You are here

علاء يدون من السجن: دكر

Primary tabs

بكتب التدوينة دي و أنا مكسوف من نفسي، اتنقلت سجن طرة تحقيق بناء على الحاحي و زني لأني لم أحتمل الأوضاع الصعبة في سجن الاستئناف، الضلمة، القذارة، الصراصير اللي بتتمشى على جسمي ليل نهار، إن مفيش فسحة و ما بنشوفش الشمس، الضلمة تاني، بس أكتر حاجة تعبتني الحمام، معرفتش اتعامل خالص مع قذارة الحمام و زحمته و غياب الأبواب و قعدت خمس أيام صائم و مزنوق مزنوق مزنوق.

أربكتني مقالة نوارة اللي بتحتفل فيها برجولتي، لكن مقالة نجلاء بدير فكرتني أن في حبستي السابقة كانت المدونة ملاذي و كنت صريح فيها مع نفسي.

معرفتش استرجل و استحمل، رغم إن آلاف مستحملين الأوضاع دي و أسوأ، رغم إني مجربتش فظائع السجن الحربي ولا اتعذبتش زي باقي زملاء المحاكمات العسكرية.

خذلت زملاء حبسة ماسبيرو و حبسة وزارة الدفاع و غيرهم من السياسين، خذلت الجنائيين اللي حركتهم الدوشة اللي معمولة عشاني و قرروا أنهم يحكولي على فظائع الداخلية عشان أعرّف الناس، فرحوا إن يمكن حد يوصل صوت البلطجية و التشكيلات العصابية. و أنا هربت عشان الحمام.

استبدلت صحبة الجنائيين اللي كلها شباب و صخب و مرح بصحبة الأموال العامة اللي كلها عواجيز و كئابة و ملل. في الاستئناف كنت كل يوم بكتشف مظلمة و قضية مهمة، أمناء الشرطة اللي اتحبسوا بعد أول مظاهرة لهم و اتُهموا بحرق الوزارة. مكنتش مصدق أن فيه حاجة بجد في صفوف الأمناء لحد ما قابلتهم. تامر رشوان اللي معموله قضية غامضة جدا تخلينا نشك إن أمن الدولة بتجرب تطور أدوات جديدة مستترة بدل الاعتقال، و التعذيب و الاهمال اللي كان بيحصل قدام عيني اللي كنت بحوّشه علشان أحكيلكم عنه لما أخرج.

مش الجنائيين بس اللي حسوا أني ممكن ألعب دور جوه، المباحث كانت بتبهدل و تفتش كل اللي يتكلم معايا و كتر المرشدين و كل كلامي كان بيوصل للإدارة.

سبت ده كله، عشان زنزانة نضيفة و واسعة و منورة، و عشان معرفتش استرجل و استحمل حمام الاستئناف. دي طاقتي و دي حدودي و ده ضعفي.

حتى قرار رفض التحقيق قدام النيابة العسكرية اللي بتحتفلوا بيه كان فيه ذرة جبن، يوم ما أجتمعنا ناخد القرار ده مكانش عندي أي شجاعة إني أسمع رأي منال اللي هسيبها لوحدها في آخر أيام الحمل و هسيبها لوحدها تشرف على العمال اللي بتجهز أوضة خالد، اللي هتحبس و تتبهدل و هي بتجري على طلباتي و اعاشتي و تصريحات زيارتي و الحملة اللي معمولة عشان قضيتي.

دبستها و خدت القرار في اجتماع سمعت فيه لزملاء الثورة و مسمعتش فيه لمراتي و اعتمدت بس على إنها أكيد هتدعمني أي كان اختياري.

بس أنا برضه فخور، صحيح أنا مش الدكر اللي فاكراه نوارة بس أنا مش جبان برضه، عرض على من خلال شخصية مهمة في الثورة صفقة تضمن خروجي العاجل، اخرج بس ما تشتمش المشير. بس كده، اتطلب تنازل بسيط قوي و رفضته. كنت هواجه أهلي إزاي يعني لو رضيت؟

نبدأ من الأول: ازيكم، أنا علاء، جندي مشاه في الثورة، فيه اللي ضحى أكتر مني بكتير، و فيه اللي أشجع مني بكتير، و فيه اللي دوره أهم مني بكتير.

أنا علاء و فخور جدا أني بعمل اللي أقدر عليه و بفاجئ نفسي أحيانا بمدى اللي أقدر عليه. و عارف نفسي و عارف ايه اللي مقدرش عليه. و بحاول متأخرش أبدا و بحاول أتغلب على الخوف دائما و بحاول أكون في الصفوف الأمامية بانتظام.

لو شفتم فيا شجاعة أو شهامة أو جدعنة اعرفوا إنها مستمدة من أمي و أخواتي البنات الأصغر مني و مراتي (اللي فراقها أصعب حاجة في الحبس). اليوم الخامس و أول ليلة في زنزانة 1/6 عنبر 4 طرة تحقيق
3/11/2011

Comments

أنا آخر مرة كتبت تعليق في المدونة دي كان في ٢٠٠٦ لما كنت بتكتب و إنت محبوس.. مكنتش متخيلة هرجع اكتب تاني و إنت محبوس برضه و بعد ما تكون قامت ثورة مكنتش أحلم بيها !! ربنا يصبر منال و يصبر أهالي كل المعتقلين.. كلنا فخورين بيك جداً يا علاء.. ترجع بالسلامة

It makes me cry :( Rabena m3ak ya Alaa w m3a kol ely masgonen zolm

منال لو سمحتي وصليله يكبّر دماغه من حوارات دكر و لا جبان دي و يبطل محاسبة لنفسه.

اكيد يا علاء ان في اهوال في السجون وفي ناس زي ما قلت جدعان قوي لكن ده ما يقللش من مجهودك وموضوع الحمام ده يا سيدي في ناس كتير بتتعب فيه بس اكيد لو اتحطيت في ظروف صعبة متقدرش تغيرها هتتعود عليها على العموم كل تجربة صعبة بتضيف لصاحبها كلنا معاك وبندعيلك ونتمنى خروج جميع الشرفاء الحقيقين من كل هذه المحن محتاجين لك تكمل المشوار

تحية و تقدير لعلاء الذى لا يهاب ان يكون انسان فى احلك ظروف محنته. هكذا يكون صدق الإنسان مع نفسه.

أبانا الذى فى المباحث ، نحن رعاياك، باق لك الجبروتُ وباق لنا الملكوتُ ، وباق لمن تحرس الرهبوت - معارضة - أبانا الذى فى س28 نحن وراك باقى لنا الجبروت و باقى لمن يرضى بحكمك الصموت و باقى لمن يحايلك الخازوق --- علاء يا بطل حبسك بيحرر وطن لانك انسان فقط لا غير لا انت البطل الخارق اللى هيكسر الدنيا على المجلس السمكرى و لا انت الانسان الخانع اللى بيرضى بالذل و يسميه واقعية و استقراد انت انسان من لحم و دم بيقرف من حمامات السجن و مابيتحملش ضلمته لكن احب اقولك ان موقفك وقفتك قدام انتهاكات حكم العسكر الهمت ناس كتير انهم يودعوا الكنبة و يقول لا للظلم وانا متأكد ان اعرف واحد من دول على الاقل و اخيرا اصبر يا ابو خالد و ان شاء الله تطمن على زوجتك منال و تجيب لك خالد و يكبر قدامك و تحكىلوه انت و منال على اللى عملتوه عشان يعيش حر و كريم -- واحد يشرفه ان يتعرف عليك و يقابلك.

ربنا معاك انت و اللي زيك أنت شخص جميل جدا و لكن الأجمل و الأحلى الناس اللي حواليك يا ريت كل الناس المظلومة و المحبوسة على ذمة العسكر يكون معاها و حولها ناس شبهه اللي عندك لأني متأكدة انهم غلابة جدا و ظروفهم أصعب من ظروفك ب مراحل. ربنا يفك أزمتك انت و اللي زيك. و نحرر مصر أن شاء الله من الظالمين و الجهلة

ربنا معاك وتخرج وتشوف ابنك بيتولد... بصرف النظر عن هروبك من قذارة الحمام... فانت جدع.. ربنا يجيبك حقك

علاء ربنا يحميك كلنا بنصلى وندعى لك وربنا يقويكى يا منال ويجيب خالد بالسلامه ويحفظه لكم

يكفي إنك إنسان ..عملت اللي قدرت عليه .. ربنا يقويك ويصبرك ويفك كربك وكربنا ...كل عام وأنت بخير

عشت يا علاء. متأكد إن ولدك هيكون فخور بيك جداً

يا علاء، انت أشجع مما تتخيل. اديتنا كلنا أمل من جديد، ألهمتنا كلنا بموقفك الثابت قدام مجلس العار. ماتزعلش، الحق ينتصر دائما في النهاية، وهاييجي اليوم اللي هاترجع فيه تاني لبيتك وعيلتك. كلنا فخورين بيك

م ~~

بجد انا مش عارفة أقول إيه...بس أكتر حاجة حاساها ان طول ما علاء و اللى زيه موجودين الثورة ان شاء الله مش هتضيع...انا فخورة اوى ان فيه شباب زى علاء فى بلدى و كل مافتكر ان الناس دى كانت بتنحت ف الصخر و بتحارب مبارك و نظامه ف عز قوته بحس اد ايه انا كنت تافهة و صغيرة...ربنا يقويك يا علاء و يصبر مراتك و عيلتك ويفك أسرك قريب ان شاء الله

لا تيأس ... فأنت الان تكتب التاريخ المشرق من داخل زنزانتك المظلمه

ربنا يحميك ياعلاء وان شاء الله البلد هتنضف وانت وكل الشباب المسجون عسكري هيخرج وبلدنا هتبقي احسن غصب عن عنيهم خونة مصر والشهداء... ولا يهمك اللي انت فيه دا مش ضعف انت قوتنا كلنا بموقفك دا .. وزي ما انت تحملت الصعب علشان مصر وشبابها ربنا مش هينسي ولا هيخزلك في زوجتك وطفلك.. يارب بحق ليلتك المفترجة ووقفة عرفة ودعاء كل المصريين والمسلمين تفرج كربه وكرب كل مظلوم وتعيننا علي الانتقام من خونة مصر ومجلس العار

إنت جدع يا علاء ... دقات جدع ... ربنا يحميك ويقويك ويقوم مانل بالسلامة إن شاء الله! كل سنة وإنت وحنيبك طيبين! خالد حيبقى فخور قوي بعيلته كلها!

ربنا يهون عليك اللى انت فيه ... وهنطلع قريب اوى ان شاء الله

We publish our translation of Egyptian blogger and revolutionary Alaa Abdel Fattah's latest letter from prison, where he remains detained for "insulting" the Egyptian military.

http://ceasefiremagazine.co.uk/new-in-ceasefire/alaa-writes-prison-a-real-man/

الاكيد انك لا تعرفنى الاكيد انك قد لا تقرأ هذا الرد ما انا واثق منه انى و انا فرد من الاخوان المسلمين تعملت ان احترم الرجل( وقليل من هم رجال ) مهما اختلفت او اتفقت مع اراءه و تعلمت انى عندما احب شخص فابلغه بحبى له يشهد الله العظيم انى احبك فى الله احبك لانك ما تركت موقف فيه مظلوم او مقهور الا و سارعت لنجدته و هذا و الله عين الرجولة و جلاء الشهامة يشهد الله ان الليلة هى ليلة وقفة عرفات انى ادعوا لك بظهر الغيب ان يجعل زنزانتك التى يحبسك فيها هؤلاء الجلادين واسعة و ان تكون روضة من رياض الجنة يشهد الله كم انا مقهور لانى حتى الان لا املك لك سوى الدعاء و لا املك لك سوى بعض الامنيات الطيبة و لكن عسى الله ان يقبل منى ذلك حتى ياتى الوقت و الان فانصرك بكل ما املك لا تعلم كم يمر على هذا العيد و هناك شرفاء مسجنون خلف القضبان ظلما و بهتانا و لكن لا تحزن على حالك فقد اعزرت الى الله و قلت كلمة الحق من يجب ان يحزن هو الذى ما زال صامتا ختى الان اتمنى من الله ان تخرج قبل ولادة خالد و ان يمر العبد عليك و على زوجتك و على سائر اهلك و قد انزل الله فى قلوبهم السكينة و الاطمئنان فلا يشعرون بالمرارة و لا يحسون بحسرة الفراق جزالك الله عنا خير

I am an Egyptian who migrated to Australia 45 years ago but still calls Egypt home. I frequently send comments to Ahram Online but I don't feel I am helping enough. If I can assist in any way, please contact me.

I have added my voice with all my Egyptian brothers asking for your release and for fair representation in a civil court, not an army court. I am following your blog and am proud of both you and your wife.

I have attached 2 links for your perusal. This is to let you know that the world can hear and see the plight of our beloved country and that your struggle is not in vain.

Keep up the struggle, you are not alone, the world is with you.

http://www.youtube.com/watch?v=4880PRuLIWM&feature=youtube_gdata_player

www.youtube.com/watch?v=4EkUjJ8tXLM

يمكن كلام علاء ده يكون هو ما يجعلنى دائما مرتبط بيه بشكل او باخر هو مش بس صادق مع نفسه كمان صادق معانا ودايما حاسس انه حايتسائل عن مواقفه واللى هو عمله فعلا يستاهل انه يفخر بيه صحيح فى ناس اتبهدلت اكتر منه بس مش كلهم واكرر مش كلهم اختاروا المصير ده لكن علاء اختار وهو عارف انه مش شىء مضمون كان ممكن ومازال رد العسكر يكون افظع من كده ولكن ربنا يستر وحكاية انه لم يستشير منال كلمة مهمة جدا لانها ببساطة بتجسد واقع اى مجاهد وعلاء مجاهد علاء زى ما بنقول فى ادبيات الدعوة اختار انه يغير المنكر بلسانه وبقلبه بالطبع والمجاهد دايما بتشده التزاماته الى القعود والمجاهد الحقيقى هو الى بينتصر عليها و_انفروا خفافا وثقالا_ ولنا بدعى من كل قلبى ان ربنا ينجيه على خير ويكلل تضحيته بالنجاح ويصبر مراته ويثبتها ويرزقهم باحلى خالد محمد السياجى - المحلة

و الله ما عارف اقولك ايه يا منال انتى وعلاء --- ربنا معاكم ومعانا --- و لكي ان تفخري بعلاء و بصدقه و نقاءه ----- خالص احترامي ليكي و لعلاء و اعتقد ما حدش فينا هيسكت ولو وصلت لإيه

الحرية لعلاء.. علاء رجل مصرى بمعنى الكلمة.. مناضل مخلص من زمان.. مدونته معروفة على مستوى العالم.. كنت أسمع عن مدونته الشهيرة الى أن قابلته مرة واحدة هو وزوجته فى مؤتمر دولى بمكتبة الاسكندرية منذ سنوات.. علاء وزوجته مناضلان مخلصان.. علاء لايستحق السجن فهو ابن مصر البار.. أطلقوا سراح علاء..

المسجون يسجن سجانيه

صعب علي أجد كلام مناسب بعد أن قال علاء وأهله كل ما يمكن أن يقال-البطل الأسطوري شخصية خرافية غير موجودة وتبعث على اليأس-أما البطل الحقيقي فهو كأبو خالد بالضبط:قرفن من الحمام والصراصير ويضيق بالزحام والظلام ولا يخجل من الاعتراف فخورة بك ياابو خالد\فخورة بام خالد-واضع نفسي تحت أمرها ومنى تعرف ازاي توصل لي ودعائي وقلبي مع العائلة الكريمة كلها-انت اهديتنا العيدية قبل العيد وقدمت حريتك ثمن وكانت أغلى واحلى عيدية

احنا اسفين يا علاء لاننا سكتنا على الى بيحصل لك ولزملائك احنا اسفين لاننا جبناء ومش عايزين ندفع ثمن الحرية كاملا احنا اسفين عن كل يوم صدقنا فيه اننا انتصرنا وكدبنا ناس قالت ان المجلس مش بتاعنا احنا اسفين يا مصر لاننا صدقنا مجلس كله صناعة مبارك واخلينا الميدان علاء صدقنى انت حر فى محبسك لانه دخلته بارادتك اما نحن فالعار سيظل يطاردنا ما حيينا ما لم نكمل طريقنا الذى بدأناه اكيد ربنا كتب علينا الموت لانه قدر محتوم ولكنه لم يكتب علينا الذل

عملت الصح واثبت على موقفك..وقولهم انهم لو قبضوا او حاولوا يحققوا مع اى شاب تانى هيكون رده "مش هرد عليكم زى ما علاء مردش" انت قريب جدا هتخرج وهنكمل ..ربنا يعينك ويعين زوجتك الكريمه وطفلك ويحميكم ربنا..أنت رجل ولست دكر ..لأن الذكر يولد هكذا بلا تدخل لكن الرجل فهو يربى نفسه هكذا مثلك انت..رجل يا علاء انت ..واوعى تفكر انك مش حر انت حر لان عقلك وقلمك حر..وحبس الجسد قريبا سينتهى بأذن الله

علاء شد حيلك السجن بقى للثورة و عشان ده يتغير لازم حد يقف وقفه راجل و نوارة مش بتمدح فيك كده لأ لو مكنتش راجل مكنش حد سأل فيك ربنا ينجينا ويكرمنا و يباركلك في خالد

You're earned the respect of many for your dedication to reforming Egypt prior to the revolution and inspired many during and after the after the revolution. We're all human and we all have weaknesses. There is nothing to be ashamed of.

I respect you for dreaming and acting on these dreams!!! You will be free soon along with the rest of Egypt.

Amro Khalifa, NY

ربنا معاك يا علاء ويصبرك. ........ واحد سلفى : )

ربنا معاك يا علاء انا ماكنتش بحب طريقتك في الكتابة واستخدامك للشتايم بس مؤمن بقضيتك وانت اشجع من ناس كتير قوي

Thanks Alaa, U've inspired us and I'm sure u'll reunite Egypt again. Our thoughts and prayers are always for u and yr family, wife and baby. Take care and know u r not alone.

أحيك على شجاعتك واتساقك مع نفسك في الظروف اللي انت فيه

بكره أحلى إن شاء الله وابنك هيعرف وهيشوف أبوه الراجل الشجاع اللي عنده مباديء وبيعشها...

انا مش عارف لإمتي هتفضل البلد فيها سلطات بالقذارة دي بس ع العموم الفرصة الأخيرة ادام المجلس لحد 25 يناير الجاي

بردوا دكر

كل سنة وانت طيب يا علاء بمناسبة عيد ميلادك غداً .. وهو شرف لك يا علاء ان تكون فى هذا اليوم وراء القضبان فى سجون النظام الظالم .. ولكن الله قادر ان ينقذك من هذة المحنة ويعيدك سالما الى اسرتك وزوجتك و الى ابنك الوليد .. وكل سنة وانت طيب ايها البطل الشجاع .