You are here

معلش يا شباب، معلش يا أسد خيرها في غيرها

Primary tabs

معلش يا شباب مظاهرة السفارة الاسرائيلية فشلت.

أبدأ بقراءة وصف أسد لليوم

اعتذار واجب

أولا لازم نعترف أن التنظيم مكانش كويس، و ده مش خطأ صاحب المبادرة لأنه عمل اللي يقدر عليه، التقصير كان من الآخرين اللي عجبتهم الفكرة و معملوش حاجة (و أنا أولهم)، كان مفروض ناس تبذل مجهود في الاتصال بالحركات و الكيانات السياسية، كان مفروض ماس تبذل مجهود في الاتصال بالاعلام و كان مفروض ناس تبذل مجهود في نشر الدعوة بشكل أوسع من كده بكتير. الدعاية على المدونات فقط مش كفاية.

آسفين يا جماعة على التقصير.

الفكرة

الفكرة في رأية كانت صحيحة تماما، رغم خطورتها (و اللي نزل النهاردة و شاف منظر العساكر واقفة ببنادق و قوات خاصة مطرح فرق البلطجية اللي اتعودنا عليها يقدر مدى الخطورة).

أحنا في حالة تضييق اليومين دول و فيه حالة خوف كمان، مظاهرة مناهضة التعذيب اللي السنة اللي فاتت كنت في لاظوغلي و كبيرة السنة دي اتعملت قدام قسم السيدة زينب و حضرها أقل من 15 متظاهر، الناس مرعوبة فعلا.

لكن الصح في لحظة زي دي هو أنك تصعد، متسمحلهمش أنهم يخسرونا المساحة اللي كسبناها السنة اللي فاتت، و تكسر الخوف بأنك تواجهه، بأنك تنزل و أنت مستعد تتعذب و تتحبس و تنضرب و تنفعص لحد ما هما اللي يزهقوا (ده اذا حصل و زهقوا يعني).

الفكرة كانت صح، و المكان صح، لكن كانت محتاجة حشد أكبر.

في الآخر أي مظاهرة ممكن تفشل طالما أننا مش ألاف مؤلفة، يوم 1 مايو كان عدد مش بطال و عرفوا يحجمونا تماما.

على فكرة ناس كتير نزلت النهاردة بس مقدرتش تتجمع و ناس كتير كانت متابعة بالتليفون و مستعدة تنزل، بلاش حد يلوم التاني و يقوله أنت نزلت و أنت تخاذلت ملوش لازمة الكلام ده.

معلش يا أسد المرة الجاية تكون أفضل.

Comments

علاء.. طيب انت اكيد اكتر خبرة في الموضوع ده.. مني على الاقل.. باتكلم بجد.. عايزك تكتب روشتة للحاجات الاساسية اللي لازم تتوافر عندنا قبل ما نعمل مظاهرة تاني..

يعني اللي انا وصلت له من كلامك.. ان في حاجتين اساسيين

  1. لازم يكون العدد كبير.. آلاف مؤلفة
  2. لازم الدعاية تكون بشكل أكبر ومش على المدونات بس

في ايه تاني؟

ﻷ طبعا مش لازم نكون ألاف مؤلفة ، أغلب المظاهرات بتبقى بعض مئات و فيه مظاهرات ناجحة جدا لعشرات فقط.

لكن فيه اعتبارات ساعات بتخلي العدد مهم جدا، يعني لو أنت هتتظاهر في مكان أصلا زحمة و عامل حسابك تتفاعل مع الناس و تتكلم معاهم يبقى مش مهم العدد، لكن لو هتتظاهر في مكان واسع عدد الناس فيه مش كبير و في وسط جحافل أمنية يبقى العدد هو الحاجة الوحيدة اللي هتفرض على الأمن نجاح المظاهرة.

عموما موضوع روشتة ده مينفعش يبقى جهد فردي لأن من الآخر كلنا حمير و جداد على الموضوع ده، ممكن مثلا يتعمل ويكي نجمع فيها أفكار و خبرات بشكل منظم.

موضوع استنوها جوه الجنينة ده اوحالى بفكرة ليه متكونش المظاهرة الجاية جوه جنينة الحيوانات بجد، المكان بيكيون كده كده زحمه اصلاً وكمان صعب عربيات الأمن المركزى تخش جوه والتذكرة كلها بربع جنيه يعنى اى حد ممكن يخش.

ايه يا عم، مش كفاية الذل اللي الحيوانات دي فيه (دب قطبي في مصر يا بشر) كمان هتخنقهم بزحمة و دوشة و عنف و غازات مسيلة للدموع و زفت؟

و بعدين دخول الجنينة مش زي خروجها، ممكن يسيبوك تدخل تتظاهر و بعدين يلموا براحتهم من على الأبواب.

وده كان رأى الحمار برضو لمؤخذة---- معلش يا علاء جت فيك---- كفارة

حلوة اوى حكاية المظاهرة اللى جوا جنينة الحيوانات دى .. وماله .. و التجمع يكون قدام جبلاية القرود !.. يلا و مش بعيد كمان الحيوانات تشترك فى المظاهرة و نلاقى بأه الاسد و الفيل و الزرافه رافعين شعار كفاية .. و القرودتشترك فى التظاهرة و يعملولهم هما كمان حركة ( قرود من اجل التغيير ) .. و لا الحمير هى كمان تعملها مظاهرة و يعملوا اعتصام قدام جمعية الرفق بالحيوان ضد التعذيب الذى يقوم به العربجية .. احتجاجا على ظلم الانسان لاخية الحيوان ..

وتخش بأه الايدولوجيات فى عالم الحيوانات ..و نلاقى قرد شيوعى ( يا قرود العالم اتحدوا ) ونلاقى جحش ليبرالى ..و تور اشتراكى و فيل علمانى الخ الخ

و الحركة تمتد لتشمل الخرفان و الفراخ و القطط و الكلاب .. الخرفان مش عاوزه تندبح فى العيد ( خرفان ملحده ) .. و الفراخ بتطالب بتعويضات بسبب ازمة انفلونزا الطيور .. و القطط و الكلاب تتحد من اجل مصر و يعملوا وحده وطنية حيوانية يرفعوا شعار ( يحيا الهاو مع الناو )

و طبعا هتظهر حيوانات ( موالسه ) تبع الحكومة تهاجم المعارضة الحيوانية و يبعتولهم بلطجية من الخنازير و الكلاب الضالة علشان تأدبهم

و نصحى الصبح نجيب الجرايد نلاقى مانشيتات كبيرة بعنوان : القبض على 9 قرود و فرختين .. و تحويل 29 عنصرمن عناصر التنظيم الى نيابة امن الدولة - قسم حيوانات

وتطالب بأه جمعيات حماية الحيوان و نشطاء من كافة الاتجاهات الحيوانية بالافراج عن كافة المعتقلين و يعملوا وقفة احتجاجية على سلم الجنينة !

يا سلاااام .. يا ترى ممكن الحيوانات فعلا يعملوها فى يوم من الايام ؟!

و صدق اللى قال : المجانين فى نعيم

سلامو عليكو

بصراحه تعليق ساخر ومعبر رغم أن البعض ممكن يفكروك بتتريق لكن أنا عارف أن دى سخريه لاذعه عملا زي أفكار أحمد رجب والمسرح العبثى والقصص الرمزيه دي كمان تتصنف هزليه وممكن تتعمل فيلم تسجيلي ولا حتى كرتون خاصة الاشاره القويه لحزب ( يحيا الهاو مع الناو ) بتاع الوحده الوطنيه

وكمان الاشاره لموضوع التصنيفات اللى بقت موضه (أشتراكي وليبرالي وملحد ولاديني وموالس وعلمانى )ولا ألاحزاب الحيوانيه بتاعتك وكمان البلطجيه خنازير وكلاب ضاله يعنى كده ضمنا تحبسنا معاك بس تعليق جامد انت مكانك معايا في المدونه بتاعتى بعد اذن علاء عمدة المدونين لانى مش بحب كلمة شيخ المدونين والله ضحكتني رغم حالة الحزن على كريم والشرقاوى ودي بقا مدونتى

http://karakeb.blogsome.com/

حصل خير يا علاء , أنا زعلان لأن كان نفسي ننجح ونعمل حاجة , كمان لأن الموضوع في الأول وفي الآخر فكرتي .

كلامك فعلاً ريحني إلى حد ما وخلصني من نوع من الشعور بالذنب مع إني مكانش ممكن أعمل أي حاجة أكتر من اللي حاولت أعمله .

اللي شفته النهاردة من حيث الأمن كان حاجة مفتكرش إني شفتها في أي مظاهرة تانية , كانت فيه محاولة واحدة بس من شخص واحد للوصول للتمثال , يا ريت محدش يتكلم عن اللي كان مفروض يتعمل إلا إذا كان شاف اللي حصل في المحاولة دي .

الموضوع كان محكوم عليه بالفشل عسكرياً , وخيرها في غيرها إن شاء الله .

حصل خير.. بالرغم من ان المرور ما وقفش.. لكنكان في حوالي 6 عربيات امن حوالين المكان.. غير الناس اللي علي الارض

ده نفس الرد اللي كتبته عند أسد

السلام عليكم اولا يا أسد أنا اللي كنت بعلق في البوست اللي فات باسم “واحد” ومرضتش اكتب باسمي غير في الاخر خالص لحد ما اعرف اخرة الموضوع ايه

بالنسبة لي انا وصلت هناك 3 بالضبط لأني ساكن بعيد عن المكان وعلى ما خلصت الجمعة وجيت وصلت 3 بالطبط

في زميلة ليا اول مرة تشارك في مظاهرة وكانت جاية متحمسة جدا وصلت على 3 إلا تلت، وقفت عند بوابة حديقة الحيوان ومشافتش حد عند التمثال، بس في ضابط في لبس مدني جه قالها انتي واقفة هنا ليه؟؟ قالت له مستنية واحدة صاحبتي عشان هندخل الجنينة، قالها استنيها جوة، بس هي فضلت واقفة

انا لما وصلت 3 قابلت زميلتي دي وكان معاها الدكتورة ليلى سويف والدة علاء وصديقة لها

انا سألتها فين الناس؟!!! قالت لي محدش ظهر خالص، قلت لها فين علاء؟؟!!! قالت لي مستني مني تليفون عشان يجي لو في حاجة

المهم فضلنا مستنيين لحد 3 وتلت، ومكانش في غيرنا احنا الاربعة وكنا واقفين عند بوابة حديقة الحيوان، في الاخر صديقة الدكتورة ليلى قالت لنا خلاص امشوا الموضوع شكله مفييش والوقفة على الفاضي متستاهلش

فقمنا مشينا بالراحة انا وزميلتي وكان في اتنين اغبياء من الأمن لابسين مدني وماشيين ورانا، بس احنا فضلنا ماشيين لحد جامعة القاهرة وركبنا من هناك هي روحت، وانا روحت مكتبة مبارك :D

اهو الواحد يبقى عمل حاجة مفيدة في المشوار ده :)

على فكرة انا لما وصلت نزلت قدام التمثال بالظبطـ يعني خليت التاكسي ينزلني عند التمثال بالظبط على اساس اني هنزل والاقي الناس واقفة فاقدر ادخل اشارك على طول، بس ملقتش حد والامن كان كتير بغباااااااااااااااء

يلا حصل خير

وبالمناسبة بقى…النهاردة عيد ميلادي العشرين :D

كانت فسحة لذيذة في عز الضهر، أعتقد انه احتفال لن ينسى

وأخيرا

تسفط كفاية والاخوان وسلم لي على مؤتمرات جامع الأزهر ومحمد حبيب (بتاع الاخوان مش المدون) والناس الكلمنجية

يا باشا محرز انا كنت واقف جنبك و مصورك انت و الظابط و مدام ليلى

لما جريت عليك علشان تلحقك

ما انا قلت مدام مفيش مظاهرة بقة اعمل عبيط علشان اصور

و فى الاخر بعد ما انت مشيت سلمت على مدام ليلى و مدام منى و قالولنا امشوا ما فاضيلش غيرنا و احنا كمان ماشيين

شويه كدة و هاحطلك اللينك و من الصور هاتعرف انا مين من الىل كانوا واقفين

انت تمام انك مسكت فى الظابط

و انا كمان تمام انى فوزت بالصور و قرطستهم

بسيطة و لا تزعل

الرك بقة الىل كانوا قاعدين فى بيوتهم فى التكييف و متكييفين على الاخر

صباحك زى وشك يا مصر

تخــا تخـــا تخـــاريفى

http://t5at5a.blogspot.com

اوك يا حاج جيمي في انتظار الصور بس انا ممسكتش في اي ظابط!!!!!!!! :D

اه وا http://morapet.blogspot.com لله اول مره اعملها

بص بص يا علاء انت و اسد

الصراحة ما شوفتش فيكى يا مصر دكر الا مدام ليلى والدة علاء

انا كنت هناك وواقف جنبها بس كنت مش فاضى الا للتصوير

اتقلوا بقة كدة لما اظبط نفسى و اكتب التدوينة و انشر الصور

علشان كل واحد ياخد حقه على رواقه

علشان انا طفحت الدم يوم كامل فى الشمس

علشان تنظيم فاشل و مبادرة افشل

يا حاج جيمي زي ما قلت لك عند اسد انت بتقول شوفت دكتورة ليلى ودكتورة منى مشوفتش العبد لله واقف معاهم وكان في بنت كمان معانا يعني كنا اربعة

بما انك بتقول كنت شايف كل حاجة وشايف كل الناس!!!!

خلاصة الموضوع ده عشان منقعدش نرغي ونهاتي في كلام ع الفاضي الموضوع تم على استعجال ولم يتم التنظيم له بشكل كافي او على الأقل تنظيم على قدر الحدث وحساسية المكان وكان في فشل في ايجاد حشود

جورج اسحق نفسه قال نحن لا نتبنى الفكرة ومش رافضينها، واللي عاوز يروح مع نفسه يروح

يبقى طبيعي الموضوع يفشل

بس أظن اننا محتاجين في الفترة اللي جاية أي فعالية في أي مكان أقل حساسية..

بحيث انه يبقى في مظاهرات على الأقل بتتعمل من حيث المبدأ حاليا..عشان يكون استمرار التصعيد بعدها ممكن..

في البداية انا واحد من اللي راحو يوم الجمعة ..طبعا مرواحي لهناك مش بالساهل لاني بسافر من محافظة تانية بتبعد عن القاهرة ساعتين على الاقل ..

المهم نزلت قدام جنينة الحيوانات الساعة 2.30وطبعا فضلت مستني لغاية ما واحد من الامن قالي انت واقف ليه قلتله مستني خطيبتي..! قالي استناها جوه ..!

المهم قطعت تذكرة بربع جنيه لجنينة الحيوانات ودخلت وفضلت اراقب الموقف من خلال سور الجنينة وعيني على التمثال مكان المظاهرة شوية وشوفت د.ليلى ود. منى ومعاهم شاب وفتاة واول ما ظهروا تكهرب الجو لدرجة ان الظابط زعق في اللاسلكي وقال .. الو .. عمليات.. العناصر الاثارية ظهرت ..!

لما طلعت من الجنينة لقيتهم عملوا دايرة حوالين د. ليلى ود. منى ففضلت واقف حوالهمن بمسافة 100 متر ..شوية وقابلت محمد عوف و احمد عبد الغفار وقفنا شوية وبعدين لقينا الامن بيبص ناحيتنا فمشينا لغاية النصب التذكاري بتاع جامعة القاهرة

عملنا اتصالات بالناس من هناك وركبنا تاكسي ورجعنا على مكان المظاهرة لقينا د. ليلي راجعة لوحدها .. فطلع احمد عبد الغفار عشان ينادي عليها فلقى مدير مباحث امن الدولة -فرع جابر بن حيان في وشه وكمان لقى وفد زائر من لاظوغلي فلف ورجع تاني ودخل في التاكسي ..!

واحنا في التاكسي رايحين ع التحرير -بعد فشل المظاهرة-قعدنا نعد عربيات الامن المركزي فوجدناها لا تقل عن 15 باي حال من الاحوال يعني عربية امن مركزي لكل متظاهر جه النهارده -بفرض اننا كملنا ال 15 يعني-

للحديث بقية

لا حول ولا قوة الا بالله بقالي حوالي 10 ايام مدخلتش على النت علشان اتابع ولما دخلت دلوقتي وشفت البوست دا جالي احباااااااط

ربنا معاكم يارب

مش عارف اقول ايه تانى ربنا يكتبلنا النجاح جميعاً

طيب ..وعلطول كده في دعوه تانيه بمظاهره يوم السبت الموافق15/7/2006امام نقابة الصحفيين الساعه سته مساءا ...مدعو ليها كل القوي السياسه المطالبه بالافراج عن المعتقلين ..وطبعا اولهم كريم والشرقاوي

الحقيقه فيه بعض الناس اللي اقترحو اني الحكايه لازم تكون مجموعه من الانشطه اللي وره بعضهاللضغط للمطالبه بالافراج ... زي مثلا امسيه شعريه امام مكتبة مدبولي ووقفات احتجاجيه علشان كريم والشرقاوي في اماكن متفرقه

لكن ناس تانيه ردت عليهم وقالت اني بما ان الشارع اليويمن دول مش لينا بعد ماسرقته منا شرطه مبارك ..خلينا نبدأ بشيء مضمون انه هيحصل .. وممكن جدا المظاهره اللي قدام النقابه تتحول لمسيره تغزو شوارع وسط البلد وترجعلًنا الشارع تاني والاعلان تم بالفعل علي بعض المدونات ... والتمرير يتم علي جميع المجموعات البريديه ....ورسايل الموبايل ...وبالتنسيق الواقعي مع اي حد عايز اليوم ده ينجح ..علشان كريم والشرقاوي ومصر

..يلا بأه حيلك معانا ياشيخ حارة المدونين علشان يوم السبت

البلوجز هو بلوجز موش حزب ولا حركة سياسية زي كفاية . من الخطر ومن الخطأ الانجرار الى تحويل المدونات الى بدائل للاحزاب حتى لو كانت ضعيفة ومنهارة او حركات سياسية معارضة للحكومة. الوظيفة المهمة اللي شفتها في الاول للبلوجزات كانت " تسجيل وتصوير " ما لم تستطع الميديا المصرية عمله في الوقفات وفي المظاهرات . ونشر حالات الانتاكات والتعذيب. نجحت في ده بسبب فشل الميديا الثانية لاسباب موش مهم هنا ذكرها لكن اهمها لتها محكومة بقوانين الدولةواللي بيشتغلوا فيها وراهم عائلات ومصالح. موش بقول ان المدونين ما وراهمش عائلات ومصالح لكن الصحفيين اللي بيرحوا شغلهم ..ده اكل عيشهم وموش عاوزين يخسروه. لكن البلوجز هو برا القانون وفوقه .ما حدش يقدر يحكمه وده كان سبب غضب الحكومة على اصحاب المدونات. اما الانجرار وراء احلام قيادية وبطولية فخطر وخطا. الخطر هو الدخول في لعبة يسيطر عليها الامن بأن يسحبوا الشباب للشارع ويرجعوا يقبضوا عليهم وتتقفل البلوجزات. الخطر هو تحويل مهمة البلوجز من اداة تعبير للجميع الى خناقات سياسية . لان الحزب مؤسسة طبقية بتعبر عن مصالح طبقة ضد لخرى. حركة الاخوان المسلمين بيجمعها مبدأ وفكرة وتسلسل ثيادي هرمي . حركة كفاية هي خليط من جماعات متنوعة لكن قدرت تعمل مؤتمرها وتحدد مسؤلياتها واولوياتها وعينت منسق ومتحدث باسمها. هذا كله بعيد عن المدونات. ياشباب ما تنجروش وراء احلام خطرة .انتوا دوركم مختلف ومهم . يعني ما تضيعوش طاقاتكم في مناقشة ليه مظاهرة ما نجحتش.او تعالوا نقف وقفة احتجاج مع الصحفيين. مجرد وجودكم هو وقفة احتجاج مستمرة . حافظوا على الشبر اللي واقفين عليه.

ادى صور اللى حصل فى المظاهرة دى

http://t5at5a.blogspot.com/2006/07/blog-post_10.html

طبعا صورتها بأعجوبة و عن طريق الموبيل و البشوات كانوا هايفسسحونى و ربنا ستر

المهم الصور اهيه و ما تزعلش منى يا اسد تانى مرة بقولهالك اهو علشان ما تزعلش

و يا ريت يا علاء تحط الصور فى الموضوع علشان الناس تعرف ايه اللى حصل بالضبط

و يالا حصل خير

http://t5at5a.blogspot.com/2006/07/blog-post_10.html

صباحك زى وشك يا مصر

تخــا تخـــا تخـــاريفى

http://t5at5a.blogspot.com