Manal and Alaa's bit bucket free speech from the bletches

الموضوع بسيط لو اتشرح في سياق الميكانيكا

بص يا سيدي المشتقة الأولي دي زي السرعة و السرعة يعني معدل تغيير مطرحك، يعني لو أنا في خمس ثواني بتنقل من أوضة لأوضة و أنت في نفس الوقت بتعدي على ثلاث أوض يبقى انت أسرع مني و يبقى المشتقة الأولى لدالة مطرحك في البيت قيمتها أعلى مني

أما المشتقة الثانية فهي زي العجلة (acceleration) يعني معدل تغيير السرعة، فمثلا أنت عربيتك بتنقل من الواقف ل100 كم في الساعة في ٥ ثواني و أنا عربيتي بتحتاج خمس دقائق عشان تعمل النقلات دي، يبقى أنت عجلتك أعلى من عجلتي و بالتالي قيمة المشتقة الثانية عندك أعلى من عندي

طبعا هي تشبيهات مسهلتش الأمور لكن أنا استخدمتها عشان أنا عاوز أركز على فكرة معدل تغير التغيير

يعني لو قلت بقالنا سنتين بنتظاهر و مع ذلك لسه فيه تعذيب (أيا كان نسبته و حدته) يبقى أنا بقيم تجربتي السياسية بناء على قيمة الدالة

لو جيت بقى و قلت بقالنا سنتين بنتظاهر و التعذيب النهاردة زي يوم ما بدأنا أو أقل أو أكثر (مهتم بالفرق مش بأنه لسه موجود) يبقى أنا كده بقيس التجربة بناء على المشتقة الأولى (اللي هي معدل التغير اللي هي السرعة).

اللي بطرحه أني لو عايز أقيس خصوصا لو أنا معني بالثورية المطلوب مش السؤالين دول و لكن سؤال بقالنا سنتين بنتظاهر في السنة الأولى كنا عشان نفضح حالة تعذيب و نفرض على الدولة محاسبة مرتكبها كان محتاج مننا مجهود قد كذا و احتمال أنه يحصل قد كذا و عدد اللي بيشاركنا قد كذا، لكن النهاردة احتمال تحقيقه أعلى و قدرتنا على الفضح أعلى و عدد المشاركين أكبر و المعارك بتاخد مننا وقت أقل.

فهمتني؟ لو مستني التعذيب يختفي يبقى لازم أحبط، و لو قارنت مستوى القمع قبل و بعد يا اما هلاقي الوضع محبط يا أما مش هعرف أفرق ما بين اللي تحقق بسبب تحركي و اللي حصل كوضع مؤقت (من هنا موضوع اصلاح أم ثورة) في حين أني لو حكمت بمعدل تغيير التغيير أقدر فعلا اقيس أدائي و أتنبأ بتأثيري المستقبلي و بدل الاحباط من قد ايه المشوار طويل أتحمس لأني قادر على تعجيل التغيير.

تخيل كده عيلة في عربية مسافرين اسكندرية، الطفل مش فاهم أي حاجة عن المسافات و السرعات و السواقة طل شوية يسأل أحنا وصلنا؟ لأ يا حبيبي، طيب قربنا؟ لأ لسه. حاجة مملة و محبطة.

نيجي للزوج، راجل ملوش في السواقة لكن حافظ طريق اسكندرية كويس، بيبص يشوف عدينا الرست ولا لأ فاضل كام محطة هو حافظها على ما يوصل، لو العربية ماشية ببطء الموضوع هيكون ممل لأنه مستني بفارغ الصبر المحطة الجاية لكن مش بنفس درجة ملل ابنه

أما الأم اللي سايقة و حافظة حركة المرور على الطريق عارفة امتى هتقدر توصل لأقصى سرعة مسموح بيها بعد زحمة اكتوبر ما تعدي و هارشة الرادارات فين فعارفة امتى تقدر تسرع أسرع من المسموح بيه العملية بالنسبة لها مش محطات لكن فرص لفتح السرعة على الآخر، كل شوط من الطريق عدى هي عارفة أن الشوط اللي بعده هيعدي أسرع (أو أبطأ).

واخدلي بالك ولا لخبطت العملية زيادة؟