You are here

كفارة يا منعم - Monem is free

Primary tabs

مبروك يا جماعة منعم خرج خلاص و هو في بيته مع أهله دلوقتي.

بكره نطمئن على باقي الشباب اللي كانوا محتجزين معاه.

المصريين عندهم جملة عبقرية بيقولوها للي يتحبس ظلم

ربنا يجعلها في ميزان حسناتك

مبروك لأهل منعم و لينا، و عقبال كل معتقلي مصر.

Comments

الحمد لله على سلامته بس دي أول مرة أعرف ان اسمها مقام حسنات اخر حاجة وصلت لعلمي كانت ميزان :)

أول زيارة للمدونة الرائعة دي ربنا يبارلك و يثبتك

فعلا هي ميزان حسناتك مش مقام حسناتك، معلش أنا ضايع في الحاجات دي و كان أول مرة أسمع الجملة لما خرجت من السجن السنة اللي فاتت و خدت وقت على مفهمت يقصدوا ايه :-)

ألف مبروك حرية منعم وألف مبروك نجاح حملة التضامن من أجل منعم واللي ف رأيي أنها كانت من أنجح حملات التضامن لحد النهاردة

يمكن عشان منعم راجل محبوب من الناس كلها؟ إحتمال.. بس كمان كان رائع إن الناس كلها اتحركت وبشكل تلقائي وطول الوقت كنا كلنا بنكتب عن منعم ونصمم بانرات لمنعم (واخد بالك إنه حتى البانرات تنوعت مصادرها ومكانش فيه يونيفورم واحد للبانر؟) والكل اشتغل من غير وجع دماغ وتنسيق وتنظيم (طبعا فيه ناس نسقت حاجات زي موقع التضامن مع منعم بس حتى ده مكانش فيه أزمة ولا مانع إنه يبقى فيه أكتر من موقع للحملة وعادي الحياة كانت ماشية لطيف)... مبروك لمنعم حريته... وفعلا منعم هيفضل إخوان ويا ريت الإخوان كلهم زي منعم

إنت ونورا بالذات بذلتوا جهد تحفة.... مبروك ليك ومبروك لنورا أنا سعيد http://egyptwatchman.blogspot.com/

كام يوم كده و نبقى نفتح الكلام في تقييم الحملة، لكن خلينا نقول حاجتين في السريع، كان ممكن (بل و المفروض) يتعمل أكثر من كده بكثير و طبعا رغم وجود ردود أفعال دولية عديدة لكنها كانت أقل بكثير من اللي اتحقق في حملة freealaa مثلا.

أما من ناحية الجهد اللي أنا قمت بيه، فأنا معملتش حاجة لظروف عائلية صعبت علي توفير الوقت و الطاقة المطلوبة، أغلب الجهد محليا قام بيه مدوني الأخوان و أغلب الجهد الدولي قام بيه سامي بن غربية و أستروبال و مالك من تونس و ماري جويس من تشيلي على ما أظن و طبعا نورا يونس.

تحية كبيرة لرفاقنا المدونين التوانسة و يا ريت نفتكرهم زي ما فكروا فينا، بلادهم في محنة يمكن تكون أكبر من محنتنا و ثمن الرأي هناك أغلى و كفاية على سبيل المثال فقط أن سامي بن غربية لاجئ خارج البلاد خوفا على سلامته (و مدونته لاجئة خارج تجمعات المدونات التونسية بسبب تجذر الرقابة الذاتية في مجتمع التدوين هناك).

كنقطة بداية أقترح الاهتمام بقضية محمد عبو اللي المفروض تكون قريبة جدا من قلبنا، فالراجل حقوقي شاب و اتحبس بسبب فضحه للتعذيب في سجون تونس.

مبروووووووووووووووووووووووك تصحيح بس غير انهل في الميزان فالمسلمين هما اللي بيقولوا كدا ههههه مبروك تاني :D http://masr-heya-ommi.blogspot.com/

الف مبروك علينا كلنا و مبروك يا علاء على المجهود اللى اتبذل فى الحمله بس تفتكر ان حملة التضامن دى كان ليها دور اساسى فى الافراج عنه؟ و هل بكده لو كثفنا من حملاتنا فى قضايا حرية الرأى و مكافحة الفساد هيكون لده تأثير كبير ولا لازم يكون فيه تضامن شعبى على نطاق و اسع؟ شكرا وعقبال كل المعتقلين فى سجون مبارك

صعب جدا تقدير مدى تأثير حملة في الافراج عن معتقل.

رأيي الشخصي أن الأمل ضعيف أننا نعمل حملة تفرض على الدولة الافراج عن حد مش عايزين يفرجوا عنه، احتمال مثلا يكون محمد الشرقاوي طول في السجن بسبب حملة التضامن مش العكس.

لكن ده ميمنعش أن الحملة بتكون عامل أساسي في ضمان سلامة المعتقل و تقليل احتمال التعذيب، بتدعم المعتقل و أهله معنويا، و الأهم من ده كله بتوصل صوته و تخدم قضيته و بالتالي نبوظ على كلاب الدولة العملية، لما هيقبضوا على حد صوته هيوصل أعلى و أوسع مش العكس و مع الزمن يمكن يفهموا أن الاعتقال مش هايجيب نتيجة.

في حالة منعم استفدنا كلنا من الحملة الدولية لفضح النظام أكثر و عشان نوصل رسالة مهمة لشعوب العالم و هي أن فيه اسلاميين زي منعم عايزين الديمقراطية و الحرية و العدالة للجميع (صورة الناس بره عن الاسلاميين مشوهة تماما و لو كسرنا ده نقدر نقلل من حدة التدخل الأجنبي لتعطيل الديمقراطية).

و لو ركزت على الحملة الدولية بالذات هتلاقي كان فيه وعي عالي بحدود ما يمكن تحقيقه و بالتالي تركيز على الحاجات اللي ممكن تجيب نتيجة.

يمكن أكثر حاجة قصرنا فيها كانت حتى الدعم المعنوى خصوصا لباقي الشباب المعتقل (منعم عنده خبرة و ميتقلقش عليه) كان ممكن نركز أكثر في ايصال رسالة التضامن لأسرته من باب التخفيف عليهم مثلا (راجع مقالات نجلاء بدير كمثال جيد لكان ممكن نعمل ايه) ، لكن أظن المحصلة النهائية كانت كويسة جدا و مبروك علينا، و نتعلم عشان المرة الجاية (اللي هي أكيد قريب مش بعيد)

ألف ألف مبروك يا عبده على الحرية من جديد .. أنا متأكدة إن إنت اتعلمت كتير من الفترة السابقة, وفقك الله وكل المدونين الآخرين.. على فكرة أنا أصبحت منهم أيضا!

ها هي مدونتي : اسمها "كيف نغير النظام" http://changeregime.blogspot.com

الف مبرووك لمنعم ورفاقه وعقبال كل الاحرار فى سجون البغل .... وانا فعلا منتشى جدا من حملة منعم حتى لو كان تاثيرها محدو د على النظام انما بيثبت حاجه مهمه ان لو الناس امنت بحاجه مشتركه تجمعهم كلهم بيقدروا يعملوا شيئ حتى لو كان الشيئ دا مجرد طرقعة كيبورد

بكره طرقعة الكيبورد دى هتتحول ان شاء الله لطرقعه على قفا حسنى والعادلى و كل ولاد الافاعى الباقيين

الحمد لله

I think it is time for Civil disobedience in Egypt guys. This needs cooperation between the brotherhood, socialists, liberalists, and the majority of Egyptians in this regard will change the regime. But I do not know why Muslim brotherhood do not support such Civil disobedience? --AA

يحيا العدل

I guess i admire that you are reasoning with the hopes or claims that the campaign brought him out as much as we would all love to believe that ,it is very rational to know that unfortunately it isn't true , that it must have helped as you said in protecting him while inside maslan and so an evaluation to what and how is a great idea and is needed akeed

Mabrouk to all anyway

ربنا يجعلها آخر مره و ان كنت اشك في ذلك بس كفاره يا معلم ويكتر من المصريين الشرفاء امثالكم ويكتر المدونين و يجعلهم قوة دفع تحرك الناس نحو غد افضل

مش مصدق ان الفراعنة بالهيافة دي 00 والخيبة دي 00 يترعبوا من مدون 00 يترعبوا من طالب 00 يترعبوا من الورقة والقلم 00 والله امن الدولة حمار 00 وبيشوه صورة النظام مش بيحميه 00 وبيشوه صورة مصر 00 وبقت سيرتنا على كل لسان 00 والمستشارين حمير 00 مصممين على التعامل الغبي مع الحراك المطالب بالاصلاح 00 مش بيقروا تاريخ 00 ولا جغرافيا 00 منعم زاد قوة 00 وزاد شهرة 00 وشجع الخوافين 00 منعم ماخسرش هما اللي خسروا 00 لو فيهم حد عاقل يقولهم ان ماحدش في التاريخ قدر يوقف موجة الاصلاح والتغيير 00 ولو دامت لغيرهم ماكانتش وصلت لهم 00 حمدالله عالسلامة يامنعم وان شاء الله في ميزان سيئات الفراعنة 00 وربنا يوقفهلهم في عيالهم 0