You are here

تالت خمستاشر - علاء يكتب بعد مرور شهر على حبسه

Primary tabs

يا أحمد يا ماهر ....
خدنا خماستاشر ....
ومفيش إفراج ....

النهارده خدت 15 يوم كمان، ومع ذلك كنت متماسك في النيابة أكتر من أي مرة.

بقالي 30 يوم بحاول احلل وأنظر عشان اتوقع هيُفرَج عني امتى. كل نظرية نطرحها يطلع ملهاش معنى.

لما بدأ الإفراج قلنا كل يومين هيخرجوا مجموعة. طلع غلط.. قلنا هيفرجوا عن أي حد مش محسوب على الغد أو الإشتراكيين الثوريين برضه طلع غلط، أظن لي تجديد كمان على الأقل يعني هكمل شهرين في السجن.

شهرين مبشوفش فيهم منال غير ساعات مخطوفة في وسط زحمة الزيارة (مرتين في الأسبوع لو أنا محظوظ) والنيابة. شهرين بعيد عن شغلي، بعيد عن بيتي، بعيد عن أصدقائي وأهلي، شهرين من غير انترنت.

المفروض اللي يشوف بلوة غيره تهون عليه بلوته، السجن فيه ناس محبوسة على ذمة قضية بقالها أربع سنين وممكن يطلعوا بعدها براءة ومحدش هيعوضهم عن السنين اللي ضاعت.

في نيابة أمن الدولة قابلنا شباب من السلفية الجهادية والطائفة المنصورة داقوا عذاب منيش قادر حتى اتخيله. حتى في مجموعة كفاية بلوتي تهون لا انضربت زي شرقاوي ولا انا جاي بالغلط ومش فاهم حاجة زي ابراهيم، أهلي من القاهرة وقادرين يزوروني بانتظام بعكس زملاء كتير وغالباً لما أطلع هلاقي وظيفتي مستنياني بعكس زملاء كتير برضه.

لكن للأسف بلاوي الغير مش كفاية عشان نخفف السجن. كل يوم بيعدي ببطء وصعوبة، كل يوم تقيل، كل يوم أفكر في منال وكل يوم سجن.

احساس بالظلم رهيب مع كل عرض نيابة. يا وكيل نيابة يا إبن الكلب بإيدك تفك سجني وحجتك الوحيدة انك بتسمع الأوامر؟! نفسي أفهم العقلية اللي مستعدة تخرب بيوت وتعرض حياة الناس للخطر عشان دي الأوامر.

ووكيل النيابة ده المفروض أنه قاضي زيه زي مكي وبسطويسي وزكريا عبد العزيز وصابر ونهى الزيني و.... و..... و..... .

كل مرة أبدأ الكتابة أبدأ بنية الكتابة عن السجن أو زملاء السجن ومعرفش. بلوم أدواتي (أحه القلم ده اختراع أثري الرحمة). بقنع نفسي اني معرفش اكتب قصة غير لما أحكيها لحد الأول. بلوم ضرورة اخفاء أسرار خلافات الزملاء ومفاوضاتنا مع إدارة السجن. بس مش دي المشكلة، أنا مش عارف أكتب جوابات للناس اللي برة أو حتى أرد على الجوابات (أه متقطعوش الجوابات لمجرد اني مبردش، دي بتفرق معايا جداً).

الحبسة فيها تفاصيل كتير تستاهل تتحكي:

  • قص شعري
  • زنزانة جرائم النفس اللي قضيت فيها يومين
  • تصويري زي في ميكي وأنا شايل رقمي
  • لبس السجن الأبيض اللي طول الوقت وسخ
  • يومين تكدير (باب الزنزانة مقفول طول اليوم)
  • فض أول اضراب عن الطعام
  • رفض ثاني اضراب عن الطعام
  • ادارة اجتماع أزمة عرض المتخلفين في النيابة
  • تفاصيل لجنة الحياة العامة ولجنة الاعاشة (بتبعتولنا دواء صراصير بيشتغل بعد أسبوع!!!)
  • الافراجات
  • عودة شرقاوي
  • الاضراب الثالث والحبس الانفرادي وعنبر التأديب
  • مفاوضات مع ادارة السجن
  • نظريات الاختراق الامني للمجموعة
  • اللفة اللي خدتها علي نص زنازين السجن كل يوم زنزانة مختلفة
  • رحلة العبور اليومية من عنبر قديم لعنبر جديد
  • البيروقراطية المصرية التقليدية لما تتحول لحياة أو موت
  • دروبي والسكر
  • محاولة انتحار احد المساجين
  • عالم الجنائيين المنيل بنيلة
  • عالم الأموال العامة المنيل بستين نيلة
  • التلفزيون المصري
  • القطط اللي شبه المساجين
  • الشوايشة اللي اختاروا الغاء عقلهم تماماً (ياكش يولعوا)
  • الزيارة والطبلية

وطبعاً الزملاء، الأصدقاء الجداد والقدام، في الأول الزملاء اللي مش أصدقاء ولا يمكن يكونوا أصدقاء كانوا أزمة كبيرة. ماتشات المزايدة والعلاقات والمناقشات العبثية كانوا أسوأ حاجة بس خلاص عدت، معرفش هل الافراجات ريحت الوضع ولا أنا اتعودت ولا فهمت ان دول قلة وان عدد الاصدقاء مش قليل والأغلبية ناس كويسة.

هحوش الكلام عن الزملاء المرة الجاية يمكن اعرف اكتب حاجة احسن من مجرد لستة.

Comments

IL SEGN LELGED3AAAAAAAAAAAAAAAAAAAAAAAAN

يبدو من كلامك يا علاء ان حالتك النفسية أحسن شوية .. ربنا معاك ..

بجد يا علاء.مش هقول لك اكتر .غير انه ربنا معاك يا بطل ... شعور الظلم ده شعور غبي قوي .. وفوق ده حكم النفس على النفس.. لأني كنت بعاني برضه من كده ..بس الحمد لله دلوقتي خلاص خلصت .. المهم عايزك صلب كده زي ماكنت طول عمرك ... ولما تخرج ان شاء الله .واللي انا حاسس انها قريب بجد هاتبقى تحكي لنا وتفتكر اللي حصل لك ساعتها . وما شاء الله لازم تتأكد انك سايب واحدة ( بميت راجل ) لان دي برضه منال ... وده اللي لازم تكون عليه .. وانا بجد عايز اعمل لك كتير ...بس مش عارف ...بجد مش عارف

أه ه ه ه ه يا بلد التعريص.

بجد... قلبي بيتقطع مع كل كلمة باقراهالك يا علاء. ربنا معاك.

أتمنى يكون كل العذاب ده بفايده في النهاية. لا تيأس وخليك فاكر إن كلنا قلوبنا معاك

30يوم هههههههههههههههههههههه بجد انت طيب اوى

الله يكون فى عون شباب الاخوان اللى بيخرج وبعد شهر يدخل تانى وتلات ورابع

عشان المدونين اللى بيقطعوا فى الاخوان يعرفوا ان الله حق وان الاخوان بيتحملوا كتير

ياريت يا جماعة تنبهونا قبل ما علاء يخرج عشان كل واحد يقول علي نفسه مصري و عنده شويةدم و وطنية لازم يرو يحيه هو و كلاء اخواتنا المعتقلين عشان مصر

Frustrating to see the immorality, ignorance, and repression to seemingly has the upper hand over honesty, intellect and freedom. They are painfully oblivious to history, and they will be condemned to repeat it.

The clock is ticking!

يا منال قولي لعلاء دول بيطلعونا بالقطاره وربنا يستر علي الناس إلي مالطلتشي بلح الشام ولا عنب اليمن ، إلي أخدت إفراجات وأمن الدوله رفضت تنفيذها ، مع إن أمن الدوله هيه إلي أمرت بإخراجهم :@ ، وحسبنا الله ونعم الوكيل

السجن هم الآخرون هذه عبارة قالها سارتر في مسرحية قريتها من أكثر من ثلاثين سنة لكنها صحيحة , فالناس اللي معاك في السجن غالبا يخلوا السجن سجنين دوبل يعني . تبقى الحبسة وسخة. أشار إليهم علاء .. طبعا عدا بعض الأهالي والمحاميين وقلة من المسجونين.علاء بدا باخد باله من التطورات اللي حاصله له . بعد ما فاق من الصدمة الأولى وبدا يشوف السجن وزميله بعيون فاحصة ومتأملة. المشكلة موش في الخمستاشر يوم ورا خمستاشر يوم ..ولا حتى في وكيل النيابة الكلب المطيع ولا حتى في رئيس الجمهورية . الواضح ان المشكلة عند كل الناس هي أنهم ما عندهمش خطة. يعني ما فيش واحد منهم كتب أو قال : تعالوا نسجن علاء وزمايله كذا يوم نادبهم وبعدين نفرج عنهم. هذا الوضع انعكس أيضا في الحالة المصرية على المعارضة اللي هي شكلية وتقليدية رغم عدم إنكار بطولاتها وتضحياتها.برضه ما عندهاش خطة. حتى القضاة المحترمين أفعالهم هي ردود أفعال الحكومة . طيب ليه علاء موش عارف يكتب عن الحاجات اللي نفسه يكتب عنها ؟ لأنه خايف ان " الآخرين " يتهمونه بالانهيار وقلة الصمود. كأنه ينهار لما يقول انا مشتاق لمنال وقعدة رايق مع صحابي واهلي والإنترنيت .النهاردة قريت رسالة من رئيس نادي قضاة إسكندرية منشورة في عمود مجدي مهنا في المصري اليوم بيتكلم فيها على الحاجات اللي ذكرها علاء .. الحبسات الاعتباطية والتعذيب وبيطالب بتشكيل هيئة شعبية لجرد كل المعتقلين في مصر وكشف بأسماء من قاموا بالتعذيب. اعتقد هذه خطوة أولى مهمة يقدروا المدونين يعملوها الخطوة المهمة الأخرى هي ان علاء وزمايله ما يخافوش من قول الحقيقة اللي في السجن حقيقة الحالة الإنسانية من خوف وقلق وتوتر وخناقات.فليصبحوا أكثر إنسانية ليتحولوا من أسماء إلى أشخاص وبشر عاديين ليهم وعندهم كل المشاكل والمتاعب اللي عند البشر العاديين

سارتر ماكتبش مسرحيات ياجدو ياللى عامل مثقف..والجملة التى تقصدها هى "الجحيم هم الأخرون" وقائلها دانتى...صباح الجهل

طيب قلي حضرتك مين اللي كتب المومس الفاضلة ؟وبعدين من كل اللي قلته انا ما فيش حاجة وجعت ثقافتك غير المعلومة دي وهي بالمناسبة صح . من كل التساؤلات والأفكار بغض النظر عن امكانية حدوثها وتحقيقها اوعدم تحقيقها . قاعد تفلي في الرسائل بدل ما تفكر ازاي تساعد الناس اللي جوه؟

Sartre's play, No Exit, denoted "Hell are others" to discuss man's cruelty toward one another, and the inability to escape this human tendency. Mr. Mosaad is both reserved and correct, the irony is that the unfair comment he received truly accentuates Sartre's thoughts.

ربنا معاك ياعلاء وان شاء الله يكون ده دافع ليك واكيد هتستفيد جامد من خطاب علاء لازم نعمل حاجة للناس اللى ضحت لما يخرجوا ان شاء الله لازم يلاقوا شغل ويلاقوا عيشة كويسة كفايةالتضحية اللى ضحوها أنا باقترح علاء ومنال يجمعوا السير الذاتية للناس دى معاهم وانا والآخرين اى فرص شغل متاحة فى أعمالنا نبعتها للموقع ويشوف المناسب وهكذا أنا استطيع تجميع الوظائف المتاحة فى مجال تكنولوجيا المعلومات بحكم موقعى فى شركة من اكبر الشركات العاملة فى هذا المجال فى مصر وسأرسلها للموقع تباعا بس عاوز صورة مبدئية لمؤهلات الأبطال دول

ربنا معاكوا وتحيا مصر

ويسقط يسقط حسنى مبارك

Rabena ma3ak ya Alaa, el segn lel gd3an. This is the only way to change Egypt. It might sound like a cliche, but freedom is taken, it is not given.

What is around us is the signs of a terminally ill regime, similar to the last days of Farouk. You know it, I know it, and they know it, that is why they will not stop and will get more violent, little Pharoah will step on Egyptian skulls, with blood on his hands to get on the throne. he must be stopped.

يمكن مكنتش اعرفك قبل الحبسة دي كويس ويمكن مكناش صحاب بس الوحيد الي هون علي اول يومين هو علاء سيف من اول مااحنا في قسم السيدة زينب وبعدين سجن ترحيلات الخليفة وحسيت انه صاحب بجد وراجل بجد واول مابدأنا مفاوضات عشان نتنقل مع بعض كنت بطلب اني اكون معاه ومع الشرقاوي ودروبي واحمد ماهر وكنت بستمتع واانا بسمع تحليلاته ومناقشاته وكنت دايما بحس اني قدام واحد فاهم بجد مش كلمنجي وخلاص قد ايه استفدت من معرفتك ياصاحبي وقد ايه وحشتني انشالله اشوفك بكرة

ياعم علاء انت بتقول

ووكيل النيابة ده المفروض أنه قاضي زيه زي مكي وبسطويسي وزكريا عبد العزيز وصابر ونهى الزيني و.... و..... و..... .

لكن المشكلة مش في ده المشكلة ان في كذا مصر عندنا

مصر بتاعت امثالنا وامثال زكريا وبسطويسي ونهي ودول مصريين طحن في مصرنا

ومصر التانية بتاعت نظيف والعادلي ووكيل النيابة ودول برضه مصريين طحن بس في مصر بتاعتهم

وفي مدونتي الجديدة http://www.masryta7n.blogspot.com/ هنزل مقال عن كل المصريييين طحن المصريين بتوعنا والمصريين بتوعهم

شد حيلك يا جبل

يابنى انت فاكرها محطة نجوم اف ام..كل شوية تكتب كلمتين هايفين وتلزق فيهم اعلان مدونتك الجديدة (السخيفة)..قال يعنى كان فيه قديمة... بصراحة انت سخيف طحن

واضح انك أحسن من المرة اللي فاتت و ده ايجيابي و الحمد لله ربنا معاك

و استحمل لأن محدش بياكلها بالساهل

we can not believe it ..we are the egyptian students in Germany ..we had discussion yesterday in Hamburg about Alaa. we wish you soonst free and be strong best regards from the egyp. students in Hamburg

ايه يا عم علاء .... كده تمام يا عم كلامك رفع روحنا المعنوية عن المرة اللي فاتت وبعدين يا عم علاء انا عرفت ان انت كنت قايل قبل كده ان احنا طول ما بنشتغل معرضين للقبض والضرب والاغتصاب كمان ... الحمد لله انها جت علي اد قبضة وان شاء الله تخرج لينا زي الاول واحسن كمان ... نشوفك في الصف الاول من المظاهرة ساعة لما يكون فيه تلطيش ونشوفك واقف تصور المظاهرة وتصورنا ساعة لما تكون الامور هادية ... علي فكرة انا عايز صورة ليا لوحدي وانا بهتف يا علاء اوعي تنسي وصامد صامد يا علاء ... بكرة تعود زي اسماء www.ismmasr.blogspot.com

thank you.

هابيوس كوريبوس ماتخفش دة مش واحد بيحضر عفريت دة قانون يونانى قديم من اكتر من 2000 سنة كان يطبق فى أثينا ومعناة ابراز الجثة ويقول انة لا يحق للدولة ان تعتقل مواطن اكثر من 3 ايام بعدها اما ان يظهر فى المحكمة اويظهر فى الشارع نفسى الحكومة تطبق القانون دة علكم علشان ترجعوا تنوروا شوارع القاهرةوربنا معانا ومعاكوا

I'm a friend from morocco i've never know you but I'm with you

ايوة كدة يا ابو علاء تدوينه تفتح النفس غير

التدوينه المحبطة اللى فاتت

كدة انا حاسس انك ابتديت تتأقلم

و اجمل نصيحة منى

سيب نفسك للتركيبه :d

صباحك زى وشك يا مصر

تخــا تخـــا تخـــاريفى

http://t5at5a.blogspot.com

ربنا معاك يا علاء ، و بكرة اجمل ان شاء الله عاوز اقولك اني اضفت التعليق ده لسبب بسيط اني اثناء كتابة موضوع عنك و عن زملائك المعتقلين في الجريدة التي اعمل بها ( الدستور ) كانت كل التعليقات من زملائي بالجريدة تذكرك بكل الخير حتي اني تمنيت ان اعرفك بشكل شخصي رغم اني اعرفك من خلال رؤيتك في التظاهرات الا ان القدر لم يجمعنا سويا في نقاش او تعارف، لعل الغد الافضل يجمعنا ان شاء الله في وطن ارحب و اجمل و اكثر حرية و عدالة و لا تنسي ان ما تقدمه انت و من معك هو الذي يقرب لنا هذا اليوم الي نتمناه و ننتظره . تحياتي و كل الصحفيين بجريدة الدستور .

salamat ya 3alaa , we need to tell the story not only in order to show the world the ugly face of mubarak´s regieme which every body know but in order to put some pressure on it , after your permision i will contact almustakillah chaneel , it is quite independent chaneel broadcasting from london , many egyptians intellectuals and human right activists participate in its program ,check on it , [email protected] i think many people should know about the world of the blog specialy those people who r leading and affecting in the society.

السلام عليكم ورحمة الله وبركاته

اخبارك ايه يا علاء يا رب تكون بخير انا عارف ان الظروف صعبه جدا بالنسبه ليك بس تعرف بصراحه يا علاء انا مبسوط ان انت بتتكلم وبتعت رسايل من عندك وكنت اتمنى ان انت تحكيلنا بتفاصيل اكتر عن حياتك داخل السجن انت عارف ان أصعب حاجه على الانسان السجن وهوا ده الى مخلى ناس كتير خايفه تتكلم وتتحرك وهيا دى العصايه الى بيخوفو بيها السايب علشان كده أعتقد ان انت لما تحكي عن كل الصعوبات الى بتقابلك ده يمكن يقلل الرعب والخوف من الحكومه ويساعد ناس كتير انها تتحرك علشان هيا هتكون عارفه ايه الى هما هيقابلوه لما يتكلمو اما الشرقاوى انا بصراحه لما قرأت الويب سايت وشوفت هما عملو ايه معاه مش عايز اقولك انا أحتقرت ظباط الشرطه دول قد أيه مع ان ليا أصدقاء كتير ظباط بس فعلا انا أقتنعت ان هما حيونات وبقيت كل لما اشوف واحد فيهم أشك فيه انه يا خول يا حرامى انا فعلا مبسوط ان في شباب في البلد دى عندهم الوعي والفكر ده ربنا يحميكم ويقويكم وان شاء الله قريب قوى تخرج وترجع تكتب تانى وان شاء الله نتقابل أخر كلام سلامى لمنال لأنها مثال للبنت المصريه الجدعه الى بتقف مع جوزها وقفة أجدع من 100 راجل ربنا يخليهالك ويبارك ليك فيها يا رب

اصبر يا علاء دى مش اخر مره طو ل ما المعرص مبا رك فى الحكم هو وابنه

يا علاء أنت غيرت فينا حاجات كتير وخلقت ثورة على النت ضد الظلم أنت قائدها فيه ناس كتير أوى-وانا منهم- عرفوا عالم المدونات وإزاى ممكن يكون ثورة ضد الظلم والمستبدين منك انت.... علاء فيه ناس كتير اوى بتحبك وبتدعى لك بالخروج ومش بتكتفى بالدعاء لكن هناك حملة فردية وأخرى منظمة للمطالبة بالإفراج عنك وعن الزملاء والسؤال المطروح دلوقتىفى كل مكانيضم المهتمين بشئون البلد...... علاء خرج ولا لسة؟ لكن هتخرج وهتفضل كبير فى قلوبنا زى ما أنت وهنتعلم منك الكتير واللى سجنوك لازم هتاخد بتارك وتار الجميع بطريقة او بأخرى التاريخ لن يرحمهم أبدا علاءبنحبك أوى ومستنين خروجك بسرعة لمنال وبيتك ولينا كلنا

عارف الكلام البايت بتاع السجن للجدعان و بكرة نقولك كفارة يا راجل و هى الدنيا كده و غيره و غيره

عايز اقولك حاجة تانية خالص .. بكرة لما تخرج عيش كل لحظة من حياتك زى ما انت عايز تعيشها و بتحلم بيها لان ماحدش عارف اللحظة اللى بعدها هيحصل ايه و كمل فى طريقك اللى رسملك بصمة و خلى ناس كتير تحترمك و تقدرك وتتكلم عنك فى غيابك احسن كلام

مش اقدر اقول غير ربنا معاكم

انا قارىء جديد لموقعكم بعد مشاهدة برنامج قناة الجزيرة انا لا استطيع مغالبة دموعى بعد هذه المعاملة الوحشية التى تعاملوا بيها و انا مستغرب جدا موقف رجال الشرطة الا يعرف هؤلاء الاغبياء انكم اخواتهم و ابناءهم و هل انعدمت الانسانية و المروءة من نفوسهم حتى يفعلوا هذا باهلهم و لعنة الله على الشعب المصرى الخنوع الذى يخاف الحكومة فى حين ان الحكومة هى التى يجب ان تخاف من الشعب و للاسف اشك فى انكم ستصلون لهدفكم حيث تم تخريب الانسان المصرى منذ زمن

عالم المدونين والمدونات هو عالم غريب بالنسبة لي . لم أكن أتعامل معه او من خلاله سابقا. لكنه فتح لي ابواب عالم لم أكن أعرف عنه شيئا يذكر. فبالإضافة انهأخرج المدونات من سلطة الدولة والرقيب ،انه ايضا كشف الحالة المصرية - العربية في" إكتمالها " وايضا وفي تمام عيبوها. اوضح التآزر والتآخي والدعم المعنوي وكشف الفشخرة والحذلقة والسفسطة وبالطبع الإختراق المباحثي الذي يركز على البذاءة وتسفيه الآخر والخط من شأنه.المدونون ومنهم علاء والمتظاهرون الآخرون الذين حبستهم النيابة خمستاشرات وراء بعضها يشكلون واقعا جديدا في عالم السياسة المصرية المنهار من خلال الحزاب التقليدية.هذا العالم الذي يقتحم فيه نعمان جمعة حزب الوفد بالبلطجية والسلاح. فليس البوليس هو الذي يستخدم البلطجية لكن زعيم حزب له تاريخه وهو ايضا استاذ قانون. هذا الإنحدار واجهته المدونات بدون قصد منها .واجهته بعفوية عبر عنها علاء في رسائله من السجن . رسائل صادقة تتراوح بين الفكاهة واليأس والأمل والرغبة في تحقيق حاجات بسيطة انسانية ضد فكرة السجن.وهي بالمناسبة قمة في أدب السجون بدون حذلقة أو إدعاء بطولة. اكتب هذا الكلام بصفتي مسجون سياسي سابق وكنت فاقد الأمل في التغيير . لكن الشباب اعطوا امثالي الأمل. اصبحت قراءة مدونة منال وعلاء عادة سياسية مع قهوة الصباح تعطيني ترموتر الأمل والفهم لواقع الشباب .

السلام عليكم ورحمة الله

الحقيقة مش عارفة ابدا كلامى منين من اول مرة اعرف فيها عن المدونات واللى هى كانت من كام يوم عن طريق برنامج فى العمق بتاع رولا مصطفى خرسا ولا منى اشكركم انكم حسستونى ان مصر لسه فيها امل معقول فى فمصر ناس بتفكر كده زى زمان ايام الثورات وسعد زغلول وثورة عرابى معقول التاريخ بيعيد نفسه معقول انى انا ولا انا هنا مش فاهمة ايه اللى بيحصل ولا دريانه بيه ولاكانى عايشة فى البلد دى وكل همى انى اسافر واهج وخلاص

المهم انى حبيت علاء ومنال وحبيت حبهم لبعض وتيقنت ان حقيقى الحب يصنع المعجزات لكن فعلا انا بستغرب جايب الايمان ده كله منين يا علاء وكل واحد زى علاء الايمان بالوطن والانتماء ده كلام بنسمعه ونقراه فى الكتب بس لكن اول مرة احسه من اشخاص على قيد الحياة مش مدفونين فى كتب التاريخ

ربنا معاكم ويقويكم ويرشدكم لصالح البلد دى اللى بقيت بدعيلها فى صلاتى لاتى بقيت احس ان الايمان بالله لن يكتمل ابدا الا بالايمان بالوطن والاهتمام بيه ولاء

تستاهل السجن عشان تتربي

لازم تبطل الهبل اللي انت بتعمله ده

انت ضحيت و استغبيت عشان ايه او مين؟

عيش لنفسك و بس و مافيش حد يستاهل

من الواضح ان انت انسان لا تفهم ما تقول ،،،،،، وبتخبط فى الكلام ،،،،،، وسلبى والجزم اللى فوق راسك تستاهلها وهتزييييييييييييييييد على دماغك

علاء أنا متابعة مدونتك بقالي مدة ولاحظت انك فعلا انسان كويس وصادق مع نفسك وتستاهل كل خير..

ومنال انسانة شجاعة وقوية ودايما أكبر من الموقف مسش الموقف اللي اكبر منها ..

أنا بس نفسي أطلب منكم طلب... أنا عارفة انكم مش مؤمنين بربنا.. بس جربوا تدعوه مرة.. مش دايما اللي الإنسان بيشوفه صح يبقى صح.. كتير البني آدم بيغير رأيه .. بمرور الوقت وتقدم السن الإنسان بينضج.. وساعات بيكتشف ان الفكر اللي كان مؤمن بيه وعاش بيدافع عنه.. فكر مش سليم أو محتاج تصحيح أو تعديل.. يعني كلنا بنغير وجهة نظرنا من وقت لآخر.. جربوا تدعوا ربنا ..مش خسرانين حاجة.. الشدة موجودة والأزمة لسة متحلتش.. جربوال تلجأوا إلى الله بنفس صدقكم ده مع أنفسكم.. جايز جداً يتغير رأيكم.. جايز تعيدوا النظر في أفكاركم...

ربنا يهدينا ويهديكم.. ويفك ضيقة علاء ويصبرك يا منال.. ويرزقكم ببيبي صغنون يفرح قلبكم :)

مرسي على دعواتك بس أنا مش عارفة أنتي جبتي منين أن أنا مش مؤمنة بربنا؟؟

ياريت تحطي لينك للكلام اللي أنا قلته و فهمتي من معناه كده

مش فاهم ليه يعنى علاء هو اللى وراه اكوام الحب ده مع ان فى غيره كتير زيه و بيعانو اكتر و علاء زيه زى غيره ومش عارف ليه وازاى انسان ما يؤمنش بربنا و هو مسلم من الاول (ربنا يهدى) ولو هداك ربنا يمكن ساعتها تبقى احسن و يمكن تكون بجد حاجة الناس وراك عشان انت عايز تعمل حاجة للبلد بس اعملها فى سبيل ربك

استغفر الله العظيم

للتوضيح , تنظيم الطائفة المنصورة المزعوم هم مجموعة من الأبرياء الذين إتهمهم النظام ظلماً بهذا الأمر قبل ميعاد مناقشة تجديد الطواريء بمجلس الشعب وصدر حكم بالبراءة ل 12 منهم وينتظر الأخرون البراءة إن شاء الله

يا بختك على الاقل فى حد يسال عليك

ya 3ala2, el mennaz el abyad yenfa3 fel yom leswed.

كفارة يا ابني :)

العاب فلاش | العاب | بيت الراغب