You are here

ما جمع الا أما وفق

Primary tabs

في الحلقة السابقة

في شهر أكتوبر اللي فات بدأت مناقشة عن مستقبل مجمع المدونات المصرية اللي حاليا جزء من موقع manalaa.net، طرحت وقتها مشكلتين بتواجه المجمع، مشكلة مادية و تقنية في تحمل العدد المتزايد للمدونات و الزوار و مشكلة تقنية و تنظيمية في نعرض التدوينات ازاي مع تزايد عددهم بالشكل السريع ده.

من المناقشة كان واضح أن فيه اهتمام باستمرار مجمع المدونات المصرية على صيغة مفتوحة للجميع و مفيهاش اختيار مدونات، و في التعليقات ظهرت اقتراحات عديدة لمشكلة حجم المحتوى أغلبها تنفيذه محتاج مجهود كبير و برمجة كثيرة.

و بعدها انقطع النقاش بسبب المواضيع السخنة اللي بترف على المدونات و بسبب سفري مدد طويلة.

رغم أني مكملتش المناقشة على المدونة لكن كملت مع أصدقاء كثر و خدت مجموعة قرارات، مرتبطة أساسا بالوضع المادي و تمويل المجمع، قبل ما أشرح القرارات دي خليني ألخص الفترة اللي فاتت.

من أين لنا هذا

المجمع بدأ في يناير 2005 كان عدد المدونين صغير جدا و عدد الزوار صغير جدا جدا، تكلفة الاستضافة كانت لا تذكر وقتها و كنا بندفعها أنا و منال من جيبنا، مع الزمن زاد عدد المدونين و عدد الزوار و اتنقلنا من shared hosting لvirtual servers و بعدين لdedicated server و قعدنا نرقي السيرفر كل شوية لحد ما وصلت التكلفة 60$ شهريا (كان وقتها عدد المدونين بالمئات و عدد الزوار الدائمين ميعديش 10000).

طول الفترة دي كان السيرفر شايل في نفس الوقت مجموعة من المواقع و المدونات اللي أحنا مستضيفنها او بانينها كعمل تطوعي، مسألة الاستضافة دي كانت هي الهدف الأساسي من شراء نطاق manalaa.net و تأجير سيرفرات و كانت الأولوية بالنسبة لينا، لكن مع الزمن بقى المجمع أهميته أعلى و بسبب قلة امكانيات السيرفر بالنسبة للضغط عليه كان بياخد مننا مجهود و وقت أكثر.

وقتها كان كل شوية كل المواقع اللي على السيرفر تنهار بسبب المجمع، فقررنا أن ضروري يتفصل مدونة منال و علاء و المجمع عن باقي المواقع، لكن امكانياتنا مكانتش تسمح بدفع أكثر من 60$ شهريا فقررنا طلب المساعدة من الأصدقاء.

أول اقتراح جالنا كان جمع تبرعات، المشكلة كانت أن أغلب المتبرعين عايزين يدفعوا مبالغ صغيرة و ده معناه أن أنا أو منال نقضي وقت و مجهود كبير في جمع الفلوس و ده طبيعي هياكل من الوقت المخصص للعمل على السيرفر و المواقع و تدريب محرري المواقع، فقررنا أننا هنلم فلوس سنة كاملة (و قدرناها وقتها أنها هتكون 5000 جنية مصري) و مش هنقبل تبرعات صغيرة. قمت كتبت جواب صغير بيشرح أحنا بنحاول نعمل ايه في manalaa.net و محتاجين كام و ليه و مررنا على معارفنا اللي قادرين على دفع مبالغ كبيرة نسبيا، و اتلمت الفلوس فعلا (دفع أغلبها الأستاذ هاني عنان).

الكلام ده كان في مارس 2006 لو ذاكرتي صحيحة، بعدها طبعا بدأت الاعتقالات و شعبية المدونات قفزت جامد جدا، أول ما طلعت من السجن لقيت أني محتاج أرقي سيرفر المجمع ترقية كبيرة و أرقي سيرفر الاستضافة، جمعت تبرعات ثاني رغم مرور أقل من نصف سنة على جمعي لما تصورت أنه هيغطي سنة كاملة (اللي دفعوا المرة دي كانوا مجموعة أكبر أحب أشكر منهم وائل خليل و حسام الحملاوي و عمرو غربية).

و بس من أول يوليو 2006 و تكلفتنا 100$ لسيرفر الاستضافة و 140$ لسيرفر المجمع شهريا.

طبعا مبلغ خرافي و مع ذلك مش مقضي، يعني ضروري نغير الموضوع تغيير جذري. (اكتشفنا وجود ألاف المدونات اللي مش مضافة للمجمع و في نفس الوقت شعبية التعذيب في مصر و جار القمر و فرقة رسالة زادوا فجأة ده غير النجاح الباهر للمدونات بعد موضوع التحرش الجنسي، مصيبة يعني).

ما العمل

فيه ثلاث موارد أحنا بنستهلكها، وقت التقنيين (اللي هما حاليا أنا و منال و أحيانا محمد سمير) و فلوس و موارد السيرفرات.

لازم يا أما نزود الموارد دي يا أما نقلل استهلاكها، يعني مطلوب تحسين أداء المجمع بحيث ما يستهلكش موارد كثير (بس ده محتاج وقت برمجة و صيانة أكبر) أو نزود امكانيات السيرفر (و وقتها المفروض أني ألاقي وقت أكثر للبرمجة بما أن الصيانة هتاخد وقت أقل). و ممكن طبعا نزود عدد المتطوعين بوقتهم بدل ما نزود الفلوس.

حد فاهم حاجة؟

قرار ثوري رقم ...

بعد تفكير طويل في الموضوع ده وصلنا للقرارات دي

تمويل المجمع هيكون عن طريق اعلانات

بدل من جمع التبرعات هنحاول نمول المجمع عن طريق الاعلانات، بما أن نظريا الاعلانات هتدفع أكثر لما يزيد عدد الزيارات. المشكلة أن نظام اعلانات جووجل مرتبط أساسا بأن الناس تدوس على الاعلانات (و أنا بصراحة مش شايف ليه في بني أدم عاقل هيدوس على اعلان) و بالتالي مقدرش أخمن خالص هل موضوع الاعلانات ده هينفع ولا لأ، الأكيد أن التبرعات مش هتنفع لو التكلفة استمرت في الزيادة بالشكل ده.

المجمع هينفصل عن المدونة

فصل المجمع عن المدونة كان دائما في الخطة و أظن سنتين وقت كافي عشان نفطم المجمع، السبب الرئيسي للفصل دلوقتي هو موضوع الاعلانات، أنا مش عاجباني فكرة اعلانات على مدونة دي خاصة لكن المجمع خدمة و خدمة مكلفة فبالتالي معنديش مشكلة أحط عليه اعلانات.

سيرفر جديد للمجمع

حاليا المجمع واقع نصف الوقت، لو ناوي أحط اعلانات و أستنى منها أنها تغطي التكلفة لازم نحاول أن المجمع ميقعش خالص، يعني لازم نستثمر في سيرفر أفضل لحد ما يبدتي عائد الاعلانات يبان.

حسبناها كده و قررت أن 3 شهور مدة كويسة، شهر على ما أظبط أموري و شهر على ما يجي عائد و شهر كمان على ما نشوف هوصلولنا الفلوس ازاي.

لقيت سيرفر كويس و ابن حلال بتكلفة 150$ في الشهر من netsonic.com و قررنا جمع التبرعات مرة كمان لتغطية ال3 شهور دول، قام بيسو مشكورا بدور جابي ضرائب العمرانية و جمع تبرعات توازي 400$ من مدونين و قرائهم و على أساسه حجزت فعلا السيرفر و بدأت في تجهيز http://www.omraneya.net.

ضم مدونة منال و علاء على باقي مدونات و مواقع الشبكة

بعد فصل المجمع هنقل كل المدونات و المواقع الي مستضافة على manalaa.net على السيرفر أبو 100$ الي السيرفر أبو 140$ اللي عليه مدونة منال و علاء (بما أنه هيفضى و يخف خالص بعد اختفاء المجمع)، تكلفة السيرفر ده هتتدفع من جيبنا بمعدل 60$ في الشهر و من باقي التبرعات القديمة لحد ما يبان نتيجة موضوع الاعلانات ايه.

المرة دي هتكون آخر مرة أجمع فيها تبرعات للمجمع

ده معناه أن لو الاعلانات مجابتش 150$ شهريا على الأقل ممكن أقفل المجمع خالص، أنا متمسك بموضوع الاستضافة لكن المجمع تكلفته بقيت عبثية.

طبعا ممكن قبل ما تكون الاعلانات أثبتت فشلها يظهر حد يساعدنا و نغير البنية بتاعت المجمع و تقل التكلفة خالص، أو مين عارف يمكن البريمو يضرب و الاعلانات تعمل دخل جامد و نتنغنغ.

أمرنا هيكون شورى بيننا

في رأيي نجاح مجتمع التدوين المصري معتمد بشكل كبير على أن حلقة المدونات المصرية و المجمع تم ادارتهم بشكل ديكتاتوري محدش له رأي فيه لكن بشكل فعال و مفتوح للجميع و مشجع على التشبيك، لو كنا حولنا الادارة للجنة أو لشكل أكثر ديمقراطية كانت خربت في أول مناقشة عن البذائات.

لكن في نفس الوقت منقدرش ننكر أن فيه ناس كثير بدأت تشوف المجمع كأرضية مملوكة للجميع (مثلا تخطيط حملة كلنا ليلى اللي اعتمد على المجمع في الأول و اللي تسبب في خناقة بيني و بينهم)، ده غير التذمر المتزايد من تفاصيل عديدة في المجمع و تأخري عن اضافة المدونات و عن تطويره و تأخرمنال عن تغيير تصميمه.

بما أن المجمع هينفصل و بما أن تكلفته شارك فيها ناس كثير و بما أن المشاكل التقنية اللي بتواجهنا بقيت أكبر من أننا نحلها لوحدنا أظن جاء الوقت اللي نبتدي فيه نوسع قاعدة اتخاذ القرار بتاعت المجمع.

ده مش معناه نهاية عهد الديكتاتورية لسه، لكن معناه أننا هنبدأ نستشير مجموعة واسعة من الناس و هنحاول نخلي عملية الاستشارة دي علنية، يعني على رأي حكومتنا هنوسع هامش الديمقراطية. و استعدادا لأزهى عصور الديمقراطية اللي هيجي قريب ما تقلقوش هنبدأ في تكويد قواعد المجمع بشكل واضح.

التجنيد و توسيع القاعدة الجماهيرية

عشان ننفز كل الأحلام دي محتاجين نوسع قاعدة الناس اللي شغالة معانا، تم بالفعل تجنيد محمد سمير و بودي و الأخوان غربية و بنت مصرية في الجناح التقني لجماعة 30 فبراير و جاري البحث عن مرشحين جدد، و مع وجود ابليس شخصيا و الشهيد مالك مصطفى بروحه في صفنا لا يسعنا الا النجاح.

Comments

و هكذا قامت الثورة المجيدة على أنقاض العهد الديكتاتوري البائد ، انه لمن دزاعي فخري ان اشارك في هذا الاستفتاء ، و نحن معكم قلبا و قالبا ، و الي الأمام يا بروطس - مين بروطس ده؟

حلو الكلام جدا يا علاء ، طيب ماهو الحوار ده دار من كام شهر و انت قلتلي ان تحقيقه صعب ، يمكن انت مالقيتش حل تاني؟

انا كنت باتكلم على الاعلانات و المجهود الجماعي وقتها ، كمان لو تفتكر قلتلك العمل التطوعي مش هايجيب نتيجه ، فكرة فصل المدونة عن المجمع دي حاجات فنية مافهمش فيها

كل الكلام ده حلو ، اطلع بطاقة انتخابية من فين؟

اللي فارسني موضوع الغاء الدكتاتورية ، كده انت ممك نتخلي ناس بضان يشتركو في اخد القرار ، و زي ما سادتك عارف الديمقراطية ليها انياب ، يعني ممكن تلاقي المجمع طار من ايدك في الاخر ، تمسك بالدكتاتورية ، ففيها النجاح ابقى قابلني لو دوستلك على اي لينك من اعلانات جووجل ، هو مافيش طريقة تانية للاعلان؟

انت فوق قلت ان دي اخر مرة هاتلم تبرعات للمجمع ، طيب اللي عايز يتبرع المرة الأخيرة دي يعمل ايه؟

طيب روح بص على ايميلك عشان أنت بيتم تجنيدك دلوقتي.

مفيش أي نية لأي حاجة غير العمل التطوعي متكلكعش الموضوع.

موضوع فصل المدونة بالأساس مش لأغراض تقنية، لكن أنا مش عايزاعلانات على مدونتي و أهو برضه المجمع كبر و عايز يستقل بنفسه.

متخافش الغاء الديكتاتورية ده في الخطة الخمسية الجاية مش هيحصل بسرعة، حاليا أنا في مرحلة ما بين أوليجاركية الماجنا كارتا و شوري سقيفة اسمه ايه ده و سيادتك مدعوا تبقى في اللجنة الاستشارية العليا اللي أنا و منال هنتجاهل كلمتها تماما في النهاية.

أما موضوع طريقة ثانية للاعلان اللي يسمع عن طرق ثانية يقولنا، حاولت أتفق مع تووت بس هما مهتمين بالمدونات فقط.

زي ما قلت بيسو كعب الغزال هو جابي الضرايب بتاعي، اللي عايز يتبرع يتصل بيه. و أنت راجل مقاول قد الدنيا و مش هوصيك.

يا جماعه أنا مصمم مواقع ومبرمج صفحات نت .. ليا خبرة فى معظم لغات برمجه مواقع وصفحات النت بدايه من HTML حتى CSS مرورا بـ PHP ...

وبعرض عليكم التعاون بدون قيد أو شرط , وبدون أى طلب مادى أو معنوى كخطوة منى لدعم المجمع والسايت ككل .

وممكن تشوفو مدونتى وعلى فكرة تم تصميمها بالمجان بالكامل على

http://www.members.lycos.co.uk/specialistserver1/

أو

www.mohamedhamdy.tk

أو تبعتولى ميل على

[email protected]

وأنا تحت أمركم .

سلام .

جميل جدا يا ريت تبدأ بأنك تتعرف على نظام دروبال عشان كل شغلنا عليه و بعدين نشوف

طيب أنا بعرف شاى وأرل سجاير وبفهم فى لغة الشوارع والحوافريت لو أنفع أساعد حد يبعتللى الواد بيسو الغرزه وأنا مش أتأخر لازم نتعاون

عمل تطوعي بمعنى ايه يا بيه ؟؟ ايه المطلوب مني مثلا؟

لا عمل تطوعي ده مش للوديين أمثالك ده للناس اللي تعرف جنو لينوكس أو php أو css و الحاجات، لكن أنت مدعوا للجنة الاستشارية العليا روح سجل.

اعتقد ان فكرة الاعانات دى فكرة ان شاء الله هتكون ناجحة وانا عن نفسى ممكن اساعد فيها ومنها برده انا هستفاد انا عندى شركة دعاية واعلان فى اسكندرية وممكن امسك التسويق لموضوع الاعلانات ده فى اسكندرية والساحل الشمالى بس ده عاوز تنسيق اكتر ما بينا لو حبيت انا مستعد

طيب والناس اللي معندهاش خبرات تقنية وكمان مدوناتها مش باستضافة على شبكة منال وعلاء لكن في النهاية بتستفيد من وجودها في المجمع .. ممكن تعمل ايه؟ [email protected]

ممكن تشارك بأنك تقدم اقتراحات للمجمع المفروض يكون عامل ازاي.

صباح الفل يا معلم

بالنسبة للإعلانات فيه إمكانية إنك تتحاسب على عدد الزوار مش النقر على الإعلانات , وأعتقد ده متاح في جوجل .

وفيه خدمة اسمها adbrite سمعت إنها بتجيب فكة كويسة .

بالنسبة للمجمع أنا فهمت إنه هيكون على :

http://www.omraneya.net

إذا كان كدة فأنا باقترح إيجاد دومين تاني يعبر عن الموضوع يعني حاجة زي egybloggers مثلاً أو أي دومين تاني متاح

بما إن المجمع هيبقى منفصل وهيمول نفسه ذاتيا وسيتم اتباع أفضل الطرق والوسائل الديموكتاتورية في إدارته ؛ يبقى نطلع بقى من حوار العمرانية والتنين البمبي وكدة يعني :)

asad.blogsome.com

حاضر موضوع العنوان هيكون أول قرار يتم اتخاذه بالشورى و مستني أسمع اقتراحات أكثر

Omraneya can be used if it's an acronym, that would be cool actually :)

other than that, the question I've always wanted to ask.. why do you insist on having the aggregator being the huge blog-archive it is?

I mean.. do you really need to host the full posts of everyone ?.. why not just a link with the post title ?

عشان فيه ناس كثير و أنا أولهم بيبقوا عايزين يقرأوا جزء من التدوينة و أحيانا كلها على المجمع. و فيه كمان ناس بتعمل بحث في التدوينات القديمة أو تصفح للتدوينات بالتصنيفات.

ده غير خططي الجهنمية للتحليل الاحصائي للتدوينات اللي معتمدة على وجود قاعدة بيانات فيها كل حاجة (طبعا مبلقيش وقت أعمل أي حاجة من الخطط دي بس نظريا مفيد و مش هينفع نفوت نعمل قاعدة بيانات بعد ما نحتاج).

عمرانية اختصار ايه بقى؟

انا مستعد للمساعدة التقنية انا بعرف فاجوال بيسك وسي بلس بلس وشوية ماشين كمان لو دول ماينفوعكش-خصوصا اني مابرمجتش ويب سايتس قبل كده- انا مستعد لبناء الخوارزميات بعبارة اكثر وضوحا دي الحاجات اللي ليها علاقة بالبرمجة اللي انا بفهم فيها وعندي استعداد للمشاركة

ملحوظة انا مش مشترك لا في المجمع ولا في الاستضافة ولا اساسا ليا مصلحة مباشرة في كل الكلام اللي انت قلته فوق ده انا هاشارك من منطلق اني اخد خبرة في البرمجه والعمل الجماعي واحسن من كفاءتي

بس خلاص

Alaa, what is the volunteer exactly going to do? Are we going to write new php scripts and debug existing code walla eh bezzabt. enta me7assesni e7na hane3mel 3amla gamda. I think it would be a good idea, a spinoff project madam kollo open source we ta7ya el open source wel gnu wel gpl.

بص أنا لما اتكلمت عن متطوعين كنت أقصد لكل حاجة مش للمجمع فقط

يعني مثلا و أحنا بنجهز موقع التعذيب في مصر احتجنا تصميم فقامت بنت مصرية مشكورة بعمل تصميم

يبقى لو وسعتها أحنا بنساعد أفراد و جماعات بشكل تطوعي عشان يعملوا مواقع و مدونات قوية عشان نثري المحتوى المصري و خصوصا اللي بالعربي على الانترنت و نشجع الناس تعمل مواقع ديناميكية فيها تفاعل مع الجمهور، و بنحتاج ناس فاهمة دروبال تساعد في تدريب المحررين و تشغيل المواقع و ناس فاهمة html و css عشان تساعد في تصميمات و ناس فاهمة جنو لينوكس عشان تساعد في تشغيل سيرفرات و ناس فاهمة php عشان تساعد في البرمجة.

بخصوص المجمع بالذات أولا محتاجين تصميم جديد و كمان محتاجين حد يعمل optimization لكود المجمع (و دي محتاجة معرفة بدروبال و php) عشان يستهلك ذاكرة و وقت معالجة أقل.

دول الحاجتين الملحين جدا، فيه أفكار ثانية بس محتاج أخلص النقل أولا و أقعد أفكر و أتناقش شوية و بعدين أطلع بقائمة مهام وقتها اللي عايز يساعد يقدر يقول أنا متطوع أعمل كذا.

ليها ماتخلوش الموضوع استثماري بدرجة احترافية اكتر بحيث تعملوا المجمع من خلال شركة تأسسوها و يكون في مساهمين باسهم و تكون الاعلانات بطريقه مفتوحة اكبر من ال جوجل بحيث ان ممكن شركات كتيرة من مصر تعلن عندكم لان كمية الناس الي بتدخا الموقع تجذب اي شركة و بعدين لما المساهمين في الشركة هيدوا اهتمام كبير لمل يلاقوا ان في ربح ان شاء الله غير لمل تكون تبرعات بس و بعدين انتوا ممكن تشغلوا شباب كتير في الشركة دي وممكن برضوا تعملوا امكانيه وجود اعلانلت شخصية زي الوسيط مثلا سواء عقارات او سيارات او اجهزة كهربائية او موبايلات كده يعنى كون العدد الكبير من الناس الي بتخش علي الموقع ممكن تساعد في طرح حلول كتيرة امشكلة التمويل

لأسباب عديدة

أولها أن دي حاجة بنعملها في وقت فراغنا من باب المتعة و الافادة موضوع تأسيس شركة ده عايز وقت و مجهود و مخاطرة بأموال و أحنا عندنا شغلنا و حياتنا مش متمركزة حوالين المدونات و بس.

ده ميمنعش أن حد تاني يقوم بتأسيس شركة تحاول تشتغل حوالين المدونات و ما شابه (فيه فعلا شركة أردنية مشابهة).

و الله لو حد عمل شركة زي دي و عايز يجيبنا استشاريين أهلا و سهلا.

أخيرا موضوع الشركة ده هيعقد الأمور القانونية جدا، الغرض هو عمل مجمع مفتوح لكل حد و كل حاجة و ده يستدعي بالضرورة أجواء مش رسمية لتقليل احتمالات المسائلة القانونية عن ما يتم اعادة نشره (و ده ميشملش فقط القباحة و السياسة و الدين عندك مشاكل من نوع حقوق الملكية الفكرية و هيصة).

عندى استعداد لاى مساعده بس للاسف العشرين يوم الجايين دول عندى امتحانات ولكن انشاء الله بعدها اكون موجود

لكن ياعلاء ممكن توضح ايه الجوانب اللى انت محتاج مساعده فيها ؟ عشان كل واحد يشوف يقدر يساعد بايه وفى ايه

كمان انا عندى اقتراح فى موضوع التبرعات وهو انك ليه متعملهاش اونلاين عن طريق باى بال مثلا ؟؟

واهو بكده يبقى متاح للجميع انه يتبرع حتى لو مبلغ صغير ومع الوقت اكيد التبرعات هتعمل مبلغ مش بطال

اولا للاسف لا افقه شىء فى لغات البرمجه و خلافه

الحاجه التانيه ليه ميبقاش فيه حاجه زى النظام اللى عملاه روايتى بمعنى ان يكون فيه فلوس بتدفع مش لازه بكروت مخصوصه اى حساب بحيث ان مقابل الاستضافه او متابعه البلوجات كل مدون يدفع مبلغ كل شهر اعتقد ان كل اغلبيه المدونين سواء اللى ليهم دومين هنا او بتابع بلوجاتهم مش حيمانعوا

عموما مبرووك و مرحله التطوير مهمه

صحيح عمرانيه اسم حلو".

قبل ما نفكر في بدائل لموضوع الفلوس تعالوا نشوف الاعلانات هتنفع ولا لأ، الاعلانات وسيلة مش محتاجة أي مجهود من ناحيتي و لو كفت المبلغ المطلوب يبقى خلاص كله تمام

ربنا معاكم

بس ياريت تهتموا بتنظيم شكل المجمع وتوزيع المدونات

تحياتي