Manal and Alaa's bit bucket free speech from the bletches

عَلِّي الجدار (إجهاض مظاهرة أمام مقام السيدة زينب، إحياءا لأحداث 18/19 يناير 1977)

عَلِّي الجدار .. عَلِّي الجدار

عَلِّي الجدار .. بعد الجدار اكوي الديار .. بحديد ونار انشر وساختك .. في عز النهار وحط المقام .. تحت الحصار عَلِّي الجدار.. عَلِّي الجدار

إخرِس لساننا .. واحكم قيودنا اشفط عرقنا .. وثمار جهودنا إيه راح يحوشنا .. لو انتفضنا وإيه راح يحوشك .. من شعب ثار

عَلِّي الجدار.. عَلِّي الجدار

عَلِّي الجدار .. بعد الجدار اكوي الديار .. بحديد ونار

عَلِّي الجدار.. عَلِّي الجدار

وسط الليالي .. خفافيش بترمح وذئاب بتعوي .. وكلاب بتنبح وغفير حرامي .. بيسرق ويدبح مهما حاشتنا .. الظلمة في بيوتنا إيه راح يحوش .. نور النهار

عَلِّي الجدار.. عَلِّي الجدار

عَلِّي الجدار .. بعد الجدار اكوي الديار .. بحديد ونار

عَلِّي الجدار.. عَلِّي الجدار

ُأءمر يا سيدهم .. ذئابك وسيبهم تهبش وشوشنا .. ويهزوا ديلهم راح ييجيى يوم .. و تدوق نيابهم طبع الديابه .. تخضع لسيدها وإن ساعة يسهى .. عليه تندار

عَلِّي الجدار.. عَلِّي الجدار

عَلِّي الجدار .. بعد الجدار اكوي الديار .. بحديد ونار

عَلِّي الجدار.. عَلِّي الجدار

بين نار سياطك .. ونار الاسعار على سلو سوقك .. وكيف السمسار ينحل وبرنا .. زي المنشار

يمكن غلطنا..في طول سكوتنا على من غدرنا .. وسف قوتنا سبنا الديابه .. تدوق دمانا وفي النهاية .. صابها السُعَار

عَلِّي الجدار.. عَلِّي الجدار

عَلِّي الجدار .. بعد الجدار اكوي الديار .. بحديد ونار

عَلِّي الجدار.. عَلِّي الجدار

كحّل عيونك .. واصبغ شعورك خَشِّن في صوتك .. واسهب في زُورك ما يخيلنا قولك .. و لاطبولك تفضل، تفارق .. ده ما عادش فارق كبت الليالي .. بقى موجه عالي وزَبد ظلامك .. بقى في انحسار

عَلِّي الجدار.. عَلِّي الجدار

عَلِّي الجدار .. بعد الجدار اكوي الديار .. بحديد ونار

عَلِّي الجدار.. عَلِّي الجدار

19/1/2008