You are here

طاوطاو يقدم : لاعب عصابة مبارك على الثلاثين قرش - الجزء الثاني

Primary tabs

Comments

حبظلم بظاظا

دا آخر فظاظه

وبايع هدومنا

بنص القزازه

حبظلم بظاظا

.....

حبظلم و مين اللى يقدر عليه

اذا شخص حبه يكلبش ايديه

واذا مر جنبه يخزّق عينيه

ولو بس مرّه

بيطلع مظاهره

يطالب بحقّه

بيدهس عليه

حبظلم بظاظا

....

حبظلم زمانه

دا مالك مكانه

بيضحك لابنه

وليكم زبانه

حبظلم بظاظا

....

حبظلم دا لابد فى كرسى الزمان

بيركب دماغه .. راكبنا كمان

و ننوس عيونه دا جاى فى المقدّر

قالتلو ماماتو انه حتما حيقدر

ورسمت سرير الملوك و الجوازه

بفضل اختلاف الامام و الكرازه

حيصبح بظاظا

....

حبظلم أليط

حبظلم غتيت

حبظلم مقيلط

حبظلم زريط

جميعا بظاظا

حبظلم بظاظا

ياعلاء ياريت نبتدي نفكر في أساليب أكثر فعالية من المظاهرات والشعارات ليه مثلا مانستخدمش الاضراب أو الاعتصام

أنا أعني استخدام الاسلوب دا في كل القضايا مثلا ارتفاع سعر تذكرة المترو ممكن نرد بمقاطعة المترو أو تضييق استخدامه في أكثر الحدود (أنا شخصيا بعمل كدا دلوقتي)

بالنسبة لموضوع الاسعار والبنزين ممكن الناس تقرر تضرب ليوم واحد لو قدرنا نقنع أكبر عدد من المتضررين وهما كلنا تقريبا بأنهم ميروحوش الشغل لمدة يوم واحد بس دا هيعمل تأثير كبير

ناهيك عن موضوع لبنان واللي ممكن يحصل لو مثلا قسمنا نفسنا موظفين الحكومة مثلا يضربوا يوم ثم الصحفيين ثم المهندسين إلخ

أنا بصراحة زهقت من المظاهرات مع إني ما بنزلهاش هيا كويسة حلوة جميلة بس مش كفاية أبدا وملهاش تأثير خالص لا النظام بيخاف ولا اللي إحنا عايزينه بيحصل

أولا أفكار كويسة، مش كلها قادرين نعملها في اللحظة دي لكن عموما تفكير ايجابي.

حتى الآن اتعمل اعتصامين حوالين موضوع القضاة، و رغم نجاحهم لكن الصراحة أننا مش جاهزين لاعتصامات أطول من يومين و مينفعش نستخدم أداة الاعتصام كثير لأنها مرهقة جدا.

مقاطعة المترو لفترات محدودة فكرة كويسة جدا و جاري التحضير لمبادرة زي دي فعلا و لو عندك أفكار في كيفية تنظيم ده يا ريت تقول.

الاضرابات الواسعة للأسف لسه شوية عليها، الصحفيين معرفوش يعتصموا أو يضربوا عشان مطالب خاصة بيهم ما بالك بلبنان.

أخيرا المظاهرات، لما أنت مبتشاركش فيها زهقت ازاي؟ مش حاسس أن ده موقف بيضان شوية؟

عموما المظاهرات مش بتشكل ضغط على النظام بمعنى أنه هينصاع لرغباتنا، حتى المطالب لا نوجهها للنظام خلاص، المظاهرات دي عملية بناء حركة، فعالية بنلم فيها أعضاء جداد و بنحاول نخاطب فيها الجمهور في الشارع، و الحكومة فاهمة ده و عشان كده بتقمع المظاهرات رغم أنها مبتشكلش ضغط مباشر عليها، لأنها عايزة تعزلنا و تمنع أننا نتواصل و نتخاطب مع الناس.

المظاهرة مش الوسيلة الوحيدة، و مش مفروض نعمل مظاهرات و بس، لكنها وسيلة مناسبة جدا بالذات في ظل التضييق الأمني، يعني لو حاولت توزع بيان و أنت لوحدك في الشارع ممكن يتقبض عليك من غير ما حد يحس (و فعلا شباب من أجل التغيير كانت بتعمل كده زمان ولازم نرجع للشجاعة دي)، لكن المظاهرة لحظة انت فيها في حماية المجموع و تقدر توزع بيان على الناس في الشارع (طبعا ساعات الخنقة الأمنية مبتسمحلكش غير أنك توزعه على المتظاهرين، و دي محتاجة برضه شجعة في مواجهة الأمن و أفكار خلاقة في التحايل عليه).

الغريبة كلمة لا النظام بيخاف ولا اللي أحنا عايزينه بيحصل، طب ما فيه مئات الاضرابات العمالية و برضه اللي هما عايزينه مبيحصلش و القضاة و أحنا معاهم اعتصكنا و برضه اللي أحنا عاوزينه محصلش، المعركة طويلة و صعبة، أنا معاك في تنويع الأدوات بس من غير ما عددنا يكبر و شجاعتنا تزيد و وحدتنا تبقى أقوى برضه اللي أحنا عايزينه مش هيتحقق.

موضوع الخوف أنا مش موافقك، القمع المتزايد دليل على أنهم خايفين، بس مش هضحك على نفسي، هما مش خايفين من قوة نملكها دلوقتي، هما خايفين من قوة ممكن نملكها لو استمرينا.

امبارح كان فى مظاهرة فى نادى المحامين على الكورنيش فى اسكندرية و انا ساكن فى االشارع اللى فى وش النادى و يا عينى على كمية عربيات الأمن المركزى (انا عديت 40 عربية بس على البحر غير طبعا اللى فى باقى الشوارع الجانبية المتقفلة )

مع ان المظاهرة على قدها و معظمها عيال صغيرة و ستات المهم كنت نازل اقابل زميل فى نادى نادى المهندسين اللى جنب نادى المحامين برضه علشان نخلص شوية شغل و معايا كام لوحة و شوية ورق فى حسابات بتاعة الرسومات قلت اخد الكاميرا معايا بالمرة يمكن الاقى حاجة تستاهل طبعا منظر الامن المركزى كان ابن وسخة تقولش هايحاربوا اسرائيل يس قلت اخد كام صورة على السكة وبعد ما صورت بتاع 4و5 صور و بشيل الكاميرا لقيتلك واحد بينادى عليا شكله ظابط بس لابس ملكى طبعا طنشت و مشيت بعتلى مخبر جرى ورايا و قاللى كلم الباشا رحت راجعله

انا : خير فى حاجة
الظابط : ايه الورق اللى معاك ده؟
:ورق شغل, لوحات فيلل تبص عليها؟
: مش منشورات يعنى
:كل ده منشور و ررحت فاردهملو و طبعا مافهمش اى حاجة
الظابط : دى شكلها خرائط
: خرائط ايه بس

و قعدت اشرحله و هو طبعا بطيخة و احتار نيك و نادى زميله يبص اول ما زهق قاللى ورينى البطاقة اديته البطاقة و كارنيه النقابة
سألنى انت ساكن فين ؟
شاورتلو على العمارة .
افتكرنى باشتغلو قولتلو البطاقة معاك بص فيها
صباح الغباء.....
قاللى طب ماتبقاش تلف كتير دى خامس مرة اشوفك
مع ان دى تانى مرة انزل بعد الصلاة!!
قولتلو اشمعنى ؟ قاللى اهو كدة و خلاص بدل ما تيجى معانا و نودى اللوح دى قسم ال شفرة!!

جاللى تليفون رحت رادد حب يستظرف بيقوللى ابعتلى ازازة مياه سبته و مشيت و لا كأنى سامعه و قلت اللى يحصل باه

فيه محطات بنزين بعينها لما نزل البنزين الـ92 راحت شايلة البنزين الـ90 ومارجعتوش غير لما الـ90 غلي، يعني تناكة وقلة أدب، دي أسهل محطات تتقاطع لأن الناس كانت مقاطعاها أصلا لما ماكانش فيها غير 92.

فكرة تانية جميلة جدا هي مقاطعة شراء البنزين والسلع الأساسية يوم واحد في الأسبوع، الموضوع ده مش حايعمل تأثير جامد انما على الأقل حيشوه التدفق النقدي في سوق الوقود في يوم المقاطعة، ممكن بعد كده لما الموضوع يمشي يبقى اليوم ده يتغير كل اسبوعين أو كل شهر على أساس ان تأثيره يبقى أكبر من لو كان نمطي.

حاجة تانية، كان في اقتراح انتشر فترة في المدونات هو موضوع الكتابة على ورق العملة، أظن ده وقت تطبيقه، عند شراء كل سلعة من السلع اللي غليت ادفع النسبة النقدية اللي غليت بيها بفلوس مكتوب عليها والأحسن تفهم البياع كده جايز يعمل كده هو كمان، لما تدفع فلوس للتاكسي اديله من الفلوس دي وقوله يبقى يدفع بيها الـ30% الزيادة في البنزين، طبعا كلنا عارفين حانكتب ايه على الفلوس. شكلهم عارفين الموضوع ده عشان كده نزلوا الجنيه المعدن (وفي رواية أخرى الجنيه البراني)

شكلي بهرتل؟؟؟

الشكوى يا حاج علاء مش عمال على بطال

الشكوى لأن التيارات المفروض إنها يكون شغلها الشاغل مثل هذه المواضيع باعت القضية ودخلت المزاد في موضوع لبنان وفلسطين

والحكومة نجحت بالتنبوء بردود أفعال النشطاء وعرفت إنهم ها - يتلهوا - في مولد سيدي لبنان فبعبصوا في الأسعار

كارتة طريق مصر اسكندرية بقت خمسة جنيه

تذاكر القطار غليت

وأشياء أخرى متعلقة بالمواصلات والطاقة غليت في الخباثة

مش بس البنزين والسولار وتذاكر مترو الأنفاق

ثم إن يا حاج علاء عرضت عليك إن 30 فبراير تتبنى الليلة والمفروض إن دي عصابتي وعشيرتي علشان إنت عارف إني لا تبع حزب ولا تيار

قمت إتريقت عليا وما بليتش ريقي زي ما عملت كده

أنا نخست الناس

لازم أنا كمان اللي آخد المبادرة؟؟؟

بعد تلطيشي في الناس يا علاء ما ينفعشي

كنت فاكرك ها تفهمها

وعليه العوض في حقوق الناس الغلابة وتحيا لبنان مزأططة !!!

أولا يا بوب كلامك فيه استهبال أو عدم فهم للتيارات الموجودة، معاداة الامبريالية من أهم أولويات اليسار و القوميين و الاسلاميين، ممكن يكون رأيك أن القضايا الداخلية أهم أو فعاليتنا فيها أعلى لكن الحقيقة أن دي أولوية بالنسبة لكتير فينا، و على مستوى المظاهرات لما بتتنظم كويس مظاهرات معاداة اسرائيل بيحضرها ناس أكتر.

ده مش معناه التخلي عن القضايا الداخلية ولا التخلي عن مشكلة البنزين، الموضوع مهديش و ممكن نشتغل عليه في أي وقت، و لو كنا ركزنا عليه و مركزناش على لبنان كان هيطلع حد يتنك و يشتم برضه عشان طنشنا لبنان.

ثانيا أنت عارف الفولة و اللي فيها، موضوع بأهمية موضوع القضاة لو مكانش الناس خدت فيه مباردرات شخصية مكنش اتعمل حاجة (المبادرات على عكس ما هو شائع جات من د. يحي القزاز و محمد طعيمة مش المدونين).

أي خول بيشتكي أن التانيين معملوش و هو معملش كلامه ميلزمش، بدل الشكوى يا روح طنط تشتغل على مبادرة.

و 30 فبراير مش كيان له هيكل، يعني ايه عرضت عليك؟ 30 فبراير يعني تتنيل تشتغل مرة واحدة و من غير زن كتير، و راجع تاريخ تلاتين فبراير و قوللي امتى قعدنا نولول و نقول الوحشين الكخة طنشوا الموضوع الفلاني ولا طولوا في الموضوع العلاني.

أنا آسف بس موضوع الشكوى من اللي وجع دماغه و اشتغل ده بيبضني، روح يا أخويا اتخانق مع اللي قاعد على طيزه مبيشتغلش مش مع اللي بيشتغل، و مش عشان أنا فكرت في يوم أتحرك يبقى واجب على دين أمي أعمل حاجة لكل حد، أنا خصيا شايف رفع أسعار البنزين ال90 حاجة ايجابية و المفروض يترفع أكتر (بس السولار المفروض يرخص أكتر)، هعمل مظاهرة أقول فيها الكلام ده؟ ازاي يعني.

و أخيرا في تفكير فعلا في مبادرة خاصة بأسعار المترو.

و من الآخر يا وائل اللي أنت عملته ده مش ايجابي بالمرة رغم أنك بتقنع نفسك أن ده نقض بناء و معرفش ايه، و الأساليب الوسخة دي هي اللي بوظت شباب من أجل البولوبيف، بطلوا تبقوا بتحكموا و تحاسبوا البشر في كل لحظة، بطلوا تبقى مستنيين من بعض حاجات بعينها و اقبل من كل واحد اللي مستعد يديه و خلاص، و اللي يلاقي حاجة مش عاجباه يا يوجع دماغه يحلها يا يتكتم.

هكذا تكلم المناضل الزعيم أبو علاء الفيصلي

علاء

هو إحنا بيننا وبين بعض بنتكلم كده ؟؟؟

يبقى ليه على الإنترنت بتكلمني كده ؟؟؟

لما أنا أبقى آخد عليك وأكلمك بالطريقة دي ممكن إنت كمان تكلمني بالطريقة دي وإنت سيد العارفين إني مش من الناس اللي قاعدة على طيزها وكمان عارف إني صاحب مبادرات والحمد لله لكن نظرا للوضع الحالي أنا مش عاوز آخد مبادرات في وقت أنا ماليش شعبية فيه ومزعل التيارات مني علشان الناس ما تعندش معايا وإنت عارف فيه ناس دماغها صغيرة قد إيه وها يقولوك دي مبادرة وائل سيبك منه يا عم وبعدين معلشي يعني إنت ما تعرفش أي خرى خالص نهائي عن حركة شباب من أجل التغيير علشان تقعد إنت كمان على لا مؤاخذة - الشلته - وتنظر في ميتين أم الليلة وتزعم إنك عارف هي إتخربت إزاي !!!

أحه يا علاء بجد ومش بهزار !!!

ونسيت أقول لك إني بأشتغل مع كل التيارات ومش باستنكف ولا بأتعالى على حد ولا بأشتغل بس علشان قضية واحد صاحبي وأسيب التاني ولا بأبص لناس على إنهم جرابيع ما أصاحبهمش وناس تانية على إنهم ولاد ناس وناس تالتة ممكن ينضفوا فمافيش مانع يخشوا الشلة !!!

إنت كلمتني كده مرة وعديتها لكن يظهر إستحليتها فمعلش يا علاء أعذرني أنت بتحط حدود لتعاملاتك مع الناس وأنا كمان بأحط حدود لتعاملاتي مع الناس فلازم تقبلها وما تتعداهاش ومش ها إتهمك إنك بتتعوج وعامل فيها زعيم إنت كمان وزي ما إنت قلت ياما السجن غير فكرة لأن أنا ما أتمناش إن سوء ظني فيك يكون صحيح ...

تصدق أول مرة تقول حاجة تعجبني؟! جميل جدا، إذا كنت مضحي بأنك تبدأ المبادرة عشان عارف انه علاقتك بالآخرين اليومين دول فيها مشكلة..أعتقد ممكن حضرتك تدعم وتدخل فأي مبادرة قام بيها أي حد تاني، حتى لو مش معروف على أي مستوى..ودي موجودة وشفنا منها حاجات معرفش إذا كانت لسه عايشة ولا لأ الحقيقة..أظن المشكلة كدة ممكن تكون اتحلت؟!

أنا محتفظ بحق البضينة وقت ما أعوز بس لأنك عزيز علي مرضاش تزعل و بعتذر عن اللغة أولا.

طبعا معاك حق في تهزيقي على كلامي عن شباب من أجل التغيير و أنا ايدي في المياه الباردة ولا كنت بحضر اجتماعات ولا واجع دماغي بالخناقات. معاك حق تماما و متشكرين على التهزيق البناء.

و أن كنت مش بالع كلام أنا مزعل الكل بس برضه أنا مش بلومك أنت بالذات، ناس كتير بتتكلم بنفس الطريقة، لو أنت عندك أسباب تخليك مش عايز تبدأ بحاجة غيرك معندوش.

عموما أنا بتضايق من الحوار بطريقة الناس دي كان مفروض تعمل كذا، و مش فاهم فايدته ايه، و مصر أنه غتاتة و نتيجته دائما سلبية، و زي ما قلتلك قبل كده مفهمش الشكوى من من يعمل و فيه كتير مبيعملوش، الكلام ده نقوله لما كل موارد الحركة تبقى مهدرة في سكة و مفيش فرصة نوجهها في سكة تانية و ده مش حاصل.

عموما عايزين نعمل دعوة لمقاطعة المترو يوم في الأسبوع و ندعوا ليها بشكل سياسي مش بشكل بيخاف يتحسب على السياسة.

بصراحة يا وائل انت اتهزات واتمسحت بكرامتك الارض وغالبا علاء بيبصلك من فوق وانت فاهم قصدي مع انة والله انسان زبالة وخسارة فية كلمة انسان يا ريت يبدا شباب المدونين يدورو في فلك غير فلك علاء لانة بصراحة انسان شاذ وسوقي وارعن ومتكبر وفاكر نفسة حاجة كبيرة وهو ولا حاجة علي فكرة انا مبسخنكش لكن اسلوبة معاك وانت علي معرفة شخصية بيه كان اسلوب واطي وزبالة وحقير واستخفافة بيك وبعقليتك شكلهم ملهمش حدود وعشان كدة يا ريت نبدا ندي الزفت المسمي بعلاء حقة ونرجعه لحجمة الطبيعي كهلفوت عادي يهوي الظهور المسرحي ولعب دور البطولة في دور مش دورة ولا عمرة هيكون دورة لانة بصراحة شخص واطي واخلاقة بتنم عن كدة وصدقني اللي مالوش خير في صاحبة مالوش خير في هموم الناس

يعني لما يكلمك انت كدة امال هيكلم واحد زيي ازاي وهو مييعرفنيش

الكلب نسي لما كان مرمي في الحبس والناس كلها اتعاطفت معاه ومع قضيتة لكن يظهر انة ناكر للجميل وبينسي المعروف بسرعة

وعموما يا وائل انا معجب بكتاباتك وباسلوب تفكيرك فياريت الموضوع دة ميهزش ثقتك بنفسك

وحالوا يا جماعة للمرة المليون تطلعوا البني ادم اللي اسمة علاء من حيز تفكيركو واهتمامتكو ويرجع لاصلة مجرد نكرة

في اواخر عهد السادات ( ربنا ينتقم منه مش لأي شئ عمله الا لأنه جاب لنا خلفه العظيم حسني شارون مبارك) رفع بعض السلع الضروريه فأذا بالناس تخرج غاضبة كالبركان وللأسف اسماها المهرج السابق السادات أنتفاضة الحراميه ( شوفو المصريين سبقو الفلسطينيين في الأنتفاضه ضد اليهود )الله يجحمه كان ممثل من الطراز الأول فشر عمر الشريف و عنده قدره غريبه على قلب الحقائق بس طبعا هو ملاك بالنسبه لخلفه الخنزير الصهيوني اللي يرفع كل يوم كل الأسعار وليس بنسب بسيطه بل بنسب تصل للثلث وللأسف الناس من كتر الجراح اصبحت معتاده ده عادي و مطبقين لسياسه ضربو الأعور على عينه قال خسرانه خسرانه الحقيقه ياولاد ان أونكل حسني مش مخلينا محتاجين العاب لأنه مورينا اللي عمر عينينا ما شافته فشر روتانا سينيما وبأقترح بعض الألعاب لمصممي البلاي ستاشن 1- لعبه الكراسي الحكميه الموسيقيه و هي بين حسني و علاء و جمال مين ها يقعد عالكرسي اكتر 2- لعبه الصياد و دي لعبه يتم فيها جري الشعب المصري وورائه العادلي بالبندقيه 3- لعبه خد القرض و اهرب بطوله نخبه من رجال الأعمال 4- لعبه التفنيس (للكبار فقط ) و دي بطوله بوش والحكام العرب ياريت يتم نشر هذه الألعاب الهادفه بين الشباب

Well done at 1380

هي اسهل من الأصدارة اللي فاتت بس فايرفوكس عمل يسرب الذاكرة و هي مش ناقصة

بمناسبة المبادرات انا كنت كلمتك قبل كده عن موضوع HOWTOS عن العمل السياسي في مصر، انا حطيته في المدونة في http://tinyurl.com/gjhl4 لكن هكتبه هنا تاني عشان لا نتهم بالجري وراء الكسا و أخواتها

أولا أعتذر عن لغتي العربية الركيكة. ثانيا، و هو الاهم أني كنت قد طرحت على الزميل علاء - المشهور بالتنين البمبي - أثناء تأبيين الراحل رزة فكرة كتابة دلائل كمقدمات للعمل السياسي، التيارات المختلفة ، و غيرها من الموضوعات المرتبطة بالعمل السياسي . أعتقد أن وجود مثل هذه المقدمات من الممكن أن يسهل أندماج الوافدين الجدد علي العمل السياسي في مصر و انا منهم. و قد أقتبست الفكرة من عالم البرامج الحرة حيث يوجد أطنان من الأدب الشارح لشتى الموضوعات الموجه للمستخدمين الجدد و الذي يراعي مستوي احترافية القارئ. لكن كوافد للحياة السياسية، أحيانا أصاب بحالة من الارتباك عن جهل ببعض الأمور و لا أعرف اين اجد المزيد عن هذا او ذاك.

لنضرب بعض الأمثلة، إذا سألني أحد عن كفاية فماذا أقول له؟ برجاء زيارة صفحة من نحن على موقع كفاية؟ أنها الأهداف فاين التاريخ؟ الأشخاص؟ الأماكن؟ من هم اليسار؟ ايه هو اليسار اساسا ده؟ هل كل وافد في الحياة السياسية يعرف عن ويكيبيديا؟؟! ناهيك عن ملائمة المحتوي للواقع المصري؟ ما مبادئ الناصرية؟ من هم الأخوان ؟ما هي ثقافة التظاهر؟ الي ابسط الأشياء مثل كيفية عمل لوحة، و غيرها و غيرها

إنني لا أقترح كتابات مطولة تغوص في التاريخ و تنقد و تحلل، بل مجرد مقدمات مع روابط للمزيد أو قائمة بأسماء كتب و غيرها عن الموضوع تضم الرأي و الراي الأخر. كل هذا في مكان واحد علي أنترنت ربما مدونة أو ويكي ويكي أو وسيلة اخري، و يمكن ايضا طباعتها و تعميمها

أنا لا أؤمن بمبدأ أن ابقي صامتا ولا ابدو معتوها، أو أتكلم و أزيل كل الشكوك. فأرجوا التعليق علي الأفكار المطروحة

يعني كمان اللعبه صعبه انتم عملتوها عشان تحرقو دمنا انا ناقص مش كفايه مبارك اللي بجد انا ناقصه كمان لعبه

يا اخي سبحان الله زي ماتكون الفلوس عارفة طريقها ...كل ما اجي اضرب الفلوس تصحي تاني و تروح الجيوب

شئ غريب حقا

اللعبه ظريفه .. انا اول مره كمان اكتب على البلوج هنا ..

البدله مالها بتاعت مبارك تخينه كده ليه ؟؟ مش بس التلاتين قرش .. كمان فى القماش :))

و على راى واحده فلاحه سمعتها بتدعى فى الميكروباص على ارتفاع اسعار المواصلات كانت بتقول "ربنا على كل حاكم ظالم"