You are here

del.icio.us أو روابط في اللذيذ

Primary tabs

ازاي ديليشوس

Web 2.0

من كام سنة كده في نفس وقت ظهور المدونات حصل نقلة في في تفكير المبرمجين تجاه الوب، نجح مجتمع البرمجيات الحرة/مفتوحة المصدر بالأساس و بعض شركات ما بعد الدوت كوم في تغيير ثقافة الوب و رجع الناس يتكلموا عن وب كأداة لتمكين البشر و وسيلة لاطلاق العنان لابداعهم. الطريقة الجديدة في التفكير و العمل دي نتج عنها شوية أفكار فلسفية أساسية و تكنولوجيات و best practices و خدمات اطلق عليهم مجتمعين Web 2.0. أو وب الاصدار الثاني.

التدوينة دي مش لشرح Web 2.0 لكن المهم نعرف شوية أفكار أو مبادئ أساسية تعتبر صميم وب 2.0 (خدي بالك أن ده أصلا موضوع خلافي تعريف web 2.0 اختلف عليه الناس و فيه ناس رافضة الكلمة أصلا)، قال ويكيبيديا:

a social phenomenon referring to an approach to creating and distributing Web content itself, characterised by open communication, decentralization of authority, freedom to share and re-use, and "the market as a conversation"

كلام جميل بالنسبة لي المهم في وب 2.0 هو التركيز على البشر مش المعلومات، الناس العادية مش الخبراء، المستخدم مش المبرمج ولا البرنامج ولا الشركة، لكن الفكرة الثورية خلف وب 2.0 هي أن في حالات كتير مجموع رأي عدد كبير من الغير خبراء قيمته أعلى من رأي عدد قليل من الخبراء، و لو مجموع الرأي ده يشمل الخبير و اللي مش خبير و اللي في النص يبقى خير و بركة.

فكرة بسيطة جدا و تبدوا لناس كتير في الأول مرفوضة، لكن دي الفكرة اللي مبني عليها حاجات كتير ناجحة زي جووجل، و ويكيبيديا، و الذكاء الصناعي الواعي بذاته 20Q و مجتمع البرمجيات الحرة/مفتوحة المصدر، و الصحافة الشعبية، و الديمقراطية. و منها ظهرت فكرة الfolksonomy أو التصنيف الشعبي.

Folksonomy

من زمان و أحنا قاعدين ننظم و نصنف البيانات و المعلومات و المحتوى بجميع أنواعه، و فيه علوم للتصنيف (من أول تصنيف الكائنات الحية لحد علوم المكتبات) و خبراء تصنيف، و مشاريع ضخمة كل المرجو منها هو تصنيف حاجات. الفكرة الأساسية وراء التصنيف كانت أنك تجيب خبير و يقعد يشتغل زمن طويل لحد ما يطلع بنظام للتصنيف و قواعد ليه (ودي بتتسمى taxonomy) و بعدها كل حاجة يبقى معروف مكانها فين بالظبط، لو النظام مبني بشكل كويس يبقى أي حد مش بس الخبير يقدر يحط أي حاجة في مطرحها الصحيح (أرفف مكتبة عامة مثلا). و بعدين تطورت الأمور و حاولنا نعمل نظم تصنيف فيها مساحة لمستجدات (مثلا يفترض نظام تصنيف الكائنات الحية أنه يمكن يتسع لأي فصائل جديدة من غير تغيير البنية الأساسية بتاعته)، و بعدين عملنا نظم تصنيف يمكن للشيئ الواحد أنه يكون له أكتر من مكان فيها (خصوصا بعد ما أكتشفنا أن موضوع ذكر العنصر في مكان واحد فقط مرتبطة باعتبارات فيزيائية غير قائمة في السياق الرقمي)، و هكذا.

أي متابع للموضوع ده هيلاقي أنه دايما بيفشل على مستويات رهيبة لكن بيؤدي خدمة مهمة و بيبسط الدنيا و بالتالي استمر (أبسط مثال هو قنديل البحر الشهير بالزجاجة الزرقاء، ده عبارة عن 4 فصائل مختلفة تعيش في تكامل و بالتالي تم تصنيف كل فصيلة لوحدها و بعدين خلق فصيلة خامسة للاشارة للميكانزم كله على بعضه)، لكن لما جينا ننقل ده للوب بدأت المشاكل تتفاقم، أولا بقينا عايزين أنظمة لتصنيف كل حاجة و أي حاجة، و بقينا عايزين نربط ما بين أنظمة تصنيف مختلفة، و بقينا عايزين كل من هب و دب يعرف يصنف (زي مثلا تصنيف التدوينات في مدونتك)، و العملية ضربت خالص.

وب 2.0 قدمت حل جزئي اسمه Folksonomy، ده مصطلح ظهر بقاله سنتين كده ولا حاجة و دي دمج لكلمة Taxonomy (نظام التصنيف) و Folk (شعبي فطري)، يبقى Folksonomy هو التصنيف الشعبي الفطري. و المقصود هو أنك متجيبش خبير ولا حاجة و متعملش نظام تصنيف مسبق، مش بس كده انت تبطل تفكر في التصنيف على أنه وضع العنصر في مكانه الصحيح، فكر في التصنيف كأنه مجموعة بيانات اضافية بتشبكها على العنصر (كأنك عملت عليه علامة أو وسمته بوسم يعني).

ازاي؟ بسيطة، أنت هتتيح لأي حد أنه يصنف أي حاجة و بأي طريقة تعجبها، و أي عدد من التصنيفات، عملية التصنيف هنا بيتقال عليها tagging (يضع وسم أو يوسم)، تخيل أن كل واحد فينا ماشي بملصقات بيضاء صغيرة و قلم ماركر، كل ما تشوف حاجة تعجبك تلزق عليها ستيكارات و تكتب أي تصنيف يخطر على بالك، يعني أنا ماشي لقيت عربية رحت ملزق عليها (غالي، مضر للبيئة، وسيلة انتقال، يستهلك بترول، معدني، أحمر، هوندا، وحشة)، يجي حد تاني يشوف نفس العربية و يلزق (سعر معقول، جامدة فشخ، تحكم عالي، أحمر، هوندا، فيتيس آلي، مش عارف كام cc)، و هكذا لو عدا على العربية دي ألف واحدة و كلهم وسموها بوسوماتهم الخاصة هنقدر نعرف معلومات كتيرة جدا عن العربية و عن البشر اللي عدوا كمان.

يعني مثلا من المؤكد أن العربية لونها أحمر و أنها هوندا و كل الحقائق دي هتبان على طول لأن التصنيف المبني على الحقائق هيتكرر كتير و غالبا مش هيبقى فيه اختلاف، لكن هنعرف أن سعر العربية و تأثيرها السلبي على البيئة من الأمور الخلافية أو تعتمد على وجهة نظر مثلا، طيب لو عربية صنفها 10 على أنها ضارة بالبيئة و عربية تانية صنفها 700 على أنها ضارة بالبيئة يبقى في معلومة جديدة لأن المسألة ما بقيتش محدودة على الناس اللي شايفين أن العربيات كلها ضارة بالبيئة أكيد العربية التانية دي ضررها كبير (SUV مثلا)، طيب لو أقدر كمان أعرف مين اللي صنف ازاي مش يمكن أنا هثق في حد بعينه أكتر؟

ممكن كمان الوصول لمعلومات أكتر عن طريق أننا نرصد العلاقات ما بين التصنيفات المختلفة، يعني مثلا نبص على ايه أكتر تصنيف اتكرر مع مضر للبيئة و نشوف هل العربيات اتكررت أكتر ولا المصانع، و نقدر نعرف مدى ارتباط مفاهيم زي حرية التعبير بالديمقراطية عن طريق أننا نشوف نسبة تكرارهم مع بعض الخ.

لكن قبل ده كله ده تصنيف برضه، أقدر أقول وريني كل وسائل الانتقال، أقدر أقول وريني كل وسائل الانتقال اللي لونها أحمر و هكذا.

مثال كويس قوي لاستخدام الfolksonomy هو خدمة flickr لنشر الصور، التصنيف في flickr شعبي و عندهم أدوات كتير بتحلل التصنيف عشان تسهل عليك تتفرج على الصور.

Social Bookmarking

الBookmarking أو وضع العلامات هو الوسيلة الأساسية اللي بنفتكر بيها الأماكن المهمة بالنسبة لنا على وب (بتوع مايكروسوفت اللي عندهم نقص شديد في التفكير النقدي بيستخدموا كلمة المفضلة بدل من العلامة على أساس أن عموم الناس عمرها ما قرأت كتاب و علمت في صفحاته و عمرها ما هتعوز تفتكر حاجة وحشة)، قبل جووجل كانت العلامات دي هي الطريقة الوحيدة اللي بيها ممكن نعمل خريطة لوب و نحولها لحاجة مفهومة و يسهل الحركة فيها.

أما Social Bookmarking فمقصود بيه بكل بساطة أنك تشارك الناس في الbookmarks بتاعتك و أنك تتفرج على الBookmark بتاعتهم. نسميه العلامات التشاركية ولا حاجة مجعلصة كده عشان نبان مثقفين؟.

طبعا مزايا الSocial Bookmarking مش بس في المشاركة مجرد أن الbookmarks بتاعتك على وب معناه أنك ممكن توصلها من أي مكان حتى لو مش جهازك.

لكن الطفرة الحقيقية في Social Bookmarking ظهرت لما دمج معاها فكرة التصنيف الشعبي، أنت مش بس هتنشر العلامات بتاعتك على وب، أنت كمان هتوسمها بأي tags تخطر في بالك. و قوة الموضوع كله في قدرتك على أنك تلعب بالوسوم اللي عملتها و اللي عملها غيرك.

يعني تقدر تسأل ايه الروابط اللي عندي اللي بتتكلم عن الطبيخ و ممكن تقول ايه الروابط اللي عندي اللي بتتكلم عن الهند، و ممكن تقول ايه الروابط اللي بتتكلم عن الاتنين في نفس الوقت، و بدل ما تدور في روابطك أنت بس تقدر تقول ايه روابط الطبيخ و الهند عند كل الناس.

و تقدر تتابع ايه المواضيع اللي الناس مهتمة بيها اليومين دول و ايه العلاقات ما بين المواضيع و الناس بتشوف الدنيا و تصنفها ازاي و تقدر طبعا تتابع معارفك و روابطهم.

del.icio.us

يااااه أخيرا وصلنا لموضوع التدوينة :-)

del.icio.us هي أشهر خدمة Social Bookmarking على وب و أول واحدة تعتمد على التصنيف الشعبي (بل هي المثال الكلاسيكي للتصنيف الشعبي)، و دي خدمة بسيطة جدا، أنت بتزور موقعهم و تعمل تسجيل و بعدها تقدر تضيف أي مواقع عندهم و تكتب وصف ملخص لكل رابط و طبعا توسمه عليه بأي وسوم تيجي في بالك.

و لتسهيل الأمور أكتر فيه extension لفايرفوكس بيخليك مش محتاج تزور الموقع بتاع del.icio.us عشان تضيف رابط، كل اللي هتعمله أنك تدوس على زرار الماوس اليمين و تختار del.icio.us->post current page و تملأ الصندوق الحواري اللي هيطلعلك. و مش بس كده كمان الصندوق الحواري هيقولك كل الtags اللي أنت استخدمتها قبل كده و كمان هيشوف لو الرابط ده موجود على del.icio.us عن طريق مستخدمين تانين غيرك و يقولك الوسوم اللي استخدموها لما صنفوا الرابط.

بعد كده بقى تقدر تشوف الروابط بتاعتك أو بتاعت أصدقائك، مثلا

و تقدر تشوف روابط أي تصنيف

و تقدر تشوف روابط في أكتر من تصنيف

و طبعا ممكن نقول وريني روابط السياسة في مصر بتاعت علاء فقط.

ركزي كويس في شكل العنوان (url) عشان دي الطريقة اللي الواحد بيتعامل بيها مع del.icio.us.

و ممكن كمان تتابع الروابط اللي ليها شعبية كبيرة (عدد كبير من الناس علم عليها) أو تتابع الوسوم اللي ليها شعبية كبيرة (عدد كبير من الناس استخدمها لوسم روابط).

و كل الحاجات دي الواحد ممكن يشوفها في صورة تلقيمة RSS كمان و يتابعها على موقعه عن طريق مجمع زي مصطفي ما بيعمل أو يتابعها عن طريق مجمع شغال على جهازه.

مش بس كده، زي أغلب خدمات وب 2.0 موقع del.icio.us موفر أدوات للمبرمجين يقدروا عن طريقها يبرمجوا حاجات جديدة مبنية على del.icio.us، مثلا تقدر تشوف خريطة لحالتي الذهنية الحالية، دي عبارة عن سحابة تصنيفات (tag cloud) معتمدة على بيانات del.icio.us بتاعتي، العلامات الأكثر استخداما حجمها أكبر و العلامات المرتبطة ببعض (بتظهر مع بعض كتير) قريبة من بعض.

و كمان حاجة مشابهة لكن باستخدام الصور، و دي في الحقيقة عبارة عن خلطبيطة أو mashup لأنها بتستخدم خدمتين Web 2.0، بتجيب التصنيفات من del.icio.us و الصور من Google Images.

أو محرك بحثي للفرجة على روابط del.icio.us.

ده مش كل حاجة، del.icio.us عنده مزايا تانية و فيه مئات من الأدوات و الخدمات اللي اتبنت عليه بس كده عندكم فكرة كويسة عنه.

المهم بقى أننا ممكن نستخدم del.icio.us مع بعض لما نعوز نعمل عمل جماعي معتمد على المدونات، يعني مثلا لما عملنا بيان المدونين بعد أحداث محرم بيك كنا عايزين نلم روابط لكل التدوينات اللي اتكلمت عن العلاقات ما بين المسلمين و المسيحيين في مصر، و بعد يوم الأربعاء الأسود جمعنا التدوينات اللي عن الاستفتاء و العنف اللي حصل و عملنا منها وثيقة حتى لا ننسى، و دلوقت بنتكلم عن تجميع كل تغطية المدونات للانتخابات البرلمانية، و كمان فيه ناس اتكلمت عن كتاب يبقى فيه أحسن تدوينات الخ.

كل الحاجات دي بتبدأ بتجميع روابط، و التنسيق فيها ممكن يكون صعب، لكن لو استخدمنا del.icio.us و اتفقنا على tag موحد نقدر نعمل نجمع الروابط بسهولة، يعني مثلا أحنا فعلا بدأنا بتجميع روابط الانتخابات البرلمانية تحت تصنيف EgyptianParliamentaryElections2005

يعني من الأخر الموضوع مقلب و أنا عايز أدبسكم عشان تشاركونا في تجميع التدوينات عشان نعمل وثيقة المدونين عن الانتخابات.

لكن ممكن استخدام del.icio.us بوسائل تانية لمتابعة المدونات، ممكن مثلا تعلم على أي تدوينة تعجبك عشان تساعد اللي مش قادر يتابع المدونات مثلا، أو تعلم على التدوينات اللي أنت سيبت فيها تعليق و بكده تقدر تتابع تلعيقاتك و الردود اللي جت عليها. و هكذا بقى شغلوا خيالكم.

Comments

Nice, You can get your cloud tag from delicious, You don't need a 3rd party service anymore: http://www.foolab.org/delicious

nice but it is not the same, the one I linked too is not just a cloud tag, it's a mind map the spatial placement is important and makes for very good visualization.

check it out and you'll understand what I mean.

Hi there Manal and Alaa'

I was surfing the web and came across your blog and I was wondering why don't you join the Egypt Blog Aggregator at www.iopblogs.com

فى الحقيقة التدوينة انسيكلوباديه

تدوينة جيدة يا علاء كنت بفكر أكتب عن Web 2.0 و del.icio.us لكن مأعتقدش إنى ممكن أكتبها أفضل وأبسط من كده. شكراً على إضافتك.

أنا بجمع كل التدوينات المصرية وبحاول أعملها تصنيف بطريقة قياسية (وإن كان ده ضد مبادئ folksonomy) لكنه مهم وبيساعد فى معرفة التصنيفات المختلفة لمدوناتنا المصرية حسب المواضيع - التوزيع الجغرافى (القاهرة/إسكندرية/المنصورة/...) - جنس المدون - اللغة المستخدمة - ديانة المدون (للمدونات الدينية) - مدونة فردية/جماعية.

ممكن نتفق مع مصطفى - عمرو (صاحب الأشجار) - محمد سمير - يوسف أسعد على tags أساسية ومن ثم كل واحد حر بعد كده فى إضافى tags خاصة بيه.

My Tags Cloud: http://ikhnaton2.manalaa.net/my_delicious_tag_cloud

---
Rami Sedhom
http://ikhnaton2.manalaa.net

هاها..ماشي يا عم، و احنا نحب نتدبس.

لكن على ما أعرف أن في فلكر التصنيف مش شعبي قوي لأن صاحب الصورة هو بس اللي من حقه يسم الصورة بوسومات. المتلقين يمكنهم البحث فقط.

"نسميه العلامات التشاركية ولا حاجة مجعلصة كده عشان نبان مثقفين؟"

شاكرين على التريقة. أنت سألت عن ترجمة و دا كان الرد اللي عندنا أنا و صاحب الأشجار باللإضافة إلى "وسم" اللي انت مش مقتنع بيها قوي .يا ريت لو عندك اسم تاني سهل و شعبوي و في الفولك تقل لنا عليه.

أنت ليه بتربط بين التعبير المحدد الواضح و بين النخبوية و كمان ترجعنا تاني لموضوع "الثقافة"! و خصوصا لو كان التعبير دا مستمد من لغة قديمة شوية أو فصحى في الأساس.

الفكرة مش أننا بنحاول نجعلص الأسماء علشان نبان مثقفين زي ما أحمد رجب كان بيتّريق في كتاباته الساخرة، الفكرة أن اللي اطلع أكتر شوية و عنده وعي ذاتي لعملية التفكير لحد ما (و دا يشملك على حد معرفتي بك) و بيحاول يسمي حاجة بشكل يكون مفهوم و يوصل لقاعدة واسعة من الناس (يعني يكون شعبي) من غير ما يلجأ للمحلية المفرطة و لهجة لإقليم أو مدينة أو حارة بعينها بيلاقي نفسه تلقائيا متجه للنوع دا من المصطلحات، من غير ما يكون متخصص و لا أي كفتة يعني. قصدي أن دا مش افتعال لكن قدرة بتتجلى. اللي ما بيعرفش يا أما يقبل اللي موجود، أو يلجأ إلى بدائل على قده و الاستخدام و الزمن هما اللي يحكموا. من غير زعل يعني.

أحب أوضح أن مفيش موقف شخصي هنا و لا هجوم، لكن مجموعة من الأفكار اللي بنختلف عليها دايما و لقيتها اتشكلت في المناسبة دي؛ مش أكتر.

أنا رأيي أن العامية في شكلها العايم الحالي غير قادرة على تسجيل المعرفة بشكل مفيد و تراكمي يتيح فهمها بعد 50 سنة. و مش باتكلم عن تكنولوجيات إنترنت اللي هي أصلا مش هتكون موجودة بعد عشر سنين، لكن باتكلم عن العلوم الأساسية و الاجتماعية.

و أخيرا، del.icio.us انضوى مؤخرا تحت لواء Yahoo! و قبله بكام أسبوع كان Flickr، و قائمة طويلة من الخدمات قبلهم أدمجت في ياهوو على مر سنين.

في ناس تتوقع أن دا هايقتل روح الإبداع و بيعتبروا أي حد كبير زي ياهوو شر و احتكاري.

و ان كنت مبحبش خلافات المسميات لكن flickr تصنيف شعبي.

folksonomy تعود على نظام التصنيف بمعني على مجموعة المفردات المتاحة للتصنيف و أي قواعد هيراركية أو ترادف أو تضاد أو ما شابه، كون أن العنصر اللي هيتم تصنيفه ده هيتم تصنيفه عن طريق شخص ولا جماعة ده موضوع تاني.

طبعا أنا شرحت المثال الأعم و flickr اللي في كل حد بيصنف كل حاجة لكن المهم في الموضوع أن التصنيف عضوي و بيجي من الناس، و التعامل مع flickr معناه التعامل مع التصنيفات و العلاقات ما بينهم و أهم حاجة فيه هي تلاقي تصنيفات الأفراد المختلفين زيه زي أي نظام تصنيف شعبي.

بصراحة لما ابتديت أستخدم وسم عجبتني و الموضوع مشي بس الفعل منه يسم ولا يوسم؟

أما الحتة بتاعة مثقفين فده عشان المصدر المؤول (مش ده مصدر مؤول برضه؟ ولا أنا نسيت شوية النحو و الصرف اللي أعرفهم؟) مش عشان أنت اللي قلتها و مكنتش أقصد حاجة غير أن المثقفين الstereotype بيستخدموا الأوزان دي بشكل مبالغ فيه (و ان كان ده بسبب عجز أو استهبال مش بسبب عنظزة في رأيي).

أنا معاك على فكرة في أن العامية بشكلها الحالي مش هتفيد في تسجيل المعرفة بشكل تراكمي مستديم بس ده ممكن يتحل و اللغة ممكن تطور لو الناس بدأت فعلا تحاول، ممكن المحاولات دي تترمي في الزبالة بعد 20 سنة بس أكيد هيكون دروسها مستفادة.

و على فكرة أنا مش متعصب للعامية أو ضد الفصحى، أنا مبعرفش أكتب فصحى و غالبا لو فرضتها على نفسي شوية هوصل لمرحلة أكون كستريح فيها بس غالبا من غير مذاكرة هتفضل فصحى ركيكة، على الأقل في العامية محدش يقدر يقوللي ركيكة لأن محدش عنده نظرية القواعد ايه أصلا :-)

على العموم شكلنا بندبس نفسنا تدبيسة كبيرة في موضوع التقنية بالعربي اهه و هنشوف النتيجة ايه.

لحد دلوقتي Google و Yahoo أدائهم كويس و حتى الشركات اللي ليها سلوكيات بغيضة زي Sun, IBM, Apple, Amazon عملوا حاجات كتير مفيدة و مش احتكارية و بمعايير قياسية و كمان متاحة لمجتمع البرامج الحرة، المسألة مش بالبساطة دي ما فيش أشرار في الموضوع (عدا مايكروسوفت هاهاهاهاهاهاهاه).

بعد محاولات طويلة نجحت في التربيط في اللذيذ

لكن كان عندى سؤال؟؟ ازاى اعرف الخريطة الدماغية بتاعتى ؟؟

ياااه دأنت دماغك طلعت بسيطة قوى يا رجيم

بص يا سيدي أولا اسمحلي أقترح أننا نكمل بهدلة في اللغة العربية و تتجاهلها لما تيجي تربط حاجة و تستخدم الانجليزي الا اذا كان الوسم اللي في دماغك محلي قوي قوي و مينفعش يترجم

ليه؟ لأن قوة مسألة التربيط في اللذيذ هي في دمج تصنيفات كل المستخدمين (ده اللي بيخليه تصنيف شعبي) و بما أن عدد مستخدمي del.icio.us قليل أصلا مش ناقصة هي نقعد نقسمهم باللغة.

دلوقتي بقى أنا عاوزك تركز، لما بتدوس على أ رابط من اللي أنا حاططهم العنوان (url) هيتغير طبعا في شريط العنوان في المتصفح بتاعك

لاحظ لما تلاقي كلمة alaaosh مثلا ده اسم الحساب بتاعي على del.icio.us لو كتبت مطرحه ebles هتشوف الحاجات اللي تبعك، و لو لقيت كلمة egypt يبقى ده وسم و تقدر تحط مطرحه أي وسم تاني و هكذا، اللعب في العناوين أسرع بكتير من أنك تزور صفحة رئيسية و تملئ فورم و هكذا.

خد عندك مثلا الخريطة الدماغية تبعي عنوانها http://kevan.org/extispicious.cgi?name=alaaosh

يبقى خريتطك انت عنوانها http://kevan.org/extispicious.cgi?name=ebles

هارش

في موضوع ( السرتنة) كتبت كلاما بصفتي خليجي.. اعجبني نشر الكلام بالرغم من قسوته على علاء ومنال... هذا الموضوع عن التصنيف اثار اهتمامي لسببين:: اولا لانني كاخصائي علم سموم toxicologist نتبع نظاما في تصنيف ما يزي عن نصف مليون مادة سامة هو في الحقيقة نظام يعتمد على مبادئ تعود للقرن الثامن عشر وهناك مدرسة جديدة للتصنيف يعارضها قدماء هذا المجال .. كالعادة.. الامر الثاني : هو.. بعد حصول هذه المدونة على اهتمام بعض المنظمات .. هل اصبحت فقط مدونة شخصية؟؟؟ بمعنى هل ستبقى مدونة فقط يسجل فيها علاء ومنال افكارهم وتجاربهم الشخصية؟؟ ام ان الارتقاء بها الى مستوى مخاطبة الجمهور هي الخطوة التالية؟؟؟هل ستنجح مدونة تخاطب الراي العام بمفردات اقل ما توصف به انها شوارعية؟؟؟ومعذرة لهذا اللفظ ولكنه الواقع!!بل هل تنجح مدونة امريكي في مخاطبة الجمهور الامريكي وهو اكثر شعوب الارض ولعا بمفردات الشوارع ؟؟لماذا لا يعيد علاء ومنال تلمس مواقع قدميهما ليعرفان بالضبط اين يقفان؟؟ ومن يخاطبون؟؟؟والا ستنحسر الاضواء عن هذا المكان ؟؟ وسيصبح توصيل الرسالة ان كان هناك رسالة اصعب.. بل مستحيل!!! ختاما اتمنى ان يحذف تعليقي المعنون ب-حتزعلو ليه-واقدم اسفي

أولا أسفك مقبول لكن مش هنحذف شيئ خليها سجل لما يحدث و بعدين أنت أرسلت التعليق Anonymous يعني محدش هيحاسبك.

منال و علاء ليست لديهم رسالة خاصة، لديهم رغبة في التواصل و التعبير فقط. أحنا شايفين دورنا أننا نيسر لمن لديه رسالة أنه يوصلها عن طريق توفير التكنولوجيا اللي محتاجينها، يعني المجمع و خدمة استضافة المواقع المجانية، و عملنا مع الجمعيات و الحركات السياسية في تجهيز مواقع و محاولاتنا لتشجيع الصحافة الشعبية و عملنا في نشر الاتصال بالانترنت و تشجيع التعامل مع التكنولوجيا بشكل ابداعي و جهودنا في نشر البرامج الحرة هي رسالتنا و أظن الاهتمام الاعلامي المبالغ فيه بينا و الجائزة اللي بنعتز بيها كانت بسبب المواضيع دي مش بسبب أهمية ما نكتب.

يعني المدونة هتفضل تعبير عن علاء و منال بلغة علاء و منال (الشوارعية) و لن تتغير لغتها الا اذا تغيرت لغة علاء و منال، لو انحسرت الأضواء (اللي هي زي ما قلت مبالغ فيها، راجع معدلات الزيارة الحقيقية)

الله ينور

يقدم وافر مخاولة لتصنيف شعبي لوب باللغة العربية

--صاحب الأشجار