You are here

قولوا لمهدي عاكف أن بين صفوف جماعته منعم

Primary tabs

معلق مجهول أشار لتدونية منعم الأخيرة عن أحداث جامعة الأسكندرية في 9 أبريل 2003 و مقتل الطالب الشهيد محمد السقا على أنها ممكن تكون السبب وراء محاولة اعتقاله

رغم أني أشك أن ده السبب الوحيد لكن التدوينة فعلا شهادة مهمة عن اليوم ده، و أنا بقرأها لاحظت تعليق منعم بيرد فيه على تعليقات محبطة تعاملت مع الحدث كأنه حدث أخواني صرف، شوفوا التعليق كده

طبعا أنا شايف ان نظرة عبدالرحمن ونظرة محمد السيد سلبية للغاية احنا اللي بنعمل في العمل العام اللي بنصدر شعور الخوف طلاب الاخوان في اسكندرية ومشرفيهم صدروا شعور الخوف للصف ومنه للطلاب يبقي مينفعش بأه نذكر تاريخ عبدالحككم الجراحيومطصفي كامل ونضال المصريين من اجل الحرية ونمسح التاريخ عشان نضحك علي الناس وميخفوش ويقوموا يخرجوا تاني للمظاهرات

ياسلام ده مش منطق ابدا حدث ذي ده مبقاش ملكنا ده ملك الامة اللي صنعته يبقي حق علي اللي شاركوا فيه وعندهم شهادات ورويات تملاء كتب انهم يعرفوا الناس التاريخ ده واجب وفرض علي اللاخوان وطلابهم اللي بيصدروا نفسهم في العمل العام انهم يكسروا حاجز الخوف عن الناس عشان تتحرك لكن للاسف رجعت جامعة اسكندرية الف سنة وراء وبقي الشباب بتعها حكماء العصر احنا خايفيين علي الناس لا وبصدر ليهم مشاريع مهمة لتحركهم شنطة الخير وجمع الملابس الشغل اللي يتحرك فيه اي حد ومش محتاج من الاخوان او غيرهم انهم يقوموا بالدور ده

الدور المطلوب منكم حس الناس علي الحركة بس روح القوة والمطالبة بالحرية

أنا معرفش منعم كويس لكن بعتز بمعرفته جدا، و التعليق ده يلخص هو مين بالنسبة لي و ليه أي حد يعرفه لازم يعتز بيه و بمعرفته، المذهل في منعم مش بس قدرته على تقبل النقد، لكن قدرته على نقد الذات بصراحة تامة و دائما،

بعد كلام منعم بيومين ألاقي جريدة المخبر اليوم بتقول نقلا عن مصدر في مكتب الارشاد

أن الجماعة تنوي تقديم نحو ١٥ مرشحاً لها في انتخابات الشوري فقط، وليس صحيحاً ترشيح ما بين ٢٠ و٣٠ مرشحاً، حتي لا يفهم أحد أن المقصود هو الحصول علي نسبة ٥% من نسبة المقاعد في مجلس الشوري، مع نسبة الـ٢٠% في مجلس الشعب للجماعة، مما يؤهلها لترشيح مرشح لرئاسة الجمهورية. وأوضح أن الجماعة تؤمن بمبدأ المشاركة لا المغالبة في جميع الانتخابات علي كل المستويات، لإيمانها بالعمل الديمقراطي.

أقرأ كلام منعم و أنكسف من نفسي، ما أنا لا عندي خبرة زي خبرته ولا أعرف أتحمل اللي اتحمله و لا هعمل قده، بس يحل علي التفائل و الأمل. أقرأ بقى كلام المصادر المسئولة بتاعت الجماعة و أنكسفله و أحس بالاحباط. يعني أنت يا منعم اتعذبت و انحبست قبل كده و مطارد دلوقتي عشان المشاركة لا المغالبة؟!!!

و ...

Comments

يعني الواحد يقول إيه بس ؟!

إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..إصبر واحتسب يا اخي ..

أم كدة يا اخي

الجماعة بقالهم بتاع تمانين سنة بيربوا في الشعب , وكل ما يربوا جيل يا يترمي في السجون يا يفضلوا ساكتين عليه لحد ما يموت وهيفضلوا طول عمرهم مربوطين في ساقية التربية إيه القرف ده ؟ مشاركة إيه وزفت إيه ؟ خايفين ليه يا عم المرشد ؟ بتحسسوا عليهم ليه ؟ ولادكم وقياداتكم مرميين في السجون زيهم زي الصيع والبلطجية وفلوسكم اتصادرت فاضل إيه بقى ؟

هو كل ما تبقى فيه معركة ممكن تدخلوها يقبضوا على كم واحد تروحوا راجعين في كلامكم عشان تحافظوا على الجماعة ؟

هو الهدف بقى الجماعة وخلاص مجرد استمرار الجماعة ده الهدف الوحيد ؟ يا عم المرشد من سنن الله الاستبدال , لو مش قدها إتكل على الله إنت وطقم مكتب الإرشاد - أمد الله في أعمارهم - وسيبوها للناس اللي هيعيشوا بقية حياتهم في البلد دي ومستعدين يشتغلوا بجد , إنتم أخدتم فرصتكم من أيام الملك فاروق الله يرحمه والقلم السياسي, خلاص بقى اتكلوا على الله و كفاية تصدير الفوبيا للعيال بسبب النقراشي والمنشية !!!!

طيب كويس يا أسد انك قلت أخيرا موضوع أستمرارية التنظيم ... علشان انا صوتى اتنبح معاك فى الموضوع دة انا شايف فعلاا ان دة الهدف و يمكن دة اللى مخلى موقفى كدة من الأخوان - مش فوبيا أخوان - زى ما أسد معتقد انى مريض بيها لما كلمتك و اتناقشت معاك كتير فى الموضوع يا اسد كان كل فحوى الكلام على كدة شباب بتبيع نفسها لهدف نبيل بعد كدة يتفاجئوا و يتخبطوا فى تنظيم عملااق أكبر من طموحاتهم و ماعليهم الا الانصياع للأوامر .... يمكن منعم كويس و عنده امل و كلامه مشجع .. بس فين هايروح من التنظيم بصفقاته المعلنة و الغير معلنه و تضارب المصالح و التوقيتات كل دة ليه حسابات كبيرة أظن انها اكبر مننا ... عبد المنعم مش مدون عادى و السلام عبد المنعم المفروض وراه تنظيم يحميه بعد الخدمات اللى هوه بيقدمها دى كلها مش يبقى هم التنطيم المشاركة و خلاص و كل فترة تطلع اوراق تتحرق و يتم الاستغناء عنها و يبقى الهم الكبر أستمرارية التنظيم مش الوقوف ضد النظام ... كمان فى مشكلة كبيرة و دة اللى انت ما فهمتوش من كلامى مننا لدعم حد من الاخوان بيبقى صعب لان ماحدش عارف هما توجهم ايه اصلا و لا هايعملوا ايه و مخططين لأيه يعنى منثلا موضوع اطفال من اجل الحرية دة بكرة انا شايفها زيادة قوى و بين قوسين كدة شو اعلامى علشان العيال تلاقى فعالية تنزل فيها .... حتى المظاهرة نفسها انا نفسى مش عارف هدفها ايه هل هى الافراج عن منعم ؟؟؟ - اللى لسه ما اتقبضش عليه - و لا مظاهرة علشان ما يعملوش معاه حاجة ؟ و لا مظاهرة عن حرية تعبير و فكر و رأى كل دى حاجات تلخبط و الواحد مش بهيمة حد يقوله ينزل هاينزل و هوه مش عارف نازل و هدفه ايه اصلا

أعتقد موضوع الإخوان و النظام مركب و كبير ، و لن ينحسم في قعدة ، و هو مفتوح للنقاش .. اليوم و غدا .. و إلى ماشاء الله .. أعتقد الأهم .. و الأفعل .. الأن .. هو حملة حقيقية و قوية للإفراج عن منعم

لاحظوا .. القبض على منعم .. إختبار ماكر .. للمدونين .. هل سيتحركون من أجله مثل .. علاء سيف .. و مثل عبد الكريم ..؟؟

أم لأنه إخوان .. يبقى مستباح .. و حسبنا الله و نعم الوكيل ، و خلاص ؟؟؟

مع كامل احترامي لكل مناضل .. و توجهه الأيدولوجي .. و تضحياته في سبيل الله أو في سبيل مصر أو في سبيلهما معا أو حتى حبا في الشهرة و النجومية

و مع كامل احترامي للأراء المختلفة حول موقف الإخوان من انتخابات الشورى أو موقفهم السياسي العام أو من القربة المخرومة .. و من اللي خرموها قضية منعم و اعتقاله .. هي قضية مدون .. و تدوين .. بالدرجة الأولى .. و الرد : حملة دولية تضغط بضراوة و دأب

و غلاسة و تباتة .. للإفراج عن المدون : منعم ، اليوم قبل بكرة

يا مدونو العالم .. إتحدوا صحصحوا شوية .. الله يستركم

هذه معركتكم .. اليوم منعم ، و غدا أي مدون غيره .. ألا هل بلغت .. اللهم فاشهد

يا سيدى عاوز أعرفك معلومة مهمة جداً إن الإخوان ماهماش بعبع الواحد لو دخل فى وسطيهم وحب يسيبهم بعد كدة هايقتلوه ولا هايستخابوله فى الضلمة ولا يحطوله مسدس فى الشاى لإنه رفض ينفذ أوامر التنظيم

الإخوان أبسط من كده بكتيير

الإخوان دول فكرة ومن أول حاجة بتتعلمها لما تبقى فى وسطهم قول الله عز وجل (( وكلكم آتيه يوم القيامة فرداً)) يعنى بيقولولك كده على بلاطة ربنا يوم القيامة مش هاينادى يقول يا جماعة يا بتوع الإخوان تعالوا من الباب ده لأ كل واحد هايقف ويتحاسب قدام ربنا عن أعماله هو لوحده وإيه كان قصده منها ومش هايشفع له إنه عمل حاجة للتنظيم ولا الجماعة ومايعرفش دى حاجة حلوة ولا وحشة ثم إن سجلات مباحث أمن الدولة مدون فيها ( ما هما كمان مدونين اهم ) كل أسامى الناس اللى مشيت مع الإخوان واللى وصلت لمناصب وبعدين تركت الجماعة لسبب من الأسباب والناس عايشة بتعمل اللى هى عاوزاه لا الإخوان بيتعرضوا لهم ولا بيتكلموا حتى عليهم وأظن إن فيه أسماء كبيرة ورموز فى المجتمع كان ليها مكانتها بين الإخوان وألأسامى كتيير

وبعدين بتقول الإخوان اللى مش عارف وجهتهم طيب ما انت اللى بعيد عنهم يا أخى روح اسأل أصحابك ولا قرايبك واتحداك إنك هاتلاقى فيهم واحد من الإخوان

أحد مرشدى الإخوان زمان الأستاذ محمد حامد أبو النصر كان يتندر بقوله : لو راحوا المجلس الملى هيلاقوا فيه واحد من الإخوان معقولة لكن جايز ماحدش عارف

أنا عن نفسى شفت مسيحيين كتير من كتر اختلاطهم بالإخوان ودفاعهم عنهم ظنيت انهم انضموا للإخوان انتهى

لكن للاسف رجعت جامعة اسكندرية الف سنة وراء وبقي الشباب بتعها حكماء العصر احنا خايفيين علي الناس لا وبصدر ليهم مشاريع مهمة لتحركهم شنطة الخير وجمع الملابس الشغل اللي يتحرك فيه اي حد ومش محتاج من الاخوان او غيرهم انهم يقوموا بالدور ده

لو كل شباب الإخوان بيفكروا زي منعم كده...مكانش ده بقى حال مصر

حسبنا الله ونعم الوكيل :(

أساساً منعم نفسه يزعله الكلام اللى انت كاتبه ده

وما عبد المنعم إلا واحد من كام واحد أو فى قول آخر سطر (يمكن أقل) فى موسوعة إسمها الإخوان المسلمين مش تقليل له بس حجم حقيقى

وبعدين أخبار وتصريحات المخبر اليوم ديه حمضانة بس برضه مشاركة لا مغالبة

لأن لسه وقت المغالبة مجاش والإخوان مش عاوزين المغالبة تيجى بيهم هما لوحدهم من غير كل المصريين فما الإخوان إلا فئة وقلة كمان

أنا مقلتش مفيش في الأخوان غير منعم، بالعكس أنا معتبر المنطقي هو افتراض أن فيه زيه كثير. و طبعا مش واقفة على نفر.

و رغم أن المخبر اليوم آخر مكان الواحد يحصل منه على معلومات عن الجماعة القرار بالمشاركة الضعيفة التي لا تسمح بطرح مرشح رئاسة قرار حقيقي.

المغالبة دي تتقال لما يبقى الأطراف الأخرى اللي شايلين هم أننا نخوفهم أطراف ليها شرعية و يبى وقتها حاجة تحسب للأخوان أنهم أبوا أن يستعرضوا عضلاتهم و الخ، و ممكن يكون مفهوم ضرورتها في وجود وضع دولي متربص بأي مشاركة للاسلاميين في حكومة.

لكن لما يبقى اللي هيتخض من المغالبة هو النظام الفاسد المستبد اللي قاهرنا كلنا و قاهر الأخوان خصوصا.... يبقى معلش ده موقف متخاذل

لما يتاخد الموقف المهادن ده في وقت لأخوان بيواجهوا فيه قمع شديد كده يبقى معناه تسليم كوادر الأخوان للدولة تعمل فيهم اللي هي عاوزاه، لما يصرح أن الأخوان مش هتاخد رد فعل و هتحتسبها عند الله، و الأخوان مش هتصعد الصراع بل هتخفف من شدته، لما السايب يبين استعداده للخوف دي دعوة للدولة أنها تبطش بالمربوط.

و اقرأ تعليق منعم ثاني كأنه بيتكلم عن الاعتقالات دي مش عن مظاهرات أبريل 2003.

أما بقى كلام المغالبة متجيش بيهم لوحدهم هو أحنا بنتناقش في عمل عسكري؟ أحنا بنتكلم عن انتخابات لا يمكن المغالبة في الانتخابات من غير مشاركة الجماهير، بالعكس بقى لما ترفض تجرب تشارك بكامل قوتك في الانتخابات يبقى شكلها كده أنك مش عاوز تحقق مكاسب بمساعدة جماهير مهياش منتمية انتماء تام للجماعة، بالعكس يبقى شكلها أنك عاوز تتحرك لوحدك مش مع كل المصريين.

فى مشاركة لا مغالبة الإخوان مش عاوزين مشاركة الوطنى ولا مغالبته عاوزين مشاركة كل القوى الوطنية بما تعنيه الكلمة يعنى الوفد والتجمع والكرامة واليسار والناصريين والمستقلين والوسط والوطنى كمان وأى حد كمان انا نسيته

لأن الإخوان يرفضون الإنفراد بأى سلطة يعنى حتى لو بالانتخاب

وعلى حد تعبير ضياء رشوان الإخوان شايفين مصر قربة مخرومة ومش عاوزين يشيلوها

تقدروا تلومونا لما نقول مش هانشيلها لوحدنا حتى لو احنا قادرين نشيلها بس ممكن نقع وتقع هى بينا

المشكلة إن مفيش مشاركة من أى حد تانى علشان يشارك الإخوان غير الزفت الوطنى اللى مينفعش نغالبه وهو اللى معاه التزوير ومعاه ومعاه ومعاه .... وانت سيد العارفين

I wanted to post a comment on the blogs created after the arrest of many high ranks in the group saying “this is happening to the Ikhwan because of their passive attitude towards individual rights and freedoms, I wish that this ordeal makes them more aggressive in tackling these fundamental issues” but then I found it to be a thick-skinned thing to be said to people who are now having their basic rights and freedoms violated. However, I still think that their attitude toward basic rights and freedoms is incomprehensible and worrying. their efforts to protests illegal arrests, torture and indefinite detention or to develop a culture that detests and object to these violations are limited to say the least, especially when compared to their uproar when other symbolic issues are at stake. It seems that the leaders of the group have developed a masochistic character to survive Nasser prisons. This character, combined with the early Sufi nature of the group made them very docile towards the regime persecution of the group members, even when they are killed under torture. Moreover, this Sufi- masochistic character of the high ranking people gives the whole group the same character since the group has one brain; that of the people in the top of the hierarchy. Perhaps they even cheered torture since the pain of the beliver meant that his sins are forgiven. I remember a Hadith saying something of that sort.

Another more worrisome explanation that came to my mind is that the group does not believe in the sacredness of individual´s rights and freedoms!!!! it will be a disaster if the group considers the daily and systematic violation of the articles 3,5,8,9,10,12 of the universal declaration of human rights as a “ fair play” in the political arena, therefore they are disposed to endure it as an “ acceptable” part of the struggle. I say a disaster because if that is the group attitude toward violations of the rights and freedom of its own people then its opposition, in case it governs, should prepare their passports or their coffins. Another thing that supports this explanation is the dis-proportionalities between the small size and little means of the secular left and its efforts to defend ordinary victims of abuse; and between the efforts of the group in the same arena, and its huge size and capable means.

I would be grateful if any insider of the group blogs about these issues What is the group position regarding the rights to life, liberty, dignity and fair trial?¿? If the group believes they are sacred then why the violations of these rights does not seem to upset the group even if the victims are their Brothers?¿?¿?¿

there is an actual debate between ikhwani bloggers about their typical passivity towards repression. Monem was actually working hard against this attitude.

I wouldn't say this attitude is based on an ideological acceptance of torture, executive detention and military tribunals for civilans. I think the reasons are much more benign, but let's give the brothers a chance to reply to your questions instead of me making guesses.

مش عارفة ليه وانا باقرا التدوينة دي قعدت تزن في ودني أغنية:

ياللي سامعني قول يا نور عيني

انت بايعني وللا شاريني

انت بايعني

وللا شاريني

قول يا نور عيني قول يا نور عيني

واخدتني الجلالة وصوتي علي وقعدت اقول: قولوا لطيري اللي سارح...

اوعى تقول لي صوتك وحش

انا عارفة

عموما طيري اللي السارح

عارف ان منعم ما بين الجوارح

ما اعرفش بقى ناوي يعمل ايه؟

علشان نتكلم بصراحة وواقعية .. وحضرتي مش أكتر من واحد متابع للإخوان ولا عارف كواليسهم ولا دهاليزهم أصلا .

المشكلة بصراحة في الموقف الدولي .. لا في انهم مستنيين باقى المصريين يفوقوا ولا مايفوقوش .. لو الوضع الدولي ممن يكون متفهم ، كان ممكن يسعوا للسلطة بالمغالبة لا المشاركة .

مرة كنت باكلم واحد إخواني .. لقيته بيستنكر جدا على أخواني تاني شايف ان احنا لازم نتحرك اكتر من كده الراجل بيقول : ماينفعش الكلام ده هنستنى لغاية إمتى ؟

رد عليه : انت شايف نعمل ايه ؟

الأول : ندخل بكل قوتنا

التاني : يعني شايف ان احنا والبلد والعام كل دول مؤهلين لأن الإخوان يمسكوا الحكم ؟

الأول : أيوه

التاني : افرض انك مسكت الحكم .. طبعا عندك مشاكل ؟

الأول : طبعا .

التاني : افرض بقا اسرائيل استغلت الفرصة وراحت هدمت المسجد الأقصى .. هتعمل إيه يابطل ؟

الأول سكت وفكر وشاف ان الموضوع ده فعلا محتاج تفكير .

اختلفنا او اتفقنا حول الفكرة .. متقدرش تنكر انه تفكير منطقي .. وصول الاخوان في هذه اللحظة للسلطة وحدهم يعني غرقهم وحدهم في بحر ضخم من المشكلات الداخلية اللى هتتفجر كمشاكل أمنية واقتصادية ، والمشكلات الخارجية من عزل وحصار وعلاقات ، ومنها علاقات موروثة مع اسرائيل مثلا ، او علاقات وصلت حد الاختراق والتغلغل زى امريكا .

اظن بلا تردد أن المشكلة فى الوضع الدولي .. وحتى قولهم لن نسمح بالتوريث هي رسالة للخارج الذي يبحث الآن قطعا في خليفة مبارك ، وهل هو جمال أو غيره .. وكلنا عارفين ان القرار ده مابيتاخدش في مصر .

انا - ولو اني مابتعجبنيش تصريحات عاكف وأبو الفتوح بالذات - لكن ما اظنش ان ناس قضت عمرها في السجون والتعذيب نقدر نقول عليهم خايفين وبيحسسوا .. مع احترامي للجميع طبعا