You are here

من بلاد تركب الجنو

Primary tabs

تأخير ساعتين في مطار الخرطوم، تأخير ستة ساعات في مطار نيروبي، يوم الأحد محدش شغال في المطار و محدش بيرد على الايميل، بيات ليلة اضافية في جوهانسبرج، تأخير أربع ساعات في مطار جوهانسبرج، تأخير ساعتين في مطار بورت اليزابيث، عادي أنت في أفريقيا.

يومين من غير نوم أو أكل، لكن ساعة واحدة في بالعربية من بورت اليزابيث لجراهامس تاون كافية لأني أنسي كل الملل و التعب.

تخيل معايا تلات عالية فيها أحراش و صبار و أشجار من عصور ما قبل التاريخ بتزهر ورد ملون أصغر وردة قد رأسي. تحت التلال العالية تلال ثانية كلها عشب أخضر مطعم بمساحات من الورد البري الأصفر و البنفسجي. و التلال دي مراعي خيول مفتوحة، تخيل عشرات ان مكانش مئات الخيول بتجري وسط العشب و الورد بحرية. عادي أنت في أفريقيا.

و فجآة تكتشف أن التلال دي مش تلال بجد دي جزء من سلسلة جبال عالية جدا و أن الشبورة اللي أنت ماشي وسطها مش شبورة ده سحاب (و ده يفسر المطر اللي بيرخ من تحت لفوق). و فجآة الجبل ينشق و الطريق ينزل بسرعة و بحدة و على يمينك حجر عريان كل ناحية ناعمة و فيها عشب و شجر و أحراش لكن الناحية اللي طالع منها الطريق صخور حمراء جرداء عاملة زي عمارات القاهرة لما يدهنوا الناحية اللي في وش الشارع الرئيسي بس و يسيبوا الباقي طوب أحمر عريان. عادي أنت في أفريقيا.

و توصل المدينة الكولونالية الصغيرة في العربية البي أم المتأجرة المكيفة و تلاقي قدامك عربية نصف نقل مهكعة شايلة عاملات نضافة متكلفتين في هدومهم و في بعض من البرد. عادي أنت في أفريقيا.

في العشاء اللي عازمنا عليه الممولين الراجل بتاع بنك أبسا و باركليز (اللي أجر عربية بدل ما يستني معايا في مطار بورت اليزابيث و مجاش في باله يعزم علي بتوصيله) بيلقي خطبية و كل مرة يجي يقول مستقبل أفريقيا يغلط و يقول مستقبل أبسا و مع ذلك الناس بتسقفله. عادي أنت في أفريقيا.

لكن دي مش أي حتة في أفريقيا دي جنوب أفريقا، جنوب أفريقيا حيث المطار مكتوب على بابه "ENTER AT YOUR OWN RISK"، جنوب أفريقيا حيث النبيذ أحلى ما يمكن و البنات أحلى مما يمكن، جنوب أفريقيا حيث كل حاجة غااااالية ماعدا Mad Magazine، جنوب أفريقيا حيث المتوقع بل و الطبيعي منك أنك تكون شعاع له طول موجي متفرد مفيش زيه في وسط قوس قزح من كل الألوان الممكنة.

Comments

دى حاجة كويسة جدا

بعيدا عن الموواضيع اللى تفرس وملكة النقد اللى بتركب الجميع على النت ومنهم انا فاقترح عليك حاجة لطيفة و مفيدة برضه :

ما بما انك كثير السفريات - على ما اعتقد - و زرت دول كتير فممكن تعمل قسم فى الموقع وتكتب فيه انطباعاتك عن الدول اللى زورتها - زى مثلا الموضوع ده - و رؤيتك للشعوب الدول دى من خلال تعاملاتك معاهم و الصداقات اللى كونتها هناك والفروق ما بين كل دلوة و التانية و كل شعب والتانى و هكذا .. يعنى رؤيتك و اللى طلعت منه من وجودك فى بلد غير بلدك و افكار غير اللى منتشر هنا يعنى مش مجرد مواقف بتتحكى و بس

اعتقد ان دى حاجة هتبقى مفيدة جدا و مهمه اوى لينا كمصريين ، لاننا غالبا بناخد صور نمطية للاجانب و لدول معينه غالبا بتكون عكس الحقيقة ، زى ما هم احيانا بياخدوا الصور النطية عننا ( شخصيةالعربى اللى لسه بيركب الجمل و عايش الحياة البدوية حتى و لو فى المدينة ! ) ..

وتبقى حاجة كده زى ادب الرحلات

المشكلة أني أولا مش شاطر بما فيه الكفاية عشان أكتب حاجة مشابهة لأدب الرحلات و ثانيا أني غالبا مش بقضي وقت كافي في البلاد دي عشان أعرف عنها حاجات عميقة.

قارن اللي أنا كتبته ده مثلا بكتابات أفريقانو عن كينيا. واضح تماما مش بس فرق الموهبة لكن كمان فرق خبرته بالمكان نظرا لطول المدة اللي قضاها.

lol @ "enter at your own risk"

wi mafesh swar ya za3eem?

لا مؤاخذة في السؤال، إيه اللي وداك البلاد البعيدة وواضح من الصور اللي انت ناشرها إنك زرت جنوب أفريقيا قبل كده. إيه الحكاية إنت متجوز واحدة تانية هناك؟

أنا حاليا مشارك في المؤتمر ده و بعدين هتكلم في الورشة دي، بس طبعا ده كله غطاء و السبب الحقيقي هو اجتماع مع أسيادي من قيادات المؤامرة الماسونية العالمية.

عل يمكن اعتبار هذه الزيارة مؤشر على احتمالية وجود تعاون بين حركة 30 فبراير و التنظيم الماسونى في المنطثة 248 شرق اوسط؟؟

معلش يا بيسو احنا في المنطقة 2450 مش 248 ولو مش مصدقني اسأل حد من الأعضاء أو اسأل المحافظ

يعنى إية الجنو؟؟ الجنون! الجنوب! ؟؟

هو غالبا اسمه نو مش جنو

http://en.wikipedia.org/wiki/Gnu

لأ مش نو هو جنو أو جانو

أيوه ده بتاع البرمجيات الحرة لكن أظن الحيوان أسمه نو

هوا فية حيوان تانى غير اللى فى بالنا؟ هوا صحيح بلدنا اتملت حيوانات لكن العائلة الحيوانية التى تحكمها هى الاخرى تسير فى ركاب الحمار الوحشى بتاع امريكا وبالمناسبة محاولات التشبة بالحمار وعنادة واضحة

ايوة يا جدعان اسمه نو دي حاجة معروفة جدا محدش بتفرج على أنيمال بلانيت و لا ناشونال جيوجرافيك؟!

ده حيوان بيهاجر باعداد كبيرة مع الحمير الوحشية هجرة موسمية

عموما قول سبحان الله يا علاء على اللي بتشوفه

المفروض دي حاجات تخليك تفكر في ربنا و ابداعه في الكون و تؤمن بيه خصوصا إن نظرية التطور أثبتت كذبها و فشلها و بطلانها من الناحية العلمية و المنطقية.

Very nice post, write more often.

اية دة دا انا بقيت خطر علي الامن العام انت بتمسح التعليقات بتاعتي باعتباري ارهابي مش كدة؟؟؟؟؟؟؟؟

مكنتش اعرف ان كلامي بيوجعك اوي كدة مع اني بجد مقصدش اوجعك لكن طالما انت حاسس اني وجعتك يبقي انا سعيد انك انوجعت وعشان اوجعك واوجعك اكتر برضة هبعت تعليقات وبرضة انتي تتوجع وتمسحها وانا ارجع اوجعك تاني لحد ما الوجعية تكبر وعموما

انا سعيد بيك جداااا علي اساس انك كتكوت مش ديمقراطي

احااااااااااااااااااااااااا يا عم الموجوع وسلملي علي الرقابةومصادرة الراي

بص يا علاء عشان مش تخلق مني بطل اسطوري ع الاقل بيني وبين نفسي وتديني اهمية اكبر من شخصي المتواضع انشر تعليقاتي عشان مصيحلكش واوجعك ماشي يا مان وعلي فكرة هفضل برضة اوجعك يعني مش هسكت بكرهك يا علاء حتي اخر العمر

يا ماما خوفتني