You are here

my own opposition (this is fun)

Primary tabs

yes I got a whole opposition movement dedicated to me, and boy what a job they're doing, if only Egypts real opposition where on par.

mo7afez decided to appoint himself/herself as my full time opposition, I welcome the challange but would like to remind mo7afez أن الديموقراطية ليها أنياب.

today being a slow day I decided to officially start الحوار مع المعرضة by brining the discussion here on the front page follows are the comments and replies between me and mo7afez so far.

I would have loved to write this in the charactaristic gomhoreya style so that I'd have my national press bel mara, but alas my skills are not that advanced, only al-ropy can bring this enlightened style to the web.

mo7afez says


كفاية كده

غيروا الموضوع ... حتى علشان ما نزهقش

اهلا شباب ... انا مبسوط من الفكر الديمقراطي في الموقع وعلشان كده قررت اني ابقى معارضة لادارة الموقع

وبالتالي حكون راجل الحكومة في الموقع هاهاهاهاها

ونشوف اللي تبعته الايا


in true 7ekoma style I ignored this first post, frankly I thought about dispatching Ezabi my chief of police to shout at the guy, but then I discovered I don't know if mo7afez is a guy or a gal, and if its a gal I'd prefer to deal with her directly, ezabi is too weak when it comes to gals.

mo7afez says in response to my piece about how the struggle for democracy is older than 20 years.


الله ينور عليك يا استاذ
Submitted by mo7afez on Sun, 22/05/2005 - 00:51.

والله يا استاذ علاء انت قطعت قلوبنا من الحسرة على حال البلد

بس عايزك تقوللي الديمقراطية اللي انت عاوزها شكلها ايه ... يعني الدستور يبقى ازاي ... والقوانين تبقى ازاي

انا شخصيا علشان متفهمنيش غلط باطالب بديكتاتورية اكتر من الموجودة ... بس للاسف الظروف الدولية متسمحش ونتقابل تاني


and I replied


الديموكراسى

Submitted by alaa on Sun, 22/05/2005 - 08:33.

اتكلمت قبل كده فى اللى أنا عاوزه من الديمقراطية

مش ممكن مع نفسى كده أكتب دستور و قوانين أنا بكل بساطة عاوز محدش يدخل و يعطل شغلى و نشاطى، مش عاوز الفساد ياخد من كل لقمة باكلها قطمتين و عاوز أطمن ان البوليس لا يمكن يتعدى على جسمى أو كرامتى.


mo7afez replied


معارضة
Submitted by mo7afez on Sun, 22/05/2005 - 22:51.

الحقيقة قرات بتأني ما كتبته يا علاء بك والحقيقة هو من اول وهلة عجبني ولكن:

بصفتي معارضة في الموقع فلازم اقول ان هناك مغالطات بالجملة (يعني زي ما عمل النواب بتوع المعارضة في تعديل الدستور)

أول حاجة مقالة زي دي لازم تكون بالعربي بلغة اشبه بالعامية من كونها فصحي حتى تصل الى اكبر فئة من المتضررين من الشباب النصف متعلم اللي جاي سيادتك بتتكلم عليهم وتحاول تحل مشاكلهم

انت بتقول التعليم مشكلته سياسية ... كفاية بقي يا حكومة موقع manalaa.net تنسبوا كل حاجة للسياسة ... مشكلة التعليم هي التعسيلة اللي واخدها المجتمع ومظبطها على الصح وانتم اللي بتغذوا ده بحجة ان الحزب الوطني وحكومته هي السبب بممارساتها السياسية http://ed.sjtu.edu.cn/ranking.htm شوف كل دول العالم عندها جامعات كويسة ما عدا احنا مع ان عندنا جامعات خاصة ومش كلها حكومة علشان المجتمع اللي كل همه يقول كفاية مش عايز يشتغل والمعارضة كل رؤساء احزابها فوق السبعين سنة يعني المشكلة مش في الحكومة والكلام ده قاله هيكل في الجزيرة

انت بتقول انك مش عارف تعمل شغل علشان الحكومة بمؤسساتها مسيطرة على الاوضاع طب امشي في مصر المحروسة وعد كام واحد سارق من عامود الكهربا وكام واحد سارق خط تليفون من جاره ومتقوليش ان التليفون من مقومات الحياة زي الميه والهوا لانه اساسا عنده تليفون

اي نوع من انواع المشاركة السياية هو رغبة في الوصول للحكم او حب ظهور او اشباع شخصي والكلام ده ينطبق على 90% من العمل العام سواء احزاب او اندية او جمعيات اهلية (طبعا انا من ال 10% هاهاهاها ما انا معارضة دلوقتي) فاللي يخش يلعب لازم يلتزم باصول اللعبة يا تاخد شعبية يا تاخد سلطة مينفعش الاتنين واللي بيتبهدلوا من البوليس هم ببساطة يا مش عارفين اصول اللعبة يا بينسوها في النص

وللحوار بقية يا ادارة manalaa.net


and now for my reply


أولا المقال بالانجليزى لأنه كان رد على مقال كتبه حلمى بالانجليزى، و عموما أنا بحب أعبر عن نفسى بالانجليزى و بالعامية و بكره عمى أكتب بالفصحى (أو مبعرفش أصلا) الغرض من الكتابة عندى قبل ميكون التواصل هو انى أوضح لنفسى أنا بفكر ازاى تلاقينى بكتب انجليزى لما يبقى الكلام جد أو تقنى و عربى لما يبقى هرتلة.

و رغم انى حاكم مملكة العمرانية الا أنى لسه متواضع و مش متصور ان كلامى هقراه أعداد كبيرة و لا هيكون له تأثير.

أما بخصوص التعليم أنا مدعتش أن السياسة هى السبب الوحيد لتدهور التعليم واللى يقول كده يبقى بيستهبل، لكن السياسة واحد من الأسباب و السياسة واحد من المعوقات الأساسية قدام اصلاح التعليم.

و موضوع ازاى السياسة ساهمت فى التدهور ده اتكتب فيه كتير(و مش الحكومة بس الاسلاميين كان ليهم دور كبير برضه ربهم يخليهم لينا لولاهم مكنتش اتعلمت ان طه حسين كان كافر و مكنتش سمعت عن الحية الرقطاء و كنت فضلت موهوم و متخيل أن الجن تشبيه مش عفاريت عمالة بتدخل فى حياتنا و الأهم من ده كله مكنتش اتعلمت أن حلاقة شعر الرجل الوسطانية حرام و كل ده اتعلمتة من مدرسين أفاضل و فى حالات كتير برة حصة الدين)

أما موضوع وجود جامعات خاصة أنا أسف لكن الجامعات الهادفة للربح ده موضوع فاشل أصلا و فى الدنيا كلها و مينفعش يكون ده البديل للخرابة اللى اسمها الجامعية المصرية.

أما موضوع المجتمع مش عايز يشتغل ده مش صحيح، أحنا فى EGLUG نفذنا أكتر من مشروع داخل جامعات مصرية و كنت فى الأول بدخل المشاريع دى وأنا مفترض أن الموضوع هيكون مسخرة الحقيقة فى كل مرة لقينا ناس عاوزة تشتغل نفسها تتعلم بجد و نفسها تعلم و تعمل بس مش لاقيين الفرصة.

طبعا جزء من غياب الفرصة تخامل لأن احنا فى eglug لا لينا واسطة ولا سلطة (ما عدا فى العمرانية طبعا)و مع ذلك عرفنا نحقق حاجات، لكن لو عرفت كمية المجهود اللى بيبذل لتفادى البيروقراطية و الأمن و الفساد و الغباء و التناكة و البواخة و البجاحة و البوغاشة و السبوبة و الذى منه، مش هتستغرب من قلة الناس اللى بتاخد مبادرة.

و ممكن تقرى اللى قالته بهية عن ازاى انهيار الدور الايجابى العام للدولة بيأثر على الاحساس بالمواطنة و الواجب العام للمواطن

و على فكرة مقال بهية ده أفضل ما قريت فى الموضوع و بنصح كل حد يقراه و معلش استحملوا انجليزى العصور الوسطى بتاعها ده.

أما موضوع أحزاب المعارضة و هيكل يا عم الموميات دى مسئولة عن اللى احنا فى بنفس درجة مسئولية الحكومة، معارضة ايه دانت اللى معارضة.

أما فى موضوع شكوتى أن تعسف الحكزمة معطلة شغلى و شغل كل حد بيحاول يعمل حاجة جد ردك ان الدنيا ماشية سبهللة مالوش دخل، أولا انهيار سلطة القانون جزئ من المشكلة و الطبيعى الناس تتجاهل القانون لما يبقى ملهمش رأى فى صياغته ولما تبقى النيابة كلها فاسدة و لما يبقى القضاء بطئ. و للأسف الناس مبتميزش مش بينتهكوا القوانين سيئة السمعة و بس بيكسروا كله و محدش مصدق أن رغم كل ده لا يزال القضاء و القانون الملاذ الوحيد لينا كشعب.

و بعدين حتى لو الناس بتطنش اللى بيعمل عمل عام ميقدرش يطنش لأنه ممكن حد يتلككله ممكن عشان الحكومة خايفة منه و ممكن عشان فى موظف عاوز يترشى أو فى ظابط مبقوق منه أو ممكن هيبوظ مصلحة لحوت من اياهم و ياما ده حصل و أقرب مثال للعمرانية كان جمعية أطفال الشوارع اللى اتقفلت بتلكيكة فى الحسابات.

و ساعات حتى لو انت مطمن مبينفعش تطنش القانون، يعنى بالله عليك عاوزنى أدخل انترنت لا سلكى بشكل مخالف للقانون فى مدرسة حكومة؟ تفتكر دى تعدى؟ ثم حتى لو المخاطرة صغيرة جدا منين ألاقى متطوعين مستعدين يخاطروا؟ مش كفاية عليهم بذل الوقت و الجهد ببلاش؟

تعرف لو القضاء و النقابات و الجامعة و النيابة بقوا مستقلين بجد و اتقضى على الفساد فيهم؟ تغور الرياسة على مجلس الشعب أنا شخصيا هكتفى بدول لكن المشكلة أنه الرياسة و الوارة و المجلس هما اللى واقفين ضضد اصلاح الحاجات دى.

ولا يا سيدى المشاركة السياسية مش بالضرورة حب ظهور أو حب سلطة و على العموم أنا عديت مرحلة انى أعتبر نفسى الله قادر على معرفة النوايا و الحكم عليها أنا اللى ليا النتائج و الأعمال .


hhmmm I ended up taking this too seriously eh? yalla now that I have my dedicated opposition I can write anything without worrying about readership since my full time opposition has no choice but to read.

Comments

معالي باشا العمرانية وكل المناطق التكنولوجية

لازم ارد لان انا المعارضة الوحيد بالموقع فالمسؤلية اللي على كتافي تحتم عليا اني ما اسكتش حتى لو عجبني الكلام(حاجة مقرفة صح ؟ اهو ده اللي بتعملوا المعارضة بجد)

الحقيقة اكتر حاجة عجبتني انت قلتها ان الديمقراطية ليها انياب, لان دي فعلا الحقيقة, انت تقدر ما توصلش صوتي لاي قارئ للموقع و تمنع اي حاجة توصل له عن طريقي ولكن انت ما تقدرش تقول لي كده الا لما تأكلني فطير مشلتت في بيتك زي ما الراجل اللي عمل الحزب الوطني عمل كده في الفيلم هاهاهاها

أعارض بقى؟

الكتابة بالانجليزي او بأي لغة غير العربي مقبولة لما تكون خواطر او ايميل في شخصي او حتى جروب لكن لما تبقى في مجلة او جرنان او عامة على النت لازم تبقى عربي امال حكومة العمرانية خلتها عامة ليه؟

نرجع تاني للتعليم, ارسلت لسيادتكم رابط لموقع (شفت الفصحى يا حكومة هاهاهاا) عن ترتيب للجامعات عالميا عامله معهد عالي في الصين , و الجامعة اللي واخدة المركز الاول هارفارد وهي جامعة خاصة ... بفلوس يعني فلو سمحت يا افندم ما تقوليش ان التعليم ابو فلوس او اللي غرضه الربح فاشل لان طه حسين نفسه كان بيدي لمولانا بتاع الكتاب فلوس او ما شابه ده البند ده في الدستور المصري اللي هو مجانية التعليم مش حينفع يتغير الا كمان عشر سنين ياللي عايزين تغيروا الدستور

وبعدين انت كده زودت المعارضين بتوعك ببتوع الاخوان يعني المفروض الاخوان اللي هما اعداء الوطني في الحقيقة يبقوا مع الوطني هنا (مساكين العالم دي محدش عايزهم في الحكومة خالص حتى العمرانية هاهاهاها)

وعن تجربة eglug اللي انا معجب بيها (بس لازم اعارض) قول لي ليه انفصلتم عن linux-egypt.org مش دي برضه تفتيت للمجهودات يا حكومة وتبقى الحكومة مش عارفة تتعايش مع بعضيها نفس الاشخاص اللي ليهم نفس الهدف متفرقين وبعدين اسبوبة اللي انت قلتها في وسط الكلام دي سبوبة للمجتمع وبيروقراطية الموظف الحكومي وليست بيروقراطية الحزب الوطني

واديك اقريت ان احزاب المعارضة مومياوات وده احنا المعارضة هنا توافق عليه

غياب القانون مش مسؤلية الحزب الوطني وحكومته لان الحل في المشكلة دي ان لو فلاح بنى له بيت على ارض زراعية يتعدم, وكده يبقى انت كمان بتنادي بالديكتاتورية , يعني احنا كده كلامنا واحد , لا يا سيدي قول حاجة محددة علشان انا اقول حاجة عكسها

ونتكلم تاني يا زعيم

>الكتابة بالانجليزي او بأي لغة غير العربي مقبولة لما تكون خواطر او ايميل في شخصي او حتى جروب لكن لما تبقى في مجلة او جرنان او عامة على النت لازم تبقى عربي امال حكومة العمرانية خلتها عامة ليه

بص بقى الكتابة تبقى باللغة اللى تعجبنى و هو ده النظام أصل أنا سيد قرارى.

> و الجامعة اللي واخدة المركز الاول هارفارد وهي جامعة خاصة ... بفلوس يعني فلو سمحت يا افندم ما تقوليش ان التعليم ابو فلوس او اللي غرضه الربح فاشل

كون أن الجامعة بفلوس مش بالضرورة معناه الجامعة هدفها الربح و لو دققت تلاقى الجامعات الكبيرة دى مهياش استثمارة و لا حاجة دى جامعات أهلية ليها مصادر تمويل متعددة من الأوقاف و المصاريف و الحكومة و التبرعات و بيع الكتب و التعاون مع شركات فى البحث العلمى لحد بيع التيشرتات للطلبة.

و على العموم مجانية التعليم مش سبب لسوء مستواه بدليل الجامعات الأوروبية مثلا.

بالنسبة لى مجانية التعليم مبدأ هدف لازم نحققه لكن طبعا من غير منأثر على مستوى التعليم، و التاريخ علمنا أن مستوى التعليم و البحث العلمى على المدى الطويل هو الأهم لكن مش معنى كده منبذلش مجهود فى مجال المجانية. و بعدين انت هتدخلنا فى مواضيع فرعية و تلخبطنى.

>وبعدين انت كده زودت المعارضين بتوعك ببتوع الاخوان يعني المفروض الاخوان اللي هما اعداء الوطني في الحقيقة يبقوا مع الوطني هنا (مساكين العالم دي محدش عايزهم في الحكومة خالص حتى العمرانية هاهاهاها)

بص زى ما مصر كان عندها الرئيس المؤمن ثم الرئيس المزمن أنا فى العمرانية بقى معروف بالرئيس المدمن، الأخوان أول حاجة هيعملوها هتبقى قفل مصنع البيرة و تانى حاجة هحجبوا نانسى، و روبى و ماريا و تينا و دوللى و كل الحاشية بتاعتى و ده طبا لا يمكن القبول بيه.

على العموم يا سيدى أنا سبق و قلت أنى رغم اختلافى بل واحتقارى للأخوان اللا أنى مش من اللى بيقولوا بلاش ديموقراطية لو النتيجة الأخوان (شوف أنا جاهز للمعارضة من زمان ازاى، و ده طبعا بالانجليزى برضه عشان الدهماء مش مفروض يعرفوا رأيى).

و بعدين أنا مجبتش سيرة الأخوان أنا قلت الاسلاميون و هو فى الحقيقة لفظ عام و غبى مش عارفله بديل عدل بس، على حد علمى الأخوان مش من أنصار الحية الرقطاء. كان عندى مدرس انجليزى اخوانجى و بسبب اسم أبويا كان فاكرنى أخ ليه لحد ماشاف والدتى، طلع ميتينى الله يخرب بيته من بعدها مفتكرلوش طرائف غير ان كل حد عنده كان خنزير من خوفو لصلاح جاهين (كان أول و أخر مرة أصلا أشوف حد بيكره صلاح جاهين).

>وعن تجربة eglug اللي انا معجب بيها (بس لازم اعارض) قول لي ليه انفصلتم عن linux-egypt.org مش دي برضه تفتيت للمجهودات يا حكومة وتبقى الحكومة مش عارفة تتعايش مع بعضيها نفس الاشخاص اللي ليهم نفس الهدف متفرقين وبعدين اسبوبة اللي انت قلتها في وسط الكلام دي سبوبة للمجتمع وبيروقراطية الموظف الحكومي وليست بيروقراطية الحزب الوطني

ولا تفتيت ولا حاجة linux-egypt رفضت الديمقراطية و القائمين عليها استخدموا خطاب يكاد يطابق خطاب العيلة المالكة فى رفض التغيير و الاصلاح. و الألعن ان لقينا الخلاف مش مع حكومة لينوكس مصر بس نص شعب لينوكس مصر كان عاوز يقضى وقته فى الهجوم على المسيحيين و اليهود و ستار أكاديمى (تصور برضة يكاد يطابق يا أخى) و كانت النتيجة أن اكتشفنا أن فينا مجموعة مش عارفة تعمل اللى هى عارفة انها تقدر تعمله فققرنا نبدأ من الأول، و لحد دلوقتى الموضوع ماشى ديمقراطى و مفهوش بضينة على حد باسم الدين و النتيجة حققنا فى سنة أكتر بكتير من اللى قضينا 4 سنين بنحاول نحققه.

طبعا التجربة لا تخلوا من أخطاء و مشاكل و محققناش قد اللى نفسنا فيه و يمكن كمان على المدى البعيد اللى حققناه ده ميلحقش يفرق لكن السنة دى حولتنى من انسان كاره البلد والعيشة لواحد عنده أمل كبير فى البلد و حابب العيشة و أظن التجربة فيها دروس كتير فى العمل العام و التنظيم و التطوع و تحريك الشباب و بنى مجتمعات رقمية، لو المعارضة بتفهم كانت قعدت اتعلمت مننا.

>غياب القانون مش مسؤلية الحزب الوطني وحكومته

أنا عندى رد من كلمتين على ده يا اما يفحمك يا اما أنت ضلالى و ملوش لازمة الكلام

كمال الشاذلى

أظن الموضوع مش محتاج كلام أكتر من كده.

على العموم أرجوك متبسطش كلامى أنا قلت مسالة انهيار سلطة القانون ليها أبعاد و أسباب كتير و رأيى ان النظام الحالى مسئول عن أغلبها لكن مش كلها و أرجوك راجع مقال بهية لأنى مش هقدر أعبر عن الكلام ده أحسن منها.

أنا مبناديش بالدكتاتورية و مفيش احتياج للاعدام البيوت مش بتتبنى فى يوم و ليلة يعنى لو فى سلطة قانون حقيقة و بوليس له شغلانة غير التعذيب ممكن الممارسات دى تتمنع. و ده طبعا برضه مرتبط بأن القانون يتنفذ على الاوزير زى مبيتفذ على الغفير و ان يبقى بيصاغ من مجلس منتخب فى انتخابات نزيهة و أن هيئة التحقيق تبقى مستقلة فعلا و متدورش تولع فى متهمى سرقة المعيز (حصل فعلا).

مأنكرتش مسئولية الشعب المصرى عن اللى بيجراله (أصلا أحنا مسئولين اننا استحملنا حكامنا غيرنا اتعرض لأسوأ من كده و اتصرف) كل اللى بقوله اننا محتاجين حرية تنظيم و حرية عمل و حرية فكر و استقلال مؤسسات و شوية (شوية بس فعلا) ديمقراطية عشان نصلح ما بأنفسنا.

لكن أكرر محناش محتاجين نستنى ممكن نبدأ باللى موجود و مرة نلف حوالين المشاكل و مرة نتحايل و مرة نطنش و مرات نتخانق بالظبط زى eglug معملت.

و العمرانية بتمسى.

مساء الخير يا شعب العمرانية الحبيب

سعدت بكلام السيد الرئيس وزي ما انتم عارفين ... انا بس اللي حارد عليه

يافندم احنا عارفين ان الموقع بتاعك وتقول فيه اللي انت عايزه عربى او انجليزي لانه ملكك(domain+host) بس لازم تعرف ان دي هيا وجهة نظر الوطني بالنسبة للمحروسة كلها ... manalaa.net بتاعتك وبقية مصر بتاعة الوطني يا زعيم (شفت بقى وجهة النظر)

ونناقش عاشر في التعليم: قناعتك بمجانيته على راسي من فوق بس يا الحكومة اللي ترضى بواحد يقعد 10 سنين في رابعة حقوق و 15 سنة في ليسانس اداب وكل ده ببلاش تبقى حكومة عايزة اللي يحب ينام ينام وكله على حساب الخواجة

بالنسبة لموضوع الاخوان كنت اتمنى ارجائه لكن المعارضة بتقول لا اوافق على وصولهم للحكم بالديمقراطية لسببين:

الاول

لو مسكوا الحكم يبقى مفيش عودة ويبقى احنا الوطني ارحم مليون مرة ومش علشان الاسباب اللي الحكومة قالتها انما ببساطة بسبب التسلق السياسي والغيبوبة اللي بيوقعوا فيها اتباعهم امال احنا حيعملوا فينا ايه والمعارض اللي بيتكلم دلوقتي اللي هو انا بدون غرور يعلم تماما كل من يحبون تسمية نفسهم بالتيارات الاسلامية بيفكروا ازاي عن طريق حوارات منهم من القلب على اساس اجتذابي ... ما انت عارف المعارض الوطني ما تعرفلوش حال هههههههه

السبب التاني

لاني مش مقتنع بمبدأ الديمقراطية من الاساس واحسن وصف له:

وأول ما يجب أن يلاحظ أن الناس على طبيعتين: الذين غرائزهم سقيمة، والذين غرائزهم سليمة، والأولون أكثر عددا. ولهذه العلة، فخير النتائج التي يراد تحقيقها من التسلط على الغوييم بطريق الحكومة، إنما يكون بالعنف والإرهاب، لا بالمجادلات النظرية المجردة، إذ كل امرئ مشتهاة الوصول إلى امتلاك زمام السلطة، وكل فرد يود لو يصبح دكتاتورا. وقليلون الذين لا يشتهون تضحية مصالح الجمهور من اجل منافعهم الخاصة....... البروتوكول الاول

بالمناسبة هذه البروتوكولات الاخوان هم اكثر الناس تداولا لها واقلهم قراءة فيها ... وللاسف كلم الصهاينة صحيح ولكن اسلوبه عنصري قبيح ومن قبله قال ذلك كاتب كتاب الامير

طبعا تجربة لينوكس مصر بها ما قلته ولكن بصفتي افهم قليلا في الامور الفنية فدنيا البرامج تعترف بالمنتج ... هما طلعوا انتاج كمطورين وانتم افضل مستخدمين بالذمة مش حرام عدم التكامل ... وكان ممكن تكملوا بغض النظر عن الهراءات التي تقال لكن حكومة العمرانية دايما نفسها قصير (خلي بالك انا كده بافتري عليكم بس هي دي المعارضة)

بالنسبة لاخر صاعقة انت قلتهالي "كمال بك" لازم ارد عليك بكلام يهز المجلس اسمع يا استاذ الواقع والتكنولوجيا

الوحيد الذي حرك المصيبة اللي اسمها يوسف والي من على انفاس وزارة الزراعة والحزب الوطني ومجلس الوزارة هو الراجل اللي انتم بتلعنوه ليل نهار "جمال" حبيبي وحبيب الملايين واسأل اي حد تعرفه داخل في دهاليز السياسة ازاي ابو والي خد الطريق الزراعي ... فالوحيد اللي قادر على تحريك وطرد هذه الحملة الاتحادية الاشتراكية من على انفاس الدولة هو هذا الرجل ... لكن ازاي ده واحد ابوه ولا مؤاخذه الريس يعني اكيد حيبقى لا مؤاخذة برضه لازم الاول يمسك ايمن نور وبعدين يبقى يمسكها لجمال ههههههههههه...نور افندي ده ينطبق عليه كلام البروتوكول الاول بنسة 100.1%ونقول

وبعدين انا ما اخترتش اني اعيش في جمهورية العمرانية الا علشان رئيسها اسمه على اسم الغالي ابن الغالي والغالية واخو اغلى الغاليين ههاهاهاهاهاهاهاهاه

واحلى مسى على العمرانية

والله شيء رائع وأقرب للحلم أن نتخيل انتقال الحزب الوثني و كهنته الجاثمون على صدور العباد إلى مقاعد المعارضة في مصرنا المنهوبة،وإن كنت شخصيا اتمنى انتقالهم إلى الرفيق الأعلى ..آمين

تحية من القلب لك يا علاء على مجهوداتك المتميزة واستعير هتاف بلطجية الحزب الوثني: يا علاء دوس دوس ..إحنا معاك من غير فلوس

وماتنساش العشرينة يا ريّس

مساء الخير يا نذير بك

الكلام مع المعارضة لا يجب ان يكون بمثل هذا اللون الكحلي الغامق ... ده انا اتشاهدت يا راجل

وانا حاضطر كده اكلم حقوق الانسان في العمرانية واقول ان حكومة العمرانية بتتمنى لي الموت ولما حقوق الانسان في العمرانية تطنشني حاخرج الى المحروسة واقول للبوليس .... اكيد انا ساعتها حابقى عميل ... هاهاهاها ... فيا حقوق انسان العمرانية نداء

وبعدين جديد عليا من حكومة العمرانية الالفاظ الجامدة دي وكلمة الملوخية بتفكرني بكمال بيه لما قعد يمثل سندوتشات الكبدة للراجل بتاع الكبدة في المجلس

يا علاء باشا حوش عن معارضتك كمال شاذلي العمرانية

انا وطني وطني وباطنطن

سلام يا نذير افندي

السيد الدكتور الوزير المحافظ

بالنسبة لا نتقالك وباقي سدنة المعبد الوثني للرفيق الأعلي،فهذا لا يتعدي نطاق الأمنيات إلى حيز التنفيذ فاقامة السلخانات للمعارضين هو أسلوبكم وأحداث يوم الاستفساء تشهد، يوم أقام نظامكم المقبور تحالفا مقدسا مع البلطجية والمومسات لذبح المعارضين وهتك عرض المتظاهرات. وكما تقول العرب "رمتني بدائها وانسلّت" أو بالبلدي عشان تفهم "....تجيب اللي فيها فيك"

وكذلك ينسحب ما سبق على اتهامات العمالة للخارج ويشهد على كلامي رشوة سنوية قدرها 2 مليار دولار لتنفيذ تعليمات الخواجة صاخب المخل داخليا وإقليميا.

فساد تزوير إفقار تبعية ..برنامج الوثني للفترة القادمة

ملاحظة شكلية: الثورة ألغت الالقاب يا من تتمسحون بالثورة وانتم امتداد طبيعي للثورة المضادة..فاكر يا نذير أفندي ولا نسيت؟

شالوم علخيم كما يقول من تحمون حدودهم بجيشنا الوطني يا نقطة سوداء في تاريخ بلدنا،وإن عدتم عدنا.

نذير فصيح افندي

تذكرتك وتذكرت علاء في مناقشة عبيطة بيني وبين احدى طالباتي عنما سألتني عن ما معنى الاستفتاء وايه الحكاية وعندما افهمتها الموضوع تعجبت ابنة العشرين ربيعا من ان يجعل رئيسا للجمهورية لنفسه انداد في الانتخابات على ان ذلك غير منطقي وعندما اخبرتها بان ذلك لا يعجب حركة استاد القاهرة "كفاية حرام" وبالاتفاق مع ثلاثة من الاحزاب المزمنة يودون مقاطعة الاستفتاء كما لو كنا نلعب في الشارع مطت شفتيها في بلاهة غير مصدقة

كنت اتمنى ان اقول لها الحقيقة ... انهم يودون ان يترك الرئيس ومجلس الوزراء اماكنهم عن طيب خاطر وبدون اية حزازيات للسيد محمد ابراهيم جسنين او السيدة نوال السعداوي التي تتدفق السياسة في دمائهم وتملأ الاراء المتطورة كلامهم ولكن ابى لساني ان اقول ان المعارضة في المحروسة بمثل هذه البلاهة

وتتكلم سيادتكم بالعربية الفصحي وبالفاظ من وحي كتاب الله ظنا ان كل من بالوطني الذين هم معارضة في مجلس العمرانية الموقر جهلة باللغة او بايحاءات الالفاظ تماما كما يفعل سرور بك في مجلس شعب المحروسة

طب بالبلدي بقى

تتكلم عن المعونة وكاننا بناخذها من الامريكان عاشان نسكت عن اللي بتعمله اسرائيل في فلسطين ... وتتخيل اننا لولا الفلوس كنا حندخل تل ابيب

طبعا ماهو اللي ما يشوفشي من الغربال يبقى اعمى ... 48 وكمان 56 وبعدين 67 نقول التالتة تابتة يا اخي ونحترم نفسنا ونشوف حالنا "لن انتقد الرئيس جمال عبد الناصر هاهنا لانه جزء من النظام الذي ادافع عنه" ولكنني انتقد سيادتكم اين كنتم كمعارضة عندما حدث كل هذا واين كان الوفد عند حدوث اخطاء الثورة ... طب نحاول نرد الارض ونشوف حالنا وناخد فلوس احسن من عينهم؟؟؟

لالالا نعمل زي سورية ما عملت نخسر الارض وبعدين نرفض نفاوض وبعدين نيجي من 2004 نلحس تراب الارض علشان ما حدش يفلي اي زعيم سوري زي ما حصل للزبون بتاع جبهة الرفض زمان

مش عايز اطول واسف يا ريس علاء على الاطالة وعلى الكلام بدون دعوة من سيادتكم على اساس ان نذير بيه "علشان ما يزعلش" هو وزير شؤون مجلس الحرية بالعمرانية

سنعود

السيد الدكتور الوزير المحافظ معلم الأجيال

يحق لطالبتك ان تمط شفتيها في بلاهة، لا لأن سيادتك مرجعها في شئون السياسة، ولكن لأن هذا الجيل لم يعرف الا حاكما وحيدا أوحدا لبلده منذ أربعة وعشرون عاما عجافا ،فظنوه من ثوابت الحياة ، مع أن الثابت الوحيد في حياتنا هو التغيير ، لكن يبدو أن القابع في قصر العروبة قد أعطى قوانين الكون اجازة مفتوحة،باعتباره الحاكم بأمره

يحق لها أن تمط شفتيها في بلاهة ، فهل يعقل أن ينازع الفرعون( أو ولده من بعده) عرشه افراد من عامة الشعب وكلنا يعلم أن الفراعنة لا تترك عروشها الا بطلقات الرصاص أو بزيارة مفاجئة من مبعوث العناية الالهية عزرائيل

المعارضة كانت بلهاء عندما صدقت دعاواكم الديمقراطية الكاذبة بامكانية خروج نظام تعددي ديمقراطي من رحم نظام شمولي ولكنها عادت لرشدها بتوّحدها في مقاطعة لاستفتاء الاستهبال:هل توافقون على احتكار الحزب الوثني للحياة السياسية في مصر؟

تجاهلك لا سرائيل ومشروعها الصهيوني التوسعي ليس عليك بمستغرب، فهذا النظام امتداد لنظام سبقه دعا للانعزاليةوارتمى في احضان الامريكان على حساب عروبته وانقلب على كافة منجزات ناصر الذي تتمسح به وانتم لستم الا امتداد للثورة المضادة على كل ماجاء به

ان دفن الرأس في الرمال او النظر في الاتجاه الاخر لن يلغي وجود عدو ينتهز اللحظة المواتية للانقضاض على مصر عدوه الاكبر في المنطقة وليس الفلسطينيين

أبرمتم كامب ديفيد وانتظر الشعب المصري انهار اللبن والعسل بعد اكتوبر آخر الحروب ولكن كل ما وجدناه كان مزيدا من النهب والافقار والديون رغم انتهاء الحروب والقاء السلاح

تقول ناخد فلوس احسن من عينهم، منطق شحاذين،ماشي بس امريكا ترشيك لسواد عيونك ولا كله بثمنه؟والثمن لو تعلمون عظيم واعتقادي ان قيم السيادة والاستقلال الوطني والتنمية لا تعني لكم شيئا يا نظام الغبرة

وفي النهاية،كنت اظن ان زواحف وخفافيش النظام ستنزوي في جحورها وتكف قليلا عن بث سمومها بعد مأتم الديمقراطية وسحل المعارضة السلمية وهتك عرض اخوات لنا في الوطن ولكن مايزال في العهر بقية واذا لم تستح فاصنع ما شئت

السيد الاستاذ المثقف : نذير

تحية طيبة وبعد

بالاشارة الي رسالة سيادتكم التي المح بها تكرارا وكما توقعت معارضة العمرانية اتجاها ناصريا اشتراكيا.

فاود ان اوضح لاهالي العمرانية الكرام ان الحكومة تتالف من 1- الاحزاب الاشتراكية التي تقول انها ناصرية واه لو يعلمون ان كل ما لدينا من سلبيات هم السبب بها

2-احزاب ليبرالية مثل حزب الجريدة الخضراء الذين تركوا للرئيس عبد الناصر المجال حتى وصلنا لما نحن عليه

3- حركات اهلية "من جماهير النادي الاهلي" (كفاية حرام)

4- والاهم الرئيس علاء الذي يقود شعب العمرانية وينظم الاتجاهات المتضادة داخل الحكومة "مع بالغ احترامي وتقديري ولا اقول له كفاية هههههههه"

سيادتكم تفضلتم بالاشارة الى اننا مصريين ويحكمنا فراعنة فهذه حقيقة تاريخية ولغوية فحاكم مصر اسمه فرعون سواء كان مصريا ام هنديا وللتتفضل بالرجوع الى كتب التاريخ الاسلامي لمعرفة حقيقة اللفظ. ولما نقول ان الذي يحدث غير مسبوق منذ عهد الملك مينا لم نكن بذلك لنفتري على احد فهذه هي الحقيقة

اما مسألة التداول السلمي للسلطة فهذه ليست من عادة المصريين باعترافك انت ... اذن نحن الاصل وانتم الذين تودون تغيير ذلك جذريا بين عشية وضحاها ... شيئ خارج نطاق العقل والله.

ويتضح من كلام سيادتكم حب اللغة العربية... فقل لي بالله عليك هل كان هناك تداول سلمي للسلطة في عهد الخلفاء الراشدين ام ان ما حدث من فتنة واغتيال للخليفة كان سببها دعاوي مثل دعوى سيادتكم.

وللكلام عن كامب ديفيد فليس ذنب رجل طلبوه لدمه انه استشف ان اولاد الزفت سام سوف يقودون العالم الى نهايته واعتقاد انه ساعدهم على ذلك بالاتفاقية يدخل ضمن بند الهلاوس السياسية.

كانت كامب ديفيد عسيرة علينا بشروطها ولكن لما تعرف تعمل كمبيوتر من الالف الى الياء تعاى ونتكلم ... بدل ما تنادى باشتراكية انهارت من عقدين من الزمن ... ولله في خلقه شؤون

عذرا فخامة الرئيس علاء للمرة العشرين على الاطالة وشكرا لسعة صدركم

شعب العمرانية ..... باحبكم ههههههههه

لا إلا الخلفاء الراشدون قبل أن تتكلم فى التاريخ ياشاطر تعرف عن من وفى أى شئ تتحدث أما عن التداول السلمى فاقرأ عن غالسقيفة وماحدث فبها واقرأ عن اختيار عمر خليفة لأبى بكر وكيف كان ولا تنسى أهل الشورى الذين اختاروا عثمانا خليفة أما عن مقتل عثمان فراجع كتب التاريخ لتعرف من قتلوه وما أرادوا بقتله فما كانوا إلا غوغاء الناس يحركهم أقوام أرادوا الباطل وكرهوا الحق واختلقوا الأكاذيب و الإفتراءات على خليفة المسلمين لهو فى نفوسهم وخبث فى مقاصدهم وليس أدل من هذا إلا زعم الكتاب الذى زعموا أن الخليفة أرسله الى واليه في مصر ليقتلهم آلله أصار أصحاب رسول الله طغاة يقتلون المعارضين ومن عثمان ذا النورين الذى تستحى منه الملائكة؟ ولو أراد عثمان لقتلهم أهل المدينة ولكنه أبى وفال لا يهراق دم مسلم لأجلى فاعلم عن من تتكلم

بسم الله

والله ان عارف انا باقول ايه كويس بس انت بص على اللي انت بتكتبه يا استاذ ........وحاردعليك بطريقة الريس علاء

"أما عن التداول السلمى فاقرأ عن غالسقيفة وماحدث فبها"

السقيفة كان فيها خيار المهاجرين والانصار من المرشحين للحكم وتم اختيار المهاجرين ومن بينهم ابوبكر رضي الله عنه لانه اكثرهم فضلا ... يعني لما نقول ان ريسنا في البهية كان قائد في حرب اكتوبر يبقى نفس المعنى مع الفارق بين ابو بكر واي حاكم كان ... ولا نزكي احدا على الله

"واقرأ عن اختيار عمر خليفة لأبى بكر وكيف كان"

لقد كان ابو بكر هو الخليفة واختار عمر للخلافة من بعده ... يعني زي ما ريس يختار نائب للرئاسة من بعده ... يعني مش المعارضة بالمدينة المنورة هي اللي اختارته.

"ولا تنسى أهل الشورى الذين اختاروا عثمانا خليفة" ... يعني كان انتخاب بينه وبين علي (بالاقتراع السري المباشر) ... ولم يقاطع اهل دولة الاسلام الاقتراع ولم ينادوا بالعصيان كما تفعلون انتم ... ايضا مع الفارق بين الصحابة واي حاكم في اي زمن.

"أما عن مقتل عثمان فراجع كتب التاريخ لتعرف من قتلوه وما أرادوا بقتله فما كانوا إلا غوغاء الناس يحركهم أقوام أرادوا الباطل وكرهوا الحق واختلقوا الأكاذيب و الإفتراءات على خليفة المسلمين لهو فى نفوسهم وخبث فى مقاصدهم" ... يعني زي حركة كفاية كده؟ ... غوغاء من الناس سمكرية وميكانيكية وشباب مدمغ وفنانين سينماءيين (شعراء العصر الحديث الذين يتقلبون على حسب الدور) ... ومأجورين من دول اخرى ولقد سمعنا ورأينا بأعيننا سعد الدين باشا ابراهيم وهو في مجلس الشيوخ وايضا وهو مع اولبرايت, وان كنت لا ترى في ذلك عمالة فاقرأ انت عن نظرية الفوضى في العلوم السياسية (على فكرة دي بجد) وكيف يرغبون في تطبيقها بمصر.

واولا واخيرا انا لا اتعرض لصحابة النبي بكلمة واحدة وما قلته هو سب لمن اغتالوه.

وفي النهاية يود الشاطر ان يوضح لك انهم اسموها شورى والشورى شيء والديمقراطية شيء اخر ... عرفت بقى مين اللي بيقرا ومش بيفهم اللي هو بيقراه.

اعتذر للريس علاء اذا كنت تجاوزت ولكن هو الذي رماني بالتهم

اشكر الرئيس مع اعزازي لشعب العمرانية الحبيب

معاش على الهجوم بس اصل أنا انغاظت حبتين المهم معارضة للمعارضة وهرد عليك

""أما عن التداول السلمى فاقرأ عن غالسقيفة وماحدث فبها"

السقيفة كان فيها خيار المهاجرين والانصار من المرشحين للحكم وتم اختيار المهاجرين ومن بينهم ابوبكر رضي الله عنه لانه اكثرهم فضلا ... يعني لما نقول ان ريسنا في البهية كان قائد في حرب اكتوبر يبقى نفس المعنى مع الفارق بين ابو بكر واي حاكم كان ... ولا نزكي احدا على الله"

الفرق كبير الإختيار هنا فى جو ديمقراطى بين أكثر من مرشح (سعد بن عبادة وأبو بكر بعد ذلك) وفى وجود معارضة قوية متمثلة فى الأنصار ثم جولات من المشاورات انتهت باختيار أبو بكر ثم مبايعة أهل السقيفة له (البيعة الخاصة) وامتناع سعد عن مبايعته (لم يقل أحد أنه عميل ويتلقى أموال من الخارج) ثم بعد ذلك البيعة العمة وهى بيعة على الملأ لا يمكن تزويرها ولا أحد يجمع الناس فى حافلات الحكومة أو يعطيهم 2 جنيه عشان يبايعوا بل فى جو من منتهى الشفافية

""واقرأ عن اختيار عمر خليفة لأبى بكر وكيف كان"

لقد كان ابو بكر هو الخليفة واختار عمر للخلافة من بعده ... يعني زي ما ريس يختار نائب للرئاسة من بعده ... يعني مش المعارضة بالمدينة المنورة هي اللي اختارته."

أول شئ الخليفة أبو بكر لم يختر عمر إلا بعد مشاورات ومداولات بينه وبين الصحابة الذين وافقوا الا واحدا خاف من غلظة عمر وشدته ثانيا لم يكن هناك مايسمى بالمعارضة والحكومة فالكل يعارض ان رأى فى المعاضة الحق أو يؤيد ان رأى مع الخليفة الحق

""ولا تنسى أهل الشورى الذين اختاروا عثمانا خليفة" ... يعني كان انتخاب بينه وبين علي (بالاقتراع السري المباشر) ... ولم يقاطع اهل دولة الاسلام الاقتراع ولم ينادوا بالعصيان كما تفعلون انتم ... ايضا مع الفارق بين الصحابة واي حاكم في اي زمن."

هناك فرق فهذا اختيار حقيقى فالكل يعرف أن صوته سيذهب لمن أراده هو لا لمن تريده طيور الظلام ومخرجى الموتى الى صناديق الإقتراع

""أما عن مقتل عثمان فراجع كتب التاريخ لتعرف من قتلوه وما أرادوا بقتله فما كانوا إلا غوغاء الناس يحركهم أقوام أرادوا الباطل وكرهوا الحق واختلقوا الأكاذيب و الإفتراءات على خليفة المسلمين لهو فى نفوسهم وخبث فى مقاصدهم" ... يعني زي حركة كفاية كده؟ ... غوغاء من الناس سمكرية وميكانيكية وشباب مدمغ وفنانين سينماءيين (شعراء العصر الحديث الذين يتقلبون على حسب الدور) ... ومأجورين من دول اخرى ولقد سمعنا ورأينا بأعيننا سعد الدين باشا ابراهيم وهو في مجلس الشيوخ وايضا وهو مع اولبرايت, وان كنت لا ترى في ذلك عمالة فاقرأ انت عن نظرية الفوضى في العلوم السياسية (على فكرة دي بجد) وكيف يرغبون في تطبيقها بمصر."

لا الفرق كبير هؤلاء لم يكن معهم دليل كلها أكاذيب وادعاءات لا سند لها ولا دليل أما كفاية فمعهم الأدلة اللتى يراها كل مصرى بعينى رأسه من ظلم وجبروت وسرقة لأموالنا خيرات بلدنا أمام أعييناوالزج بنا فى المعتقلات والسجون ناهيك عن أقسام الشرطة وما يحدث فيها ووووووو وبعدين سعدالدين(والدين منه براء)فكلب أمريكا وماهو والجلبى إلا واحد وإن افترقت الأجساد فقد اتحدت العقول المليئة بالظلام يحسبونه نورا

"واولا واخيرا انا لا اتعرض لصحابة النبي بكلمة واحدة وما قلته هو سب لمن اغتالوه."

سأرد عليك بما قلته أنت فى الأول

" فقل لي بالله عليك هل كان هناك تداول سلمي للسلطة في عهد الخلفاء الراشدين"

اخي العزيز الاستاذ خالد

برضه انت مصر انني اسب الصحابة وحاشاي ان افعل ذلك

انا مصر انه لم يكن هناك تبادل سلمي للسلطة في عهد الصحابة

وزي ما انا فاهم ان التبادل السلمي للسلطة معناه ان يترك الحاكم او الحزب الحاكم السلطة بدون ثورة او انقلاب لغيره لكي يحكم وهكذا.

اعذرني فانا محافظ ولا ارى ذلك النظام مثاليا وارى ايضا انه مصطلح ونظام مستوردين من اوروبا ... وليس لهم اي علاقة بعهد الخلافة الراشدة. ام ان كل ما يأتينا من أوروبا سليم وجميل وفوق النمرة واحد بواحد؟

لقد قالها عثمان رضي الله عنه نصا عندما طالبه المتظاهرون ومثيري الفتنة بترك الحكم. ما كنت اخلع عباءة البسني الله اياها. ام لم يحدث هذا الكلام والا لماذا اغتالوه لو كان طبق ذلك؟ يعني انت بتعتبر اني اسب الصحابة لانك ترى الديمقراطية من المسلمات وانا ارى اني لا اسبهم بتاتا لاني غير مقتنع بها مطلقا.

اما عن الديمقراطية نفسها والتبادل السلمي للحكم ... فاعذرني انها تجربة اوروبية محضة ربما نجحت في بلادنا الى حدود او لا تنجح مطلقا لانها ببساطة قائمة على نظرة المجتمع للفرد بذاته بدون النظر لاعتباراته الاسرية او القبلية او العشائرية وذاك في بلادنا مستحيل ... "مفيش حد فينا لم يتأثر بأسرته ... ان هذا يعيبه ولا يزيده شيئا ... علاء نفسه رئيس هذه المناقشة شديد التأثر بوالده وانا احترم فيه ذلك برغم ان ذلك هدم لفكرة الديمقراطية من أساسها"

ومن اجل ذلك لا يجوز ديمقراطيا ان ياخذ ابن الرئيس زمام السلطة بعد ابيه ... انا يا خالد غير مؤمن بمبدأ الديمقراطية في بلادنا ... لا يصلح ... لان لدينا ترابط اسري وولائنا لعائلاتنا اكبر من اي شيئ.

والناس اللي بتاخد 2 جنيه علشان تروح تدي صوتها هو فساد فعلا لمن يعطي المال ولكنه فساد رهيب في المجتمع يعني انا بابيع نفسي ب 2 جنيه او حتى 100 جنيه ... وما جعل هؤلاء المرشحين يفعلون ذلك الا لانهم وجدوا الناس يقبلون.

يعني ببساطة انا متفق معاك وقلت لك لا احد مثل الصحابة في الحكم ولكن ايضا المجتمع نفسه وقتها كان شيئ اخر غير الذي نحن عليه

والاسماء التي تذكرها من كبار الصحابة هي اسماء اصحاب الرأي فيهم الذين هم اهل للحكم وليسوا متظاهرين ... مش اي حد شايف نفسه كويس يبقى يتكلم.

يعني سعد بن عبادة عبارة عن معارضة داخلية وليس غوغاء كما يحدث الان.

وانت بتقول ان كفاية معاها دلائل انا ما شفتش اي دلائل ... ان كلامهم كلام عام ينطبق على اي نظام به سلبيات ...وهم عبارة عن تيارات سياسية مختلفة ... فقل لي بالله عليك كيف يمكن تنفيذ مطالبهم وهم لا برنامج لهم من الاساس ولا ترى منهم جليا الا حقدا على الطبقة الحاكمة, فمن معزولين سياسيا الى من يريد الظهور الى من يحب جلد نفسه وهكذا دواليك.

اما عن المعارضة من اجل المعارضة فذاك صحيح وانا انفذه مع علاء لانني ارى انه يقوم بذلك بالنسبة للحكومة المصرية ارايت كم ذلك سخيف؟؟؟؟

وهل أنا قلت أنه مثالى؟ هل قلت حقا؟لا أذكر

بالطبع هو نظام فاشل بالنسبة لنا وكما قال عمر بن الخطاب (نحن قوم أعزنا الله بالإسلام ومهما ابتغينا العزة فى غيره أزلنا الله)

وبالنسبة لرأى سيدنا عثمان فهذا هو الإسلام دين عالمى يصلح يومها ويصلح اليوم ويصلح بعد ألف عام

فإذا مان سيدنا عثمان رأى رأيا فذاك رأيه ولكنه ليس ملزما للإمة بل على الأمة أن تختار ما يتاسبها مادام لا يخلف قواعد الإسلام يعنى أهل الحل والعقد يبقى مجلس شعب والبيعة تبقى انتخابات وهكذا

أما عن النظام الأسرى فما علاقته بالحكم سيدنا عمر رفض أن يدخل عبد الله بن عمر فى أهل الشورى رغم صحابته وسبقه وقال يكفى أن يحاسب واحد من ال عمر عن أمة محمد وبالطبع تذكر ما جدث حين ولى سيدنا معاوية ابنه من بعد على كره من الصحابة ومافعله يزيد

أنا لا يهمن ديمقراطية أو ملوخية (معلش على الطبيخ) أنا يهمنى انى اخد حقى ,اعبر عن رايي,مايجيش عسكرى يكسر بابى في نص الليل ويقول لى قانون الطوارئ أما اللى بياخد اتنين جنيه عشبن يقول نعم دا لا مؤاخذه ؟؟؟؟؟؟ بلاش نقول كلام وحش

أما قول المجتمع وقتها والآن فليس هذا مبررا للظلم والإستبداد أما عن نوعية المعارضين فهذه ليست حجة فعندما قال عمر أطيعونى ما أطعت الله فيكم فإن عصيته فلا طاعة لى عليكم قام رجل وقال لو رأينا فيك اعوجاجا لقومنا ه بسيوفنا, أى فظاظة هذه ومع ذلك قال عمر الحمد لله الذى جعل فى أمة محمد من يقوم اعوجاج عمر بسيفه ,يعنى مازعلش وقال له انت مين انت (لو كان من كبار الصحابة لذكر اسمه لكن هو فى الغالب أحد الأعراب فهذه فظاظتهم المعهودة) ومين اللى دافعلك وانت عميل للروم (بدل أمريكا)

أما عن أدلة كغاية فهى ما نراه بأعيننا ونسمعه باذا ننا فى الجامعة وفى الشارع وفى الحارة وفى بلدنا ولا انتا شايف ايه عندك؟

معندهمش برنامج ,يعنى هى الحكومة اللى عندها برنامج

وكفاية رغى أصل حاسس علاء هيطرنا برة ويقول انتو قلبتوه منتدى :)

صحيح أنا وقعت منكم من زمااااااااان من أول ما دخلتم التاريخ الغابر اللى مالوش أى دعوة باللى بيحصل النهاردة فى الموضوع و من أول أما اتكلمتم فى الدين اللى ميهمنيش و ميخصنيش فى أى شئ بس على العموم براحتكم و البيت بيتكم و أصلا التدوينة مخصصة للكلام ده و أشك حد هيقراها غير اللى شاركوا فى المناقشة.

الدين اللى مابيهمكش

دا انت خبطت خالص

شكل المعارضة هتبقى اتنين دلوقتى

ابسط ياعم mo7afez هنبقى اتنين معارضة أنا شكلى هاختلف مع الحكومة

وياعم علاء بتعايرنى ماعن ماحد قراها يعنى هو حد بيقرأ اللى انتى بتكتبه

يبنى أنا أقصد محدش بيقرا اللى أنا كتبته

ده بلوج يعنى الناس بتيجى تقرأ الموضوع الأساسى و بعدين يقراو التعليقات و الموضوع ده أقل موضوع أتقرا عندى و كمان بقاله زمن طويل يبقى أكيد محدش بيقراه غير اللى مشارك فى المناقشة

شفت لا معايره ولا حاجة.

اخي العزيز خالد

من اكبر مشكلاتنا اننا كلما رأينا نظاما ناجحا اشرنا الى ان الاسلام كان كذلك من 1400 سنة فربما تطابق ذلك النظام الناجح مع النظام الاسلامي في بند وتعارض معه في مليون بند ومن اعظم امثلة ذلك ما قاله امير الشعراء في مدح النبي (ص)

الاشتراكيون انت امامهم ............. لولا دعاوى القوم والغلواء

ان النظام الاشتراكي يتناقض جذريا مع النظام الاسلامي ولا يتفقان الا في مبدأ التكافل الاجتماعي فهل بهذا يصح ان يكون النبي (ص) امام الاشتراكيين. ونحرق القصيدة بقى بعد انهيار الاتحاد السوفيتي؟؟؟؟؟!!!!!

كفانا استخفافا بعقولنا فكما قال علاء ان نظام الحكم من 1400 سنة كان ناجحا وقتها ونحن ناخذ منه مفهومه وقيمه العليا ونطبقها في حياتنا سواء كانت في الحياة الشخصية او على مستوى السياسة والحكم.

وفي النهاية اود الاشارة الى ان الاحزاب المعارضة بالمحروسة برغم اعتراضي عليها لديها برامج ومبادئ ... يعني بالتاكيد الحزب الحاكم له برنامج انما كفاية دول مبدأهم:

حسني مبارك واسرته ....... كفاية

مجلس الشعب .............. كفاية

مجلي الشورى.............. كفاية

محليات................... كفاية

عادل امام............... كفاية

دين..................... كفاية

طب شوية شاي............. كفاية

طب سندوتش فول........... كفاية

طب اي حاجة.............. كفاية

يعني حاجة تجن وتجيب احباط بصراحة

معلش يا ريس علاء بس ده رأيي

وللحديث بقية

ياعم انت هتؤولني كلام ماقلتوش أنا قلت مرن يمكنك أن تطبق فى حدود الحياة العملية ( مش فى الصلاة والصوم وماشابه من عبادات)ماتراه مناسبا للوقت/المكان/الأشخاص/الظروف مادمت ستتبع جوهر الدين وضربت مثال بالإنتخابات والمجلس عشان ده المثال اللى أنا عرفه لاكن لم أقل مثل هذا أو كنا كهذا أنا أقول لو عملنا هذا من لدينا لم نستورده ولم يخالف الأصول يبقى احنا تمام

مش زى ما ريس العمرانية عايز دنيا مفصولة عن الدين لا يامعلم ماتنفعش معانا وعندك تركيا داخلين على 100 سنة علمانية وفى الآخر حزب دينى اللى وصل للسلطة(أى نعم دينى نص نص بس ده اللى الجيش سابه)

أيه رأيت بدأت معارضة بس خد بالك أنا بعارض اللى مابيعجبنيش بس

بعد التحية والسلام والكلام الاونطة الى مياكلش عيش وياكل بغاشة فى بلدنا حقيقى الى يشوف حواركوا الفظيع عن الديمقراطية الضائعة فى بلدنا العامرة يسطيع ان يتعلم درس عملى فى الديمقراطية الحقيقية على ارض النت لذلك ادعو كل ابناء هذا الوطن والغير ناضجين سياسيا بشهادة اجدع راجل فى مصر رجل التكنولوجيا الاول فذ الافذاذ ان يمارسوا الديمقراطية الضائعة فى ارض الواقع على ارض هذا الموقع ولا نقول كفاية و لا مش كفاية احنا معاكوا للنهاية

الله يرحم الموسيقار محمد عبد الوهاب

قال ان عبد الناصر كدب على شعبه وكل الشعب صدقه وجه السادات وقال الحقيقة والصراحة لشعبه والشعب كدبه

علشان كده احنا زعلانين من ابو حميد النضيف ... يلا ما احنا طول عمرنا كده

مع خالص حبي يا زديحلي

الحقيقة انا سعيد جدا بردك يا محافظ على مداخلتى البسيطة الى يمكن تكون عبيطة لكن فى نفس الوقت مستاء حتسالنى مستاء لية فحرد بكل بساطة واقلك انك اعتمدت فى ردك على كلام الموسيقار محمد عبد الوهاب ونسيت او تناسيت كلام الاستاذ احمد عدوية لو انتوا الى رميتوا الشبكة احنا الى طعمنا السنارة واحنا الى غرقنا السمكة لبسنا الشمس النضارة لذلك كان يتوجب على فذ الافذاذ رجل الحكومة الاليكترونية الى حيمشى الشعب على صفر وواحد ويعلم العمدة ازاى يفتح الويندوز ويعلم البت ازاى تعمل شط داوان انوا ميناش نفسة بروح اهلة ويحترم الناس الى هو منهم لان الشعب الغلبان دا لو طفح بية الكيل حيفرمطة خالص ويدور على سيستم جديد واذا كنت بتدافع عنة بصفتك معارض المعارضين فخاف على نفسك بقى لحسن تتفرمط معاه ولا عزاء للتكنولوجيا

والله كلمة محافظ اقصد بيها ان انا مش مجدد ومش عايز تغيير

ما اقصدشي اني محافظ لمحافظة .... هو فيه حد معارضة بيمسك محافظ برضه يا معلم زديحلي يا تفاتيح وانا محافظ في الجمهورية المصرية العمرانية يعني حزب معارض اسمه حزب المحافظين.

سعدت جدا بكلماتك عن الفن الاصيل والذي قاله الفنان المصري احمد عدوية ولكني ارد عليك بكلام سيدة الغناء ... شعب ايه اللي انت جاي تقول عليه ... ان كنت تقصد شعب العمرانية فكلامك عشرة على عشرة يا استاذ ... ولكن شعب المحروسة يبقى سامحني ... 82% من شعب المحروسة وطنيين و الله العظيم لو عملوا انتخابات حرة وراحوا لكل مصري وسألوه "بس في بيته من غير ما يتعب نفسه ويروح" لحينجح الرئيس الموجود وهيعجبهم كلام رئيس الوزراء وهتلاقي الريس الجديد جمال

طب ما قدامك ... الوحيد اللي كان في مظاهرة كفاية هو الريس علاء وكل الناس جاية تقول له ... ياريت كنت معاك ... ماهو علشان كده انا باعترف بالريس علاء في العمرانية.

واذا كنت متخيل اني حاتفرمت معاه تبقى بتحلم زي ما السذج حلموا بتنحي بوش وبلير وبقية البفة اللي بتبيع وتشتري في العالم. وبعدين ياريس علاء علم حكومتك اللينكس ... يعنى ده عيب جامد اوي يتقال كلام زي ده هنا.

يا معلم زديحلي فووووووووووووووووووق ... وحبة فووووووووووووق

كل حبي للعمرانيين من المعارضين والاغلبية ههههههههه

يراد بها باطل بجد يا سيادة المحافظ افحمتنى لما عرفت انك محافظ مش محافظ - يا ريت بقى تتمسك بانك تفضل محافظ حاكم انتوا يا معارضين فى جمهورية العمرانية لا محافظين ولا غيرة دا انتوا وعلى راى احمد عدوية بردوا حبة فوق وحبة تحت وزى ما بيتقال عنكوا فى الفرق الموسيقية القديمة بطانة وبالعربى كدا كدابين زفة وبالعربى كدا علشان بص مدخلش فى حوارات بالعربى كدا علشان بص انا مش ناقص متهات والنبى بلاش كلام عن الديمقراطية ويا ريت نتكلم عن القرع والملوخية علشان انتوا احسن حاجة تتكلموا فيها الطبيخ ما انتوا احسن حاجة فالحين فيها تسلقوا القوانين وتحمروا عينكوا للى يعارضكوا وتشوا الشعب بارتفاع الاسعار وفى الختام احب اقلك غير بقى وبلاش تحافظ يا سيادة المحافظ

الحقيقة لا ادري لماذا تصر حكومة العمرانية على ضرب الامثلة من خلال الطبيخ

ابتداها الريس ابو احمد "اللي هو علاء يعني ... انا لو كتبت ابو علاء هيحصل لبس" ... هاهاهاهاهاها ... بكلامه عن البوغاشة.

ثم تلاها نذير بضرب المثل بالملوخية وبعدين زديحلي وبعدين خالد ... وبقية حكومة العمرانية تتحدث من خلال القرع والبامية ... وما تقولونه يدلل على شيئ مهم جدا ... ان معارضة المحروسة التي هي حكومة العمرانية مشتركة مع السواد الاعظم من شعب المحروسة اللي هما احنا كلنا بربطة المعلم تحس بالجوع ... لاحظ كلامك يا زديحلي الأخير عن غلاء الاسعار.

يعني في النهاية ما تصدعولناش دماغنا بدستور ومظاهرات وقوانين ودياوله ... تلات ارباع الشعب المصري كل همه يعيش عيشة احسن مش تقوللي ديمقراطية وكلام فارغ.

يعني من الاخر ظرفني تعرفني و ابجني تجدني

Zarrafny te3rafny ... Abbegny tagedny

ولو انتم بتتكلموا في كده يبقى اتكلموا بالشعر عن ما حدث في عصر "الرئيس المؤمن" وعصر "ابو علاء" من ارتفاع مستوى المعيشة

وبعدين يا أخ زديحلي انت بتقول ان انا بطانة ... ماشي ... بس انا لو بطانة فلحاجة موجودة مش بطانة لسراب ... الريس "علاء" حاطط لوجو الموقع الحالي ايقاد الشموع عند ضريح سعد ... يا سلااااااااااام ... بيتهئ لي بعد الاغنية اللي انت كتبتها ان المقصود هو ضريح سعد الصغير.

وبعدين لو شتمتني تاني ... انا مافيش غالي عليا ولسه ما اتخلقش اللي حيلعب بعقلي.

إلى عزيزي خالد ... ما ينفعش نتفق لان انت حكومة وانا معارضة ... انت لو قلت نفس كلامي انا حاغيره علشان اعارض...هاهاهاها

الى شعب العمرانية الحبيب ... ربنا يرزقنا بأكلة هنية ...هاهاهاها

أعتذر مسبقاً .. إن احتوى هذا الايميل على بعض الألفاظ .. التي

يستحي لساني أن يذكرها .. إلا أنني أجد نفسي مضطراً لاستخدامها

لأنها اللغة الوحيدة التي يفهمها هؤلاء - البلطجية - من الأمن داخل كليتنا

ماحدث هو أنه في يوم الأحد الماضي قام طلبة الإخوان المسلمين بجامعة

عين شمس بعقد مؤتمر على مستوى الجامعة .. ينادي بالاصلاح

ينادي ويقول بأن الجامعة الحرة = وطن حر

ينادي وبمنتهى الأدب بأن تكون لنا حريتنا .. الحرية .. وليس وهم الحرية

والمزيف وبعد انتهاء هذا المؤتمر في تمام الساعه 2.45 ظهراً .. انصرف طلبة

وطالبات الاخوان المسلمين من حرم الجامعة .. وتبقى بنتين من الأخوات

المسلمات

كانتا يتفقدن الجامعة .. وينتظرن أن تنتهي الزحمة من على البوابة حتى يخرجن

وفي أثناء تفقدهن لأحد مباني الجامعة .. قام بعض أفراد عصابة الأمن .. بإغلاق

باب ذلك المبنى عليهن .. فأخذن يستنجدن .. .. فقام هؤلاء القذرة من الأمن

بفتح الباب لهن واقتادوهن إلى قصر الزعفرانة - الذي هو مقر رئيس

جامعة عين شمس .. وقاموا بحبس هاتين الأختين فيه حتى تمام الساعة

الثامنة مساءاً .. وخلال تلك الفترة .. أذاق هؤلاء الثلة النتنة .. أخواتنا الكريمات

أبشع ألوان الضرب والسباب الذي يعف لساني عن ذكره الآن

بعدها قام قوات عصابة أمن دولتنا الموقرة بتجرين هاتين الاختين من حجابهن

وقاموا بجرهن وركلهن ( بالشالوت ) إلى مصفحات الأمن المركزي

ليرحلوهن الى مقر أمن الدولة بميدان لاظوغلي

وهناك .. رأوا حقارة ونتانة وزبالة أفراد أمن الدولة ..

قاموا بوضعهن في غرفة تحت الأرض .. واقتادوهن من غرفة إلى غرفة أخرى

وذلك كله تحت أبشع ألوان الشتائم

تروي لنا أحد هاتين الأختين فتقول .. أن أقل شيء قاله لها ظابط أمن الدولة

وهو ينظر إليها بعين السكير .. قال لها

أريد أن أتأكد من أنك أنثى !!!!!!

تقسم بالله هذه الأخت أن هذا أقل شيء نطق به لسان ذلك الكلب الحقير

وبعد ساعات من التعذيب والضرب المبرحين

قاموا أخيراً بالافراج عنهن في منتصف الليل

لماااااااااااااااااااااااااااااااذا ؟؟؟؟؟؟؟؟؟؟؟؟

هل نعيش في بلد تحكمها عصابة المافيا

هل نعيش في بلد غربية .. أقسم بالله العظيم .. أنه أحقر دلوة غربية ..

تملك جهازاً أمنياً أأدب ألف مرة من جهاز بدلنا الموقر .

أم أن سياسة الأعتداء على الأخوات المسلمات .. كانت في برنامج

الفكر الجديد المزعوم ؟؟

بعدها نتلقى نحن جماعة الاخوان المسلمين تهديداً صريحاً من قائد حرس كلية

الألسن يقول فيه . إذا تم تصعيد موقف هاتين البنتين من قبلكم أيها الطلبة

فسأكتب قراراً .. أقول فيه بأني قد وجدت هاتين البنتين في حرم الجامعة

في موقف مخل بالآداب

هل نسي هذا الخنزير أن أخواتنا الطاهرات العفيفات أشرف من معنى كلمة الشرف

هل يظن ذلك الشاذ أننا بهذه التفاهة حتى نخاف من كلمة حقير ووغد مثلة .

إننا طلاب الاخوان المسلمين إذ نعلن لكم هذا الأمر وهذه المهزلة .. فإننا

نحب أن نوصل رسالة إلى كل وغد حقير أمثال هؤلاء القذرة .. ونقول لهم

إن الدعوات تحسب دائماً في حسابها أن الجيل الأول كله إنما يذهب وقودا للتبليغ

وزاداً لايصال الكلمات التي لاتحي إلا بالقلوب وبالدماء ..

ونحن بعنا أروحنا ودمائنا وأنفسنا لأجل دعوتنا ومصرنا الحبيب ..

يا من تزعمون أنكم أمن مصر .. نقول لكم ياقذارة مصر اعلموا أن تلك الاعتداءات

التي هي ترجمة لنتانة فكركم .. وحقارة أخلاقكم .. لاتأتي إلا

لتأكد لزملائنا الطلبة والطالبات أنكم ثلة من شياطين الانس التي لم ترد في يوم

من الأيام أن تحافظ على أمن وطننا ومصرنا الحبيب ..

أخيراً يامن تدعون أنكم أمن دولة مصر

إن سياسات الاعتداءات والاعتقالات وكبت الحريات التي تتبعونها مع شعب مصر

إنما تنتج جيلاً من الأخوة والأخوات والطلبة والطالبات لا طاقة لأحد به

وحسبنا الله ونعم الوكيل

منقوووول

للمزيد من المعلومات:

للتضامن مع الاخوات المعتدى عليهن: