You are here

لا لمبارك أب و ابن لا للفردة و الاستبن 5

Primary tabs

اليوم الخامس

صور

مظاهرة كفاية (ميدان الأوبرا)

ده الاختبار الحقيقي للحركة، مظاهرة كفاية اللي بعد الضرب على طول، بدأنا باشاعات أن في ناس عاوزه المظاهرة صامته، ده غير خبر أن النيابة أستدعت القيادات للتحقيق معاها.

المهم شيلنا اليفط و 180 ورقة عليهم مواقع المدونات و الحركات السياسية و غيره و أنطلقنا، أركن بعيد شيل اليفط و اتمشي، أمن كتير في طلعت حرب و بعدين ينقطع و يبان تاني عند ميدان الأوبرا.

ديمقراطية مبارك anti campaign شهادة مبارك في الحضانة لا لا لا لا لا لا
سابوا للمظاهرة رصيف كبير (قدام مكتب مصر للطيران)، البوسترات عملت شغل جامد قوي، العدد عادي مش كبير (ناس قالت 300 ناس قالت 500). الحزب الوطني يا دوبك عرف يلم 15 قعدوا يصبعوا و يبعبصوا الهوا (كله من تأثير الفياجرا).

في الأول الكوردون كان فيه فتحة صغيرة، أنقضيت على الجمهور أوزع الورق و أتكلم معاهم، موظفين مصر للطيران خايفين يردوا أو حتى يبصوا في وشي، شوية واحد فيهم لان و بينتقدنا و يقول البلد ما جابتش غيره (و ماله، لما همه سبعين مليون هلف، ما تسيبونا ننقي هلف يحكمنا و يروح هو يدور على بلد تستاهله)، المهم بنتحاور راح زميل ليه زقوا و قالي أمشي من هنا، عاوز تهتف أهتف هناك لكن سيبنا في حالنا، طبعا الناس شاطت و اتخانقت معاه (الواحد مش محتاج مباحث اليومين دوا، في ناس متطوعين، يعني يخالفني ماشي، لكن بيسكتني و يهش اللي بيتكلم معايا؟ حد فسرها و قالك مبارك استنسخله مليون من نفسه عشان يضمن أن المربوط ينضرب).

trying to get out الصحافة فين الارهاب اهه removing violent officer from the scene
طبعا الناس لقت المساحة كبيرة ابتدت تتحرك جواها، راح الأمن قافل الكوردون، كان في ناس كتير أتجمعت جوه مجرد بتتمشي، قالوا للضابط عاوزين نمشي شخط و مد ايده، طلعنا أحنا جدعان و ابتدينا نتخانق مع الضابط عشان يمشي الناس، معجبوش حد فينا جه يضرب رحنا ملطشينله و ندهما على الكاميرات.

الخول وقف ورا العساكر و قعد يشتم و يقول لو راجل تعالالي، يا جبان يا أبن الجبانة أنا اللي أجيلك و أنت حواليك ألفين عسكرى؟ المهم عملنا فيها بشاوات و قعدنا نسأل عن أسمه عشان بلاغ النيابة، جه لواء هشه و فتح للناس الكوردون.

disabled protester accessible protest بطل كسر الكوردون
أتنين على كراسي عجل مشاركينا المرة دي، البطل اللي كسر الكوردون يوم عابدين و وجه جديد، اتصاحبنا و رجعت تاني أحاور الجمهور، ناس كتير معانا بس بتتعامل على أن الرفض و العصيان فرض كفاية (حلوة فرض كفاية دي)، المهم أننا بنتكلم، راجل جميل قعد يحكيلي حواديت فساد تقشعر و حكيتله حواديت تعذيب عشان مأتقشعرش لوحدي، قابلت حد من العريش أول مرة ينزل مظاهرة، شاورتله على محامين حقوق الانسان عشان ياخد نمرهم حد عارف هيلموه امتى و يعذبوه، كل ما حد يشكي أن أساتذة الجامعة كلهم، أو المحامين كلهم، أو الصحفيين كلهم، أو الدكاترة كلهم فاسدين أطلعله ناس مننا و أعرفه بيهم، دول عينة من شرفاء بلدكم و صدقوني في منهم كتير.

يا عم السور ده عهدة واحد بيضرب و التاني بيضحك محدش يضرب، عاوزين ماما أمريكا تفشخنا ولا ايه سيبوني عليه
الناس جت تتشعبط على السور الحديد العساكر زقتهم، فورا ابتدى العنف، رميت نفسي في النص و حشت، خلاص هديت تماما و مبقيتش عاوز أمسك ضابط أديله في بضانه بالشلوت، يمكن عشان اللواء بتاعي و نبيل العزبي بطلوا يظهروا؟ يمكن عشان منال مش معايا و وعدتها أني هرجع صاغ سليم؟

غلست على بتوع الدستور شوية عشان ماحطوش أحداث يوم السبت على الصفحة الأولى.

بعد ساعتين انفضت المظاهرة، الأمن متنكش و ما قعدش يقولك واحد واحد و اتنين اتنين، الشباب قالوا في سرية نفاجئهم و نطلع على طلعت حرب، و ماله.

على ما وصلنا طلعت حرب كان الموضوع انفض، مش عارف بقي الأمن فضها ولا الناس تعبت ولا ايه.

خمس أيام ورا بعض مشحونين، يوم 25 مايو و يوم 30 يوليو ما كانوش أيام سودة دي كانت أيام ولادة، من يومها و أنا حر.

منيش من مريدي الشيخ امام و بتضايق قوى أننا مش لاقيين غيره نغنيله في تحركاتنا، الراجل قدم كتير بس لازم أصوات جديدة، مع ذلك من يوم السبت و أنا بغني
أتجمع العشاق في سجن القلعة
أتجمع العشاق في باب الخلق
و الشمس غنوة من الزنازن طالعة
مين اللي يقدر ساعة يحبس مصر

اتجمع العشاق في الزنزانة
مهما يطول السجن مهما القهر
مهما يزيد الفجر من السجانة
مين اللي يقدر ساعة يحبس مصر

حتي لو محققناش حاجة يكفيني أننا قمنا بالفرض نيابة عنكم جميعا


اقرأ

Comments

دي أحلي كتابات قريتها ليك من ساعة ما عترت على بلوجك وأنا بأدور على لينكس في مصر

أنت راجل سكرة وزي العسل

فرحت وطرت من الفرح لما لقيتك لطشت للزابط

كنت عاوز أكسر الشاشة - كنت عاوز أكون معاك

حاجز الخوف تعبني نفسيا وصحيا وكل حاجة

نفسي ألاقي حبوب الشجاعة وأنزل معاكم في مظاهرة

نفسي أمي وإخواتي البنات ما تترعبش لو عرفوا إني نازل في المظاهرة

عندك حل يا أمير

مش أنا اللي لطشت الضابط، ده كان واحد من الصحفيين، أنا لما جريت عليه عشان أصوره أصلا بتوع وكالات الأنباء شخطوا فية و قالولي أرجع يا علاء (على أساس أنه صعب يتعرضلهم لكن ممكن يبهدلني).

صدقني لو أتشجعت و نزلت هتلاجي حاجز الخوف ده اتفتفت، مش هتبطل تخاف لكن الخوف هيبطل يحوشك.

أما موضوع الأهل فده مالوش حل اذا كان كبار النشطاء بيخبوا على أهاليهم.

غريبة يا علاء من يوم السبت اللي فات و أنا مشغل مجموعة اغاني الشيخ امام مع اني مسمعتش أغانيه من حوالي تلات سنين المود مود الشيخ امام :)

ألاقيش عندك ملفات أغاني الشيخ امام، بس بشرط تكون الجودة كويسة؟ عشان التسجيلات الكاسيت المنيلة اللي اتربيت عليها متتسمعش أبدا (عندي ذاكرة عن يوم زرنا فيه الشيخ امام عشان ناخد علبتين شرايط، مش فاكر ده كان بعد خروج بابا من السجن بوقت قصير، ولا قبل وفاة الشيخ وقت قصير؟)

عندي فيهم حبة كواليتي بتاعتهم معقولة و حبة الكواليتي زفت معظمهم من سواري.كوم اللي عنده مجموعة كبيرة جدا http://www.sawari.com/emam_main.shtml http://www.sawari.com/torath/new-emam.htm

ساعات بحس أن العرب بس اللي بيستخدموا real مش عارف ليه متمسكين بالفورمات الوسخ ده

لا وايه الأغنيتين اللي عاوزهم real يفتح الله

أنهو اغنيتين. جايز يكونوا عندي؟

اتجمع العشاق و شيد قصورك

بس بلاش real لو سمحت بيجيبلي أرتكاريا

عندي الاتنين كواليتي شبه معقولة و mp3 . هبعتهوملك

Do your part Alaa. Put up a sharmrelief.com banner. Every political faction will agree to the benifit, as you did, to helping these families. Now that we have your aproval as to our orginization, utilize your traffic for direct benifit

Thank you

يا زعيم فاتك نبيل العزبي في الاعتصام أمام مكتب الناب العام ظهر الأحد.

مشى وسط الطرقة الى كانت مسدودة بالمتظاهرين. كان خارج من مكتب ما و لابس مدني.

بهاء هجم عليه و قعد يشاور قدام وشه و يهتف "أمن الدولة كلاب الدولة" فالراجل أحاسيسه المرهفة انجرحت و استغرب و بان عليه الضيق!

كويس أنها جت على كده، بهاء زيي من أعضاء أعمل في الظباط في المظاهرة اللي لا يمكن تستجرأ تفكر فيه في سرك.

ما عدش حيعرف يلم حد بعد كده حتى البقر فهمت وعرفت

والسوابق بداوا يتكسفوا من اهل الحته شويه شويه حيعرضوا على اللى يطلع لهم مظاهره الف جنيه

متطمنش قوي كده أظن لسه قادرين يلموا، الموضوع غالبا أن مقاول الأنفار اللي كان متعهد الليلة خنصر الفلوس اللي كانت تلم 200 في جيبه و لم 20 بس.

أومال انت فاكر بيبطله فساد و بلطجة بينهم و بين بعض؟

بعد العتبة لقيت كام حد جيين يقولوا ان الناس هتطع على طاعت حرب , قلقت بس قلت يالا لما نجرب . فى الطريق قابلت بعض الناس وكان الكل قلقان , وصل الجميع فى نفس الو شويةقت تقريبا و ابتدوا يغنوا عشان يشدوا الناس و الناس فعلا ابتدت تتجمع بس فى واحد راح هتف يسقط يسقط حسنى مبارك فالناس بعضهو خافوا و مشيوا . الظباط اللى ف الشارع يجوا و يتكلموا فى اللاسلكى . ابتدينا نتحرك فى شارع طلعت حرب و شوية شباب ابتدوا يدخلوا معانا و فنفس الوقت أصحاب المحلات كان كلامهم"يمشى ما يمشيش ابعدوا عشان مايتخربش بيتنا" احنا كنا قرييبين من محلاتهم . فى دقايق وصل ظابط شكله كبير و ابتدا يهددنا و شفنا ناس جاية تجرى , عددنا كان تقريبا 30 فالناس قالوا كدة مش طالباها نتعجن تاني . و خالد قال للظابط من غير تهديد احنا ماششيين يالا يا جماعة كفاية كدة , والناس ا بتدت تمشى . الحلو ان فعلا مش احنا بس اللى كنا خييفين , الظباط كمان كانوا عمالين يصوتوا فى اللاسلكى و يزعقوا... كان نفسى ناس أكتر من الشارع يتشجعوا و يدخلوا وخصوصا ان مكنش حوالينا مليون عسكرى كالعادة بس هو الموضوع كلوا حصل بسرعة ف ييجى 15 دقيقة

طب كفاية وقاطعت التنسيق اقصدى الانتخابات المطبوخة ومستوية من 3 سنين فاتو على الاقل وعرفنا ان حسنى هو اللى حينجح

طب ايه العمل كفاية حتخليها تتظاهر الى مالا نهاية 6 سنين كمان يعنى

احنا كلنا عارفين ومتاكدين انهم جبلات ومفيش عندهم اى دم فياريت نفكر فى حلول تنجز الموضوع شوية

انا عارف ان اللى كفاية بتعملهخ ده منتهى الانجاز بالنسبة لمصر بس مش عوزين الموضوع يطول

فهل فيه حل غير مقاطعة الانتخابات المطبوخة اصلا

الاب المرة دي محمد عبد الحكم دياب

وده آخر مقال ليه الترتيبات الموضوعة للتجديد للرئيس مبارك لن تمنع المفاجآت: العقاب الجماعي وشراء الأصوات أهم ترتيبات التجديد

أما الابن فهو خالد دياب الذي ارسل خطاب لمبارك من عدة شهور بيقول ( بالانجليزي) يلم نفسه وكا عنوانه Not a love letter to the Egyptian president في مدونته الملخص الشيطاني Diabolic Digest http://users.skynet.be/diab/Egypt/Egypt_main.htm

USELESS USELESS USELESS USELESS USELESS USELESS

انا واحد من الناس الا عايشه بره مصر ولما بشوف مظاهره لكفايه بموت من الغيظ والغضب وببقى نفس اشارك معاهم بس مش عارف ازاى حد يشوف لى طريقه اشارك بيها معاكم ؟؟

ممكن تنظم مظاهرة من مكانك اتنظمت مظاهرات تضامن قام بها مصريين في الخارج في باريس حاول تتصل مع مصريين مقيمين معاك في نفس البلد و تنشر الموضوع وسط الجالية المصرية ، و جيب كذا فرخ ورق أبيض و اكتب عليهم اللي نفسك فيه ، و اطبع بيان على كام ورقة عشان توزعها على الناس في الشارع ، و ابعت ايميلات للميديا عشان تاخد تغطية، و انزلوا اقفوا لمدة ساعة أو ساعتين

ده طبعا لو كنت في دولة ممكن تتظاهر فيها من غير مشاكل

الدول العربية مش كلها هتمنع الحاجة دي على ما أعتقد

مثلا البحرين و الكويت و المغرب و لبنان ممكن يعدي الموضوع من غير مشاكل

أما السعودية مثلا أو ليبيا أو تونس فانسى!

It might help to convince a friend to come with u. The feeling that u can conquer ur fears is really worth the effort and the risk.

Hey Alaa n Manal Um midodaking Yasmin's n Douaa's brother I Wanted To Suggest Smthn..Kont 3aiez Ma3ad liMozahra Nerateblaha Gamed..n everyone u know can announce it sumwhere do it..Um for example an Operator in IRcQ Arabic room It has many egyptians n ready for that I can announce it in d Room n in d Site of it..jus gimme its date when n where n what will we call for..n isa i'll do ma best..n Yasmin comin on 21 dis month btw :P

قد تكون هذه هي الفوضى الخلاقة أو هي فوضى وخلاص، حق التظاهر مطلوب للجميع لكن بدون فوضى وبدون شتائم في المقالات أو الكتابات

watch your language dear alaa

لا يا بوب لو سمحت متقوليش أعمل ايه في مساحتي الخاصة بي

أنا مش عارف أنهي فوضى اللي سيادتك بتتكلم عنها أما الشتايم فده أنا شايفه حق و شئ طبيعي جدا و كل حد بيمارسه

متقوليش أعمل ايه في مساحت(ي) الخاصة (بي) لقد سببت لي الياءتين هولاء أزمة كلمت عليها الانا الي ما بين الاقواس

(أنا) مش عارف أنهي فوضى اللي سيادتك بتتكلم عنها أما الشتايم فده (أنا ) شايفه حق و شئ طبيعي جدا و كل حد بيمارسه

لا أحد يختلف عن الدور الرائع الذي تقوم به انت والسيدة منال ، ولكن دعنى أسألك ، هل انت تكتب ما تكتبه ليقرأه الجميع أم لتقراه انت ؟

تكتبه لتعبر بحرية ونعبر معك عن كل شئ عما نراه حق ، كما نراه يجب أن يكون أو ما يجب أن يختفي من حياتنا ..الخ

لكن بالنجاح الذي أحرزه(Manal and Alaa's bit bucket) تعدي الموضوع ان يكون مساحتك الخاصة بك ، أصبحنا شركاء ،ولا ايه ؟

انت ترىالشتايم حق ، وانا لا اراها كذلك ، انا من حقي اني ماقرهاش لانها بتضايقني ، لكنك (ولا اعنيك شخصا) تراها احد وسائل التعبير عن ضيقك او ضيق شخص ما ، والسؤال ، من له الحق ان يقرر الان ، انت لانك المنشئ ( بالتعاون مع السيدة منال) ام نحن جميعا من منطلق أننا بقراءتنا لك أصبحنا جزء من الموضوع ؟

ولماذا لا نجعلها بداية لاختبار قدرتنا نحن على الديموقراطية ، لاننا احيانا يا أخي بجد ( وأخص نفسي قبل ان أعممها على الجميع) نطالب بالديموقراطية لكن لما تيجي لساعة تحكيم الرأي في موضوع شخصي او بسيط وتتاح لنا الفرصة ان نمشى راينا ، بننسي الديموقراطية وامها وخالتها

مش عارفة اللي عاوزة اقوله وصلك ولا لأ ، ساعات مش باكون شاطرة اقول اللي عايزاه ( وباشتغل صحفية) شوفت المصيبة :)

راي أن نمشيها vote

تحط شتيمة ولا لأ إذا ما اعتبرتنا شركاء لك

أشوفكوا في النقابة بكرة

أولا منورة و متشكرين لفرصة المناقشة العقلانية

بصي يا ستي في أطر كتير لعمل صفحات على الوب بالنسبة لي اطار المدونة ده أساسا للحاجات الشخصية جدا، المدونة دي بالذات لا ليها خطة و لا في البال أن ليها دور، دي مساحة شخصية لاتنين متجوزين يكتبوا فيها اللي هما عاوزينه،

دي جردل بندلق فيه أي كلام، بنرجع فيه ساعات، و صحيح بنعمل ده علني لكن مش معنى كده هنعمل حسابكم

طيب بس شئت أم أبيت المدونة دلوقتي بتقدم شوية خدمات بسيطة ليجي 200 نفر (ده تقديري للعدد الناس المواظبة قوي قوي) هل دول ليهم حق علينا؟

مش عارف؟ أولا مش موافقك أن دي فرصة لتجربة الديمقراطية، الديمقراطية لازم يكون فيها مجالات مختلفة محمية من بعض، يعني مثلا أعضاء النقابة فقط اللي يسمح ليهم يتدخلوا في شؤون النقابة، أغلبية الشعب مالوش دعوة بالمرة (دي في رأيي ضرورة و الا فقدت كل المؤسسات اللي بتحمي الديمقراطية أصلا)، ذات الشيئ بالنسبة للقرارات المحلية (نعمل ايه في شوارع حي العمرانية ده بالأساس شأن سكان العمرانية و سكان أسيوط يعدوا على جنب لو سمحتم)

هارش لحد كده؟

طيب نيجي بأه للمساحة الشخصية، دي عندي ليها قدسية، الديمقراطية اللي هتخلي الأغلبية تتدخل في مساحتي الشخصية متبقاش ديمقراطية، الديمقراطية خاصة بالشأن العام فقط

لكن نرجع و نقول ده شأن عام ولا خاص.

أنا شايف بما أن أي حد يقدر يعمل مدونة، و بما أن أنا و منال متبرعين بوقت و مجهود و فلوس عشان نسمح للناس تعمل صفحات بأحسن الأدوات يبقي مالوش لزمة نفرض على مدونة هدف صاحبها ماخترهوش.

يعني لو سيادتك شايفة أن مهم مثلا يبقي في مكان بيجمع اعلانات الفعاليات السياسية و يخلوا من الشتيمة اتفضلي اعمليه و ادعي الناس تشارك في، و خلي ادارته تتم بشكل ديمقراطي بحت. في أجدع من كده؟

لو بزور بيتك كل أسبوع و متعود أتغدى معاكم هل ده يديني الحق أقول يا جماعة لو سمحتم نعمل vote قبل متختاروا لون جديد للمطبخ؟

من الأخر أنت ضيوف مش شركاء فمتقلوش، و اللي مش عاجبه النت قدامه واسعة و يقدر يعمل اللبديل اللي يعجبه و الlogout يفوت جمل

ثانيا الله ينور مقدارك ، يزيد فضلك ، ويجعله عامر ومتشكرين خالص ،

ومقدرين جدا .. وده بجد مش هزار ، ويظهر احنا ضيوف تقال ، ممكن لسان حالك بيقول ( مش عارف الناس دي بتدحدف علينا منين )

، بس شكلوا بيت كرم وومكن تتحملونا شوية ( معلش خليها عليك المرة دي )

احنا مختلفين في 1- انت شايف انكم (دي مساحة شخصية لاتنين متجوزين يكتبوا فيها اللي هما عاوزينه)

وأنا لأ انا شايفاكو اكتر من كدة ، مش انا وحدين انا وغيري تحديدا ، أحد الزائرين قال مرة أنه أصبح اذا اراد ان يعرف ما يحدث في مصر يدخل على "مساحاتكم" ، بدلا من ( ذكٌر أكثرمن موقع اخباري مشهور)

وأكيد معاك حق ، ليس لي أن أقولك شيل دي !! حط دي !! لأ لأ لأ بلاش شتيمة دي ، شتيمة دي وحش خاااالص ، انت الأدمين طبعا ما قلته ليس المقصود به كده ، لكن طالما انت اخترت ان تضع تعليقات الناس ، يبقى مش من أولها نقول لبعض (الlogout يفوت جمل ) رغم انها قاعدة احترمها عن نفسي ، وطوول عمري أقول اللي مش عاجبة القناة دي يغيرها أو أحسن يقفل التليفزيون) مش يقول الرقااابة فيين التلفزيون أه ويقطع النور .

لكن لو كنا من أولها ( صحيح أحنا تجاوزنا أولها ) هانقص لسان بعض ونقول يا جماعة "الزيارة" ليها أصول ، الأكل الموجود يتاكل ، مش عاوزين دوشة . مش ده الل (خليني أقولها) اللي نتمناه . واحنا قلنا من البداية ( خليها عليك المرة دي.

واخيرال ( ) ( ) مش مقصود بيها اعتراضي يا سيدي انت انت انت انت انت لك كل الحق في انك تعمل الي انت عاوزه في مساحتك وأنا لي الحق اقولك عاجبني،

مش عاجبني هامشي ، أو مش عاجبني بس هاعد برضه ، لك حق تعتز بنفسك ، إذا كنت انا( وغيري) مبسوطة بكل ما تقومون به ، فلك كل الحق ، ومبدأ الlogout يفوت جمل مبدا متاح دائما.

بس برضة أشوفكوا في النقابة بكرة .

أولا يا فندم انت منورة الموقع و النت كلها و البيت بيتك، و مافيش ضيوف تقال ولا حاجة أنا مبسوط أنه في ناس بتزور الموقع و أن في ناس شايفاه مفيد و مبسوط أن في ناس بتقرالي و ناس بتاخد من وقتها عشان تعلق على كلامي.

أنا بس بنكش شوية و موضوع الlogout يفوت جمل ده قلته عشان عجبتني الكلمة مش مقتنع بيه قوي يعني

أحنا طبعا أكتر من مجرد مساحة شخصية، يعني أنا لما بنزل اعلان عن فعالية ما أو ملفات من تقارير حقوق انسان أو كتابات غيري أو حتي عرض لأماكن wifi-hotspots أنا أكيد نيتي أني أقدم خدمة معينة للناس، ده غير طبعا مجمع المدونات

لكن لما بكتب عن حاجة عشتها ولا عن رأيي في موضوع هنا بتبقى مدونة و بس، والله بقى أنت لما بتقروها بتنبسطوا، بتستفيدوا، بتضايقوا ده مش شغلي، الحتة دي بتاعتي و مالهاش أي هدف غير أن أحكي و أكتب اللي شايفه و حاسه زي مأنا شايفه و حاسه (و على فكرة باستثناء حكي ما جرى يوم الفتاء دي أقل حاجات بتتقري على الموقع، و يا ويلي يوم ماكتب عن حاجة غير المظاهرات و الغم ولا حد بيعبرني أصلا).

أما موضوع من أولها نقول الزيارة ليها أصول فده حاصل فعلا، بدليل أن التعليقات بتعدي علي الأول و أنا أختار ايه أنشره و ايه منشروش. و بعدين مين اللي قص لسان التاني مش انتي اللي عاوزاني أبقى مؤدب و أربع ايدي، أنا واد وسخ وقبيح و أسألي اللي يعرفوني

و بعدين هو ايه الخنقة دي، الواحد ماشي ماسك لسانه من أول ماتولد يلم نفسه في البيت عشان أهله، يلم نفسه في المدرسة مع أن كل اللي فيها معرسين ولاد وسخة، يلم نفسه في المعهد عشان لو فتح مش هيخلص، يلم نفسه في الشغل عشان اللي دافع دم قلبه ده مش ذنبه الفلوس تروح على الفاضي، يلم نفسه في الشارع عشان ناس ميعرفهاش ولا عمره هيعرفها، يلم نفسه في المظاهرة عشان البرجوازيين فاكرين الشعب مؤدب و حيائه بينخدش، سيبوني أبعتر نفسي شوية من نفسي بقى بدل ما أطق و أعمل مصيبة، تلاقوني واقف في وسط أبو النمرس بقول يا عوووووومااااااار

ياعم بعتر زي ما انت عاوز

يعني هو حد قالك حاجة ... ما انت بقالك قرب السنة نازل شتيمة في رئيس الجمهورية وما حدش كلمك.

بس انا بجد عندي نقطتين محيريني

الاولى: اشمعنى انت سايبينك كده تشتم وتبرطم وما اتقبضش عليك ... اوعى تقول لي ان فيه T1 Connection في قسم شرطة العمرانية وانك بتكتب الكلام ده من الزنزانة وبيطلعوك تتظاهر وترجع تاني.

التانية: ليه كل المدونات ومنتديات الحوار على النت اللي بتتكلم في السياسة فيها دكتاتورية مطلقة ... ده حتى يمكن انت معقول جدا وبتسيب الناس تتكلم وديكتاتوريتك بتتمثل في شتيمتهم بس. ده فيه ناس تانية زي منتدى محاورات المصريين شالوا كل مشاركات واحد منهم علشان شتمهم في موقع تاني ... وكل ما تسأل واحد سواء انت او هم يقول لك ما انا مفقوع مرارتي في البلد وانا هنا بقى الريس (شكل الكلام بيبقى هزار لكن اتضح انه بجد) ... يعنى انا بسأل سؤال لو انت او حد من الناس دي مسك منصب في البلد حيعمل فينا ايه ؟؟؟؟؟؟؟؟؟؟؟؟؟؟؟؟؟؟؟؟؟؟؟

أحبك لما تقول كلام يلزم يترد عليه

أولا لازم تفهم شوية حاجات، المدونات صفحات شخصية المفروض أنها بتعبر عن رأي صاحبها و كتير من المدونين بينشر التعليقات اللي تهمه و تحسسه أن فيها اثراء للحوار و بس (و طبعا ممكن يختلف المعيار من حد لحد)

الديمقراطية في المدونات نابعة من فكرة أن أي حد ممكن يعمل مدونة و يقول فيها اللي هو عاوزه، مش أن ممكن أي حد يقول أي حاجة في أي مدونة مش بتاعته.

فبلاش الشكوى دي فتحلك مدونة و عيش حياتك

الديمقراطية تبقى غايبة لما حد يقول أنا بوفر مدونات لكل فكر و بعدين يرفض يوفرها لفك معين، و لما حد زيي يشغل مجمع لكل المدونات و بعدين يقرر أنه يطنش مدونات بعينها لاختلافه مع فكرها لكن التعليقات دي كل صاحب مدونة و هو حر فيها.

أما بالنسبة للمنتديات، أولا في رأيي المنتديات من أسوأ وسائل النشر و النقاش و التواصل، و بتشجع دايما على الخناق و الجعجعة و التدخل من قبل الالهة مديري المنتدي و جه لأسباب كتيييييير مرتبطة بتصميم برامج المنتديات أصلا و بالأعراف الجارية فيها

و بالتالي عادي جدا اللي أنت بتشكي منه

بس برضه لازم نفرق بين حاجات، الديمقراطية حاجة و حرية التعبير حاجة تانية، و حرية التعبير حتي لما بتكون مطلقة بيبقى مفهوم أن مش في كل المنابر

يعني ايه الكلام ده؟ مثلا EGLUG عندها منتدى و في رأيي الشخصي EGLUG ديموقراطية جدا جدا جدا، بس في نفس الوقت EGLUG مهياش مساحة مطلق فيها حرية التعبير، في مجموعة قواعد و ضوابط (أهمها الالتزام بموضوع البرامج الحرة مفتوحة المصدر)

أومال EGLUG ديمقراطية ازاي؟ لأن القواعد دي المجموعة هي اللي اختارتها بأسلوب ديمقراطي، و متاح للمجموعة تعدلها وقت ما تعوز، و لأن تطبيق القواعد دي بيتم عن طريق ناس تم انتخابهم و بمساعدة المجموعة كلها و بيتم في شفافية مطلقة و متاح للمجموعة مراجعة و مسألة المشرفين في أي لحظة.

و هنا بيبان أكبر مشكلة للمنتديات، من غير ضوابط على ايه المواضيع اللي تطرح، و أخلاق الحوار و طريقة تنظيم و تنسيق المنتدى (و دي كلها في النهاية عوائق قدام حرية التعبير) الموضوع بينهار و يتحول لمأساة (و ده في أي منتدى و مش حاجة مربوطة بمصر بس)

يبقى نرجع تاني تقريبا لنفس النتيجة، الديمقراطية على النت نابعة من امكامية أن أي حد يعمل منتدى مش من امكانية أي حد يعمل أي حاجة في أي منتدي

طبعا لو كل المنتديات بلا استثناء بتحجب أراء بشكل عشوائي و من غير شفافية يبقى مفيش ديمقراطية و يبقى معاك حق تقلق من الناس دي، لو فعلا في فكر بيحجب عشان صاحبه مش عشان مخالفته لقواعد معينة يبقى معاك حق، و لو رواد النتدى مالهمش كلمة خالص في ايه القواعد اللي المفروض يلتزموا بيها يبقى برضه معاك حق

لكن برضه مننساش أن مش بالضرورة تكون الناس بتطالب بديمقراطية في كل حاجة، يعني أنا مثلا نفسي أي مجموعة منظمة تدار بشكل ديمقراطي، لكن قلة قليلة اللي ممكن توافق أن جراح و مساعديه و ممرضيه ياخدوا قرارات بأسلوب ديمقراطي المتوقع أن الجراح يكون الكل في الكل في غرفة العمليات.

طبعا لو أنا أصلا نيتي أتناقش في الاصلاح و الديمقراطية يبقى لازم أتصرف بشكل ديمقراطي و أحاول أطلق حرية التعبير بدون حدود

أنا تهت، حد فاهم حاجة من الكلام اللي فات ده؟

أنا يا سيدي لا عاوز أمسك منصب ولا بتاع، لكن مينفعش تحكم على كصاحب منصب من سلوكي في مساحتي الخاصة، عاوز تحكم أحكم على موضوع المجمع و استضافة المواقع و دوري كمدير في EGLUG هي دي أدواري العامة اللي المفروض فيها أكون ديمقراطي و بأحترم الرأي الأخر و حريات الأخرين، و أظن هتلاقيني عند حسن ظنك

معلش نسيت أقول نشوفك بكره، أنا غالبا هاروح على الساعة 6 كده بعد الشغل

بأمانة يا علاء انت شاب تمام

ومصر بلدنا هتتقدم لو في كام الف واحد زيك

وانا فعلا نفسي اتعرف علي شاب زيك وعلي مجموعتكوا الحلوة دي

ونردد مع بعض

بسم 6 مليون عاطل حكم حسني مبارك بااااااااااااااااطل

يا مبارك اطلع برة مصر بلدنا هتبقي حرة

بأمانة وما تزعلش انت مني

لو فيه كام الف واحد زي علاء كانت البلد باظت وكنا رجعنا لعصر المماليك

ما تاخدشي كلامي يا علاء ان انا أقصد ان انت عميل وقابض او بتاكل عيش من ورا الكلام ده او الحاجات دي وليعاذ بالله.

لكن انا اقصد ان وجود كام الف قائد ممكن يبوظ البلد ويرجعها لعصر المماليك, ده حتى المركب اللي لها ريسين بتغرق ما بالك بكام الف ريس.

كفاية علينا علاء واحد ياعم ويجعل دار العمرانية عمار

والله ايمن نور ده حرامى ونصاب كبير ولو مسك البلد وده بعيد عن شنبه اللى حلقه هانقول نار مبارك ولا جنه نور الآفاق الحرامى الآهبل واهو الريس سايبه بلعب شويه عشان عارف ان المصريين فى الآخر هايتفرجوا على اراجوز واحنا بنحب الآراجوز آه لكن مش ممكن نمسكه زمام امورنا طبعا احنا نتفرج عليه وده آخره بعد كده يشوفله نصبه تانيه ينصبها فى مكان تانى ..... آل ايمن نور آل ناقصه هيه نصب وعيال....وسلام

مش عارف ايه العلاقة ما بين التدوينة دي و أيمن نور أصلا

لكن على العموم يا ريت حضرتك تشرحلنا منين جبت اليقين أن أيمن نور حرامي و نصاب، يا ريت تشاركنا في المعلومات اللي معاك يمكن نستفيد

أقولك منين يا سيدى جبت ان ايمن نور حرامى ونصاب وأفاق ومرتزق وابن 60*120 جزمه اولا شوف المؤتمر بتاعه اللى عمله عشان الانتخابات شوفه كويس

وكمان انا سألت العراف اللى قرا الكف لستك جيهان السادات اللى قالها انتى هاتبقى ملكه مصر وجوزك هايبقى الريس وقد كان وقاللى ان ايمن لو مسك ده لو وقلنا بعيد عن شنبه وماما جميله بقت سيده مصر الاولى هاتبقى مصر عباره عن عزبه زى العزبه اللى ماسكهاالسيد حسنى دلوقتى بس على اوسخ وحيث ان الاتنين اوسخ من بعض يبقى نخلينا فى الوساحه اللى اتعودنا عليها انت فاهم ان لو ايمن مسك الكبار هايسيبوه ؟ تبقى لامؤاخذه يعنى لان الكبار دول اللى ساندين السلطه وولادهم همه اللى هايسندوا ايمن برضه وماتنساش ان فى الاخر ايمن ده حتت عيل لاراح ولا جه وفى الضروف اللى احنا فيها لازم يمسك البلد واحد زى حسنى لانه راجل عسكرى يا أخ وكده انا اثبتلك انى أكثر وطنيه منك لانى اتمنعت من دخول عملى وعملولى انقطاع عن العمل وبقيت عاطل لانى وقفت فى وش واحد بيلعب طاوله مع صفوت آه وقفت فى وشه بالحق بس برضه ماياكلش الكلام ده

عايز اقولك انى من اكثر الناس المتضرره من حكم حسنى ياباشا لكن لو بصيت للبلد ككل من الزاويه الأكبر والأشمل والأهم احنا علينا العين والننى والحاجب يعنى محتاجين ريس قوى لزوم السياسه الخارجيه يا أستاذ لغايه ماشوكتنا تقوى شويه عن كده أو عالاقل الحمايه لغايه مالمنطقه تهدى شويه

لكن واحد زى سى أيمن فنجرى بق هايضيعنا خارجيا وداخليا وهايعملنا عمو البلطجى زى ماصدام عمل وأديك شفت النتيجه وبدل مالبلد مدمره داخليا بس هاتبقى مدمره داخليا وخارجيا فهمت ليه ايمن ده بلطجى وفنجرى بق وانا كوطنى مخلص وأكثر تضررا منك فى عهد مبارك ومش لاقى حد يجيبلى حقى اقسم بجلال الله العظيم ان الحال هايبقى اوسخ واقذر لو ايمن شم الكرسى يا قمر

انت باقول انا لو حسبت الموضوع من الناحيه الاكبر والاشمل وهى مصلحه البلد ككل وخاصه على الصعيد الخارجى طبعا حسنى يكسب ونولع احنا داخليا بجاز لغايه مانعدى المرحله دى . (يالهوى ايه الكلام الجامد اللى انا باقوله ده ؟ ولا احمد عرابى فى زمانه) وتحيا مصر والله أكبر فوق كيد المعتدى......وعجبى

أنت قاعد بتنجم و تقولي المستقبل هيكون عامل ازاي من غير ما تقولي أي أسباب أو شواهد

أقولك منين يا سيدى جبت ان ايمن نور حرامى ونصاب وأفاق ومرتزق وابن 60*120 جزمه اولا شوف المؤتمر بتاعه اللى عمله عشان الانتخابات شوفه كويس

يعني بالذمة ده رد على أي حاجة؟ ما تنتيل تقول ايه هو اللي أنت شوفته فى المؤتمر اللي خلاك متأكد من أني نصاب و ضلالي و بلطجي و عيل و دياولو

و بعدين ما تثبتلكوا على رأي، أيمن نور بتاع أمريكا ولا أيمن نور هيزعل أمريكا و يودينا في داهية؟ اختار واحدة منهم و أشرحلنا عرفت منين

انت شكلك هاتعيش فى فيلم مش بتاعك انتوا من الاخر شعب عايز ضرب النار ويستحسن الفعص بالجزم ومبارك استاذ فى ده خليكوا كده اتكلموا ومبارك سايبكوا تلعبوا وتصوصوا واهو كله كلام فى الهوا لايودى ولايجيب يا عم السياسى الكبير حوش حوش السياسه اللى بتنقط من البنطلون

وخساره اصلا الوقت اللى باضيعوا فى الصفحه الهزيله دى وأى غلط انا ممكن تكبر فى دماغى وأجيبك من بيتكوا يا شاطر عشان انا متخصص فى الحاجات دى كويس وساعتها هايبقى شكلك وحش وانت بتعيط زى الكتكوت اللى سبقوك عملوا كده روح العب بعيد وانا هالغى الصفحه الهايفه دى من عندى بعد ماتابعك يومين عشان لو قليت أدبك أظبطك يا سوسو باااااى

لوهلة أفتكرت أن في بني أدمين عاقلة بتأيد مبارك و اتخضيت جدا لكن أنت دلوقتي أطمنت

الكل عمال يتكلم عن انتخابات الرئاسه والمرشحين الجدد والقديم ويفاضلوا بينهم من النواحى السياسيه والماديه والاخلاقيه والذمه الماليه وفى نفس الوقت كل المرشحين جداد وقديم بيتكلموا عن رفع مستوى المعيشه و المستقبل المبهر اللى فى انتظارهم واللى مش ممكن هايحصل ومستعد احلفلكم على المصحف وبالله واللى مش مصدق عندى استعداد احلفله ( بالطلاق ) انه مش هايحصل من اى واحد منهم والسبب بسيط جدا وكلنا عارفينه لكن بنستهبل وعاملين نفسنا مش عارفينه..............

الدين..الدين...الدين

الدين أولا واخيرا

حد فيهم جاب سيرة الدين والدفاع عنه بأى حال من الاحوال واللى ابسطها واقلها اولا الدفاع عن المصحف والتدنيس اللى بيتعرض له من ناس حسبى الله ونعم الوكيل فيهم

وتانيها التصدى بكل الطرق للكتاب الجديد اللى سمعت انه بدأوا يدرسوه فى بعض الدول العربيه هذذا الكتاب المسمى ( الفرقان المجيد ) وشكرا

يا جمااااااااعة ياريت يا عم علاء لو حافظ اغنية بكالوريوس اللي اتغنت في مظاهرة ادباء الاخيرة تكتبهالي او تديني لينك تكون عليه اصل الاغنية دي دخلت دماغي اوي انا واصحابي وعاوزين نحفظهااااااااااااااااااااااااااا

أنا كنت عيان أصلا و معرفتش أسمع حاجة، اسأل على منتدى كفاية يمكن حد يدلك

بصراحة يا علاء كنت متخيل انك بضيع وقتك علي الفاضي .. واني ورهنت نفسي لو قريت التعليقات اللي جيالك هلاقي كلها بتهلل وتأيدك- اصحابك بقه يا عم-لكن اللي فرحني بجد ان فيه معارضة والالطف ا لسه فيك جهد تناقش

عمار يامصر

ليه الناس دايما داخلة بفكرة مسبقة كده

يا عم أغلب اللي بيقروا الصفحة لا أصحابي ولا حاجة، و بعدين أنا قليل ما بكتب حاجة تستاهل التعليق أو تفتح مناقشة، هتلاقي أغلب البلوج اعلانات و كتابات غيري، , و هتلاقي أغلب التعليقات مش في صلب الموضوع الأصلي و بص كده على التدوينات اللي جالها أكبر عدد من التعليقات

و يمكن أخر موضوع اتفتحت مناقشة مثرية في تعليقاته كان the grand islamic experiment و ده كان من زمان قوي للأسف

أما عن المعارضة أنا عندي معارضة متخصصة و متفرغة

اخي العزيز

عندي فكرة بمليون جنيه ايه رايك لو نجح حسني في الرياسة و سقط الوطني في البرلمانية؟

الوطني ده بؤرة فساد و مصالح و صعب جدا هزهم لدرجة الخسارة

اللي ممكن نعمله أننا نركز على افراد بعينهم، ليهم سلطة و تاريخ كبير (زي الشاذلي مثلا) و ننزل قدامه بمرشح يتفق عليه الكل و شغل مباشر في الشارع و مراقبة شعبية و دعم من الصحافة الخ الخ

لو قدرنا فعلا نكسب معركة زي دي هنهز النظام جامد و هندي رسالة للناس اللي في الوطني لكن مش جزء من المطبخ أن جه وقت مراجعة النفس

من المؤسف ايها الحيون ان تتكلم علي عمك ايمن نور بهذا الشكل فانت من النوعية التي تعشق جلاديها وخليك متمرمط في البطالةوالتعذيب والقهر وجبت منين ان هو نصاب وحرامي ولا التهم تلقي جزافا

لا اعلم لماذا تزكرت بيت الشعر الذى يقول

بالعلم والمال يبنى الناس ملكهم ********* لم يبن ملك على جهل واقلال

وانا اطالع اخبار بعض الممثلين ومسلسلاتهم في شهر رمضان الكريم والتي تلقى كل الاهتمام من الجميع ولا ادري لماذا قفزت الي الذهن مقارنه بسيطه بين وضع استاذ الجامعه والفنان ماليآ لفت انتباهي بعض ما نشر في الصحف عن دخول هؤلاء الممثلين خلال شهر رمضان( فقط) وليس عبر العام كله واليكم بعض الامثله المشجعه علي التمثيل (مع حفظ الالقاب) 1- يحيى الفخراني : تقاضي 2.5 مليون جنيه نظير قيامه ببطوله المسلسل الجديد (المرسى والبحار)غضب اللة عليه والهام شاهين: تقاضت مليونا وستمائه الف جنيه مقابل بطوله مسلسل (علي نار هادئه) وربنا ياخذها اخذ عزيز مقتدر حسين فهمي: حصل علي مليون وربعمائه الف جنيه مقابل قيامه ببطوله مسلسل (الشارد)وان شاء اللة سيشرد ويبيع الى وراة وقدامة نجوى ابراهيم: العائده للتمثيل تقاضت مليون جنبه نظير بطولتها لمسلسل (عواطف النساء)وهى لحقت تخلص فلوس عثمان احمد عثمان حسن يوسف:تقاضى اجرا مليون جنيها عن نفس المسلسل السابق كما شارك حسن يوسف في مسلسل اخر (مسائل عائليه جدا) باجر اخر مليون جنيها اي اجمالي 2مليون جنيها ومزيدا من التقدم يا فضيلة الشيخ وتحياتى لشمش محمد صبحي : مليون و 300 الف جنيه لبطوله مسلسل (انا وهؤلاء) وهههههههههههههههههههههههههههههههههههههههه فيفي عبده: مليون جنيه لانها 0ست متواضعه جدا لمسلسل ( ست اصيله) لانها فعلا اصيله ومأ صلة وياترى بطلتى هز ولا لسة وعملتى اية مع الواد مدحت صالح ىاترى صالحك ولا لسة يامدرسة الاداب حنان ترك:(ياه حرام غلبانه صعبت عليا جدا) 800الف جنيه مسلسل (ساره)وهى تعوض الباقى من سكة تانية هى عارفاها هاني رمزي: الذى فرض نفسه علي التمثيل تقاضي مليون جنيه لبطوله المسلسل البائخ ( مبروك جالك قلق)وانشاء الله يعيش في قلق علي الدوام وربنا يأخذةهو والى عملة ممثل محمد هنيدي:اللي المفروض انه محسوب علي الدوله رجل ولكن انا انصحه انه يحول نفسه الي انثى بدلا من ان يتعب نفسه في ادوار الستات وانا ياعم علية مصاريف العملية ولايهمك اي شيئ والف من يطلبك للزواج علشان فلوسك *** لانه بيتقاضي ملايين غير ايرادات الافلام الى مش عارف الناس بتتفرج عليها ازاي وعل سبيل المثال فيلم(يا انا ياخالتي ) اللي ابوه كان عاوز يتجوزه في هذا الفيلم## بالذمة دة كلام اغنية ولا الاغنيه البائخه اللي كان بيغنيها بالزمه دا رجل ياناس ولكن لا يوجد نسبه وتناسب باي درجه فهذه الارقام تقول ان ما يتقاضاه ممثل منهم خلال شهر رمضان( 2,5مليون جنيه ) يعادل دخل الاستاذ الجامعي لمده 70 سنه(وهذه ليست نكته ولكنها حقيقه وربنا يخلي وزير الثقافه اللي عملهم سعر لهؤلاء المشخصاتيه وقود جهنم انشاء الله خالدين فيها مخلدين لانهم من اهم عناصر الفسق والفجور والدعاره الخ في مصرعصرالطاغية مبارك

لو أدركت كم الذنوب التى جنيتها بسبب مقالتك هذه و ما جمعته فى صحيفتك من سيئات بقدر ما كلته من تهم و سباب لاخرين حتى و لو كانوا ممثلين أو حتى راقصات و لكن علام العتاب ؟ فى الحقيقة كانت هذه أول مرة أدخل فيها على مثل هذا الموقع المشبوه و بالتأكيد ستكون آخر مرة أيضا و لكن طبيعى أن تكتب مقالتك من خلال موقع مثل هذا الموقع الذى يعج بسيل من الشتائم و البذاءات التى تنم بكل وضوح عن المستوى الآخلاقى المتدنى للقائمين عليه 0 وآسفاه على شباب مصر 0 عفوا تلك قلة لا تشرف بأن تنتمى لتراب مصر أو لشبابها الواعى 0

التعليق اللي فوق ده كاتبه شخص مجهول (Anonymous) لا علاقة له بأصحاب الموقع ولا بموضوع المقال الأصلي.

i like to would say that i like aflam

أقدر أعرف حضرتك عرفت منين أجر النجمة حنان ترك عن مسلسل ساره مين قالك 800 ألف جنيه دي ماحصلتش حتى ربعهم وبعدين إيه طريقة ولغة الحوار الهابطة دي اللي إنت بتتكلم بيها عن ناس محترمين ولا هو حقد وخلاص وبعدين إيه التلميحات الغير محترمة في كلامك عن حنان ترك لو سمحت إلزم حدودك في الكلام

يا أستاذ يا مجهول إحترم نفسك وإنت بتتكلم عن النجمة حنان ترك وبلاش تلميحات قذرة وحقيرة عن قضية ثبتت براءتها التامة فيها لكن إحنا كدة نصمم على الإتهام ونطنش البراءة وحنان دي يا أستاذ قد تكون أفضل عند الله من مليون واحد من عينتك

الاخ : صاحب موضوع لا اعلم لماذا:

الحقيقة انا مستاء جدا من اسلوبك دة مش نقد دا تجريح مهين جدا و كمان دة يسئ الى سمعة اناس لا تعرف عنهم شيئا ....فجميعنا مثلا يعرف حنان ترك و كم هى فنانة ملتزمة و محترمة بكل معنى الكلمة.....انا حزين من مثل هذا الرائ ....الحقيقة و بئس الراى....

رجاء ممن يكتب ان يمتب بوعى و بضمير و ان لا نسب اناس قد يكونوا افضل منا.

و شكرا

لا أجد الكلمات المناسبة التى تعبر عن درجة اشمئزازى من المقال الذى كال فيه كاتبه بتاريخ 9/11 سيل من التهم و السباب لعدد كبير من ممثلى و ممثلات مسلسلات رمضان 0 و للعلم أنا لا اتابع مسلسلات فى شهر رمضان أو حتى غيره و لست على صلة بأى منهم و لكن من أنت يا كاتب هذا المقال البذىء حتى تحكم على الآخرين و ما أدراك بخاتمتك ؟ و ما أدراك أن تكون خاتمة من انتقدتهم و انتقدتهن و رميتهن بالباطل أن تكون أفضل من خاتمتك بمراحل 0 كيف تخرج من هذا الشهر الفضيل و لم يمضى على نهايته سوى أيام قليلة و أنت بهذا القدر من الأذى ؟ ان العبرة بالخواتيم فاتق الله عفا الله عنا جميعا و عفا عنك 0 اللهم نسألك أن تحسن ختامنا و أن تقبضنا على طاعة 000 آمين

يا اخوانا المشكلة مش ريال والا ام بى 3 فيه برامج بالهبل تحول من شيئ لشيئ المشكلة فى جودة الصوت بس ، تصبحوا على خير

أنيس : اهو هوه ده لقاء السحاب بصحيح. على فكره مجلة روزاليوسف مجله محترمه أوى فيها ناس متنورين وشرفاء وليهم هيبه كده كأنهم شغالين فى الأمن شفت ذنقوا الواد جمال اذاى وخلوه يوضح موقفه اهى هى دى العلمانيه ولا بلاش...

تعيس :علمانية ايه هو فى حد فى الوطن العربى فاهم معنى الكلمه دى ايه ده حتى عمنا زكى نجيب محمود (مش محفوظ) ماعرفش يعمل فيهاايه وقعد يقول عاء فتحه عيى لحد ما مات وفى نفسه شىء من العلمانيه اما لقاء السحاب فعندك حق أنا من زمان مسمعتش عزف وغنه حلو كده

أنيس:يااخى بلاش افتره ده قال انه مش هيرشح نفسه وان هوه وباباه ملهمش فى التوريث اى نعم ماجبش سيرة الماما بس الرجال قومون برضو

تعيس:يبنى هو كان ابوه رشح نفسه كل اللى فيها اللى قبله لما اتقتل جوله شوية بتوع قالوله والنبى أحكمنا قلهم البركه فيكم كلنا(والبركه فيكم كلنا دى مش غلطه مطبعيه هوه قالها كده من اللخمه)اما حكايت التوريث على حد علمى المتواضع جدا ان الأنبياء هما اللى لا يورثوا حتى ابقى أسئل شيخ الأزهر ولا بلاش سيبه فى اللى هوه فيه ما هو بقى ملطشه يا ولداه وبعدين ما الشعب المصرى سمع أبوه بيقول مش حاخد فتره تانيه واخد بالك كانوا بيقولو فتره مش ولايه وبالمناسبه ولايه دى تنفع امريكانى وتنفع أفغانى وبعدين لو اخونا بقوا اغلبيه ومالواتبقى خلافه واديك شايف ابو مازن أهوه ما هو قاعد ده لو رضى وحتى لو طلع السر اللألهى اهو فى وسط العياط والووله فى مجلس الشعب ينصب خلفا لفقيد العالم والوطن العربى وبعدين جمال ولا علاءولا سخام هتفرق ايه

انيس: أزاى حتفرق ايه امال كل المظاهرات دى والبهدله اللى بتحصل للشباب ملهاش لزمه يعنى نقعد فى بيوتنا ونسمع الأخبار

تعيس: شوف انا عارف انك عاوز تلحق المتش والكوره واكله دماغك اليومين دول عشان كده هنقلبها كوره طبعا انت عندك فكره عن الأحتراف شوف ياسيدى لما السادات وقع عقد احتراف مع الأمريكان بأسم مصر أصلها كانت زمان لاعب اساسى فى فريق الشرق الأوسط وكمان كانت بتلعب فى اسيا وافرقيا حاجه كده ليها قيمه اى نعم ماكنتش الحياه لونها بنبى وكانت يمكن ضنك بس كان زى مقلتلك فى قيمه المهم وقع عقد الأحتراف بكام مليون وحتت أرض هيا كانت بتاعتها وكان فيه عصابه وخداها بوضع اليد ورهناها عند الأمريكان وبقت مصر بكل حرفنتها وتاريخهاورصيدهاالأستراتجى بتلعب فى ملعب الأمريكان خلى بالك مصر هى اللى بتلعب مش السادات مصر فضلت تلعب وهيا مش عارفه حتى شروط العقد زى الناس اللى بتشجع مابتكنش عارفه خطط المدرب ولما جه المدرب الجديدفضل ماشى على نفس الخط يعنى موظف مهو كان ماضى شاهد وكانت الحكايه فى منتهى البساطه بص على كل سياسة مصر الخارجيه عباره عن فوطه وخرطوم فوطه تلمع مكان الأمريكان وخرطوم يطفى اى حريقه يعملوها وهما بيضبشوا أما جوه يعنى السياسه الداخليه فعباره عن جزمه ومحفظه جزمه تقهر ومحفظه ترشى وفى النص شباب لاعارف منين ولافين ولاليه ولاازاى اللى بيعرفله حاجه فى الحاله دى هيضرب دماغه فى الحيط المهم كل اللى عاوز اقوله ان من حق مصر انها تعرف بالضبط ايه شروط العقد دة ويا تغيره ياتلغيه وبالدمقراطيه اللى فشخونا بيها دى ولو حصل ده اى حد يحكم هيبقى موظف عند صاحب العقد اللى هو فى الحاله دى مصر

أنيس : بس برضو مجلة روز اليوسف عملت اللى عليها وكل محرريها ناس اشراف ومحترمين وشرفاء ومناضلين وعقلانين وعلمانين وتحس كده انهم ملهمش فى النفاق ولامسح الأوساخ ولا التباته ولا السطحيه ولاالتلميع وبعدين عوزين مصلحة البلد وتحس كده انهم عندهم هيبه زى رجال الأمن تمام وفيهم واحد عنده تكشيره كده فى وشه عمله كده زى الصرامه اللى بيقولوا عليها وكل لما بشوفه بيفكرنى بفؤاد المهندس لما بيغنى انا واد خطير جدا خطير

تعيس: هى فين الحيطه

انيس : شفت اللى حصل يجى ألف بنى أدم يروحوا، بسبب الأهمال والأستهتار وتحصل أنتفاضة حجاره، و زعيم البلاد المفدى بدلا أن يذهب مواسيا،ومرابطا مع هؤلاء المنكوبين يذهب ليشجع المنتخب القومى. تعيس : مرابطا.. انته عارف يا انيس فيه ناس شكلها غبى بس فى الحقيقه هى مش غبيه وده بينفعها زى يلسن بتاع روسيا،وزى صاحبك ده.. انيس : مش فاهم .. تعيس : أصل الأداء السياسى فى الدول اللى مش مصنفه سياسيا زينا لموأخذه بيخضع للغريزه زى الغابه كده، يعنى مثلا قد يحدث فى البلاد والعباد شرا كبيرا بسبب ضربت جزاء يكون اخطر من غرق الف عباره،خاصة لو كانت هناك موجه عاليه قد تتحول لتسونامى آخر كموجة الرسوم التى اتت من بلد تضحك فيها الأبقار علينا، يبقى فين المكان اللى لازم يروح فيه الزعيم المفدى، طبعا حيث ينشغل الناس وتهفوا قلوبهم، وفى الحاله دى لو فازالفريق يبقى الريس وموقفه الملهم، وان لم يفز يبقى الريس عمل اللى عليه .. انيس : طب لو هوه زى مابتقول ليه مسهلهاش على ابنه فى موضوع الحكم .. تعيس :يبنى هوه فيه اكتر من اللى هوه عمله ده فضل مقرطس البلد تأبيده بقانون طوارىء ومن غير نائب لما البلد اتحولت بص فى اللى حوليه .. انيس : أنا نفسى أعرف أنته ليه فاكر أن جمال عاوز يحكم مصر بعد أبوه .. تعيس : بعد ابوه قبل أبوه ، متفرقش شوف يا انيس المشكله ان الموضوع ده بالذات بيتحلل فى غير مكانه، يعنى لو واحد مثلا عربيته خربت مش معقول يوديها للدكتور .. انيس : قصدك ايه ..ده موضوع سياسى والكلام فيه يخضع للتحليل السياسى .. تعيس :اعتقد ان هى دى المشكله بالضبط ففى الحقيقه لا الموضوع سياسى ولا فيه ادوات لتحليله ثم مين قال ان فى سياسه من اساسه مش قلت لك قبل كده هما الفوطه والخرطوم بره والمحفظه والجزمه جوه .. انيس : يظهر المره اللى فاتت خبطت دماغك فى الحيطه جامد .. تعيس : يا ابنى لازم تعرف ان جمال مش عاوز يحكم مصر ، هوه لازم يجكم مصر، و السبب مش السلب والنهب فهو بسم الله ماشاءالله زى ما انت واهلك يعرفون،اى نعم موضوع السلطه لايقاوم بس برضو مش ده السبب .. انيس : ايه يعنى عاوز يحكم مصر غلاسه .. تعيس : اعتقد انه عاوز يحكم مصر دفاعا عن النفس .. انيس : دفاع عن النفس ياابنى ده أقوى راجل فى مصر .. تعيس : طيب تفتكر أقوى راجل فى مصر لو محكمش مصر هيتعمل فيه ايه لو حد تانى حكم مصر وامامك التاريخ من العصر الفرعونى حتى العصر الفشخونى الحالى، حاجه من اتنين يا هيتنفى مثلما حدث مع ملك مصر والسودان، يا هيتعمل فيه زى ما ابوه عمل فى المجاهد عصمت السادات وخالد الذكر رشاد عثمان فيسجن وتصادر املاكه بعد محاكمته محاكمه عادله تشغل البلاد والعباد،وتبشر بعهدا نظيف اليد كما فعل ابوه تماما وهتلاقى الناس بتقول شوف يا ولداه كما تدين تدان زى ما سجن اخو السادت بتهمت الفساد عشان يشتهر بالأمانه بقالوا فى ولاده .. انيس : بس تفتكر الأمريكان هيتخلوا عنه .. تعيس : هى فين الحيطه

انا نفسي و ما يكتر علي الله ان السيد الرئيس يعمل النظام وزاري و الرئيس يكون ولا حقولكوا حوجع دماغي ليه اللي عايزينوه يعملوه احنا سلمناها لله من زمان كفايه الاسعار النار وبيزودوا الموظفين واللي زيينا مع نفسيهم ياكلوا زلط هما وعيالهم خلوها علي الله

حيرة وخوف بيحوطنا كل ما بنحاول نعرف ، لما كنت ياعلاء في اليوم الخامس كان في ناس نفسها تعرف وتفهم وتحس بس خايفة ، خايفة من انها تدفع الثمن ، خايفة من التعذيب وهتك العرض ومرعوبة علي ولادها واهاليها بس عايزة تعرف ، الخوف مشكلة صعبة ، سورها عالي اتربي فينا وجوانا ويابخت اللي قدر يعدي بس اللي لسه بيشاور عقله مشكلته صعبة ، الاختيار ، الموازنة ، مشكلة صعبة ، بس الله المستعان .

الحيرة ، حيرة اللي عارف : اذا كان العارف او العالم بالحال يزداد حيرة كل يوم ويطالبه عقله انه يدقق وميمشيش وراء الرموز والتأليه ، ويحكم عقله ويعترف لنفسه ضمنيا ان كل شيئ متغير ما عدا الله يعني ممكن جدا ثائر سنة 2006 يبقي سنة 2020 وصولي ويركب الموجه ، الثابت هو الله ، لازم تحكم عقلك ، كل خطوة ومتبعش دماغك . حيرة اللي مش عارف : ، بس الحيرة عند الميعرفش اكبر واللي معندوش فكرة عن اللي بيحصل حيرته اكبر ، يصدق مين ، الصوان زحمة ، مولد وصاحبه غايب ، احزاب احزاب ، وكل حزب وجماعة لها فكر تقرا وتشوف تمشي وراهم وثاني يوم تلاقي مصيبة تصدك عنهم وهكذا ، طيب وبعدين . حيرة وخوف ، خوف من تلاميذ ابو غريب ، وحيرة من كتاب مصر اللي تقريبا كثير منهم ركبوا الموجه بعد ما كانوا مليين المعتقلات ، وغيروا ذمتهم وزوروا تاريخنا . حيرة وخوف والاختيار صعب نعمل زيك ونرمي نفسنا في وسط المعمعة وربك يستر بس نقول ايه كفاية ولا وسط ولا اخوان ولا كرامة ولا نقول ايه اقولك نقول مصر وبس مش كدة ومعلش ياعلاء امام بردو مصدقينه وبنحبه وعاش ومات من غير ما يركب موجة ولا يتغير من ليك وللي زيك امام بردوا ... ملاح يا أسمراني .. الشيخ امام عيسى ملاح يا أسمراني .. يا معدي البحور موالك سباني .. و مشيت ع الجسور متعمشق و غاوي .. و معاك الغناوي إبدر حبه حبه .. و إملا النيل تقاوي و يطوف بالمداين .. عصفور الجناين يرمي الحب حبه في قلوب الأحبه .. تخضر المحبه و تفرع غناوي