You are here

ايه البضان ده

Primary tabs

طب أنا عاوز أفهم هوا احنا غية عندنا البضينة، يعنى مينفعش نعمل ام أى حاجة مزبوط ابدا، و حتى لما نعمل حاجة حلوة لازم نطلع ميتين الخلق كأننا بنمن عليهم. سيبك بقى من أيمن نور و الريس و التعليم و العراق و كل الحاجات الصعبة دى، نفسى كده فى حاجة بسيطة بس تتعمل مظبوط من الأول للأخر.

طب بلاش دى، سيبنا من دى، حد يقوللى ايه اللى صعب فى اننا نعمل أم website يبقى المعلومات الى فيه كاملة و مظبوطة، يعنى البتوع اللى فى EGLUG دول مش بشر مثلا، ماهوم عيال صيع زيهم زى أى حد تانى بس عارفين يعملوا صفحة، مش فكاكة هية.

نهدى و نحكى الموضوع؟

المسألة انى دخلت عصر الWiFi فا من باب التسالى قلت نحاول نلف على أكبر م من الhotspots و يمكن نكتب مين فيهم حلوين. و بعدين اكتشفت انو مفيش لستة بأى أماكن مش تبع wayout، حلو يبقى نعمل حاجة مفيدة و نحاول نلم الباقى على صفحتنا.

أكيد زباين wayout مش محتاجين منى لسته ده رزق الشركة و شغلها و أكيد الناس دى شايفة شغلها مش كده، و بعدين دول اللى دخللو الwireless فى مصر يعنى حيغلبوا فى لسته؟؟

لكن على مين يابا دحنا سبعتلاف سنة حضارة، لحد دلوقتى فى تلت لست واحدة عند wayout و واحدة عند WiFinder.com باعتها واد اسمو تامر باين عليه بيشتغل فى wayout و التالتة openhotspots.net باعتينها ناس مختلفين.

لحد كده و ماشى طبيعة النت التكرار، لكن كل لستة فيها حاجات مش فى التانية مع شوية تقاطع، طب ليه مش كلهم على waout ما هية اللى ركبتهم كلهم؟؟

يا ريت نقف عند كدة لو المكان متكرر فى اكتر من لستة يبقى لستة واحدة بس اللى فيها العنوان، و طبعا من حين لاخر العنوان مالوش معنى خالص أو ميدلش غير اللى ساكن فوق ام الكافتريا.

طبعا أنا مش فاهم حاجة، قلت نلمهم لهم فى مكان واحد و بعدين ننشر و المكان اللى يطلع فشنك نبقى نشيللوا، العملية دى خدت منى يوم كامل و لسة مخلصتش.

لأ و ايه عبر، واحد يقولك Egypt->Cairo->Sharm El Sheik طبعا كلنا عرفين ميدان شرم الشيخ اللى فى وسط القاهرة، و ان حد غلط و قال Egypt->Giza->Cairo يبقى معاه العزر ما هموما بتوع المرور ولاد الوسخة بعد ما شالوا محطة الرسوم اللى بين القاهرة و الجيزة ماحدش بقى عارف امتى دى بتبتدى و امتى دى بتخلص.

ده غير طبعا الخلاف بين اللست على شارع النزهة نصه ولا عشره فى مدينة نصر.

بس ألطف حاجة بتوع المعادى يقولك beanos المعادى، فى اكتر من واحدة فى المعادى اشعرف أهلى أنا أنهو واحدة اللى انتخبوها تمثل المنطقة، و لا يمكن بتلف عليهم واحدة واحدة.

و بعدين فى مؤامرة ولا ايه يعنى كل roastry فيهم wifi اللى البتاع اللى أنا بقعد فيه.

المهم اهو قضينا يوم مسلى نقرا اسامى كافيتريات البلد، كنت تعرف انه فى مصر الجديدة فى Carinos و فيه Jonny Carinos؟؟ ولا يمكن دى غلطة، ولا عمرى هعرف مانا بصراحة اتكسف انزل أسال عن Jonny، بعدين يقولولى عاوزه ليه، كفاية الكلام اللى بنخده علشان شعرى الطويل.

و برضه من سبحان الله فى cilantro و cafe cilantro و دول غير بعض بشهادة 66% من اللست.

شلنا السلك من المكن عقبال منشيل الجلخ من المكن اللى فى دماغنا

أنا مستعد انتخب حسنى مبارك و أمنع أبويا يجيب laptops تانى فى مقابل لما نعمل website نحشيها صح

Comments

هأ-أو! قال يحشوها صح قال!!! أهى الانتخابات جايه اهه، وابقو تعالو قابلونى لو انتخبتو حسنى! بس نتمنى ان اللى يجى بعد كده، يبقى يرحم أبوك والـLaptops بتاعته!

أوعاك تسأل على Jonny يا واد .. ملعون أبوها ليسته!

جاى

ياعم ارحم بتوع الاقاليم دة الواحد بيدوخ عقبال ما يفتح ايميلة من الدايل اب تيجي انت تفرسني وتقولي واي فاي كمان دعوة واحد غلبان جدا : يا رب ارحم عبدك المسكين وابعتلة اي دي اس ال متين ينزل منة بسرعة الصاروخ بدل من الديل اب قاعد بيدوخ

امين

و إيه الجديد! ما انت أكيد شفت العيال اللي بيعملوا المواقع في الشركات..عالم ضايعة..

أنا بأقضي نصف وقتي في أي شغلانة جديدة أعلم الناس ازاي يكتبوا العناوين "شرق النيل يبقى قاهرة و غرب النيل يبقى جيزة" لكن تبقى مشكلة معرفة الشرق من الغرب و الزمالك و المنيل.. و زي مانت عارف ان مناطق زي العجوز مثلا اختفى اسمها من على العناوين لصالح أماكن أخرى يفترض أنها أشيك زي المهندسين، اللي هي أصلا تبع قسم العجوزة، يعني إداريا مالهاش وجود.

و كمان أرقام التليفونات كود مصر 20 مش 002 و القاهرة (2) بس مش 02، زيها زي أي شبكة محمول.

مبروك عاللاسلكي، ابق عدي من الشارع بتاعنا يمكن تلقطنا.

Here is a link to a Wifi Hotspot Directory of Egypt, it even shows address as well as the telephone number of the place, click on the name of the place and it will give you all the info about it including the service provider and type of network. Hope it helps http://www.wi-fihotspotsdirectory.com/Wi-Fi_Hotspots_HitsD67-0.html