You are here

عم حمدي قناوي يكتب: مجموعة أرابيسك .. وجيل لن ينهزم

Primary tabs

عم حمدي قناوي، رفيق زنزانة 8/1 عنبر قديم. الراجل الخدوم جدا اللي يحرجك بكم نشاطه و حيويته و اصراره، عم حمدي اللي يشرفني أني أعرف أنه من زوار موقعنا الدائمين، راجل مخلص ميفوتش أي مظاهرة مع أنه بيسافر لها، راجل مبدع كل مظاهرة يصمم و ينفذ لبس تنكري مختلف حسب موضوع المظاهرة. أكيد شفتوه قبل كده.

عم حمدي مش مبدع في التنكر و بس، بيشوف الحاجات بعيون فنان، في يوم قعد يوصف أوضاع النوم المختلفة في زنزانة زحمة و يشبها، قالك ساعات بتبقوا زي بوكيه الورد، رجليكم لازقة في بعضيها لكن متباعدين عند الأكتاف، و ساعات زي البازل معشقين، و ساعات حروف s مرصرصة ...

أقرأ عم حمدي يحكي عن مجموعة سجن المحكوم


بعد ثلاث خمستشرات أفرجوا عني.. بطعم الملح استقبلت النبأ ولم أعرف لماذا؟

فقط وأنا على الباب الحديدي الكبير وآخر باب حديد تراه العيون قبل الإنعتاق، ساعتها فقط عرفت السبب، لأني حسيت إني فيه حتة مني لسه جوه زوغت مني ومش عايزة تخرج إلا معاهم.

والضمير هم يعود على مجموعة الشباب إلى جم على صوت (النداهة) إللى اسمها كفاية فلمست أوتاراً لم تصدأ بعد بفعل كساد 25 عاماً، فأتوا من كل صوب ولون، كرامة، غد، إخوان، ناصري تجمع إلخ،،،،بصراحة بدا لي في أول الأمر أنني أمام مجموعة متنافرة وشباب جديد مش قادر أفهمهم ولا قادر أتعامل معاهم فلا أنا قادر على تفسير تصرفات مالك وحماقاته ولا ضجيج بهاء واندفاعاته ولا حدة الصحارى وتصلباتة ولا زعيق الفيل وانفعالاته ولأني مش فاهم قلت أسكت وأقعد وراقب وحافظ على شيبة 56 عام.

لحد ما رجع الشرقاوي مرة ثانية بضلوعه المتألمة، وآهاته المكتومة يجر بيد شاحبة أحلاما محرمة بانتزاع مناطق محررة بشارع عبد الخالق ثروت، فتفجرت في المجموعة قوى (النداهة) الدفينة فينا، عاد المناضل بلا حدود ليضع كرامة المجموعة كلها على (المصلب)- وهو أبرز مكان في الزنزانة ولا يسكنه إلا أقواهم-

وهنا اكتشفنا صلابة (رضا كريم) ذو الوجه الطفو لي الوديع وشجاعة (سامح) صديق المائة سجين وحماس العريس الجديد (عماد) وشدة بأس النحيف (أحمد صلاح) وجسارة الوديع (أحمد ماهر) وجدعنة ابن البلد (أحمد عبد الجواد) وإنسانية (الدروبي) ووداعة (حسين) وسماحة (عادل) وطيبة (على المضاغ) وبشاشة (أكرم) وقدرتهم على إرتياد كهوف التعذيب قصدي التأديب اللاإنسانية لأيام وليالي مصارعين الحشرات والجوع والظلام و(وائل خليل) حامل (مازورة) معاوية بعد أن استهلك شعرته في التفاوض مع إدارة السجن وتبادل مراكز الشد والرخى مع ساهر ويعود مجهدا لينام القرفصاء على أسوأ (نمرة ) ليترك أفضل الأماكن لأصدقائه الموجوعين، والدرديري ينعشنا بالإعاشة وحسين يطهر الزنزانة وعم فتحي يهادينا بشعر نجم وإذاعة على الفيل تسرى عنا في المساء والقبطان كمال خليل يهدينا بحنكته وبعمر السجون المخزون داخل حكمته وشجاعة الرباعي جمال ,و أشرف ,و سيف ،وبهاء وهم يسحلون ويرفعون إلى سجن المزرعة قصرا، وصرامة علاء الرقيق في إدارة الحوارات الحادة وقدرته الهائلة في ترتيب الأفكار حتى أنني اعتقدت أن منال- التي لم تفارقه أبدا- كانت جانبه بتساعده في تحضير المواضيع . واكتشفت كم كنت مخطئا وأنني أمام مجموعة متناغمة تكمل بعضها البعض

رجع الشرقاوى المناضل بلا حدود ليضع كرامة المجموع على المصلب ولأكتشف وأنا على الباب الكبير الحديد وأخر باب حديد تراه العيون قبل الانعتاق أنني أمام مجموعة أرابيسك وجيل لن ينهزم .

لأنتبه على صوت الشاويش الأجش .. حمدى قناوى .. أفراج .

16/6/2006

Comments

ألف مبروك الإفراج يا علاء بيه لن أقول "كفّارة" باعتبار "حبستك" لا تجب ما قبلها, وباعتبار أن الطريق لا زالت طويلة

مبروك لك ولمنال وعقبال عند باقي المدونين, وعقبال عند مصر

كن بخير

عم حمدي قناوي انت بركة مصر ربنا يديلك طولة العمر يارب والصبر وتحية من قلبي لمجموعة الاربيسك وربنا يحميكم يارب وكلنا معاكم وضد الظلم

الف تحيه ليك ولعم حمدي..حمد الله علي السلامة ..العمرانية نورت

رءوف مسعد إلى حمدي قناوي :عجبتني فكرةالنداهة وتجميعك انت للشباب ووصفك في جمل وكلمات قصيرة حاجات بالغة الاهمية والحساسية .طبعا لما واحد خمسيني يتحبس مع شباب ما يعرفش عنهم حاجة وموش من ثوبه يترعب.لكن موضوعية رؤيتك لهم بدون استعلاء جعلتك تقدم معدنهم الاصيل بعد ما تشيل الرايش !وده مهم جدا خاصة انك بتقارن الحرية خارج الحبسة بالحرية معاهم داخل الحبسة حرية فيها تضامن بمواجهة السجن والسجانة. إلى علاء : الكتابات التي نظهر احيانا عندك وعند بعض الأخرين تتميز بطعم خاص غير موجود في" أدب السجون والمحابيس " لأن ما كتبناه في السابق لم يكن يحمل الضعف الإنساني إلا نادرا باعتبار ان " السجن مدرسة الثوار " ..واعتقد ألان انه لا توجد كتابة صادقة طالما لا تحمل الضعف الإنساني بكافة اشكاله وانواعه. عندي سؤال هل هناك فكرة عند واحد اروب ان يجمع كتابات فيها الخلاصة اللي بتظهر احيانا بدون تفلسف ولا تقعر؟ وان يتم هذا النشر في كتاب لأن الكتاب في النهاية يمكن للواحد ان يجده بعكس ما اعتقد - ولعلي غلطان - ان النيت والسايتات تختفي ومحتاجة تجهيزات يستغني عنها قاريء الكتاب . ياريت

هل فعلا احنا جيل هتتوحد أفكاره واتجاهاته فى طريق واحد قصاد كل الظلم والفساد الموجود حاليا؟؟ وهل فعلا هنقف ثابتين ومش هنركع ؟؟؟

نفسى يعم حمدى حدسك يطلع صح !!!

وعموما

قللنا فخارها قناوى بتقول حكاوى وغناوى ... وياقلة الذل أنا ناوى ماشرب ولو فى الميه عسل

مساء الفل والحريه يعم حمدى ياقناااااااااااااااوى


--AMS

your efforts are not for nothing, the whole world watches your aktivities with respect.

ibi

أولا ألف مبروك خروجك للنور بعد التجربه القاسيه دى لكنى أعتقد أنها ستفيدك جدا وتصقلك على مستويات كثيره الشخصى والأنسانى والسياسى و... الخ

لا تعرفنى شخصيا وان كنت اتمنى أن نتقابل ونتحاور وأتمنى أن تراسلنى على الميل لنرتب لذلك. أنا من جيل بعدكم بعقدين تقريبا لكنى مثل عم قناوى متفاعل معكم . قرأت معظم ما كتب فى مدونتك علقت قليلا على بعض الأفكار متفق مع أفكار ومعترض على أفكار أخرى لكن فى النهايه سعيد جدا بكم.

نظرتى تشاؤميه قليلا لما يحدث لا أعتقد أن الكل سيظل متوحد فى خندق واحد اذا ما حدث تغيير حقيقى فى البلد, الكل قد يسعى للحصول على قطعه محترمه من التورته. لقد تم تخريب السواد الأعظم من هذا الشعب لسنوات طويله وحرم من ممارسه حقه السياسى وتم ربطه فى الساقيه بشده لكى يلف ويدور فقط للحصول على ابسط حقوق الحياة الكريمه أقصد لقمة العيش. أتمنى أن أكون مخطئ !!!

تقبل تحياتى انت ومنال وعلى امل لقاء قريب.

العم حمد قناوي

لفت نظري وبشدة ما كنت تقوم به في الفترة الأخيرة من تنكرات وأضفاء جو من الأبتكار علي المظاهرات الجافة العجفاء التي لم نكن نملك الا هي...ادهشني قدرتك علي إيصال رسالتك من ابسط الطرق واقصرها واطرافها احيانا يكون الصمت ابلغ من الكلام

غسلتني الطيبة التي تحدثت بها الأن وانت تحكي عن زملاء الزنزانة...في رأي الغير متواضع انت افضل من نقل لنا صورة رومانسية عن ما حدث

سنوات عمرك ال 56 أضفت علي النص زهد خالص ...سحرني

تحيات شاب لا تعرفه

وان كان هو الأن يعرفك حق المعرفة

Welcome back home, i hope you'll continue your fight with more strenght, efficiency, and preparing.

If you need any kind of help; i'm ready i'm from morocco, and it'l be great if we change ideas and experiences.

بجد من أجمل ما قرأت من الناحية الأدبية، أو مكنتش أعرف مين كنت هفتكر انة أديب أو كاتب محترف، هو فعلاً فنان.

من سوريا إلى أرض الكنانة مصر، تحية للشباب المناضلين على اختلاف توجهاتهم الفكرية و السياسية. الحق يقال الشباب في مصر متقدمين علينا في سوريا من ناحية التحركات و التنظيم و النشاط، المناضل السوري نجيب الريس قال:

ياظلام السجن خيم إننا نهوى الظلام
ليس بعد الليل إلا مجد فجر يتسامى

هو قالها للمستعمر الفرنسي لكن ما أقسى الظلم عندما يكون من أهل البلد اتمنى الحرية لجميع الشعوب و اشكركم على إنارتنا بقصص و أخبار من تجاربكم

مبروك الافراج لك و للجميع امل ان يتم الافراج عن البقية

التفت الأسرة حول فراش الزعيم وهو يلفظ أنفاسه الأخيرة قال الزعيم بصوت ضعيف ولكنه حازم في نفس الوقت

حسنى: كلكم موجودين

سوزان: أيوه ياحسنى ... أنا جنبك أهه ... وأدى جمال وعلاء ... قمرين دول ولا عينين

حسنى: طب إسمعوا اللى حقوله كويس

جمال: سامعينك يابابا ... إتكلم

حسنى: مصر دى كنز ياولاد ... إمكسوا فيها بإيديكم وسنانكم ... بنسرق فيها بقالنا سنين وسنين ولسه بتدينا

علاء: هيا دى البركة اللى بيقولوا عليها يابابا

حسنى: أيوه يابنى ..... ربنا يبارك لكم ولعيالكم فيها ... ودلوقتى إسمعونى

علاء: إنته على الهوى يابابا ... إتكلم

حسنى: أنا مش مديون لحد ياولاد ... يعنى أى واحد يصيع عليكم ويقول لكم أبوكم كان مستلف منى فلوس تفوا فى وشه على طول

علاء: إطمن يابابا ... حرامى على حرامى ما يلعبش

حسنى: أنا سيبت لكم ياولاد اللى يكفيكم إنتوا وعيالكم وعيال عيالكم ويفيض ... فلوس متلتلة متتعدش ..... مش حقول لكم حافظوا عليها وبس ... لآلآلآلآ ... زودوها كمان وكمان لجل ما روحى ترتاح وأنا فى تربتى

جمال: هيا الفلوس اللى إنته عملتها يابابا دى بتسميها فلوس .... شفنى أنا وعلاء حنعمل إيه .... ولا صحيح حتشوفنا إزاى .... عموماً ما تقلقش

حسنى: ودلوقتى إسمعوا وصيتى ..... الحكم لأولاد مبارك ... لازم أول ما جمال يحلف اليمين تغيروا إسم مصر وترجعوه زى ما كان زمان أيام الملك فاروق والملكة نازلى (المملكة المصرية)

جمال: مفهوم يابابا ... خش فى اللى بعده

حسنى: الجيش والشرطة والأزهر ... أوعوا واحد من التلاته دول يخرج عن طوعكم أبداً

علاء: مفهوم برده ... اللى بعده .... ياساتر ده إنته ملل

سوزان: عيب ياعلاء لما تكلم أبوك كده

علاء: بهزر ياماما

حسنى: الهرم لأم العيال ... ليكى ياسوزان بعد ما خدمتينى بتفانى وإخلاص طول السنين دى

سوزان: هرم !!!!!!! .... هيا دى آخرة صبرى !!! ...... وده يسوى كام ده !!!!

علاء وهو يمسك بالألة الحاسبة : يسوى كتير ياماما ... لو تحبى أتصرف لك فيه ممكن يعمل معاكى مبلغ كويس

سوزان: مش حرضى باأقل من التلات أهرامات وأبو الهول

حسنى: مش خسارة فيكى ياغالية .... أثار النوبة لعلاء .... والأقصر لجمال ... ودلوقتى نيجى للميه .... الساحل الشمالى لعلاء والبحر الأحمر لجمال وقناة السويس تخصصوا دخلها صدقة جارية على روحى

سوزان: إنته أكيد مخبول ... مليار ونص دولار صدقة جارية على روحك !!!!

جمال: ما تاخديش على كلامه ياماما .... ده يبقى كتير لو طلعنا 100 ولا 200 جنيه على روحه للفقرا

علاء وهو يمسك بالألة الحاسبة: ممكن نطلع لحد ألف جنيه ياجمال ... السيولة تسمح

حسنى: أوعوا تفرطوا فى حبيب العادلى من بعدى ياولاد ... حبيب قلبه ميت وإيده طرشه وهوه ده اللى ينفع مع الغجر اللى هنا

جمال: بس ما بيعجبنيش شنبه يابابا

حسنى: إنته مالك ومال أم شنبه ..... إحنا بنشترى مجرم

جمال: أعاهدك يابابا إنى حخليه معايا ومش حفرط فيه أبداً

حسنى: الشيخ طنطاوى ياولاد راجل بركة ..... يمين يمين شمال شمال ..... أوعوا تفرطوا فيه ..... بس ما تخلوهوش يصلى عليا لأنى بصراحة مش متأكد إن كان ربنا حيقبل منه ولا لأ

علاء: ولا يهمك يابابا .... حخلى أنكل كمال الشاذلى يصلى عليك

حسنى: والله لو عملتها ياعلاء لكون متبرى منك إلى يوم الدين

علاء: بهزر معاك يابابا ..... أنكل كمال مش حافظ الفاتحة

حسنى: المشير طنطاوى ياولاد ..... مش حوصيكم عليه ..... الراجل ده عامل زى الست المستحية .... حاطط وشه فى الأرض على طول وعمره ما استجرى يرفع عينه فيا ... وفى نفس الوقت ماسك الجيش بإيد من حديد

سوزان: هوه فعلاً خجول وكل ما يشوفنى ما يقوليش غير ياست هانم .... إبقى خليه معاك ياجمال

جمال: حاضر ياماما

حسنى: عايز جنازتى ياولاد الناس تحكى وتتحاكى عنها ...... هاتوا المخرج الإيطالى ده اللى إسمه مكافيللى يصورها

علاء وهو يمسك بالألة الحاسبة: هوه حيكلفنا كتير ... لكن ممكن فى الأخر نلم مبلغ معقول لو خلينا شركة أجنبية تحتكر حق توزيع الفيديو فى أوروبا وأمريكا

حسنى: عايز أحلى مدفع يشيل النعش ياولاد

جمال: مدفع رشاش

سوزان: الهزار مش فى الحاجات دى ياجمال

جمال: آسف ياماما

حسنى: عايز أدفن فى شرم الشيخ ياولاد جنب أولمرت وشارون

علاء: بلاش كفر مصيلحة يعنى

حسنى: لأ كلها براغيت يا علاء

أنتم متخلفين

وكفار وعايزين تعملوا فتنة في البلد

وكارهين رغد العيش اللي إحنا فيه وبتحاربوا السياحة الليلولاها كنتم شحاتين ياكلاب يا حيوانات

الله يلعنكم في كل كتاب

ده حسني مبارك وعائلته أحسن منكم ومن اللي جابوكوا

الله لا يوفقكم يا إرهابين

قارنوا رئيسنا بباقي الرؤساء على مستوى العالم وتعرفوا أنه من أحسنهم

يارب كل اللي يحاول يعمل فتنة في مصر تتشل أيدي ورجليه ويتخرس

انتو سايبين الهبل يخشوا على مواقعكم ليه اللى كتب الكلام دا عايش فين حد يقولى

انا هقولو كلمه وحده انته حمار يحمار؟؟؟

دا سؤال مش شتيمة

استمروا يشباب ربنا معاكم

Fantastic !

أخى \علاء كم أنا ممتن لك أن نشرت انت ما نثرت أنا من أحاسيس على القرطاس -أرابيسك..و جيل لن ينهزم- فأدلفتنى لعالم سحرى ما وطأتة قدمى-قصدى قلمى-بعد , عالم المدونات المبهر.

لم أكن أتوقع أن تنال كل هذا الاستحسان و خاصة أن الزملاء رؤوف مسعد و يحى و واحد معدى و تامر و أخرين لدرجة انها كبرت فى نفوخى و حتبقوا انتوا السبب لو مشيت فى أكبر ميدان فى المدونات..و قعدت أزعق و قول أنا جدعععععععععععععععع.

هذا فيدو كليب يوجع القلب .. الرجل اتهموه بقتل ابنته و عذوبوه حتى الإعتراف .. ثم ظهرت مفاجآت لا أول لها و لا آخر

http://ia300236.us.archive.org/1/items/mohammed_badr_el_din/mohammed_badr_el_din_small.avi