You are here

لا لمبارك أب و ابن، لا للفردة و الاستبن 3

Primary tabs

اليوم الثالث: الأثنين 1 أغسطس

صور

النائب

قولي يا نائب فكرك ايه يسقط يسقط حسني مبارك
برضه فوت النائب العام، المحامين بيقولوا محصلش تحقيق عرض أوراق فقط، قعدت في الشغل لحد مجالي خبر قرار أخلاء السبيل، هتعملوا ايه يا جماعة، قالك معتصمين لحد ما الناس تطلع فعلا.

مركز الدراسات

شوية و كلموني، سيبنا نقابة المحامين، حصل شد هناك مع ناس معروف عنهم أنهم مباحث و شكلهم مزقزق علينا، الناس قالت ده وقت فرح مش غم بينا نروح على مركز الدراسات الاشتراكية، حصلتهم هناك، تورته و جاتوه و ناس مهيصة، الناس شكلها مجهد جدا، نورا رايحة على الدراسة تجيب أخوها، مش مصدق أنهم هيسيبوهم في ليلتها.

المحامين شرحولي مفيش تهم بشكل رسمي، أغلب المعتقلين رفضوا يردوا على أي أسئلة و قالوا نيابة أمن الدولة غير دستورية و شككوا في حياد و نزاهة النيابة و طلبوا قاضي تحقيق، يعني المفروض ياخدوا 15 يوم، من الأخر ده انتصار لينا.

المركز قريب من البيت، خدت منال و روحنا نريح شوية لحد ما يبان مصيرهم ايه، شوية و عرفنا أن أفرج عنهم فعلا و الناس بتحتفل بيهم في نقابة الصحفيين، محمد سمير جاب معاه صينية حلويات شرقية من الأردن سحبتها و جريت على النقابة (المصادر المفتوحة تتضامن مع الحركة الديموقراطية المصرية)

احتفالات

كفارة شريف يونس عجبتكوا الحلويات؟ كفارة يا محسن
في النقابة قابلت المعتقلين، لسه بهدوم يوم السبت و الريحة عال، كفارة يا وائل كفارة يا محسن كفارة يا شريف كفارة يا أحمد كفارة يا أسامة.

نطلع على الجريون بقى الموضوع يستدعي بيرة، في الجريون سمعنا نوادر الحبس من وائل خليل، حكى عن الغلابة اللي كانوا نازلين طلعت حرب يشتروا هدوم و اتلموا معاهم، عن مصور الغد اللي ملوش في السياسة بجد و انهار ازاي لما شاف ولاده، عن الألعاب اللي لعبوها عشان يمضوا الوقت (أنا شايف الواحد يمشي بكوتشينة في جيبه الأيام دي) و ما الي ذلك، و عن الولاد بتوع الجهاد اللي اتمسكوا في كرداسة و قعدوا يعذبوا فيهم شهرين قبل ما يعرضوهم على النيابة (ارهابيين في الطريق أهه هدية من العادلي و كلابه)، كل المساجين حواديتهم زي بعض، اللي اتحبس يوم و اللي أتحبس خمس سنين.

احتفال بالجريون
أتنقلت للترابيزة اللي فيها أهلي و أهل نورا، ياه فرصة أقعد مع بابا، أجمل مفاجأة كانت أني ألاقي الاستاذ حنا جريس على الترابيزة، اتكلمنا كتير عن المدونات و المدونين المصريين، عن موضوع الأقباط و المواطنة و التقصير الشديد من كل الناس في التصدي لقضايا الأقباط، عن الكشح و سنينها و البابا و مبايعته و غيره و غيره


اقرأ