You are here

تجديد تاني - another renewal

Primary tabs

State Security prosecutors renewed another 15 days to Mohammed El Sharakawy and Karim El Shaer.

جددت نيابة أمن الدولة حبس محمد الشرقاوي و كريم الشاعر 15 يوم كمان

Comments

ليه تانى علشان مانشفهومش وهم حالتهم سيئة من المعاملة ولا أيه المهم صحتهم أزاى وربنا يخرجهم بالسلامة

لا إله إلا الله ..

هو ليه كده ؟ .. ربنا يكون فى عونهم .. الحبس فى ظل ان كل اللى معاهم خرجوا شئ صعب فعلا .. الله يكون فى عونهم .. مش عارف ممكن نعمل وقفة علشانهم ولا ده صعب ..

انا بسأل السؤال ده للناس اللى بتنظم الوقفات .

ممكن طبعا يتعمل وقفات، بس مش ليهم لوحدهم لكل المعتقلين بسبب تضامنهم مع القضاة.

اتعمل فعلا أكتر من وقفة عند نقابة الصحفيين بس دي تأثيرها كان محدود، قدامنا دلوقتي اختيارين، ممكن نعمل وقفات في شوارع عشان نعرف الناس بموضوع المعتقلين (و بالمرة نقول اللي نعرفه عن كل المعتقلين).

أو وقفات ضغط على النائب العام، مش عشان دي ليها تأثيرها المباشر، بس فيه ناشب عام جديد و لازم ندبحله القطة من دلوقتي و نبهدله معانا شوية.

Also, protesting for the people still in detention sort of defeats the point for the government of keeping them there.

My understanding is that the government is holding them because of their role in the protests, so if holding them actually leads to more protests then why keep em there?

i'd say when it comes to demonstrations in these cases, the more the merrier. But yeah, "butchering the cat"(forgive the ugly translation) is also crucial!

عادي يا جماعه ما كل حاجه عندنا بقيت تمديد اشمعني يعني هما

ربنا معاك يا محمد انت وكريم ربنا مبيديش حد حاجه وحشه ابدا "ولرب نازلة يضيق لها الفتى ذرعا و عند الله منها المخرج، ضاقت فلما استحكمت حلقاتها فرجت و كنت أظنها لا تفرج

عصر القمع من مجاميعه .

تجديد الحبس للِشرقاوي وكريم من نيابة قمع امن الدولة و طلب النائب في مجلس الشعب مصطفى بكري رئيس و" صاحب " صحف دار "الاسبوع " بإجراء مقص الرقابة على فيلم عمارة يعقوبيان خاصة مناظر الهومو سيكسويل ويقول انه لما شاف المناظر دي أحس بالمهانة. يا سلام ! وما حسش بالمهانة من انتهاك أعراض البنات والشباب في المظاهرات وأقسام البوليس ؟!

اولا انا ضد المصادرة وضد الرقابة بشكل أساسي لأنه ليس من حق احد ان يحدد للآخرين يقروا ايه ويشوفوا ايه. ثانيا انا شايف ان رواية يعقوبيان رواية قمعية . خدو بالكم هنا من موقف الكاتب علاء الاسواني من حكاية الهومو سيكسويل في الرواية فهو يتعامل مع " حاتم " الصحفي الهومو باعتباره مريضا بالشذوذ ( هذه تعبيراته ) ويجعل عشيقه يقتله لأن العشيق شعر بالذنب ! الاسواني ايضا قدم سببا لتطرف الجماعات الإسلامية بشخصية طه ابن البواب الذي رفضته لجنة كشف الهيئة في أكاديمية الشرطة ( مقموع طبقيا عاوز يلتحق بجهاز قمع ) لأنه ابن بواب فالتحق بالجماعات وأعطوه تكليف بقتل ضابط في الأمن المركزي اشتهر بتعذيب المعتقلين من الجماعات فيقتله ليدخل الجنة شهيدا. ما جبش سيرة ان الجماعات قتلوا فرج فودة وحاولوا يقتلوا نجيب محفوظ وهددوا القمني بالقتل! الأخطر من ده ان الاسواني يعزي سبب " شذوذ " حاتم للطباخ أو الخادم النوبي في عائلة حاتم اللي " استعمل " الصبي حاتم وهو صغير فأصابه بالداء الوبيل .. ياساتر على التحليل . وما كفهوش ده بل قرر ان يجيب ثلاثة مسيحيين في الرواية وهم كل الشخصيات المسيحية فيها، أتنين أخوات معرصين والثالث مرتشي.

مصطفى بكري له موقف معروف من جماعة كوين بوت اللي أطلقت عليهم صحيفته اصطلاح عبدة الشيطان وقوم لوط وطالب بأقسى العقوبات لهم باعتبارهم أطراف في مؤامرة صهيونية وامبريالية ضد خضرة الشريفة اللي هي مصر! وهو كمان اللي أثار موضوع السي دي بتاع كنيسة إسكندرية في رمضان اللي فات ، وهو اللي اثار موضوع زوجة القسيس اللي أسلمت . لكن هو ما فتحش بقه لما الأمن والبلطجية كسروا عظم المتظاهرين وانتهكوا إعراض البنات اللي تضامنوا مع القضاة . مصطفى بكري ربنا فتح عليه بشدة فتحول من مندوب اعلانات الى صاحب " مؤسسة " للنشر وعنده جرايد ونفوذ وعضو مجلس شعب!. وكله من عرق الجبين عقبالنا.

لكن بقول نحن الكتاب ضد المصادرة للفلم أو الكتب أو استخدام سيف الرقيب.. لكن في الوقت نفسه ندين رواية زي يعقوبيان. بدون ما نطال بالمصادرة او القص. رواية قمع فيها الكاتب علاء الاسواني الشخصيات المهمشة في المجتمع المصري مثل النوبيين والمسيحيين والهومو واعتبرهم زي ما ببقول في الرواية " ظاهرة فساد " وسبب فساد لمجتمع . المدهش ان الاسواني قمع شخصياته أخلاقيا علشان يرضي الرجعيين وغازل الجماعات وهزأ المسيحيين . لكن وبتوع القمع الرسمي من الناحية الثانية يقمعوا الاسواني !

المقموعين زي الشرقاوي وكريم من جهاز قمع نيابة امن الدولة يطالبوا بحرية كل الناس .وما زلنا نطالب بحرية كل الناس لكن موش في القمع. عجبي عليكي بلد .. نزرع القمح في سنين وتطلع الكوسة في ثواني!

يابنى اتكلم فى الموضوع احسن وبلاش تتحفنا بالتحليلات الجهنمية ديه.

على الاقل انت فهمت اني بعمل تحليلات وفاضي وما وريش حاجة . وفهمت كمان اني سبت موضوع كريم والشرقاوي وخرجت عن الموضوع .طيب ايه هو الموضوع ؟ الموضوع هو قمع ( ارجو ما تكونش قمع دي مزعلاك ) الراي الآخر . اي واحد عنده سلطة زي وكيل نيابة امن الدولة بيقمع الآخر . الآخر هنا الناس اللي طلعوا في المظاهرات. طلعوا ليه ؟ لأن الحكومة حاولت تقمع القضاة وتمشيهم جنب الحيط.

دور الكاتب في اي مجتمع انه يقف مع المهمشين والمظلومي . ده ما عملوش الاسواني في رواية عمارة يعقوبيان وانا متأكد انك لو قريتها حا تاخد بالك من اللي بقوله وموش مهم توافقني او.. لا . لكن المهم تتعلم كلنا ازاي ان موضوع الظلم واحد بالرغم انه يبدو انه موش واحد. يمكن يكون رأيك لو نتكلم في موضوع الشرقاوي نشتم الحكومة . طيب وبعدين ؟ او نولولول ونقول ربنا معاكم والله اكبر على الظالم وابن الحرام وكل واحد يروح بعد كده وضميره مرتاح ويقمع التانين اللي اضعف منه. انا متأكد ان وكيل النيابة بيروح بيته مرتاح الضمير وغالبا بيصلي وكمان العساكر اللي كانوا بيتنططوا فوق جسم المتظاهرين ويضربوهم بالجزمة . اكيد عندهم عائلات وقلبهم على ولادهم ولما بيجي العيد بيوزعوا اللحمة على المحتاجين .الموضوع لا زم نفهم ازاي بيتحول المجتمع المقموع الى مجتمع قامع يعني ايه " الناس على دين ملوكهم " . السلطة فاهمة انه من حقها تسجن وتضرب يالجزمة اللي ما يعجبهاش وانت كمان لو ما عجبكش اللي بقوله بدل ما تحاول تشغل نخك وتفهم بترفضه من الأصل. مقموع يقوم بقمع الاخرين .

ده الموضوع الاساسي . واذا انا خرجت عن الموضوع فانا ما عنديش مانع انك تفهمني ازاي ادخل فيه من غير شتيمة الحكومة او الولولة .ومستعد ابطل التحليل الجهنمي لأنه بيوجع وبيدخل معظم الناس ( ما عرفش انت منهم وللا لا ) جوه جهاز القمع !

نص الكلام عن القمع..انت بتاع جاز ولا بتاع بامية؟

يبدو ان العربي بتاعك ما اتطورش من ايام الباميه وبتاع الجاز معلهش خليني انورك بس موش بلمبة نمرة خمسة. القمع هنا معناه الظلم وكبت الرأي الآخر بالقوة. واذا ما كنتش شايف الربط بين تجديد حبس كريم والشرقاوي اللي كل اللي عملوه انهم قالوا رأيهم فانت ( او أنتي ؟ ) بتعمل نفس اللي بيعمله وكيل نيابة امن الدولة : بتقمعني وما تخلنيش اتكلم عن القمع .واذا ما كنتش شايف الربط بين موقف مصطفى بكري الاخير ومواقفه الاولانية وموقف وكيل نيابة امن الدولة وموقفك وموقف معظم المجتمع المصري يبقى القمع مأثر في عيونك ومحتاج عملية ازالة مية القمع الزرقاا

تاني؟؟؟؟؟ طيب حالة شرقاوي الصحية ايه؟؟؟؟ http://bluerose.egyblogs.com/

شرقاوي حالته الصحية و المعنوية كويسة جدا، بس مقدرش أتصور ازاي مستحمل الحبسة لوحده كده، يعني لو معاه مجموعة كبيرة عادي نستحمل شهور.

عموما المفروض أن كريم اشاعر اتنقل تاني سجن طره تحقيق بس على حد علمي مش قاعد في نفس زنزانة شرقاوي