You are here

مظاهرة القضاة

Primary tabs

نوصل المظاهرة عالساعة 2 تقريبا..مفيش ربع ساعة و الواحد يحس ياااه ده احنا بقالنا كتير منزلناش مظاهرات في عز الظهر كده!! مع انني كنت فى مظاهرة روض الفرج السرية الساعة تلاتة الظهر لكن المظاهرة من أولها لآخرها مكملتش نص ساعة.

عددنا كده بتاع 300 - 400، صف أمن مركزي يتيم و متفرط قصاد رصيف نقابة الصحفيين، لكن ما خفي كان أعظم.

مظاهرة التضامن مع القضاة

نسلم عالعيلة و الصحاب، و نهتف شوية. صحفية تطلب توقيعنا على بيان احتجاج على حرمان الأستاذة الصحفية سكينة فؤاد من الكتابة و النشر. يتوزع علينا منشورات و يفط صغيرة مكتوب عليها كفاية، شوية و آخد بالي انها مش يافطة عادية: دي مضرب دبان مدور و عليه ستيكر كفاية من الناحيتين.

مضرب ذباب كفاية

اد ايه فكرة عملية، بسيطة و رخيصة، و كمان ينفع تهوي بيها في الجو الزفت اللى كنا فيه. طبعا في استعارة مكنية أو مجاز مرسل في استخدام مضرب الدبان، ده غير انه بيلهمك بأفكار عن امكانية استخدامها مع الظباط و اللى يتشددولهم.

فجأة نلاقي مجموعة من شباب من أجل التغيير جايين من أول الشارع و بيهتفوا بحماس شديد، الناس على السلم اتحمست و بقيت تهتف أجمد، صف الأمن المركزي اليتيم اتحول لاربع خمس صفوف مايفوتوش المية.

بحر عساكر

و مجموعة الشباب اتخاصرت بكميات مش طبيعية من الأمن المركزي، و ابتدى التفعيص لدرجة أننا ما بقيناش شايفين غير علم مصر اللي كان شايلوه واحد منهم مع أننا كنا واقفيين على السلالم فوق خالص.

علاء نزل علشان يحاول يفهم ايه الموضوع و يصور من قريب، حصلته بعدها بشوية و خدت الكامير علشان اصور من فوق. خدت كام صورة و مادريتش بمحاولات فتح الكوردون غير بعد ما تفتح، الموضوع كله حصل بسرعة جدا. الأمن سابولنا الشارع قصاد النقابة و سدوا الشارع بالعرض من الناحيتين.

ما قلنا الشارع لنا لازم زق يعني

قبل مانزل من عالرصيف الاقي علاء جي مسنود على حد و شكله متبهدل و منهار خالص: ما فيش فايدة خلاص ما فيش فايدة ايه يا علاء اللي جرى، علاء منهار خالص و مش بيتكلم، كل شباب من أجل التغيير جم و ضموه و حاولوا يهدوه، مش عارفة احضنوا و لا اضمه..مكنتش عارفة اعملوه حاجة وحاسيت أني ماليش لازمة خالص.

النضارة ضاعت، شوية و عمو سيف جابلنا الشمبر، سليم نوعا ما..برضه التيتانيوم بينفع، تظبيط بسيط و عدسات جديدة و يبقى تمام. و لقينا واحدة من العدسات

بعد اعادة التدوير يمكن استخدام العدسة مونكل

لفيت اصور شوية، رجع الهتاف..قعدنا عالأرض و كمال خليل يهتف يا ريس يا خنيق..زور زور في الصناديق و قعدنا نغني لحد ما جلنا طلب من القضاة أننا ننهي المظاهرة علشان يعرفوا يبتدوا اجتماعهم.

عالفكرة علاء كتب عن المظاهرة بالانجليزي و هتلاقوا الصور هنا

Comments

el bahdalah baket sonet el 7ahia ....

انا شاب مصري عندي 24سنة ..فاهمين ..يعني حياتي كلها في عهد مبــــــــــــــارك..مش كفاية ..كفاية كده