You are here

عاجل القبض على أكثر من 20 متظاهر من ضمنهم اثنين مدونين

Primary tabs

تحديث على الأقل مجموعتين من المعتقلين بيتم ترحيلها دلوقتي، أخر الأخبار كانوا واقفين في صلاح سالم بالقرب من منشأة ناصر

اثنان مدونين من ضمن المعتقلين محمد عادل صاحب مدونة ميت و محمد طاهر صاحب مدونة مواطن مصري واخد على قفاه

أنا لسه هربان من مظاهرة التحرير دلوقتي، الأمن هجم بعنف و اتفتت المظاهرة لثلاث مجموعات على الأقل و بعدها بدأوا في اختطاف الشباب المتظاهرين

قدام عيني قبضوا على بهاء صابر و أربعة أخرين

محمد عادل (ميت) اتصل بي و كان فيه دوشة حواليه و كان بيوشوش بيحاول يقوللي حاجةـ بعدها تليفونه فصل، أنا قلقان يكون اتقبض عليه هو كمان.

قبضوا على 20 واحد على الأقل و أحنا بنحاول نجمع أساميهم

حاليا والدتي الدكتورة ليلى سويف و الدكتورة عايدة سيف الدولة و معاهم اثنين ثلاثة كمان معتصمين في ميدان التحرير (أمام مسجد عمر مكرم) و رافضين يمشوا الا لما يتم الافراج عن كل الشباب، المعتصمين محاطين بألاف من جنود الأمن المركزي و كلاب مباحث أمن الدولة.

في مجموعة متظاهرين متجمعة بالقرب من حزب التجمع و مجموعة أخرى عند نقابة الصحفيين.

مظاهرة التجمع متحولة الى اعتصام مفتوح الى أن نعرف أخبار المعتقلين و الكل بيضم عليها.

وصلنا اتصال بيبلغنا بترحيل المعتقلين الى قسم الدراسة

هنحدث التدوينة دي كل ما توصلنا أسامي

المجموعة الأولى (أسامي مؤكدة)

  1. نادية رشاد
  2. محمد عادل
  3. محمد طاهر
  4. وليد صلاح
  5. أحمد الجندي
  6. عبد الخالق فاروق
  7. محمد مالك
  8. محمود الورداني
  9. أحمد علاء
  10. عمر ابراهيم
  11. حسام شعبان

باقي المجموعة

  1. نائل يحى
  2. أحمد عبد الجواد
  3. محمد فتحي
  4. محسن سميكة
  5. رامي توفيق
  6. فتحي فريد
  7. محمد عبد اللطيف
  8. مصطفى سيد اسماعيل
  9. محمد سعد عبد الحميد
  10. صلاح وتيدي
  11. عبد الهادي المشد
  12. عامر عبد المنعم
  13. محمد عبد السلام
  14. بهاء صابر
  15. خالد عبد الحميد
  16. محمد بدر
  17. اسلام ؟؟؟؟؟
  18. بلال ؟؟؟؟
  19. أحمد عبد السلام
  20. عمر عادل؟
  21. على عبد الحميد؟
  22. عماد صابر؟
  23. محمد اسماعيل؟
  24. كريمة الحفناوي

Comments

Sorry for my ignorance .. but what demonstration was this?

أحة

لازم نعمل حاجة يا اخواننا مش كل مرة كدة

معلش يا علاء، علقة تفوت ولا حد يموت!!!! و ربنا يطمنا على الرجاله!!!

أي أخبار جديدة عن مكان المعتقلين؟ في فيديو أو صور للمظاهرة؟؟ ماهو تقديرك للعدد؟ تقريبا يعني كيف بدأت المظاهرة وماهي التيارات السياسية -بجانب كفاية- التي تواجدت فيها؟ هل هناك إصابات؟

شكرا علاء, سمعت عن خبر الإعتقالات فسارعت الى مدونتك لأعرف التفاصيل ولم تخذلني

الوضع كان فوضى جدا و الضرب و الخطف بدأ في الشوارع قبل التجمع أصلا، يصعب أني أجاوب على الأسئلة دي.

الحاجة الوحيدة اللي رصدتها أن في المعتقلين و المعتصمين في وجوه جديدة كثير و ده معناه أن كان ممكن تبقى مظاهرة ناجحة. يمكن أكتب تدوينة بكره بعد ما أستريح.

انا مبسوط جداااا انك بتقول فى وجوه جديده لانى كنت واحد من الوجوه دى فى المظاهره اللى كانت لدعم لبنان من حوالى كام شهر فاتو وكان الحافز الاساسى ان اخرج للمظاهره واسافر للقاهره هو التدوين وانى لقيت شباب زى ناشط وبيعمل حاجه .... المشكله بقى ياعلاء انى كنت رايح لوحدى ومعرفش اى حد كان فى المظاهره ومش هكدب واقلك كنت مرعوب من اللى شايفه وقلت انا هنضرب وهتهان اكيد النهارده وحتى لما كلمتك يومها مش عارف اذا كنت فاكر ولا ﻷ كان عشان أطمن نفسى ان فيه حد اعرفه حتى لو مشفتوش قبل كده ولما لقيت مالك وعمرو عزت من المدونيين اللى بقراهلم موجودين حصلى اطمئنان داخلى ......

المشكله بقى دلوقتى انى مكتئب وخايف جداا من تصعيدات اﻷمن كل مره ومش عارف هيروحوا بينا لفين وخصوصا زى مقلتلك زى حالاتى مش ناشط ومعرفش حد ممكن يساعده لو وقع لكن انت طمنتى بتدوينك الاخيره دلوقتى ان فيه محامين شغالين مع الناس

علقت بكلام كتير ومش مرتب بس دا شعورى دلوقتى ):

المحامين هيدافعوا عن كل حد و أي تحرك بيبقى للجميع، و نسبة من الأسامي دي محدش كان يعرفها لحد ما اتقبض عليهم، منتاش محتاج تكون ناشط معروف أو عضو حزب عشان نجري عليك

المشكلة فقط و اتقبض عليك لوحدك، هنعرف ازاي ؟

و دي حلها أنك متعملش أي حاجة لحد ما تنضم لمجموعة، يعني محدش يهتف لوحده أو يتشاكل مع البوليس و هو واقف لوحده.

انا ذهبت تلبية لنداء الدكتور عبد الوهاب المسيرى وهالنى الوجود الارهابى وليس الامنى فكان الداخلية هى صاحبة الدعوة للمظاهرة والتغطية منهم على اوسع نطاق جغرافى اظنه لم يحدث من قبل وصلت حوالى الخامسة الاربع بحثت عن المتظاهرين فلم اجد اح (بالطبع انا لايعرفنى لانى غير مشارك باى فاعليات بشكل اساسى ولكنى متعاطف حتى النهاية واحاول الخروج من شرنقة الخوف التى تملا المصريين وكثيرا ماذهب الى المظاهرات ولكن حين اصل لا اقوى على المشاركة بقلب جامد خصوصا حين ادرك او افترض انه اذا قبض على فاولا لااحد يعرفنى اساسا ليكتب اسمى ضمن المقبوض عليهم حين تاتى لحظة الافراج عنهم واهلى لاظهر لهم مطلقا وبالتالى اخشى الدخول الى ثقب اسود )المهم تجولت فى شارع طلعت حرب ثم دخلت على شارع محمود بسيونى حتى المتحف ثم الى بداية طلعت حرب ولم اجد اى مظاهرة الى ان سمعت لواء شرطة يسال احد هم مشى قنديل واللى معاه فقال له مش قنديل ثم استمروا فى المشى فى طلعت حرب حتى المبنى الادارى اللى امام فلفلة ورايت مجموعة تهتف فلم يمهلوهم فرصة وسحب منهم عدد ما الى سيارة لورى من الداخلية لونها ازرق ثم رفعت مجموعة منهم شعارات كفا ية الدائرية الصفراء سائرين فى اتجاه طلعت حرب وحوصروا عند بداية الميدان واجبروهم على عبور الشارع فى اتجاه دار الشروق الى قصر النيل وفرقوهم ثم بدات تظهر حركة فى شارع محمود بسيونى فاذا بمجموعة محاصرة فى شارع كريم الدولة تهتف ثم تجاوب معهم عدد قليل من شرفة حزب التجمع واستمر الحال على ذلك اكثر من ساعتين داخل الحصار وكانت هناك هتافاتمن شرفة حزب الغد تجاوبت معها بعد فترة عدد كبير من شرفة حزب التجمع ولكن هناك امر غريب لفت نظرى وهو ظهرت فتاتان تدخلان الى الجيب المحاصر وهم يرددون كلام بطريقة شعبية جدا مثل حسبى الله ونعم الوكيل ربنا يوريك فيك يوم ربنا ياخدك وهكذا ثم دخلوا الى الجيب المحاصر وبعد فترة طويلةرايتهم يخرجون فى شكل مظهرى الى حد ما وقتما خرج الاستاذ محمد عبد القدوس ويدورون حوله فى منظر كان الشرطة تحاول القبض على شحص ما واخواته البنات يدافعن عنه بنفس الشكل الشعبى وركب عبد القدوس تاكسى وانزلوه منه ثم سار على قدميه الى ميدان طلعت حرب وحوله جمهرة من الشرطة ونفس الفتاتان وهناك ركب تاكسى اخر ومعه هاتين الفتاتين ثم ظهرن مرة اخرى بعد اقل من ربع ساعة عند الجيب المحاصر فى كريم الدولة الا انهن مشين فى اتجاه ميدان التحرير وام اتابعهن وشادت ايضا الدكتور محمد السيد سعيد وكانه قادم من جهة الجيب المحاصر وسار الى طلعت حرب

ياسادة انتم تتعاملون مع اناس يدافعون عن امتيازات نالوها وحصلوا عليها فى ظل هذا النظام فهم يتعاملون معكم من منطلق الدفاع عن لقمة عيشهم وتلك هى الكارثة فبالتالى هم ليسوا فى حاجة الى اوامر لقمع المظاهرات ولكنه منطق اللى يجى على لقمة عيشى اموته او يا ناوى على قوتى يبقى ناوى على موتى او ماشبه هذا الكلام

انا كلمت محمد عادل بيقول لى رايحين قسم الظاهر

مصطفى سيد إسماعيل هو مدون إسمه مصطفيتش ممكن تضيف اللينك بتاعه و شاعر و عضو في مندرة كفاية بإسم نجيب سرور

هو صاحب مدونة حاجاتي http://hagaty.blogspot.com/

تصحيح للاسم الاخير مش حسام شعبان عصام شعبان، باحث زميلنا فى مركز آفاق |إشتراكية ولو عرفت أى حاجة تانية هبلغكم

محمد طاهر اتصل بيا يا علاء و قال انه خرج هوه و فتحى فريد

لكن ابن خالته لسه محبوس


صباحك زى وشك يا مصر

تخــا تخـــا تخـــاريفى

http://t5at5a.blogspot.com

مصطفى سيد اسماعيل المعتقل هو المدون مصطفيتش ومدونته اسمها حاجاتي http://hagaty.blogspot.com/ ولو تقدر تنزل القائمة النهائية بأسماء المعتقلين التلاتين اللي اتحجزا في قسم الضاهر يبقى كويس هل فعلا الطاهر أفرج عنه؟ طب الباقيين أخبارهم إيه؟

ايه رأيك في مظاهرة تدوينية يا علاء

عارف اغنية يا قبضتي دقي على الجدار اللي كانت في البرئ:

يا قبضتي دقي على الجدار

لحد ليلنا ما يتولد له نهار

يا قبضتي دقي على الحجر

لحد ما تصحي جميع البشر

لحد ما تتفسر الاسرار

مش فاهم اللي حاصل

لكن بقلبي واصل

واللي مش فاهمه عقلي

بتشرحه السلاسل

يا قلوب بتنزف دم في العتمة

يا قلوب بتنزف دم وتغني

سجنوكي والكلمة

والكلمة غصبن عنها وعني

طلعت من القضبان وم الاسوار

=========

يا ريت يا علاء تعممها على كل المدونات

انا قلت لوائل برضه

ياريت كلنا نحطها وتبقى شعار المدونين

ومظاهرة تدوينية ما يقدروش يطلقوا عليها قنابل مسيلة للدموع

الاكواد بتاعتها اهه

Myspace Mp3 Player, MySpace MP3 Players, Flash MP3 PlayersCheck out this MySpace MP3 Player!


نشيد حلو بس يريت حركة كفايه تغير مكان المظاهرة ويقف الكل مشبكين ايديهم ويغنوا معا النشيد الوطنى لمصر

والله انا نزلت للمظاهره في الميدان و انتظرت على قهوة وادي النيل الساعه جت 5 لاقيت واحد معرفش رتبته( لابس ملكي) جه اخدني من مكاني و اتنين مخبرين بيشلوني و بترمي فمكوباص ازرق في ايه في ايه استلموني اسئله اسمك , ذقنك طويله ليه , لنت من بتوع كفايه بقي طب هنشوف , مترد وحيات اممك ....

و بعدها بسعتين من الاسئله و الاهانه سابوني على شرط انني اتجه للمواصلات و على بيتنا بدور على اعضاء كفايه مفيش حد الميدان فيه عساكر بس كانوا فين كفايه بقي قلولنا ميدان التحرير عشان يروحوا عند زقاق حزب التجمع و ننضرب و ننهان احنا في الميدان ؟ Help Set Egypt Free http://masr-heya-ommi.blogspot.com/

كنا في ميدان التحرير فعلا، و أنا شفت خمسة بيتقبض عليهم من المديان

الناس اللي اتقبض عليها في أماكن أخرى الأمن لقطها و هنا في طريقهم للميدان (على أساس أنهم كانوا معروفين للأمن) و الباقي انضرب لحد ما تراجع عن الميدان

ده كله حصل بسرعة جدا و في الأول خالص، أنا وصلت الميدان 5 و ربع كان أغلب المتظاهرين و جزء كبير من الحشد الأمني انسحب لشوارع وسط البلد لدرجة أني قعدت لحد ما شفت بهاء و مجموعته بيتقبض عليهم متخيل ان اللي كلمني في التليفون يحكيلي عن الضرب و الاعتقال بيدلع أو بيهول و مفيش نصف ساعة و لقيتني مضطر أهرب خالص.

مبرووووك ..يا جماعة .. كل الناس اخدوا برائة.. انا لسة جي من النيابة.. وهيخرجوا من قسم قصر النيل


http://x-ist.blogspot.com , http://CAESAr-DIABLo.shadowness.com .::I'LL iNJECT tHEM wITHA pOISON::.

قسم الظاهر يا بوب مش قصر النيل