You are here

أصلا أنا مش مدون

Primary tabs

أرجع من السفر في دماغي حواديت كثيير ، يجي في بالي المدونة، مش يبقى لطيف لو كتبت عن بيروت، دأنا حتى شفت الضاحية الجنوبية و الاعتصام و مخيم شاتيللا و عاصرت اللبنانيين و هما عايشين القلق من العودة للحرب الأهلية.

بس مش عارف أجيلها منين، مفيش كتابة عايزة تيجي، أصلي لما بسافر لازم لما أرجع أحكي كل الحواديت لكل الناس اللي بقابلهم و باين كده الحدوتة اللي اتحكت باللسان مينفعش تتحكي بالكيبورد.

طيب بلاش بيروت أنا راجع محمل كوميكس لطيفة جدا، أغلبها مش معروف و دي بقى أصلا مبلاقيش حد أحكيله عليها، طيب ما تيجي أخبطلي تدوينة كده عن الناس اللي بتكتب سيرتها الذاتية في صورة كوميكس، من سبايجلمان لمارجان ساترابي لصديقتنا لينا مرهج.

كل ماجي أفكر في مدخل للحدوتة ألاقي خبر منيل يشتتني، منعم اتقبض عليه، الباشا الفاضي عبد الفتاح مراد ملفقلي قضية، نواب أخوان بيتقبض عليهم، ضرب نار في سينا، مركز الخدمات النقابية بيتقفل، القضاة معرفش مالهم.

بلاش هبل، أنت هتصدق الهيلمان اللي معمول و تحس أنه واجب أنك تدون؟ أنك بتناضل بالكيبورد؟ لا أنت تنفع ولا أنت عايز. و بعدين لو هتكتب في الكلام ده ايه الجديد اللي هتقولله؟ ما الجرائد بتحكي فيه و الأمور واضحة و مفقوسة و مش عرضة أصلا لاختلاف الرأي. طيب منعم ضروري حاجة تتعمل لمنعم ده برضه صديق و كمان يمكن بكره تكون مطرحه و تحتاج اللي يقف معاك، سيبك من الكوميكس و الحوارات و أكتب عن منعم.

كتبنا عن منعم ما تيجي بقى نجرب الموضوع اللي بيقولوا عليه نعبر عن نفسنا ده، هاه أي حدوتة لطيفة كده. تليفون "محدش بيدون عن تحويل التأمينات لشركة قابضة ليه" يادي النيلة. باظت.

طيب أكتبلكم عن ثانية اعدادي؟ أصل أنا عندي امتحانات ثانية اعدادي بعيد عنكم، ما هو كبارات العيلة صحتهم مش مساعداهم فالبت أختي الصغيرة محدش فاضيلها و شكلها هتسقط في ثانية اعدادي، فالمهم تفتق ذهني أنهم يبعتوهالي فترة الامتحانات أذاكرلها، أنا أصلا ثانية اعدادي دي كانت بداية فشلي الدراسي و لحد قريب كان مدرس الدراسات بتاع اعدادي بيجيلي في الكوابيس، لكن تعمل ايه في الاحساس بالذنب، احساس بالذنب عشان مش بساعد في مشاكل الشيخوخة اللي بتواجه العيلة و احساس بالذنب عشان من جواية فرحان بالبت سناء اللي ملهاش في العلام ولا المدارس و عرفت تربي أهلها و مدرسينها و تخليهم يستسلموا و يتقبلوا الفشل الدراسي. المهم عندي ثانية اعدادي و ده موضوع يستاهل تدوينات من أول ذكريات المدرسة لحد نوادر سناء (و يا سلام بقى لما تعمل اسقاطات سياسية على نوادر سناء) و اشي بقى شتيمة في المناهج و نظام التعليم و يلعن أبو مبارك على اللي جابو مبارك و كده يعني.

ندخل بقى في الهبل، كل خمس دقائق صحفي يتصل يسأل على قرد الرمال، هو مين و بطل تدوين ليه. على ما تقنعهم أن الراجل كتب أسبابه على مدونته و أنك مش ممكن هتديهم رقم تليفونه بما أنه المفروض بيحاول يخلي شخصيته سرية و أن عموما له ايميل ممكن يستخدموه خلاص أي فكرة لتدوينة في دماغك راحت. طيب تعليقك و رأيك في الموضوع بلا تعليق بلا بتاع متخليناش نغلط في حد و ربنا يوفق الجميع ايه رأيكم نتكلم عن منعم؟

المهم لما حاجة من الحاجات دي بتشتتني لا بكتب عنها ولا بكمل في اللي كنت ناوي عليه.

أنا أصلا مش مدون، يعني قلب كده في المدونة مش هتلاقينا قمنا بأي عمل يندرج تحت الصحافة الشعبية، ولا أنا بعبر عن نفسي بجد بدليل أني تقريبا مكتبتش عن أي حاجة مهمة بالنسبة لي بجد، لا كتبت عن مراتي ولا أهلي ولا كتبت عن الكوميكس ولا كتبت عن البرمجيات الحرة و الهوة الرقمية و لا عن شغلي ولا أي حاجة ليها القيمة في التكنولوجيا ولا عن أفلام ولا موسيقى بحبها. حتى السجن مكتبتش عنه بجد.

يعني في الثلاث سنين اللي هما عمر المدونة (أول سنة فاضية تقريبا) حاولت محاولة ولا اثنين في كل سكة من دول و مبسوط جدا من النتائج، و كتبت تدوينات بحب أرجع أقرأها. بس كل فين و فين.

اللطيف في الموضوع أن فيه ناس بتيجي تقرأ المدونة كل يوم و من حين لآخر بقابل حد منهم و أسمع كلام جميل، و أنا طبعا أبعد ما يكون عن التواضع فمش هخبي عليكم أن الموضوع ده بيعجبني، و برضه مصلحه بيطلع لنا منه سفر و تخفيض على الكتب بس يعني نفسي أفهم اللي بيزور كل يوم ده مستني ايه؟

ساعات بكتب تدوينات و أستنى أتفرج على اللي بيزور ده هيعمل ايه، هيرد ازاي، الواحد شاف حاجات عجب، مثلا خريج العلوم اللي المفروض علموه منطق اللي معتبر أن تصبيعي لمبارك بالطريقة الغربية مش بالطريقة المصرية دليل على أني شغال لصالح قوى أجنبية.

طيب أنا في اللحظة دي الفأر اللي في المتاهة ولا الراجل ابو بلطو أبيض اللي حط الفأر في المتاهة؟

على سيرة الفأر و المتاهة نفسي برضه أكتب عن قصة خيال علمي لاسحاق عظيموف استخدم فيها التشبيه ده، ولا بلاش دي فيه قصة خيال علمي برضه عبقرية فيها فأر في معمل له دور مهم. دأنا حتى كنت بدأت ترجمة قصة لعظيموف و بطلت و نفسي قوي أكتب عن الخيال العلمي و ازاي بقى اتعلمته من أمي و معرفش ليه مبكتبش.

المسألة طبعا مش مأساة، لا أنا رحاب بسام ولا ألف ولا عمرو عزت، محدش خسران يعني لو مكتبتش الحاجات دي، ولا انا خسران قوي، صحيح نظريا النشاط الهلامي اللي أسمه تدوين هو الحاجة التعبيرية الوحيدة اللي بعملها بما أني بطلت أرسم و أعزف و أعمل جرافيكس بس عادي ما أنا مش فنان (و لا عايز دي عالم فاضية و مخها تعبان).

المشكلة أني بيجيلي الرغبة أني أكتب الكلام ده و معرفش. معرفش عشان الوقت، معرفش عشان مبعرفش، معرفش عشان مش طالبة معايا التعليقات البضينة، معرفش عشان مش طالبة معايا أكتشف أن البتاعة بالذات اللي واخدها جد و عاجباني الكل طنشها، معرفش ليه معرفش.

يمكن الحل أن لما تجيلي فكرة تدوينة أكتب تدوينة عن فكرة التدوينة و برضه التدوينة البيضة تنفع في اليوم الأسود.

عموما منورين يا أخوانا و المدونة مدونتكم، و مادام وصلتم لحد هنا أقترح تقلبوا في الأرشيف يمكن تلاقوا حاجة تعجبكم لحد ما ألم نفسي و أكت حاجة تعجبني.

Comments

يعني علاء المدون طلع أصلا مش مدون؟؟ وقبل كدة تلاتين فبراير طلع مش تلاتين فبراير وإنه أصلا مفيش حاجة اسمها تلاتين فبراير؟؟ والصحافة الشعبية اللي انت بتعملها طلعت مش صحافة شعبية؟؟ طب الفار اللي ف المتاهة طلع فعلا فار في متاهة ولا أصلا برضو مفيش حاجة اسمها متاهة؟؟ ولعلمك بقى الدكتور أبو بلطو اللي حط الفار في المتاهة هو نفسه أساسا مدرس الدراسات اللي كان بيطلع لك في الحلم وأصلا البت سناء هتطلع في آخر الكومكس مش أختك وهي أساسا السبب في الهوة الرقمية

لأ الحمد لله يا راجل طمنتني عليك ألف سلامة ليك يا باشا وانشالله العدوين ويسقط يسقط فوزي مبارك (على أساس إن مفيش حاجة أصلا اسمها حسني مبارك)ـ

لا فى متاهة بس المشكلة ان الفيران فيها كتيييييييييييييييير قوى وكلهم بيخبطوا فبعض ومحدش فيهم فاهم التانيين ولا عاوز يحاول حتى يفهمهم مجرد الرغبة مش موجودة اما الخروج من المتاهة فبايد الراجل ابو بالطو اللى حاططنا كلنا فى المتاهة وقاعد فوق يتفرج بس اقولك مش بس الرغبة فى الخروج مش موجودة عند الاغلبية كمان القلة اللى عندها الرغبة معندهاش الارادة الكافية لتحقيق الرغبة دى وسلملى عالمترو

عمو عمو ممكن اشوف الكومكسايه اللطيفه اللي انت جاي محملها معاك من بيروت

لا صعبة عليكي دي بالعنجليزي

طيب انا باخد كورسات انجليزى ولى سوابق في قراءة الكوميكس بالانجليزية هل يمكن الاطلاع عليها او استعارتها

عليك بالتورنت يا ولدي ففيه الخلاص أما الكمال فلمن استطاع اليه سبيلا

حاديك فكرة مزعجة تعملها فيلم مادام طلعت مش مدون واحتمال تحب تكتب سيناريو او تعمل فيلم من بابه. توجد في الاخبار اللي ما بتتنشرش في مصر حكاية حبرية عن قبيلة في سيناء اسمها السوراركة ؛ راجت بقضها وقضيضها تطلب اللحوء في اسرائيل من كام يوم بسبب ان الحكومة طبعا مش الاسرائيلية قتلت لها اتنين من افراد القبيلة لأنهم طبقا لكلام الحكومة رفضوا الوقوف بسيارتهم .. فقتلوهم .. بسيطة ! انا شخصيا رحت سيناء من كام شهر واستضافني الكاتب السيناوي مسعد ابو فجر ( وهو بالمناسبة له رواية عن سيناء وعن حكم العسكر هناك جميلة اسمها طلعة البدن صادرة من ميريت ) ورحنا عند قبيلة السواركة وكان معنا مخرج مصري صديقي مش قادر اقول اسمه ( موش مهم مسعد يتأذي ) وشرينا الشاي وسمعنا منهم انهم راحوا قبل كده لاسرائيل ايام شارون طالبين اللجوء . ابقاهم شارون بضعة ايام داخل الشريط الحدودي وجاب الميديا العالمية عشان يقول ان اسرائيل فيها ديموقراطية اكثر من مصر. السي ان ان سألت الرئيس( المصري طبعا ) عن موضوع قبيلة السواركة فاجاب " سواركة ؟ يعني ايه ؟ ما اعرفش انه توجد في سيناء قبيلة اسمها السواركة " طبعا ما قالش انه ما يعرفش من سيناء غير شرم الشيخ ! سبب الازعاج في الفكرة دي انك ما تقدرش تعمل منها حاجة لا فيلم ولا رواية ولا حتى فصة فصيرة فبعد ان سينا رجعت تاني لينا تحولت الى معسكر يحكمه الامن المركزي وسكانها اسرى في مصر يطالبون ان تطبق عليهم المعاهدات الدولية زي بتوع دار فور. فالجنجاويد المصري التابع لحبيب العادلي يأخذ الأهالي رهينة بالمئات ولا من شاف ولا من دري وما حدش بيكتب عشان حفاظا على سمعة مصر اللي هي زي عود الكبريت واذا ما كانتش الحكاية دي عجباك فما رأيك في موضوع الشرم والشيخ ؟!

موضوع أن محدش بيكتب ده بقى نادر جدا، راجع الجرائد و المدونات هتلاقي السواركة مكتوب عنهم يمين و شمال.

و بما أني لا صحفي ولا فنان ولا حتى مدون أصلا وسيلتي الوحيدة في أني أعرف أي معلومات عن الموضوع هي الجرائد و المدونات، طيب يعني هضيف على الموضوع ايه؟

لكنها برضه من ضمن القصص الكبيرة قوي اللي شغالة اللي مخلية قصصي الصغيرة قوي متعرفش تطلع عشان أجنا في ايه ولا في ايه.

عموما يسقط يسقط حسني مبارك و طلعة البدن رواية حلوة قوي كان نفسي برضه أكتب عنها.

كويس ان رواية طلعة البدن عجبتك لأنها ممكن تزعج ناس ما يحبوش فضح العلاقة بين اهل مصر في الوادي وبين بدو سيناء وهي علاقة كما تعرف انت بشكل مؤكد علاقة استعلائية من جانب المصريين في الوادي . ياريت تشير بشكل ما الى الرواية . رءوف مسعد

اللي عجبني في الرواية مش المضمون السياسي بس رغم أنه مهم جدا، اللي عجبني فيها اللغة، حاجة رهيبة أنا عايز أعمل تدوينة أحط فيها مقطع واحد منها بس.

حتة العلاقة الاستعلائية دي عايزة منقشة لوحدها لأنها هتفرع في دهاليز من نوع هل الرؤية متبادلة من الطرفين و تأثير الخطاب العبثي للمثقفين الليبراليين اللي كل حاجة مش عجباهم يلوموها على ثقافة البادية متجاهلين تماما انتشار البدو في تاريخ و جغرافيا المنطقة و تنوعهم (أصل لما تسمي الوهابية ولا السلفية بأسمها يبقى عيب، لازم ترطن بكلام يونجي عفا عليه الزمن و تفسر أن مصدر رزق الأسلاف يقرر كل شيئ و بعدين تقول على نفسك علماني و ليبرالي و يساري و مدرك ايه).

شفت بقى أهي دي كلها أفكار لتدوينات جأتني عشرين مرة و منكتبتش، أنا بحس المبدع الحقيقي مبيفرقش عن الناس العادية في حاجة غير أنه زبال، الفرد مننا تجيله مليون فكرة و يطنش و يمكن يمشي وراء واحدة ولا اثنين و لو بخته حلو البريمو يضرب و يمشي وراء واحدة صح، المبدع بيمشي ورا كل حاجة لأخرها و بعدين يرمي في الزبالة و بكده مفيش سكة مهمة هتفوته.

شوف التدوينه دى فعلا جايه فى وقتها وبما انى بحب اعرف الناس وخلفياتهم واهتمامتهم فصدقنى كنت بستنى تدوينات تخص علاء واهتماماته عشان اعرف عنك حاجات اكتر واستفيد كمان ..... عشان كده تلاقينى دايما بقلب فى اللينكات القديمه واربطها بلينكات جديده ;) واحاول اكون صوره كامله فى ذهنى عنك :) انا فعلا بستمتع بكده .

وبعدين انت مش واخد بالك انك كتبت عن نفسك اهه و طلعت تدونيه لذيذه دلوقتى ، ثم يا اخى ماانت قلتها زمان اظن جه الوقت تكتب اللى بتحبه وفعلا شيئ صعب جدا انه الواحد يحس ان التدوين بقى مهنه لازم يأديها مظبوط والا يبقى مارق وخاين وعميل :) ماهو اصل دى شيئ اصيل عندنا .

انما مقلتليش بقى ايه هيا " البتاعة بالذات اللي واخدها جد و عاجباني الكل طنشها ." ؟؟!

وبعدين يعم عبرنا وتواضع شويه ورد على الميل بتاعى بخصوص المدونه بتاعتى المستضافه عندك :)

ماله البوست ده ؟ فين محتويات الويكى اللى كانت قبل دروبال ؟

http://www.manalaa.net/alaa/the_rise_and_rise_of_the_manalaa_civilization

أحلى تدويناتك هي ال بتقول أنها مش تدوينات.

أنا مثلا استمعت بقراية البتاعة دي جدا

و البتاعة الثانية ال بتحكوا فيها عن نفسكم أنت و منال كمان و ال طلع أن سمير رابط لها في تعليقه السابق على تعليقي مباشرة. البتاعه دُكها أنا كنت قعدت أكتب تعليق طويل جدا عليها أول ما عرفتكم لكنه ضاع. مش مشكلة.

لا دي تدوينات أنا مقلتش عليها مش تدوينات، بس دي بتحصل كل فين و فين،

عموما منور

I enjoyed this post ya Alaa. Especially the 2i3dadi part :-)

Good job. And I love your blog!

زي ما هو مافيش حاجة اسمها 30 فبراير , مافيش حاجة اسمها تدوين او مدون

انا فاكر في مناقشات المجموعة البريدية انك انت قلت ان التدوين وسيط بيأثر علي الكتابة

لكن مش نوع كتابة بعينه

لكن ممكن الوسيط ينتج أو يطور أنماط من الكتابة

كل واحد عنده مساحة بيشكلها و بيشكل شخصيته كـ" مدون " و شخصية الـ "مدونة "

انا قلبت في الارشيف

مش لاقي تدوينة كانت عاجباني جدا

كنت راجع من اجتماع و شتمت اللي مش قادرين يقفلوا موبايلاتهم في الاجتماع

كمان عجبني جدا حكاياتك عن المؤامرة الدولية

انا فاكر اول مرة دخلت هنا , كنت باعمل بحث عن اخبار حاجة لكفاية

لقيت نفسي هنا و مش فاهم اي حاجة , ايه كل الكلام ده , عربي علي انجليزي , فصحي علي عامية علي شتيمة علي صور و عواميد في الجنب و تعليقات

انا جت لي صدمة حضارية

طبعا مدونات تانية كانت اليفة اكثر زي طق حنك و صاحب الاشجار

حاجة مفهومة و واضحة

لكن بعد ما فهمت خريطة الموقع ده اتشكلت صورة لمدونتك و شخصيتك التدوينية

ناس كثير بيعتبروها اقرب كثير لفكرة التدوين زي ما خطرت لهم لاول وهلة

و بيعتبروا ناس زيي بتحط مقالات علي الانترنت

و زي رحاب بسام بتنشر ادب علي الانترنت

لكن اعتقد بمرور الوقت الوسيط طبع عل الكل و بقي كتابات لينا مش من السهل انها تتفهم لو اتشنرت علي ورق

و بقي فيه تناص - حلوة تناص دي - بين كتاباتنا و بين اسماء مدوناتنا

و فيه كلام مسكوت عنه مش بنكتبه لانه معروف لمتابعي المدونات

يعني لما اقول مثلا فينك يا ابو الليل , الناس تفهم ان قصدي ايه

انا مستمتع جدا بموضوع التدوين ده

و بالناس اللي عرفتهم من خلاله

مش عارف انا كنت هاتفرج ع الدنيا ازاي من غير مدونات و تدوين و مدونين و 30 فبراير

طبعا فيه حاجة اسمها 30 فبراير

احكي لنا عن لينان


http://mabadali.blogspot.com

Dear Alaa.

1st time to write u although it's been long time since i come across ur website i have no idea how!

anyway i find out that putting ur thoughts as voice file RM or Mp3 would be better. I'm sure you have the knowledge to make it small file through some free programs to record voice.
the cost is only a mic can be around 10 to 30 LE. what do you think???
Ahmed

I think I came across this blog a few weeks ago but don't remember reading anything.. This post is really well expressed and it is also fun to read, I'm loving the whole theme of the blog too.

Good luck, and keep it up..

فكره المدونه ديه أول مره أشوفها هنا مكنتش أعرف يعني ايه مدون ولا يعني ايه مدونه وأخيرا لقيت المدونه اللي عرفتني أن مفيش حاجه أسمها ومدونه ولا تدوين ولا وجع دماغ وبلا ازرأ أكتب يا علاء زي م أنتا عايز أما نشوف أخرتها أيه معاك