You are here

أنت فين يا عزرائيل

Primary tabs

من يوم ما بدأ المدونون يتابعوا كفاية و يتكلموا عن مبارك ظهرت تجارب لطيفة لعمل مادة سمعية و بصرية هذلية تتمقلس على فرعونا مبارك و الباشا ابنه، نشر منها عندنا ثلاثية القناع الأسود و اللعبة التي حاذت على اعجاب الجماهير طاو طاو يقدم مبارك و عصابة البنزين. و طبعا مننساش في هذا الصدد ابداعات محمود توفيق زي باطل و نصف.

لكن للأسف في كل مرة لقينا حد بيطلع بحاجة و لا اثنين و بعدين يتوقف. لحد ظاهرة أحمد شريف.

أحمد انتاجه غزير لدرجة أني مش قادر أتابعه، كل يومين تقريبا تلاقيه عمل فيديو أو موسيقى جديدة، متابع لكل الأخبار و مغرق المدونين و النشطاء مجاملات و كلام حماسي أكثر مما يستحقوه بكثير. الشغل بروح مصرية جدا لكنه فاهم برضه ازاي يعمل رسالة تخاطب الأجانب وقت الحاجة. و طبعا بسبب غزارة الانتاج المستوى بيتذبذب أحيانا لكن بيفضل أغلبه حلو جدا.

و بمناسبة تجاهل عذرائيل لدعوات و آمال عموم المصريين سنة كمان تعالوا نغني مع أحمد الشريف

سنة حلوة يا جميل سنة حلوة يا زعيم سنة حلوة يا ... مزور يا جبان يا فاشل يا قاتل سنة حلوة يا حرامي و بالمرة برضه نشكر سيادة الرئيس على جمايله اللي مغرقانا و نغني مع أحمد الشريف

سانكيو على الفقر على القذارة على القرف سانكيو على المجاري الطافحة سانكيو على الزبالة

Comments

عزرائيل بالزين مش بالذال

هو عذارئيل كان جي ياخده من تلات سنين

بس واحد من جهنم - منه لله - رفع قضية عشان

مبارك ميجيش عندهم

بحجة ان وجوده معاهم يتنافي مع الرحمة الالهية

و كمان لان الكتب السماوية اتكلمت عن النار و العذاب لكن لم يرد ذكر لحسني في اي منهم

و لسه من اسبوعين كان في مظاهرة كبيرة في الجحيم - تبع حركة اي ان او يو جي اتش - و علقوا يافطات كثيره مثل - متفقناش على كده - و - هو انت ورانا ورانا -

و مع انتشار الخبر بدا بعض الشياطين من ذوي النفوس الضعيفه المقابله مع رجال الدين ليناقشوا امكانية ان يتوبوا و "ينفدوا من جهنم"

و المحامي "حلاء سكينة الكفر" ماسك القضية اللي بقالها تلات سنين دلوقتي

جدير بالذكر انه في حاله فوز سكان جهنم بالقضية هتطر الملايكة تجهز جهنم مخصوص للبيه

لكن المسؤلين رفضوا التكلم عن حجم الجهنم الجديد ده او كمية البنزين اللي هيستهلكها اشعاله

هاستغل الفرصة دي واسأل، بعد ما انت وصاحب الأشجار كتبتوا عنه مخصوص، وعرباوي كل شوية يفرجنا على حاجة بتاعته:

إيه اللي عاجبكو ف شغل أحمد شريف؟ مش باستنكر، يمكن أنا مش واخد بالي.

عموما مبعرفش أرد على السؤال بتاع ايه اللي عاجبك في كذا.

في حاجات من شغله عاجبني فيها المزيكا و فيه حاجات عاجبني الفكرة، لو دي تنفع اجابة. عاجبني أن حد بيحاول يدور على طرق مختلفة و مبتكرة بدل من استسهال تكرار الشعار و خلاص لأني شايف أن ده مهم في استمرار حالة الاعتراض على و الاستهزاء بالنظام الحالي.

مهواش عاجبني طبعا بدرجة أني أشغله كل شوية من باب الاستمتاع، أنا بتعامل مع الشغل ده على أنه زي الاعلان، يعني حاجة ليها وظيفة محددة، أكيد ممكن يعجبني اعلان أو اعتبار أدى وظيفته لكن في النهاية مش هروح أشغل اعلان عشان أتسلى.

ثانيا متعودتش منك تستهبل يا حمكشة، لما تقول يمكن مش واخد بالي تبقى بتستنكر، عايز تستنكر استنكر براحتك مش عيب.

أولا أحمد شريف عكسك خالص. يعني بيحاول يدور على حاجة كويسة في الناس ال قدامه.

الموسيقي في منها كتير كويس جدا، و إن كان محتاج إنتاج أحسن: يا حرية فينك فينك. روبي ضد مبارك؛ كفاية، و الفكرة ساعات بتبقى قوية زي لما إسلام نبيه أخد أحسن مخرج، أو لما ترجم أوامر الضابط للصف.

أخدت لي بالك؟

-- حوليات صاحب الأشجار