You are here

وداعا Ed McBain

Primary tabs

Ed McBain أو Evan Hunter 1926-2005

في زحمة المذابح فاتني خبر موت Ed McBain بالسرطان.

انا و منال بنحاول دايما نركز و نحتفي بالحاجات المشتركة مابينا، Ed McBain من أكتر الحاجات اللي بنتفق عليها، مهما قرينا أدب راقي و رائع بنرجع دايما لSteve Carrella و Mathew Hope و لا يمكن أبدا نختلف في الرأي مادام McBain هو الكاتب.

لا يمكن أروح سور الأزبكية من غير ما أرجع برواية واحدة McBain أيا كان رحت أعمل ايه أصلا، لا يمكن أسافر من غير روايتين ليه على الأقل.

زعلت قوي ليه يموت ويسيبني، طب لما أقراله كل حاجة أعمل ايه؟ الراجل بيكتب من الخمسينات و بقرأله بقالي 10 سنين.

أغلب الحاجات اللي بقراها بيصنفها المثقفين على انها هيافة، كوميكس و ستريبس، خيال علمي، فانتازيا و جريمة، في الأول ماكنتش بحب أدب الجريمة للدرجة الحاجات الكلاسيكية بتزهقني لكن الراجل ده حاجة تانية خالص، بيكتب procedural crime novels يعني واقعية شديدة على حاجة تفكرك بالسينما نوار.

أسلوب غريب تطور الشخصيات فيه بيحصل ما بين الروايات، يعني بتشوف أبو Carella بيتقتل و في الرواية اللي بعدها تلاقي Carella بقي بني أدم تاني، من علوش ممكن تفتكره مش مهتم بالشخصيات، بالمشاعر، تفتكره كتاب سطحي لكن لما تمشي معاه كتاب ورا كتاب تلاقي الجريمة مش مهمة بالمرة و الموضوع كله في الشخصيات. حتى ساعات الجريمة ما بتتحلش أو الحل بيكون معروف من الأول.

المجرمين و عند McBain مش عباقرة بالعكس ملخبطين أغلبهم مش أشرار لكن نادر ما يفكرلهم في عذر، الاجرام عنده اختيار الواحد بيعمله الشر فينا كلنا، المخبرين مش عباقرة بالعكس الموضوع كله أنهم دؤوبين بيعملوا شغلهم و نفسهم طويل، ما فيش قوالب أكتر مخبر كريه و عنيف و فاسد Olly Weeks شاطر جدا.

الشخصيات النسائية عنده أقل بكتير من الرجالة، زوجات و مجرمات صغيرات و شرطيات أدوارهم صغيرة لكن لما عمل تجربة أنه يحطهم جنب بعض بأنه مجرد يقص الحتت اللي عنهم و يلزقها جنب بعض من غير أى تحرير أو تعديل لقيناهم مش سنيدة بالمرة، صورة جبارة اتبنت، كل واحدة فيهم انسان حي ماليان قصص و تناقضات و معارك، و يمكن يكون أحلى مشهد كتبه بتاع العاهرة الحامل اللي بتولد في وسط القسم، المشهد بيبتدي عنها على ما توصل للولادة تلاقي عشرين راجل حواليها من السكارى اللي في التخشيبة للمخبرين و العساكر و الفراش (الوحيد اللي عرف يتصرف و يولدها). طلع مشهد عبقري عن الرجالة.

الحقيقة ده بالنسبالي موضوع Ed McBain الرجولة. (بكل المعاني التقليدية و الغير تقليدية، السلبية و الايجابية)، و دايما بحس معاه بأني شايف جدران السجن اللي أسمه الرجولة ده، كاراكترات عمرها ما بتسأل يعني ايه راجل أو ليه أنا كده. بعكس مثلا Marion Zimmer Bradley و تناولها للأنوثة كل شخصياتها بتسأل و تدور على اجابة، يا ترى أحنا كده مش بنحاول نفهم ولا ده شخصيات Ed McBain بس؟

بصراحة ماناقشتش منال في الفكرة دي قبل كده، يا ترى أنت شايفاه عن ايه؟

أهم من الشخصيات المكان، في روايات 87th Precinct المدينة Isola المفروض انها شبه New York، المدينة كائن حي أسطوري هي بطلة كل الروايات حتى اللي ماتكتبتش هي اللي خلت المجرم مجرم و اللي خلت الطيب طيب و اللي خلت الشرير شرير، McBain لازم يوصف الجو في كل مشهد لازم تعرق معاهم و تبرد معاهم (و طبعا الحر بيسرع تحلل الجثث و يبقي لازم الطب الشرعي يتحرك أسرع)، بيوصف كل حاجة العين عين مخبر بياخد باله من التفاصيل لكن الرك على اللي بيقرا لو عرف يفوت من عقلية المخبر يقدر يفهم المكان و الناس (حاجة المخبرين عمرهم ما بيلاقوا وقت ليها و يصعبوا عليك بسببها).

ما فكرتش أعرف عنه حاجة غير بعد ما مات أتاريه كاتب سيناريو The Birds بتاع Hitchcock و طلع كيروساوا عامل فيلم مستلهم من رواية ليه (ده لازم أشوفه طبعا).

أكتر كتب حبتهاله

أرامل Widows: أكتر رواية حياة المخبرين فيها بتتعقد و تتكعبل Carella أبوه بيتقتل و Eileen بتغتصب. لا يمكن ما تكرهش الضحية، راجل لزج و مع ذلك ستات كتير حبته

سم Poison: هتقع في غرام Marilyn الجميلة اللى مقطعة السمكة و ديلها و كل عشاقها بيتقتلوا، هتصعب عليك لما تطلع عاهرة هربانة من سجون المكسيك و قوادها اللى قتلته في الأرجنتين و من بعدها هتقضل تتابع بقلق Willis المخبر القبيح القصير اللي حبها ولازم يعيش بقيت حياته مخبي سرها

رومانسية Romance: رواية McBain الأقرب للثقافة و المثقفين (بعد الشر) فكرتني بأفراح القبة لنجيب محفوظ، برضه فرقة مسرحية كل شخصياتها متعفنة و نقد شديد للنفس الانسانية (و فيها سطر بأضحك كل ما أفتكره) على الجنب Kling (اللي كل رواية بيبقاله مغامرة عاطفية مختلفة من بعد Eileen ما سابته) بيدخل في علاقة متشابكة و قمة في الرومانسية مع طبيبة سوداء

كان في بنت صغيرة There Was a Little Girl: رغم اتفاقي أنا و منال على Ed McBain هي بتفضل روايات Mathew Hope غالبا عشان الجوانب الرومانسية و أنا بفضل 87th precinct عشان الحضور الطاغي للمدينة، لكن الرواية دي من أحسن روايات سلسلة Mathew Hope عالم عبثي غريب ما بين السيرك و الهيروين

لسه قدامي كتير لEd McBain أقراه مش هحس بموته بجد الا لما الكتب تخلص (زي ما بزعل و أفكر في Moris كل ماأقرأ Asterix).

وداعا Ed McBain و شكرا على أكتر من 50 سنة عطاء، و خللي حد يستجرأ يقول أدب استهلاكي ولا تافه قدامي

Comments

feen embaba ya alaa? ana kont mestany elta3'tya bas mafeesh ay post 3an elmawdo3 howa fe eah sorry ana fe elso3odia, 3ashan keda enta elmasdar elmawsok feh elly momken yetse2el. tab law etla3'et 2olo 7aga,

arabist has some coverage and photos by josh and issandr

also check our photos

امبابة كانت روتينية عدا شوية شغل في الميكروباص لما روحنا زنوا على منال عشان تحكيلكوا هي بتكتب أحسن مني.

و تابع الوعي المصري

روح اقراله أحسن