You are here

عاجل: المعتقلين بدأوا اضراب عن الطعام و اعتصام أمام قسم الظاهر

Primary tabs

بما أن استهبال أمن الدولة ملوش حدود لم يفرج عن أي من معتقلي كفاية لحد دلوقتي رغم أن النيابة أمرت باخلاء سبيلهم كلهم، مأمور و ظباط قسم الظاهر أظهروأ أنهم مخصيين و غير قادرين على تنفيذ قرار النيابة بدون أوامر مباشرة من مباحث أمن الدولة و طبعا أمن الدولة سايقة في الاستهبال.

المعتقلين بدأوا اضراب عن الكعام احتجاجا على استمرار احتجازهم اللي ملوش أي مبرر و مأمور قسم الظاهر الجبان رفض يعمل محضر يثبت فيه الاضراب.

كمان فيه اعتضام أمام قسم الظاهر تضامنا مع المعتقلين و من أجل تشكيل ضغط على ظباط المباحث و مأمور القسم، يا ريت اللي يقدر يشارك، القسم قريب من ميدان السكاكيني بمنطقة الظاهر (قريب من محطة مترو غمرة و منزل كوبري أكتوبر بتاع غمرة برضه و اللي يسأل ميتوهش).

و أكتب على حيطة الزنزانة حكم مبارك عار و خيانة

Comments

احنا عارفين الحركات القذرة دي كويس ومش أول مرة يتحبس لنا حد.. أنت نفسك اتبهدلت بعد قرار اخلاء سبيلك.. أنا مش عارفة احنا لية مبنتعلمش! بنهدي الجو والميديا والناس ونفرح بالقرار رغم أن المعتقلين ممكن يتبهدلوا أو يتعذبوا أو يلفوا كعب داير بعد اخلاء السبيل

فاكر بهدلة كريم كوفو ومالك؟ والمعتقل التاني بتاع حزب الغد اللي بعتوه البحيرة؟ محدش يقول هيه ولا يقول اخلاء سبيل الا لما كل الناس تروح بيوتها والنبي

محدش هدا الجو يا نورا عدد اللي تواجدوا قدام القسم كان أكبر من عدد اللي تواجدوا قدام النيابة و أكيد يعني منسيتش البهدلة اللي اتبهدلتها في القسم، الفرح بالقرار رد فعل منطقي لأن بهدلة الافراج هتحصل بغض النظر عدد أيام الحبس فده فرح بقلة عدد أيام الحبس.

و مش محتاجة أفكرك أن دي مدونة بقول فيها اللي أنا حاسس بيه، و وقت خبر اخلاء السبيل كنت عايز أقول هييه، مظنش أن قولة هييه دي تسببت في أنهم يقضوا وقت زيادة في الحبس.

meen 3aref, mesh momken olet "heeeh" di tellabessak tohmet ta7reed ded el nezam wal far7a bekhroog 3anaser beyheeno el rayes webeyza3za3o el amn?

هل يشترط ان اكون احد المدونين او احد اعضاء كفاية او غيرها من حركات معارضة الاستبداد و الفساد فى البلد حتى اتمكن من المشاركة فى النشاطات الت تقومون بها من مظاهرات او غيرها ألا يكفى كونى مصرية احمل دماء هذا الوطن و كل الانتماء له و اعنى لامر كل ما يجرى من احداث و كوارث به الا يكفى هذا لاتمكن من مشاركتكم و عموما أقسم حتى لو كانت هناك شروط انا مؤهلة و مستعدة تماما لادائها و لكن ساعدونى بالله لاكون طرف فعال بشكل اوقع و لا تتجاهلوا رسالتى بالله عليكم لانى اعنى كل حرف في مما قلت ارجو الرد على باسرع ما يمكن ارجوكم باسرع وقت بالله عليكم انا بانتظار هذا الرد

احيانا اشعر انه يوجد عالم مواز لنا عالم مكون من ضباط الشرطة لابد ان ما نسميه نحن مضايقات امنية لابد ان هذه المضايقات الامنية اسمها عندهم مسابقات امنية انا ما نسميه نحن تعذيب وانتهاك لابد انه يحمل عندهم اسماء مثل مسابقة اسرع قفا/او ادخل العصاية في مكانها الصحيحة/او اسحل واجري لابد ان ما نسميهم نحن اشرار في عالمنا يطلقون عليهم هم اسم الابطال كل من قرا رائعة جورج اوريل 1984 او الراجل الراكض التي تنبأ فيها بنهاية بمصير العالم بعدة فترة من حكم الاستبداد سيفهم ماذا اعني لكن دعوني الان اتساءل هو ليه الواحد حاسس ان السجن في مصر مالوش قضبان

و أكتب على حيطة الزنزانة **حكم مبارك عار و خيانة وأكتب على كل بيت ** حكم مبارك خرب البيت ** وأكتب بدماء الغلابه وأكتب بأرواح الطيابه ** حكم مبارك خلى مصر ** ** أكبر سجن في كل عصر **وأكتب وأكتب وأكتب كمان عن بلد يحكمها ابن سوزان ** بلد كلها رجاله مش نسوان ** بس الأيام صعبه عليهم والأزمان ** ** يارب يجي اليوم والقى مبارك مطرود من مصر داري ودارك