You are here

الصبر مفتاح الفرج

Primary tabs

بحب قوى الكلمة بتاعت بره استنوا كتير

خد عندك مثلا حسب تعليق بيقولك

السعودية...2009؟ لا أعتقد. قرأت منذ حوالي شهر المقابلة التي أجراها ولي العهد السعودي مع صحافيتين فرنسيتين. عندما سألته إحداهما عن حقوق المرأة في المملكة أجاب بكل ديبلوماسية قائلا ً أن المرأة الأوروبية انتظرت كثيرًا حتى حصلت على حقوقها، المرأة السعودية سوف تحصل هي الأخرى على حقوقها، غالبًا في وقت أقل!ـ

برضه الحاج بتاع الرابسو قالها امبارح قالك أمريكا بجلالة قدرها استنت 200 سنة قبل محققت الديموقراطية مستكترين على مصر 20 سنة!! لسه بدرىىى

مش فاهم أنا هو تاريخ مصر ابتدى مع بناء مدينة العاشر من رمضان ولا ايه، ايه 20 سنة دى كان فى ايه قبل العشرين سنة؟؟ ديناصورات ولا قبائل جمع و التقاط؟

يعنى مثلا اختيار محمد على صحيح مش ديمقراطيا لكن مش بعيدة عن الماجنا كارتا مثلا

بلاش دى محمد على طلع راجل مفترى خلينا فى عرابى كان ايه الموضوع ايام عرابى يا ترى ؟ ولا اتلغت من المنهج دى؟

سيبك من عرابى ده راجل عسكرى يبقى أكيد ده كان انقلاب و ملهاش دعوة بالديموقراطية

ندخل على 1919? و نتكلم عن الوفد؟

بلاش حواديت أبيض و أسود خلينا فى التاريخ المعاصر لجمعية المص العربية (و لا بلاش جمعية الجمعيات دى حاجات وحشة بتاخد تمويل أجنبى نسميها جمهورية أصل دى مش بتاخد تمويل أجنبى أبدا و العياز بالله بناخد أحنا فيها صحيح بس مش موضوعنا)

المهم عبد الناصر أول من حكم جمهورية المص كان (سيبك من الراجل الأولانى ده كان بيدفيلو الكرسى بس) محدش اعترض خالص، محدش طلب ديمقراطية؟ اومال السجون كان فيها مين لا مؤاخذة حرامية مثلا لا سمح الله؟ يعنى القضاة و مذبحتهم دى مكانش ليها علاقة خالص؟ عالعموم مش مهم دى طالما انهم سموا قبل ما يدبحوا، و بعدين الناس قالت أحا أحا لا تتنحى يعنى ماكانوش عاوزين الديمقراطية وقتها ولا حاجة

نخش عالسادات أهو كان راجل عسل، أولا وفقا لكلام السادات احنا أصلا كنا فى ديمقراطيا صحيح كان ليها أنياب بس متقدرش تنكر انو كانت موجودة من أتر من عشرين سنة، و بعدين ايه اللى حصل فى يناير 77? ولا هتقوللى دول الحرامية برضه؟

و بعدين أنا من يوم ماوعيت عالدنيا واحنا بيتقالنا ان احنا فى أزهى عصور الديمقراطية يبقى نستنى ليه بقى احنا مش وصلنا خلاص؟ انا فاهم ان احنا دونا عن الدنيا كلها الديمقراطيا عندنا هامش و بعدين أحنا 70 مليون يابا يعنى الطابور على دخول الهامش طويل بس برضه يعنى مش ممكن نستنى الوقت ده كله.

أنا شايف نوسع الطريق للديمقراطية و نعمله حارتين و يا ريت يكونوا اتجاه رايح بس

ياسادة احنا مستنيين بقالنا فى أحسن الأحوال 86 سنة وفى أسوائهم 124 (محسبتش محمد على عملا بقاعدة درجات الرأفة) أظن كفاية علينا

Comments

اما انك جاهل صحيح انا مش فاهم يا اخوي بيعلموكم ايه في مدارس الخواجات دي

هو مش في سنه كبيسه يا أستاذ؟ احنا في جمهورية المص العربيه بنحسب بالسنة الكبيسه بس مبنحسبش السنين العاديه يعني تصبر شوية بقى و بلاش دوشه

عالم عميله صحيح

بوودي - عضو نشط في الحزب الوطني بعد آخر علقه كلتها في القسم

أنا صاحب التعليق ولم أكن أتخيل أنه سوف يثير رد فعل بهذا الحجم. عمومًا هذا ما فهمته من رأي الأمير عبد الله في صحيفة لوموند الفرنسية في عددها الصادر بتاريخ 13 أبريل 2005. سوف أعلـّق على هذه التدوينة التي هي تعليق على تعليقي ذاكرًا مقولة قرأتها وهي منسوبة لكبير أطباء الحملة الفرنسية على مصر إذ يقول: "بملاحظة بسيطة لما يدور حولنا نرى أن المصريين يستفاد ون من دروسنا. إذا كنا وجدناهم متخلفين ببضعة قرون فإن قدرتهم على التقليد ومهارتهم العملية جعلاهم يستعيدوا قرن خلال عام واحد". إنها جرعة تفاؤل وأتمنى ألا يطول صبرك وصبري. ـ

والله يا استاذ علاء انت قطعت قلوبنا من الحسرة على حال البلد

بس عايزك تقوللي الديمقراطية اللي انت عاوزها شكلها ايه ... يعني الدستور يبقى ازاي ... والقوانين تبقى ازاي

انا شخصيا علشان متفهمنيش غلط باطالب بديكتاتورية اكتر من الموجودة ... بس للاسف الظروف الدولية متسمحش ونتقابل تاني

الديمقراطية، فى أقل تعريف ليها طموحا، تعنى نظام دولة لا يسمح بوجود ديكتاتور

و أى ديكتاتور مستبد مهما كان هو مين.

اتكلمت قبل كده فى اللى أنا عاوزه من الديمقراطية

مش ممكن مع نفسى كده أكتب دستور و قوانين أنا بكل بساطة عاوز محدش يدخل و يعطل شغلى و نشاطى، مش عاوز الفساد ياخد من كل لقمة باكلها قطمتين و عاوز أطمن ان البوليس لا يمكن يتعدى على جسمى أو كرامتى.

الحقيقة قرات بتأني ما كتبته يا علاء بك والحقيقة هو من اول وهلة عجبني ولكن:

بصفتي معارضة في الموقع فلازم اقول ان هناك مغالطات بالجملة (يعني زي ما عمل النواب بتوع المعارضة في تعديل الدستور)

أول حاجة مقالة زي دي لازم تكون بالعربي بلغة اشبه بالعامية من كونها فصحي حتى تصل الى اكبر فئة من المتضررين من الشباب النصف متعلم اللي جاي سيادتك بتتكلم عليهم وتحاول تحل مشاكلهم

انت بتقول التعليم مشكلته سياسية ... كفاية بقي يا حكومة موقع manalaa.net تنسبوا كل حاجة للسياسة ... مشكلة التعليم هي التعسيلة اللي واخدها المجتمع ومظبطها على الصح وانتم اللي بتغذوا ده بحجة ان الحزب الوطني وحكومته هي السبب بممارساتها السياسية http://ed.sjtu.edu.cn/ranking.htm شوف كل دول العالم عندها جامعات كويسة ما عدا احنا مع ان عندنا جامعات خاصة ومش كلها حكومة علشان المجتمع اللي كل همه يقول كفاية مش عايز يشتغل والمعارضة كل رؤساء احزابها فوق السبعين سنة يعني المشكلة مش في الحكومة والكلام ده قاله هيكل في الجزيرة

انت بتقول انك مش عارف تعمل شغل علشان الحكومة بمؤسساتها مسيطرة على الاوضاع طب امشي في مصر المحروسة وعد كام واحد سارق من عامود الكهربا وكام واحد سارق خط تليفون من جاره ومتقوليش ان التليفون من مقومات الحياة زي الميه والهوا لانه اساسا عنده تليفون

اي نوع من انواع المشاركة السياية هو رغبة في الوصول للحكم او حب ظهور او اشباع شخصي والكلام ده ينطبق على 90% من العمل العام سواء احزاب او اندية او جمعيات اهلية (طبعا انا من ال 10% هاهاهاها ما انا معارضة دلوقتي) فاللي يخش يلعب لازم يلتزم باصول اللعبة يا تاخد شعبية يا تاخد سلطة مينفعش الاتنين واللي بيتبهدلوا من البوليس هم ببساطة يا مش عارفين اصول اللعبة يا بينسوها في النص

وللحوار بقية يا ادارة manalaa.net