You are here

مظاهرة عيد العمال 2006

Primary tabs

من قبل مانروح و التليفونات شغالة..عربيات أمن كتير و فرق كاراتيه ملية وسط البلد!!

المظاهرة كانت المفروض قصاد عمر أفندي طلعت حرب..أول متخش شارع طلعت حرب من ميدان التحرير. رايحيين أنا و علاء و طنط ليلى مع عمو سيف في العربية، هينزلنا و يطلع على المركز علشان لو حصل أي حاجة يبقى في محاميين يتحركولنا. ميدان التحرير ناحية طلعت حرب حوالي دستة عربيات أمن مركزي. مفيش حد واقف قصاد عمر افندي غير شوية لوائات و كوردون من العساكر. نكمل في شارع طلعت حرب و نبتدي نلمح وشوش من المتظاهرين تلاتات و اربعات متنتورين بطول الشارع و مجموعة قصاد مدخل العمارة اللي فيها الحزب الناصري. ننزل قبل كافيه ريش بشوية و نبتدي نتجمع مع الناس و نعدي للمجموعة اللي واقفة تحت الحزب.

تليفونات بتيجي و الناس بتفكر تنقل على ميدان مصطفى كامل..قال يعني هيسيبونا نروح هناك لو طلبت معانا..

نقرر أننا نتحرك ناحية عمر أفندي علشان ده مكان المظاهرة المعلن عنه و لو حد جيه متأخر وللا لوحده يقدر يضم علينا..و هوب يا معلم في خمس دقايق نلاقي كوردون من فرق الكارتيه محاوطنا..أو بمعنى أصح محاوط الأغلبية، أنا كنت بره الكوردون و عرفت أخشلهم بصعوبة..و في ثواني قليلة الكوردون بقة خمس طبقات و الدعك ابتدى...عودة ظباط من أجل التفعيص!!

دخلوا البنات و الستات جوه المدخل و فضل الأمن يضيق علينا لغاية لما كلنا بقينا جوه مدخل العمارة محاصرين.

قضينا حوالي ساعة ونص في نفس المكان..شوية هتافات..شوية شد و جذب مع الأمن..شوية أغاني..شوية مفاوضات على هننهي المظاهرة إزاي..شوية ناس يطلعوا يهتفوا من بلكونة الحزب..و هكذا دواليك

إرسال الموبيلات كان ضعيف جدا جدا و بالتأكيد في ناس كتير قلقت علينا..لكن اطمنوا مفيش حاجة، و على حسب علمي الأمن ما مسكش أي حد النهارده..مع أن كان في على الأقل مجموعتين كمان زيينا، بس اتعاملوا نفس المعاملة..كردن و ازنق و بعدين طلعهم فرادي أو مجموعات مش أكتر من خمسة. الأمن ماكنش سايب الإعلام يقرب مننا مع أني لمحت أكتر من حد قبل ما محاولة المظاهرة تبتدي.

كان يوم كئيب آوي..مالك، شرقاوي، وائل، بهاء اطلعوا بقه..المظاهرة ماكنتش مظاهرة من غيركوا..يارب تكونوا كويسين.

و على رأي عبير..ادي اديها كمان حرية و ابعت هات لنا ميت عربية، أصل احنا قادرين على العربيتين اللي قصادنا..و قال ايه الشارع لنا!!!

Comments

This is Shehab Fakhry. I hope you guys are doing well. I was reading the news when I found the photo of the demonstration with Alaa and Jano and I read about the government thugs following demonstrators even afterwords. I wish I was there.

احنا كويسين يا شهاب و ماجرلناش حاجة لحد دلوقتي، بس فيه ناس كتير آوي اعتقلوا في الأسبوع اللي فات

أنشالله تكون بخير و ياريت نشوفك قريب

يارب يامنال أنت وعلاء تكونوا بخير -- الكلاب ولاد الكلاب "الصعرانه" لن يتركوكم في حالكم -- لازم الحذر شوية الايام دي -- رغم انني مؤمن ان --من أجل الوطن كل شئء يهون -- والله انا فرحان -- رجعتوني لأيام شبابي في مدرج الصاوي - كلية الهندسه - جامعة القاهره واحمد فؤاد نجم والشيخ امام عيسي يغني --- مصر يامه يابهيه ---- يأم طرحه وجلابيه.... الزمن شاب وانتي شابه --- هو رايح وانت جايه-------- ورجعوا التلامذه ياعم حمزه --- الامن هو هو والضرب يمكن علي أيامي كان زياده شويتين -- انا اعتقلت في مظاهرات مارس 1968 وهي المظاهرات المعروفة بمظاهرات " محاكمة الطيران " بعد وكسة 67 واعتقلت مع احمد فؤاد نجم وعبد الرحمن الابنودي عام 1971 وعام 1977 وبعدين يابنتي اتهد حيلي من الضرب علي القفا -- علي ايامنا كان الضرب جامد قوي -- لا كان فيه حقوق انسان ولا جرايد معارضة ولا احزاب ولا انترنت يفضح الكلاب ولاد الكلاب --- بس والله رغم ذلك الامر ما كانش بالسوء والتردي بتاع اليومين دول

حسني مبارك "اسود حاكم لمصر منذ محمد علي باشا -- بل اسوء رجل عرفته علي مدار حياتي -- ممكن تقولي عليه بلغتكم "" زبالة الزباله""

ياباشمهندس...باعتبارنا زمايل كلية واحدة (هندسة القاهرة) ولو ان حضرتك طبعا أقدم بكتير فأحب بس أصحح لك ان اسمه مدرج "الساوى" بالسين وليس بالصاد وربنا يديك الصحة

معلش يابني -- ما أنا قلت لكم الواحد " اتهري " وتعب والعيب في النظارة" وليس في لغتي العربية والله -- وكتر خيري يابني علي كده --- ربنا ياأبني يوفقك واشوفك " مهندس " كبير في وطن " كبير " من غير لا "قلعة" ولا زنازين"

يا جماعة فين تم الاعلان عن المظاهرة دي ما فيش الية ممكن الواحد يعرف بيها مواعيد المظاهرات دي عشان نيجي؟ بجد انا بضايق جدا

هي فعلا الدعاية ليها كانت متأخرة آوي آوي، احنا أول ما جالنا الخبر نشرناه

شكرا يا منال على اهتمامك
يا جماعة اللي عنده صندوق بريد علي جوجل (GMail يعني) ممكن يضيف مواعيد الاعتصامات و المظاهرات علي Google Calendar فيجليه تنبيه قبلها بعدد من الايام ممكن انتت تحدده
http://www.google.com/calendar
عنوان جدول المواعيد
webcal://www.manalaa.net/event/ical
و الطريقة موجوده هنا
http://www.google.com/support/calendar/bin/answer.py?answer=37100

و اللي عايز يضيف أي حدث أو فعالية للأجندة يزور Events->Add Events

النيل طفح بالأنين روحه والموج ساير وداير يشكي للناس جروحه والدم سال على الشطآن برزت ضلوعه صرخ النيل ودموعه في ميته والدمع طافح من جعبته والناس بتشرب وتهرب زي الكلاب من الصياد اعور وفي العين سحابة يمشي كالدابة جوة رحم كلبته

قصيدة كتبها واحد صايع وملوش اهل اسمه كامل حلمي

ملحوظة: الصورة دي من عندنا في رويترز وخدها واد صحفي ومصور جدع جدا اسمه توماس بيري..

اشكرلنا توماس بقى، دأنا مكنتش فاكر أن العجن جامد للدرجة أصل الواحد مبيبقاش مركز و هو في المعمعة.

للتوضيح فقط الشكر ليكوا انتوا مش بحب الكليشهات بس فعلا مش لاقية حاجة تانية اقولها غير ان مصر بخير طول ما فيها ناس زيكوا ربنا يحفظكم ويحميكم من انياب مصاصي الدماء والارواح

Sea is my Blanket, Ocean is my Core

منال ..ولاد الذين وحشوني جدا

heey manal how r ya ? and how is alaa .. miss ya so much .. did u see what happend to me 2day ... check http://x-ist.blogspot.com

.::I'LL iNJECT tHEM wITHA pOISON::.

مش هقول غير ربنا يهديكو ويشفيكو

طلعتو بايه من كل ده غير البهدلة وحرقة الدم

مش هتكلم كتير لانكم اكيد متعصبين اوي للي انتو فيه

ربنا يهديكو وتعملو حاجة مفيدة غير الزعيق

مش هدخل في جدل عقيم عن فائدة التظاهر لأن دي في الغالب بتكون خلاف مرجعية لكن خلينا نشوف منطق كلامك

أنا و منال بنقضي من 16 الي 18 ساعة من اليوم صاحيين، المظاهرة بمواصلاتها استهلكت 3 ساعات، يعني اتبقى لكل واحد فينا 15 ساعة، منال قضت ساعة كمان بالكتير قوي بتكتب التدوينة دي، يعني هي اتبقالها 14 ساعة و أنا 15 ساعة، اطرحي منهم كام ساعة للأمور البيولوجية اللي من نوع الأكل و الشرب و الطرطرة و الشخاخ و الحموم.

اشعرفك بقى عملنا ايه في باقي اليوم؟ مش يمكن عملنا حاجة مفيدة؟ ده غير أننا مش كل يوم في مظاهرة ولا حتى أغلب الأيام في مظاهرة.

زي غالبية البني أدمين عندنا شغل بناكل منه عيش وبنتصور (أو بنأمل) أنه يكون مفيد للآخرين، و زي بني أدمين كتير بنقوم بعمل تطوعي برضه شايفين أنه مفيد، سيادتك تعرفي كل اللي بنعمله و لسه شايفاه غير مفيد؟

ده غير الحاجات المفيدة على مستوى شخصي زي صحبة الأهل و الأصدقاء و اللعب و الكتب و الأفلام و الموسيقى و قرائة المدونات و الأخبار و شغل البيت و الكبيخ و الأكل و الفسح و السفر. برضه تعرفي تفاصيل كل ده و لسه شايفاه غير مفيد؟

هاخدك على قد عقلك و افترض أن أي تحرك مع جماعات المعارضة غير مفيد و أي كتابة عنه أو مناقشة ليه غير مفيد، يفرق في ايه؟ نسبة صغيرة من وقتنا مستكتراها علينا ليه؟

و بعدين عندك اقتراح مثلا ببديل أفضل؟ بلاش دي عارفة أصلا طموحنا و أهدافنا و أحلامنا و نظرتنا للحياة عشان يكون عندك اقتراح متوافق معاهم؟

ربنا يهديكي و تتعلمي التفكير

على فكرة عندنا قطة اسمها كبسولة

بس انتي يا منال و انت يا علاء تخلفتوا عن ركب الحركة الوطنية

بعد المظاهرة اتجمع كل الناس في مركز هشام مبارك

لقينا نفسنا كتير حوالي 70 قلنا ننزل كلنا تاني بسرعة و نعمل وقفة في اي حتة

ده كان راي كل الشباب

لكن كان فيه ناس كبيرة كده تقدر تقول قيادات عمالية تاريخية من اللي شاركوا في كميونة باريس

قاموا قالولك لأ احنا هانعمل احتفال هنا و هانصيغ حتة دين بيان هيطلع من عينيهم و احتمال كمان نصعد و نغني نشيد 1 مايو في نهاية الاحتفال - تعرف النشيد ده ؟

المهم حصل شد و جذب : عاوزين ننزل نعمل تصويت القيادات التاريخية قالت لك نستني بعد الكلمات

حوالي كده 111133444 كلمة اتقالت و تقريبا كان لسه فيه كلمات

انا صحتي الانجابية ما استحملتش اكمل كل الكلمات .. نزلت و انا يحيي

طبعا بعد كل الكلمات دي نزلت لقيت خير اللهم اجعله خير مدخل العمارة علي جنبيه صفين عساكر امن مركزي يوصلوك لحد ناصية الشارع

و ع الناصية حوالي 10 عربيات امن مركزي و زيهم علي مدخل الشارع من الناحية التانية

المهم خرجنا من العمارة زي اللي ما شيين في زفة

بس اطمن يا علاء و اطمني يا منال و كل الناس تطمئن

البيان جامد

و كمان اسم 30 فبراير من الجهات الموقعة عليه

http://mabadali.blogspot.com

و شفت يا عمرو جهاز الرقابة القومجي الرجعي اللي عند الحركة المصرية من أجل التغيير "كفاية" قام حذف مجموعة تلاتين فبراير لما أعاد نشر البيان رغم أن اللي وقعوا باسمها 7 و رغم أن 3 من أعضائها في المعتقل

هو فيه حد معتقل من رفاق 30 فبراير غير مالك و الشرقاوي ؟

مين ؟

http://mabadali.blogspot.com

بهاء

It's no secret any more how people are treated inside police stations.It's no secret how "Kelaab El-Sultah" Dawn Visitors kidnap people from their bedrooms,turture and rape them in a sadistic way.It's also no secret that nothing last forever and everything comes to an end. No freedom=No justice. No justice=No peace. I'm so happy to see many people getting over their fears and hitting the streets to protest.Stand up,don't give up,keep the fight for your right. If today is THEIRS, tomorrow is OURS,and we will never let them steal it from us!