You are here

تأملات نرمو

Primary tabs

بما أن النهاردة يوم تنضيف الايميل العالمي و يوم نشر حاجات مش أنا اللي كاتبها أقدملكم عمل أخر من أعمال نرمو نظرة تأملية في تأثير المكان على البلطجية (البت باين عليها مثقفة)


تأملات

المظاهرة عالم فيه اللى واقف بيهتف وفيه اللى بيوزع بيان وفيه المخبر وفيه الناضورجى وفيه اللى بيصور وينقل للتليفزيونات وفيه جيوش الامن المركزى واقفين صفوف صفوف ومن وراهم الرتب مترشقة .وفيه البلطجية جنب باشوات الداخلية واقفين زنهار يعلنوا للشعب المخنوق عن " تحالف البلطجية وامن الدولة من اجل التاديب " فى مواجهة حركة كفاية والحملة الشعبية والتحالف الوطنى وكله من اجل التغيير .ولكل مظاهرة لون وطعم ومهازل . ومن مظاهرة الاستفتاء لكنس السيدة ومن شبرا لعدرا الزيتون ومن امبابة لعابدين صوت الهتاف كان له نداء بيخش قلب البيوت وبيعدى صفوف الجيوش وبيخرج للى قاعد على القهاوى واللى ماشى فى الشوارع واللى نايم على الرصيف من غير سكن .

ولما كانت المظاهرة بتتحاصر بالامن ومن وراهم البلطجية يبقى لازم نتكلم عن كل مظاهرة من منظور جديد" لنج "الاوهو تاثير المكان على البلطجية وخاصة ان الداخلية اخترعت وظيفة جديدة اسمها "بلطجى وطنى " .

ومش هابدا بمظاهرة الاستفتاء لان ما كانش فيه اى وقت للتامل وكان لازم اهرب بسرعة قبل ما يحصلى اللى انتوا شوفتوه وعرفتوه فى هذا اليوم الفظيع .

وفى مظاهرة كنس السيدة وقف البلطجية على الرصيف المواجه للمظاهرة الصغار منهم "تحت التدريب " حاملين صور مبارك اما الكبار فقد رفعوا ايديهم بحركة الاصبع الشهيرة والتى اصبحت رمزا مميزا للحزب الوطنى وهاتفين بهتافات بذيئة ومن الملاحظ ان بلطجية السيدة يتميزون بضخامة الاجسام طول بعرض بسمك مما يوحى بفضل مسامط ام هاشم عليهم فالغذاء الرئيسى لهم من الفتة والكوارع ولحمة الراس وهذا يؤكد على تاثير المكان على هيئة البلطجى .اما شبر ا فكانت من اروع واهم المظاهرات فالاول مرة تختفى جحافل الامن المركزى من مشهد المظاهرة تاركا الساحة لبلطجية شبرا ولان شبرا حى من احياء الطبقة الوسطى لذلك بدا لنا بلطجية شبرا من الشباب الروش اللى بيحلق ويلبس على الموضة وفى الغالب كانت مكافآت الحزب الحاكم لهم وجبات من كنتاكى او ماكدونالدزولم تخلو مظاهرة بلطجية شبرا من "الحركةاياها" رمزالحزب الوطنى ولا من الشعارات المبتذلة فى تاييد الحاكم وهنا ممكن نبدا نفكر فى التغييرات التى طرات على الطبقة الوسطى فى عصر مبارك لان من المعروف ان اكثر الطبقات تمسكا بالفضيلة والاخلاق هى الطبقة الوسطى اللى منها بلطجية شبرا والتفسير المنطقى هو ان هؤلاء البلطجية الصغار قد خانوا طبقتهم وتبنوا مفاهيم وافكار "الطبقة الحاكمة".

ننقل على الزيتون التى كانت مظاهرة جميلة وخفيفة على القلب حيث تضامن معنا سكان العمارات بالزغاريد والهتاف "بوصفنا جيش التحرير "وقد اصر الامن على اغلاق ابواب العمارات حتى لاينضم السكان الينا كما اصر على فرض المصورين فى البلكونات لتصوير المتظاهرين - دون رغبة من غالبية السكان- حيث تحتفظ الداخلية بارشيف " محترم "لكل المتظاهرين وفى مظاهرة الزيتون لم ارى اى بلطجية وحتى عندما نجح بعض الشباب فى عمل مسيرة فى الشارع لم يتعرض لهم سوى جنود الامن المركزى بامر من باشوات الداخلية .

اما فى امبابة فقد وقعت الحكومة فى مطب محترم فقد جاءت بشوية شباب غلابة وهدومهم مقطعة ويبدو انهم ما يعرفوش حاجة فى الدنيا غير الكورة وكان ارتفاع بعض الرايات الاشتراكية الحمراء داخل المظاهرة تاكيدا لهم على ان الموضوع مجرد خلافات كروية بحتة وان الامن المركزى هو نفسه بتاع فض شغب الملاعب ومن هنا جاء هتافهم التاريخى المفاجىء ستة رايح اربعة جاى .

وفى عابدين لم يكن هناك اى مكان للبلطجية بسسب تضاعف جيوش الامن المركزى والتعزيزات التى ظلت تاتى حتى نهاية المظاهرة وعلى الرغم من اعداد الامن المركزى الهائلة الا ان المتظاهرين قد نجحوا فى اختراق الصفوف والنزول الى قلب ميدان عابدين وقد ادى ذلك الى صدام بين بعض المتظاهرين وحنود الامن اسفر عن كسر ذراع احد المتظاهرين واصابة آخرين باغماء وبعض الاصابات الطفيفة

مفاجاة ......ظهور احمد سبع الليل

فى نهاية مظاهرة عابدين نجح حوالى 150 متظاهر فى الخروج بمسيرة فى شوارع وسط البلد واجبرهم الامن على الدخول الى شارع عبد الخالق ثروت وف اثناء المسيرة هاجمهم جنود الامن المركزى بالضرب الاان احد الجنود رفض باءباء وشمم تنفيذ الاوامر بضرب المتظاهرين وقال " انا مش ممكن اضرب مصريين اخواتى " مما عرضه للاهانة والضرب بعنف والاختفاء المفاجىء قبل ان يستطيع المتظاهرون الذين تعرضوا للضرب الشديد من انقاذه .

واحمد سبع الليل هو جندى الامن المركزى فى فيلم البرىء الذى جسده الراحل العبقرى احمد زكى

نرمــــــــــــــــــــــــــو

Comments

ازيكم

والله انا متشكرة اوى على التقديمة الفظيعة دى

وعايزة استشيرك فى حاجة عشان انا امية فى ام التكنولوجيا النهاردة وانا بافتح الاميل بتاعى لاقيت كل الرسايل اللى انا محتفظة بيها فى الانبوكس مدلته ولاقيتها فى التراش كان وانا ماحدش يعرف الباص وورد بتاعتى خالص بس انا بافتح الاميل من النت كافية وباقفل كل الصفح قبل ما اروح وحاسة ان فى حد دخ0ل على الاميل بتاعى من ورا ضهرى علشان كدة ياريت كلكم تيعتولى على الميل بتاع الياهو اللى انا كتبته فوق ويا لايت تقولى اعمل ايه وازاى فى دين ام المشكلة دى

نرمـــــــــــــو

مهم جدا انك مش بس تقفلي الصفحات يعني تقفلي نوافذ المتصفح، لكن قبل كده أنك تستعملي أمر الخروج log off من صفحة موقع البريد بتاعك.

و كمان في الظروف اللي احنا فيها دي يفضل تلغي تاريخ التصفح و الكوكيز.

معاك حق يا ألف انا اضطررت لاستخدام سايبر من كام يوم عملت لوج اوف و لغيت التاريخ و الكوكيز و ضغطت ctrl+alt+del عشان اتأكد ان مفيش برنامج مريب شغال في الخلفية

ليه التوتر ده كله؟

فوق الكمبيوتر اللي أنا قاعد عليه ورقة مكتوب عليها : برجاء ترك رقم البطاقة و الاسم و تسجيل وقت الدخول و الخروج حسب تعليمات مباحث أمن الدولة

صحيح مطلبوش حاجة مني و كبروا دماغهم بس الورقة كانت مستفزة و تخليك تحس بعدم الأمان

غيري الباسوورد فورا واضح انهم في السايبر اللي بتدخلي منه حاطين برامج تجسس زي الكي لوجر مثلا او ريموت باسوورد ستيلر او جولدن آي و دي سهله جدا استخدانها بدون ما حد يعرف

حاولي الباسوورد تكون كبيره قدر الامكان و فيها تشكيله من الحروف كابيتال و سمول و ارقام و رموز

مع تمنياتي بالتوفيق

عودا حميدا للهرتلة والتهييس بعد مصيف عنيف

مساء الخير يا رجالة ... مساء الخير يا ستات

النبرة عليت مش عارف ليه

يمكن علشان انتم حاسين ان الانتخابات قربت ومبارك هينجح هينجح ... احتمال

يمكن علشان لقيتم ان اللي حصل ده كان في مصلحة الحزب الوطني وليس مبارك فمبارك ناجح ناجح ... يجوز

يمكن علشان حاسين ان دي نهاية المظاهرات والهبالة اللي بقالها شغالة 9 شهور. فمش معقول بعد ما الريس ينجح والحزب الوطني تجدد له فترة رياسة جديدة تعملوا اي حاجة. والا تبقوا غير ديمقراطيين وحيطلع ..... ........

يمكن علشان اتخدعتم في رموزكم نعمان جمعة وايمن نور الذين ملأوا الدنيا صراخا وعويلا في الصحف على التعديل الدستوري ثم يدخلون انتخابات الرئاسة بنفس نص التعديل المرفوض.

عموما انا شايف نبرة الشتايم والسفالة عليت واديكم شايفين بتوع الوطني بيردوا بصوابعهم زي ما بيقول علاء ... يبقى كده مش حنعرف نرد عليكم بالحوار اكتر من قلة الادب.

يبقى انا ما ينفعش اسمي نفسي محافظ والمفروض اسمي نفسي اي حاجة تانية تختارهالي يا علاء