You are here

قولوا للنايم في عابدين

Primary tabs

هبتيديلكوا بمجموعة صور المظاهرة (معلش يا جماعة الصور مش على مستوى فني عالي اوي لأننا كنا عاملين تظبيطة غلط في الكاميرا)

واسمحولي اعرضلكوا مجموعة صور لحركة ظباط و جنود من أجل التفعيص اللي كانت شغالة على أعلى مستوى في عابدين!!

ظباط و جنود من أجل التفعيصظباط و جنود من أجل التفعيص 2ظباط و جنود من أجل التفعيص 3 ظباط و جنود من أجل التفعيص 4ظباط و جنود من أجل التفعيص 5

أنا متهيألي أننا كنا حوالي 2000 نفر، بس علشان اللي الأمن كان عامله فينا محدش هيقدر يخمن تخمين مظبوط، ولا حد ممكن يحكي كل اللي حصل حتى لو كان أول واحد يروح و آخر واحد يمشي.

المرة دي وصلنا متأخر نص ساعة..أمن مركزي..نعدي من الكوردون فنكتشف أن فيه كوردون تاني بحذا الرصيف مطوق المتظاهرين اللي واقفين على الرصيف (عالشمال وأنت داخل ميدان عابدين)..كوردون بطبقات كتيرة و منعرفش نعدي منه. بعد شوية تدقيق و تمحيص نكتشف أن المتظاهرين دول عبارة عن مجموعتين و مابينهم كوردون تالت من الأمن المركزي (عامودي على الرصيف)!

و يبتدي التفعيص!! التفعيص ده اشتغل طول الوقت و على كل مجموعات المتظاهرين (على الأقل كل المجموعات اللي أنا شوفتها)، و فضل شغال لآخر لحظة..يعني لما جينا نروح ابتدى الأمن يفتح فتحات صغيرة ده طبعا علشان الناس ما تطلعش مرة واحدة و تعمل مسيرة في الشارع (بس برده عاملوا مسيرة و معرفش الأمن يفضها من غير ضرب)، فيقوم الأمن المركزي يبتدي يضيق علينا من الناحية التانية..حاجة مستفزة جدا، و المستفز أكتر الناس اللي تيجي تقولك انتوا بتزقوا الأمن..لأ برافو يا واد اكتشفتها لوحدك دي؟! امال ايه نسيبهم يزقونا و يقسمونا و يهشونا و يفوضوا المظاهرة، طب و نروح نتظاهر ليه بقه من أصله إذا كنا راييحين نسمع كلام الأمن، يبقى من باب أولى بقه مانعملش مظاهرات أصلا.

أكملكوا اللي شفته: تبتدي المجموعة اللي عرفت تعدي الكوردون الأولاني تكبر و ترد على هتافات مجموعة من اللي مفعوصين، الأمن يزود في فعص المجموعة..المنظر كان كئيب جدا، كنا حاسيين أن اليوم مش هيعدي من غير ما يموت لنا حد. علاء يصور الفعص (الصور اللي فوق). المجموعة البرانية تكبر أكتر و يظهر لها هتيفة منها..بس تبدي تتجه بعيد عن الكوردون الأولاني. أنا كنت تعبانة شوية فوقفت بعيد عن كتلة المجموعة التالتة، علاء يروح يصورهم و يرجعلنا و يروح و يرجع..شوية و الأمن يأخد باله من المجموعة التالتة و يبدأ تكوين الكوردون الرابع و ينفصل علاء عننا. شوية و يبتدي تفعيص المجموعة التالتة يعني هي دي اللي و قعت من قعر القفة؟! نحاول ننضم للمجموعة علشان نفضل مع بعض لكن ما فيش فايدة.

بعد شوية المجموعة التانية و التالتة يكسروا الكوردون اللي ما بينهم و ينضموا لبعض، لكن احننا برضه مانعرفش نخشلهم. نطلع على الرصيف يمكن نعرف ننضم للمجموعة الأولى وللا حاجة. عمر يكلم علاء و يقوله على موقعنا. عبير العسكري مغمى عليها بيحاولوا يفوقوها..يا ناس ابعدوا عنها شوية خلوها تعرف تتنفس، معاها دكتورة لكن مش هيقدروا ينقلوها برة المظاهرة، نعمل حواليها كوردون علشان نبعد الناس عنها و تعرف تتنفس شوية، ننطلب من السكان مية بملح أو مية بسكر، فيرمولنا ازازة عالطول.

المجموعة 2+3 تكسر الكوردون اللي حواليها و تأخد مساحة أكبر والمرة دي نقدر نضم عليهم. الموضوع مبقاش كئيب ذي الأول و في أمل.

أكلم علاء ونروحله أنا وعمر. عددنا كبير قوي ورغم المساحة اللي حررناها من الأمن المركزي لكن احنا لسه برضه مزنوقين. علاء قعد يدردش مع عساكر الأمن المركزي اللي وراه: "ليه بتتاخدوا الأمن المركزي؟ ذل يعني؟""انت منين؟""متجوز؟""طب في حد مستنيك؟""لما تخلص مدتك هتعمل ايه؟" و كانوا بيرودوا عليه و يضحكوا معاه، و اشتكولوه انهم واقفين من الفجر وان نفر واحد من المتظاهرين يقدر يزق عشرة منهم ماهو احنا بنفطر لحمة و هما بيفطروا فول!

يفضل يجرى كل شوية محاولة فعص و تطلع ضدها محاولة "أنتي فعص" و هكذا لحد لما نيجي نروح. قبل ما نروح جمال يطلب مننا ناخد الصورتين دول

جرافيتي: كفايةجرافيتي: الحرية الآن

خلاص ماشيين و بنعدي من ممر الأمن و فجأة يطلع علينا اللواء ابن الـ.. اللي أشرف على ضرب علاء و طنط ليلى و يحاول يستظرف على علاء، يخبط على كتفه و يقولوه علاء..يا خويا لما أنت عامل فيها راجل اوي كده خايف تقول اسمك ليه؟! طبعا علاء لف و اداهملوا!!

طبعا الشباب المروحين لقوا نفسهم عزوة فابتدوا يهتفوا و قلبوها مسيرة، مشينا معاهم شوية لحد محطة المترو و سيبناهم و روحنا..طبعا كان ساعتها الأمن اتبلغ بالمسيرة و ابتدوا يهلوا، سمعت بعد كده أن حصل ضرب علشان المسيرة تتفض..بس الغريب أن لما الشباب ابتدوا يهتفوا اتحدف علينا أكياس مية من فوق، مين بقه صاحب الفكرة دي؟

بعض الاصابات:

  • حالات إغماء كتيرة اوي و منهم (عبير العسكري، بهاء)
  • مجدى حسين (حزب العمل) - اصابة في الساق
  • محمد (شباب من أجل التغيير) - كسر في الدراع
  • ده غير طبعا الكدمات و الخدوش و الهدوم اللي اتقطعت، لكن دي حاجات الناس بتعتبرها عادية أصل الناس عندنا ما تقولش عنف غير لو حد اتكسر فيه حاجة او كان لازمه خياطة مش أقل من عشر غرز، غير كده يبقى بنكبر الموضوع و بنبالغ!!

تفاصيل و صور و تغطية أكتر:

Comments

لا لمبارك .. لا للتزوير .. لا للطوارئ

الحملة الشعبية من أجل التغيير الحرية الآن

لا لمبارك .. لا للتزوير .. لا للطوارئ نعم لحق شعبنا في اختيار حكامه ومحاسبتهم

دعوة للتجمع والتظاهر بميدان التحرير في اليوم التالي لاعلان مبارك الترشيح للرئاسة

تدعو الحملة الشعبية من أجل التغيير (الحرية الآن) جميع القوى والحركات السياسية التي تناضل من أجل التغيير الديموقراطي في مصر الى الاحتشاد في ميدان التحرير في اليوم التالي لترشيح مبارك لفترة خامسة. وسوف تقوم الحملة بالتشاور مع جميع القوى وحركات التغيير للدعوة لاجتماع لجنة تحضيرية للاعداد لهذا اليوم يشارك فيها الجميع.

ليكن يوم اعلان مبارك الترشيح هو يوم اعلان الشعب المصري رفضه لاستمرار مبارك في الحكم..

لتتحد كلمتنا جميعا

لا للتجديد.. لا للتوريث.. لا لحكم العسكر الحرية الآن!

www.hamla.net [email protected]