You are here

مظاهرة الزيتون

Primary tabs

كان يوم متعب اوي، و غريب شوية. بما أن نص مجموعة الانترنت المستقلة اللى ماتتسماش ما جووش، ادبيست أنا فى تلات تربع شغل البوسترات من قص و لصق و كتابة و تلوين. خلصت معظم البوسترات لكن كان نفسي أفنن فيهم شوية. قابلنا وائل خليل عند مركز هشام مبارك ماحنا لازم نروح بعربية، ما ينفعش نركب المترو بالأعمال الفنية دي.

السكة معقولة مش زاحمة، قابلنا عربية تانية فيها زملة رايحيين المظاهرة برده، يشوفونا و نبتدى نكلكس كأننا رايحيين ماطش كورة..تيت تيت تيت تت تيت..تيت تيت تيت تت تيت

نوصل شارع طومان باي و نأخده من أوله، شوية و تبان تجمعات نشطاء الأمن المركزي اللى نازلين معانا المظاهرة. كمية مش طبيعية من عربيات الأمن المركزي، ده غير ظباط البوليس و الظباط اللى بلبس ملكي. عربيتين مطافي فى شارع جانبي..و كل ده و لسه ما وصلناش قرب الكنيسة.

وصلنا بدري و ما كنش في حد واقف أصاد الكنيسة، قلنا نلف لفة كمان و نركن لكن على بال ما لفينا كانوا قفلوا شارع طومان باي، ركنّا في شارع جانبي و مشينا في شارع السنان (كنيسة العدرا عند تقاطع السنان و طومان باي). قبل ما نوصل طنط ليلى اتصلت و كنا سامعين أصوات الهتيفة حواليها..خمس دقايق و نبقى عندكوا.

نوصل التقاطع نلاقي مجموعة صغيرة ما تزيدش عن تلاتين و قفة فى شارع السنان و حوليها كوردون أمن..البوليس ما سبهمش يقفوا جنب الكنيسة! أللاه؟ أومال فين الهتيفة اللى كنا سمعينهم عالتليفون؟؟ فين طنط ليلى؟؟

نتصل بيها تاني فنسمع صوت الهتيفة تاني و نفهم ان فيه مظاهرتين مفصولين عن بعض تماما. علاء يفهم منها هما فين بالظبط و يروح في بعثة استطلاعية مع وائل خليل و جوش من العروبى. ننضم للمظاهرة اللي هناك وللا هما اللى ييجوا؟ هنا مكان المظاهرة المعلن عنه..بس هناك حوليهم عمارات كتير و الناس وقفة بتتفرج وده اللى أحنا عايزينه أن الناس تشوفنا، و بعدين ماهما وقفين برضه في طومان باي مش بعيد اوي عن الكنيسة (يطلع في الآخر أنهم كانوا بعيد عنا بحوالي 50 متر بس لكن كان في طبقات من الأمن المركزي خللتنا منحسش بيهم خالص).

اتفقنا أن احنا اللي نروح لهم من غير منستنى البعثة الاستطلاعية ما تيجي بالأخبار. نبتدي نتحرك عالطول الأمن المركزي يعمل حوالينا كوردون و يتحركوا معانا. اسمع واحد من الظباط بيكلم ريسه عاللاسلي "متخفش يا باشا متحوطين يا باشا..أحنا محوطنهم كويس يا باشا"

يمشونا في شوارع ضيقة و العربيات راكنة فيها عالصفين، بالعافية يمشي فيها تلاتة أو أربعة بالعرض (طبعا التلاتة أربعة دول منهم اتنين من الأمن المركزي واحد عاليمين و واحد عالشمال)، و يفضلوا يحودوا بينا كل شوية. اكلم طنط ليلى واقولها أن أحنا جايين لكم لكن الأمن قاعد بيلف بينا فى سكك غريبة.."لو موصلناكوش كمان شوية ابقوا اتصلوا اطمنوا علينا". لسه ماشيين في شوارع ضيقة، نحود تاني واحس انهم حيخدونا على شارع سد و فين يوجعك يا معلم.

الناس رفعت اليفط و ابتديت تهتف..و يبتدي الناس اللي في الشارع يقفوا يتفرجوا، أسأل واحد من المتفرجين على اسم الشارع، ما يعرفش لكن اللي جانبوه يقوللي. شوية و نوصل عند مجموعة من المتظاهرين. هى دي وللا دي مجموعة تلتة؟؟ حواليهم أمن مركزي كتير زنقنهم في مكان ضيق عالناصية متبعين تكنيك الفعص على رأي وائل عباس زي في مظاهرة لاظوغلى.

أعدي الكوردون وأدوّر على علاء أو طنط ليلى أو وائل خليل، لاقيت علاء و اطمنت و ابتديت أصور المظاهرة. كان في ناس كتير بتتفرج علينا من الشابابيك والبلكونات

جمهور مظاهرة كنيسة العذراء جمهور مظاهرة كنيسة العذراء بالزيتون

و ناس كتير في الشارع لكن الامن مش سايبهم يدخولوا

الناس نزلت الشارع

لكن في شوية عرفوا

وحوه جديدة كتير

طبعا الولاد الصغيرين ماكنش عندهم مشكلة في الدخول و الخروج من كوردون الأمن، و كانوا معجبين اوي بالأعلام و كل شوية يجي ولد و يطلب مني علم.

علم مصر

جه ولد و سألنى "هو جاي؟" "هو مين؟" "حسني مبارك..لما يجي هنضربه!" امسك نفسي من الضحك و اقوله "لاء مش جاي" شوية و يشتد الهتاف في محاولة لاختراق كوردون الأمن و نزول الشارع يجي نفس الولد يسألني بحماس "هو جه و للا ايه؟"

محاولة الاختراق و النزول للشارع منجحتش اوى، لكن المجموعة الصغيرة اللي نزلت الشارع و قفت اتكلمت مع شوية ناس و وزعت منشورات فيها أسامي و عناوين و تليفونات جمعيات حقوق الأنسان اللي شاغّلة على موضوع التعذيب و بعض مواقع الصحافة الشعبية و في ضهرها شهادات من ضحايا التعذيب، ودخلت اللي عايز ينضم للمظاهرة، و في نفس الوقت البوليس قرر يديينا مساحة أكبر نقف فيها و يبطل فعص فينا احسن ننجح و ننزل الشارع.

بقى عندنا فرصة مثلا اننا نتعامل مع سكان العمارة اللي كنا واقفين تحتيها اللي نزلوا جابولنا مية و وقفوا يتكلموا معانا و طبعا وزعنا عليهم المنشورات برضه

الميه تروى العطشان و الكلمة تروى القلقان

و سمعيت أن في بنت من سكان العمارة حدفت الأمن المركزي بكوباية ازاز لمل حاولوا يهجموا على المظاهرة من الجنب و يفصلوا ما بينا و ما بين مدخل العمارة.

بعد ساعتين (عالساعة 8) انهينا المظاهرة و عرفنّا الموجودين بمعاد و مكان المظاهرة اللي جاية..هتفنا "المظاهرة اللي جاية..يوم الأربع..في امبابة..شارع الوحدة..محطة السلم". أنا شايفة انها فكرة كويسة اوي اننا كل مرة نقول على معاد و مكان المظاهرة اللي بعدها، لأني فجأة لقيت واحد بيسلم علي و يقوللي انه اتعرف علينا في مظاهرة شبرا..افتكرته كان من الناس اللي وقفت تتناقش معانا بعد المظاهرة.."اااه اذيك؟" سلميت عليه بحرارة و عرفت منه انه جه مظاهرة لاظوغلي بس معرفش يشوفنا. علاء برضه اقابل اتنين كمان من جمهور مظاهرة شبرا.

واحنا ماشين سكان العمارة ودعونا من الشبابيك و البلكونات، راحت شوية بنات زغرطوا و كلنا سقفنا و هتفنا هييييه


طبعا اليوم ماخلصش..

ابتديت الناس تروح، معظم الناس مشيت في اتجاه المترو، و احنا مشينا في اتجاه عربية وائل و قابلنا رجل شاف جزء من المظاهرة و قعد يتكلم معانا لحد ما جلنا تليفون أن البوليس ضرب ناس من اللي مروحين عالمترو. قررنا نروح لهم (شكرا وائل و إيهاب و اسفة اننى بالغت في رد فعلي).

و احنا ماشيين لقينا كتيبة أمن مركزي جاية من مكان المظاهرة و ماشية في اتجاه المترو..مشينا وراهم. شوية و لقينا ناس من اللي كانوا معانا في المظاهرة، فيه ايه؟؟ محدش عارف بالظبط بس الأغلبية رأيها أن في شوية شباب هتفوا راح البوليس بدأ يضرب. في حد جراله حاجة؟ الأصابات مش خطيرة على حد علمي. في حد اتمسك؟ اتنين تلاتة لكن سابوهم في ساعتها.

لمحنا طنط ليلى و قررنا نروح معاها بالمترو. يبدأ الشد و الجذب..البوليس يحاول يمشينا من شوارع جانبية علشان ما حدش يشوفنا و لا حد فينا يحاول يهتف تاني..واحد من سكان المنطقة يحذرنا أن الشوارع دي ضيقة و ضلمة و ممكن يبعتلكوا ناس من الحزب الوطنى يروقكوا..نقولهم لاء احنا هنمشي في النور وسط الناس. شوية و يتكرر نفس الحوار تاني نشوف سور مترو الأنفاق و نوافق..صاحبنا اللي من المنطقة يمشي معانا و يسحب معاه ظابط علشان كده محدش يقطع علينا الطريق، يمشي معاه الظابط شوية و بعدين يفلفص و يفلت منه قبل نص الطريق.

نوصل الشارع الموازى للمترو..شارع مقطوع و ضلمة، صاحبنا كان عنده حق. المهم وصلنا المترو بالسلامة و ركبنا ونهينا اليوم بغنا فى المترو، غنينا كفاية وغنينا أغاني الشيخ امام

كفاية كفاية كفاية

و وزعنا على ركاب المترو منشورات برضه

عايزه ثورة يا بلادي

Comments

I think demonstrations should go to the countryside of EGypt, remaining in Cairo is minimizing the chances for a greater success. You need to reach out. I am sure many people are waiting. Don't make the regime's mistake marginalizing other Egyptians in all cities and villages. Good Luck and all the best

first of all kefaia and the ikhwan did organize protests in several cities before.

and off course many protests where organized in Arish.

but the thing is the initiative must start from locals, we can't just land on any given city or village and start protesting.

هى مظاهرة يوم الاربع الجاى فى امبابه زى ما هى ولا حصل تعديل؟؟

انا ابتديت معاكوا من شبرا وبعدين ام النور وسمعت ميعاد ومكان المظاهره بمش شايف اى دعوةولا بوستر عنها فى اى حتى زى المظاهرات اللى قبل كدا حتى(واحده مصريه )اللى كانت مابتتوصاش عامله بوست عن مظاهره يوم14/7 فى عابدين؟؟؟؟طب دا احنا فين ويوم 14/7 فين؟؟؟

ياجماعه ياريت حد يعرفنا خصوصا ان انا باتحرك من بره القاهره وباخبط مشوار ما يعلم بيه الا ربنا

المظاهرة لسة قائمة في معادها

الموضوع يا صاحبي أن المظاهرة دي بينظمها الحملة الشعبية و بما أن أغلبهم من دور والدي فقدراتهم الاتصالاتية واقعة شوية

النهاردة شوفتهم و سألت فين اعلان المظاهرة عشان ننشره حصل تخبط و قالك بعتناه لأ مبعتناهوش، هنبعته، هتروح تلاقيه

و أنا أهه لسه مستني.

أما موضوع كفاية فأولا كفاية عاملة المظاهرة دي أسفين فى الأخوان و بالتالي كان ضروري يعلنوها قبل الأخوان ما يعلنوا مظاهرتهم (عك مالناش دعوة بيه)

ثانيا كفاية ملهاش دعوة بمظاهرة امبابة ولا هيحضروها زي ممكانش ليهم دعوة بالأربع مظاهرات اللي فاتوا (أوعاك تصدق الصحفيين دول كسالى و خباصين)

يا زعيم

موقع جريدة الشعب بيقول إن مظاهرة الزيتون اللي دعا ليها حزب العمل

موقع المصريون بيقولك كفاية والتجمع

اجيلك هنا ألاقيك انتم اللي واخدين الموضوع جد

اللذيذ، وكالة الأخبار الإيرانية قالت عليكم إنكم شيعة بتتظاهروا ضد طغيان مبارك - بس مش على يوم الزيتون طبعاً

بعدين نقطة مش مرتاح لها، كل مرة الأخبار تقول تجمع 200، تظاهر بعض المئات، تجمهر بعض القلة المنحرفة/ الضالة

سؤالي ليه بالميات مش الالاف، كده ديتكم إمضاء بقلم سياسي متعفن وما نسمعش عنكم تاني أبداً

وأخيراً، الدعوة للتغيير بدون اختيار بديل حتفقد بريقها بعد فترة

زي الصحافة اللي بتغطي تحركاتم، مرة ، اتنين ، تلاتة وخلاص، فيه غيركم كتير حبيبي

ودا - في رأي المتواضع- تفكير البوليس السياسي، إنكم تصبحوا مملين متكررين والناس تنفض من حواليكم

ماشي عملتم مظاهرات والأمريكان - الذين لا يمكن الوثوق بهم أبداً (راجع موقفهم من العراقيين وتشجيعهم لهم على الثورة ثم تركهم لهم ليقعوا في أحضان كلاب صدام)

الأمريكان استخدموكم كورقة ضغط على الكهل المتصابي حسني، بس وبعدين

كفاية ظهرت على حقيقتها وابتدا الكل يلمع صلعته عشان خاطر المقابلات التليفزيونية، وحتى انت ابتديت تهاجمهم ودا معناه التشتت والتقزم وتكرار قصة الثور الأبيض

لازم رسم استراتيجية مرنة، وتحديد هدف واضح جداً، زي مثلاً ترشيح أبو غزالة، أو المغرور عمرو موسى

لازم تصحوا وتنتبهوا إن السياسة لعبة قذرة - لازم تضحك على الخروف الكبير، وتوعدوا إنك تسيبوا يتجوز المعزة اللي شاغلة عنيه - مع اعتذاري عن قبح التشبيه - لكن الغرض تقريب الفكرة من الأذهان

في النهاية، ربنا يحميك يا زعيم

الدعوة لمظاهرة السيدة و لاظوغلي و الزيتون بدأها مجموعة من الأصدقاء لا ينتموا لأي حركة.

حزب العمل فعلا تبنى المظاهرة و شارك في تنظيمها و الدعوة اليها، بالتالي يحق ليهم يقولوا مظاهرتهم

الاعلام اختزل الحركة كلها في كفاية، أولا لأن الشعار جذاب و الكل بيستخدمه و ثانيا لأن شباب من أجل التغيير بتشارك في كل المظاهرات و هما محسوبين على كفاية.

أنا بنتقد أداء كفاية من بدري و أصلا المبادرات الفردية اللي أحنا أخدناها كانت انتقاد لبطء كفاية و أساليب تحركهم، و أظن نجحنا أننا نشجع الحملة الشعبية و شباب من أجل التغيير أنهم يصعدوا شوية الشغل و يحافظوا على المظاهرة الأسبوعية.

المظاهرات اللي فاتت كانت بالأساس عن التعذيب و التعسف الأمني و ليها مطالب محددة جدا، المظاهرة الجاية (من تنظيم الحملة الشعبية) عن الفساد.

على العموم التنظيم الفردي مش حاجة كويسة و احنا احتجناله لما لقينا الناس مفوتة شوية لكن من هنا لأغسطس على الأقل الحركات مرتبة شغل و مافيش ضرورة لمبادرة فردية.

Here are the locals taking initiative.

http://img47.imageshack.us/img47/2685/200507049nq.jpg

Locals don't have the networking you are doing through the website,

emails and cells and laptops...

why ya3ni cell phones and internet are available all over the country, infrastructure and level of progress is highly normalized in Egypt the difference between the capital and other cities is not that big.

villages might trail behind a bit but no cell phones?

you don't need a laptop to network, you need a pc and a dialup connection or a cyber cafe.