You are here

وسع وسع للتدوين

Primary tabs

الانترنت مليانة تقارير و قصص شهود عيان عن أحداث ملحمة انتخابات مجلس الشعب و المدونين طبعا شاركوا في ده و عملوا تغطية كويسة جدا و تحليل للي شافوه، لكن عددنا لسه صغير و لسه مش قادرين نغطي كل اللجان و الدواير.

من وسط الكتابات الكتير عن الانتخابات أذهلني التقرير المفصل اللي كتبه المؤرخ عن مغامراته يوم الانتخابات في مركز منوف بالمنوفية.

أدعوكم تقرأوا التقرير و تشوفوا الصحافة الشعبية ممكن توصل لايه.

معرفش ازاي فاتتني مدونة المؤرخ لحد دلوقتي. شكرا صاحب الأشجار على الرابط.

و أسفين يا باش مهندس محمد الهامي على تأخير دخولك في المجمع و ياريت تنشر ملفات الفيديو و الصوت اللي عندك


يقترح صاحب الأشجار عمل وثيقة شاملة تجمع كل اللي اتنشر عن الانتخابات في المدونات بحيث تكون مشابهة لوثيقة حتى لا ننسي اللي اتجمع فيها كل ما نشر عن أحداث الأربعاء الأسود 25 مايو 2005. الفكرة مش بطالة رغم المجهود الكبير المطلوب حتى لا ننسي اتوزعت توزيع واسع جدا داخل و خارج النت و كانت عامل رئيسي في نمو جمهور المدونين و المدونات نفسها، ايه رأيكم؟

Comments

الموضوع جامد جدا و يا ريت لو الأخ الهامي المؤرخ شيّر الميديا اللي صورها و سجلها

مش شايفة إن المجهود المطلوب لجمع التدوينات اللى كانت عن الإنتخابات كبير يا علاء، أنا على إستعداد تام للمساعدة بما إنى قرأت معظمهم فسهل أجمعهم

طيب ايه رأيك تبدأي الشغل بأنك تعملي تاج لكل التدوينات الخاصة بالانتخابات على del.icio.us باستخدام tag موحد زي EgypElections مثلا

كده أي حد عايز يشارك يقدر يعكل نفس الشيئ و نيجي في الأخر نجمع في وثيقة واحدة.

أنا هاجّمع الURLs و بعدين تشرحلى اللى إنت قولته دة أعمله إزاى :)

هحاول أكتب حاجة النهاردة عن del.icio.us عشانك

أخيراً عرفت مين del.icio.us :) دة إختراع وهمى، شكراً إنك عرفتنى عليه

أي خدمة، و برضه مصر أكتب عنه بس ألاقي وقت

علاء، أنا خلصت تجميع كل الURLs، الfile جاهز معايا أبعتهولك إزاى؟

ايميل على [email protected]

شكرا

http://del.icio.us/tag/EgyptianParliamentaryElections2005

أقترح، لكثرة التدوينات مقارنة باستفتاء تعديل الدستور، أن نركز على شهادات أيام الانتخابات، والتعليق على الحكومة وحزبها، بدون التطرق إلى ما بين المعارضة والإخوان من اتفاق أو اختلاف.

--صاحب الأشجار

ايمان لمت شوية وصلات و أنا استخدمت magles2005 http://del.icio.us/tag/magles2005 عشان أعلم عليهم

مش لاقي طريقة أعمل بيها OR للتصنيفين :-(

أنا رأيي بالعكس نلم كل حاجة، تغطية الحملات قبل بدء الانتخابات، مناقشات الأخوان و أداء المعارضة، كل حاجة. ممكن لما نجمعهم نخلي الوثيقة من فصول كل موضوع له فصل

  1. الحملات
  2. دعوات للمشاركة و انتخاب طرف بعينه
  3. المرحلة الأولي
  4. المرحلة الأولي اعادة
  5. المرحلة الثانية
  6. المرحلة الثانية اعادة (نهي الزيني)
  7. المرحلة الثالثلة
  8. المرحلة الثالثلة اعادة
  9. النتيجة النهائية

اللى أنا لميته كله كان بس عن اللى حصل مع ناس بتحكى عن يوم الإنتخابات فى مراحله كلها، يعنى كله ناس بتحكى عن اللى شافوه يومها بنفسهم و حصل معاهم (acting as reporters for us)، مفيش أى لينك عن رأى شخصى لحد فى موضوع اللإنتخابات أو مناقشات عن الإخوان أو الأحزاب.

لا بأس إذا وجدنا من يقومون بكل هذا العمل. نحتاج أذونات من أصحاب التدوينات التي لا تحمل رخص المبدعين العامة. تجميع كل شيء يعني تضمين أبيات الأشعار، وأي نقاش عن الإخوان أو حالة مصر، أو أي شتائم لهذا الطرف أو ذاك. هل يعني أيضا مدونات الحملات كالأشقر ورزة وكمال خليل ومجدي حسين؟

--صاحب الأشجار

للأسف مجونات الحملات الرسمية استخدمت لغة أقرب للبيانات الصحفية أغلب الوقت و بالتالي مظنش ليهم مكان، لكن ممكن اختيار مقال واحد من كل موقع و وضعهم في فصل واحد كمثال .

أنا طبعا قاعد برمي اقتراحات و معنديش أي فكرة هنعمل ده كله امتى.