبوبة بنت الإيه..

علاء سيف وكل من معه إليكم وحدكم إلى هؤلاء ..من تحملوا عنا عبء المحاكمات العسكرية... االسجن له قضبان.. لكن ماقيدنيش.. على بابه كان سجان.. عمره ما خوفنيش.. صحيح انا مسجون.. وحلمى بات مدبوح.. لكنى زىّ الطير.. مليان غُـنا مش نوح.. سجانى مش إنسان .. وتملى بيعلى.. ف السور كانه الليل.. دايما بيحرمنى.. أحلم ..أنام بالليل.. حتى المطر لو فات.. عدى وساب زخات.. تجرى..تجف..تخاف.. سجانى يجلدها.. وأنا مهما سجنى يطول.. وحيطانه تخنقنى.. لازم ف يوم و أطول.. بإيديه طرف النور .. ف شعاعه وأتشعلق ... زنزانتى لو هتضيق.. بالأمر تخنقنى.. أنا ليـّا قلب كبير.. هيساع كتير وكتير.. من خلق بالملايين.. تجرى وتتربع.. مهما تطول لياليك.. الفجر حالف ليك.. لازم ف يوم هيجيك.. والعتمة هتنور.. سجانى يا سجان.. بُـــكرانا جاى قوام.. تتبدل الأدوار.. صوتنا يدفى الدار .. وولادنا تحضنـّــا.. وأنت يا عينى عليك.. هناك هتبقى وحيد.. ولا حد فيك يسأل.. علشان بقيت سجان.. قلبك سجنته كمان.. لحظت ما لعبت بيك.. روحك وقالت ليك.. كرامتنا ملك إيديك.. بعترها كرباجك.. م العتمة مش هنخاف.. ولا فينــا هتأثر.. هنهد قضبانك.. هتشوفنا قدماك.. عصافير بتبنى فى بيت... السجن له قضبان.. لكن ماقيدنيش.. على بابه كان سجان.. عمره ما خوفنيش.. صحيح انا مسجون.. وحلمى بات مدبوح.. لكنى زىّ الطير.. مليان غُـنا مش نوح..

مختار سعد شحاته

كل سنة وانت طيب يا علاء بمناسبة عيد ميلادك غداً .. وهو شرف لك يا علاء ان تكون فى هذا اليوم وراء القضبان فى سجون النظام الظالم .. ولكن الله قادر ان ينقذك من هذة المحنة ويعيدك سالما الى اسرتك وزوجتك و الى ابنك الوليد .. وكل سنة وانت طيب ايها البطل الشجاع .

ان شاء الله عيد ميلادك ال٣٠ مش هيتنسي وان شاء الله النهارده هيكون يوم مؤثر في نجاح الثوره وىارب يثبتك ويفك سجنك وتخرج لابنك اللي ان شاء الله هيتولد في وجودك جنب امه وفي بلد حر ربنل يقوي عيلتك

هانت يا بطل ربنا يجيب خالد بالسلامة ويكون قدام عينيك .. الميدان انتفض من جديد وانت واللى زيك شرارة ونار هتحرق الظالمين بقدرة رب كريم دعواتنا ليك ولكل اللى زيك ما تفتكرش اننا ننسى فضلكم من بعد قدرة الله العظيم

قريبا سيعود علاء الى بيته باذن الله ....الظالم غبي وليس ذكيا كما يدعي او يظن البعض... وسوف يحاكمون باذن الله على جرائمهم الكثيرة والتي منها بالطبع سجن الثاور ومحاربة الثورة

الف مبروك ياعلاء ومنال علي خالد......وقدم خير وسعد عليكم وعلي الثورة يارب.....وعقبال مانهنيكم ببراءه علاء قريب...وينصركم علي الظالمين يارب

بجد من كل قلبى مبروك ياخالدفكلنا ابائك وان كان الظلم قد منع علاء من يراك بالجسد فهو متهلل بالروح لقدومك لحياة جديدة دافع من اجل الحق فيها بالرغم من اننى لا اعرف ابوك او امك ولكنى انحنى احتراما لهم ولامانتهم فى الحياة فثق يا ابنى ان لك فى الحياة اب وعائلة مثل هؤلاء وكمان ثق ان اللة سيعطى لك من كل خيراتة من اجلهم وسيعطى لهم لان الحق هو اللة وابوك شهد للحق فثق ان اللة سيشهد لة وهذا ايمانى ويقينى وثقتى فى الهى وبجد نفسى اشوف ابوك وامك وابوس على ايدهم واقول لهم شرفتم اهل مصر وبكم ولكم مصر ستكون ام الدنيا بجد

ازيك يا ابو خالد ابنك بسم الله مشاء الله ربنا يحفظه انا مش عارف اقول ايه غير انك رجل مصرى مصر الطيبة كلها بتتشرف بيك ربنا يحميك وتشوف ابنك وتشوف وشه وتشوف مصر الطيبه لما شافت وشه يا بطل

إهداء إلى علاء عبد الفتاح : مــبــروك يــا لـؤلـؤ يـا إبـن الـناس يــا لــولــي و مــعــقـود مـع مـاس يــا جـنـاح عـصـفـورة و قــــوة تــور يــا كــلــمــة أهــم مــن الـدســتـور يــا عـنـيـد زى مـا مـصر عـنـيـدة يــومــاتــي بـيـقـتـلـوا عـيـل لـيـها و هــي تــقــدم شــهـــدا جــديــدة مــاحــدش مــاســك ذلــة عـلـيـها و الـــواد إبــنــك لـيــه مــحـتــار مش عارف النونو إزاي يحسبها شـــافـــه أبـــوه بــيـــن الأســوار و الــحــريــة شــامــم ريــحــهــا ولــيــد الـعـدل أو إبــن الــنــار ؟ عــمــال فــي دمــاغــه يـقـلـبـهـا لـسـة فـي بـيـضـة و طـالـع برة ؟ قـولــه يـا واد إنــت إبـن الـثـورة عمر فؤاد مبروك يا علاء من كل قلبي