You are here

معا من أجل كرامتنا ... معا من أجل سلامتنا - نشوفكم يوم السبت و ميفتكوش الفيديو

Primary tabs

التعذيب و المعاملة الغير انسانية من أكبر المصايب اللي بتواجهنا في مصر، و أظن بقى واضح خلاص أن الكل عرضة ليها، من أول سائق الميكروباص الغلبان عماد الكبير للمظهرجي الشقي محمد الشرقاوي لحد ابن الأكابر أمجد مختار، و طبعا مش فارق راجل ولا ست و شاب ولا طفل ولا كهل، مسلم ولا مسيحي التعذيب يمكن يكون الحاجة الوحيدة اللي فيها مساواة تامة في بلدنا.

أحمد سيف الاسلام المحامي بمركز هشام مبارك للقانون (و أبويا) عن العلاقة بين التعذيب و الاعتقال في مصر

لتنزيل الفيديو

دلوقتي أكيد تابعتوا ازاي المدونين مع الصحافة المستقلة و الفضائيات و منظمات حقوق الانسان قدرت مش بس توثق و تفضح وقائع تعذيب لكن تبحث و تتقصي و تضغط لحد ما بقى عندنا أكثر من قضية بتنظر في المحكمة على خلفية نشر فيديوهات التعذيب، و أشهرهم طبعا كليب عماد الكبير.

يوم السبت الجاي 17 مارس مجموعة من المدونين (من ضمنهم أبطال قضية عماد الكبير وائل عباس و دماغ ماك و محمد الشرقاوي و حسام الحملاوي و أسد) و مجموعة من نشطاء و محاميو حقوق الانسان (من ضمنهم الشبكة العربية لمعلومات حقوق الانسان و مركز هشام مبارك للقانون و جمعية المساعدة القانونية لحقوق الانسان) هيتجمعوا في جمعية المساعدة القانونية - 2 شارع معروف تقاطع شارع طلعت حرب 2 الدور الرابع - وسط البلد عشان نتناقش في ازاي ممكن نوسع الحملة ضد التعذيب و نعلي تأثيرها. الاجتماع هيكون من الساعة 5 مساء للساعة 9 مساء

مهم كمان نعرض المضايقات الأمنية اللي بيتعرض ليها المدونين و نشطاء حقوق الانسان و نسمع آخر أخبار قضية هويدا طه، و نتكلم شوية في ايه الحماية اللي ممكن نقدمها لبعض. هنعرض في القعدة وقع التعذيب في مصر و نتناقش في تطويره و نشوف اذا كان حد مستعد يتطوع يشارك في تحريره.

القعدة هيبقى فيها مداخلات مختلفة حقوقية و قانونية و تقنية و نتمن ى كمان أننا نتعرف على بعض أكثر و نقضي وقت لطيف برغم كئابة الموضوع.

يا ريت تشاركونا، يوم السبت 17 مارس من 5 الى 9 مساء بمقر جمعية المساعدة القانوين لحقوق الانسان - 2 شارع معروف تقاطع طلعت حرب (عمارة يعقوبيان) الدور الرابع - وسط البلد - القاهرة.

لمزيد من التفاصيل

Comments

منال وعلاء وجدت الكثير من الصعوبات في التواصل معكم خارج المدونة مش عارفة ازاي لكن هحاول اوصل وكان نفسي جدا احضر اللقاء الفكري لكن للأسف مش هقدر فهل من الممكن أن أحدكم يكتب تقرير عما حدث في اللقاء ويتنشر بعد كده على المدونة علشان اللي مسافر وبعيد عنكم واللي وراه شغل واللي عند مواعيد تتعارض مع الميعاد تقدروا تنقلوله الصورة وكأنه حضر معاكم بالصوت والصورة كمان. انا كمان عايزاك يا استاذ علاء ويا استاذة منال تتطلعوا على المقال التالي: http://12.47.45.221/article.aspx?ArticleID=50195&r=t وشكرا

All I can say is....It takes mOre than a " blOg" to change the wOrld..!

السؤال هو : انا متلخبطه شويه ..هي " قضيتكم اليومين دول " عن المعتقلين ..ولا التعذيب؟؟ لانه دي حاجة ودي حاجة ....مش كل المعتقلين يتم تعذيبهم ..ولا كل المتعذبين بالضرورة عايشين داخل السجون " واخدي لي بالك انته" إحمم صحافة مستقلة ..فيديوهات..منظمات حقوق الإنسان..مدونات ..مظاهرات

هممممم؟

اذا كان لهؤلاء قدرة تغيير ..وقوة تأثير..وقوة تخويف ..وقوة إصلاح لمافسد من نظام ..

فكيف لأحد أن يتجرأ على حق مواطن ..؟؟ أن ينتهك " عرض " مواطن ؟؟ أن يكون كل هذا الفساد والذي لا يبدو أنه يقل بل بالعكس هو يتكاثف ..؟

يعني هي الدولة بحاجة لأن تنتظر الاعلام ان يكشف ماتقوم به من أخطاء ..وبعدين تيجي لك الدولة وتعتذر وتصلح الخطأ او تحاول ان تصلحه وغالبا تاخذ سنين وهي بتصلح فيه لحد ماالناس تنسى أصلا الخطأ كان أيه ...؟

دي لعبة قذرة والي يخش فيها مابيطلعش ..

لاحظ ان الاحداث متكررة عبر سنوات ..يعني عمرها ما انتهت ولا ح تنتهي

بس شغلكم حلو ..انا عن نفسي واسمح لي ..لا أخذ حديث المدونات ..صباحي ولامسائي بأي قدر من الجدية ..

معليش ياأفندينا

تحياتي من شبرا الدوحه

{13}. :-)