Manal and Alaa's bit bucket free speech from the bletches

ظباط محترمين ايه أنت كمان، متخليك واقعي، الظابط المحترم ده حاجة كده عاملة زي طائر الرخ، بنسمع عنه في الأساطير و نشوفه في التلفزيون في رمضان.

ما فيش في مصر كلها ظابط لم يتواطئ بشكل مباشر أو غير مباشر في تعذيب أو اهانة مواطن.

اللي معذبش بنفسه غالبا أعطى أوامر و اللي لا عذب بايده ولا أعطى أوامر حضر و شاف بعينه تعذيب بيقوم بيه زميله و سكت، و اللي لا عذب و لا أمر ولا شاف و سكت أكيد شتم أو لطش لمواطن قبل كده، أو سكت عن تلطيش زميل لمواطن قبل كده.

ده غير أنه نادر أن يكون فيه ظابط ما أخدش رشوة ولا بلطجش أتاوة و لا لعب في حرز ولا استغل نفوذه لمصلحته الشخصية، و لو فيه يبقى غالبا عشان لم تتاح ليه الفرصة.

بلاش نضحك على نفسنا و نبحث عن الظابط الشريف، ممكن نقرر أننا هنتسامح عن أخطاء الظباط اللي مرتكبوش جرائم فظيعة على أساس أن الاجرام كان منهجي و مش مسؤليتهم لوحدهم و على أساس أن عددهم كبير و كده لا أكثر.