You are here

اعتصام 52 موظف و عامل بجامعة عين شمس

Primary tabs

على خلفية الصراع الطبقي اللي محتدم في البلد بقاله 5 سنين و اللي وصل ذروته السنة دي كع اقتراب موعد انتخابات المقابات العمالية بدأ النهاردة اعتصام من نوع مختلف شوية

وفقا لكفاية قررت ادارة جامعة عين شمس تخفيض أساسي مرتبات بعض العاملين من 220 جنيه الي 134 جنيه (معنديش فكرة بعد حساب الاضافات و المافئات الموظفين دول بياخدوا كام لكن المؤكد أنك لو عندك عبد هتصرف عليه أكثر من 134).

المهم حاولت مجموعة من العمال أنها تقابل رئيس الجامعة و رفض مقابلتهم فبدأوا اعتصام بالجامعة، تابعوا موقع كفاية لمزيد من الأخبار (و الموقع بيحاول يتابع كل أخبار الاضرابات و الاعتصامات العمالية مؤخرا).

52 Ain Shams University workers on strike

Comments

فيه مشاكل من مدة جوا جامعة عين شمس منها اضراب مجموعة من الموظفين عشان زملاءهم تم التحقيق معاهم .

الإدارة هناك زفت، والقرارات مش متزنة

"بقاله 5 سنين"

only 5 years??

أنا أقصد المفهوم الماركسي الكلاسيكي للصراع الطبقي المنظم، على حد علمي الخمس سنين اللي فاتوا شافوا كثافة غير مسبوقة في الاضرابات و الاعتصمامات ما بين العمال و الفلاحين. لحد ما وصلنا لاضراب كل شهر.

أسباب الصراع ده موجودة منذ الأذل طبعا لكن فيه حاجة مختلفة الخمس سنين اللي فاتوا. و يمكن حد يعرف أكثر مني يؤكد المشاهدة دي و يقدم تفسير ليها.

لاحظ أن دي حاجة سابقة على الحراك السياسي المرتبط بالمطالبة باصلاحات ديمقراطية يعني صراع طبقي نابع من الطبقات الكادحة فعلا.

و برضه لاحظ الفشل الذريع لليسار المصري في الاستفادة من الحالة دي أو المساهمة في قيادتها (كتيار طبعا مؤكد فيه أفراد مشاركين والا مكناش سمعنا الأخبار أصلا).

هو لا مؤاخذة ممنوع حد يتضامن مع المعتصمين او حتى ينظم اعتصامات او اضرابات الا الجماعة اللي غرقانين في الشعارات اللي بيقولوا على نفسهم يساريين و ناسيين ان الدنيا اتغيرت و ان النهاردة غير امبارح و بكرة اكيد هيبقى غيره؟ امتى هنفوق يا بلد بلالين ؟ كل واحد يطلعله بكلمتين عن الطبقات الكادحة و الفئات المحرومة و الصراع الطبقي او الحللي و الناس اللي عندها المشكلة اساساً وضعها ما بيتغيرش الا للأسوأ . طب و بعدين؟ أظن ولا قبلين حنفضل ننادي بكلام براق لكن الطبقة المستهدفة أساساً ما بيوصلهاش أي حاجة من الكلام النظري المطاط اللي ما تعرفلوش راس من رجلين .

مش فاهم؟ أنت عايز ايه يا كابتن؟

هو حد حاش حد يتضامن؟ حد منع حد من العمل؟ ما اللي عايز يتضامن ما يروح يتضامن ايه اللي حارقك؟

و بعدين متشوف الكلام اللي بيتقال المشكلة مش في أن في ناس بتقول كلام معرفش ماله مبيوصلش للطبقة المستهدفة، المشكلة أفدح الطبقة المستهدفة بتتحرك لوحدها بقالها خمس سنين على الأقل لكن مفيش جهد منظم للربط ما بين التحركات دي و للبناء عليها و المحافظة على و تعميم أي مكاسب بتحققها و هكذا.

أولاً: أنا مافيش حاجة حارقاني من ناحية الاعتصام دوة على العكس ده يعتبر خطوة ان ماكانتش للامام فهي على الاقل مش للخلف .

ثانياً:اظن ردي كان على الكلام اللي انت كاتبه بخصوص الصراع الحللي اياه . طول عمر الدنيا فيها طبقات ( أو حلل!) و سيظل هذا الوضع "الى أن يرث الله الأرض بما عليها" زي ما بيقولوا. لكن الجماعة اياهم بتوع اليسار الجامدين اوي مصممين انهم - لا مؤاخذة هو انتو يساريين؟!- يلعبوا على الحلم العبثي بتاع "تذويب الفوارق بين الطبقات" رغم ان على الاقل مالوش اي سابقة تاريخية توحي بامكانية تحقيقه من الاساس وحميع النظريات اللي "افتكسوها" اثبتت فشلها الذريع لما اتيح لها التطبيق.

ثالثاً: انا عايز ايه؟ هو لا مؤاخذة انت هتعرف تحققهولي؟!!

رابعاً:(و هو ده المهم) خطوة زي دي لها "ثقل" اعلى من جميع مظاهرات "النخبة" و "المثقفين" اياهماللي ما وراهومش غير انهم يعيشوا جوة اوهام المعارضة المستنيرة اللي ما بتقدمش و لا تأخر "رغم كل المجهودات النبيلة التي بذلت بنية يبدو انها صافية" لان الحقيقة المرة -دايماً بيبقى فيه واحدة مش كدة! - بتقول ان قمة الهرم بتتبنى آخر حاجة.....

أخيراًً : انا مجرد باحاول اتناقش من اجل شئ يطلق عليه البعض "المستقبل الافضل" و آسف اذا ما فهمتنيش يا باشمهندس...!

أولا: ماشي يا سيدي مفيش حاجة حرقاك في الاعتصام، ايه بقى الطلعة الغريبة بتاعت هو التضامن حكر على اليساريين ده؟ يا ترى الطلعة دي سببها ايه؟ هو ده السؤوال بتاع ايه اللي حارقك.

مش فاهم برضه "ردك" على اللي أنا كتبته ، أنت بتقول أن طبيعة الدنيا أن يكون فيه طبقات. ماشي اللي أنا قلته يتعارض في ايه بقى مع ده؟

اللي أنا قلته أن فيه صراع طبقي محتدم بقاله خمس سنين، و لما حد سألني خمس سنين بس؟! شرحت أن قصدي بكلمة صراع طبقي حاجة محددة جدا. استخدام كلمة الصراع الطبقي كان هنا لوصف مجموعة من الأحداث اللي حصلت مش للكلام عن تصور ما للمستقبل تذوب فيه الطبقات.

أنت قفشت لمجرد استخدامي لفظة صراع طبقي، فهمني هل أنت معتبر أن وصف العدد المتزايد من الاضرابات و الاعتصامات وسط العمال و الفلاحين بالصراع الطبقي على أنه وصف غلط مثلا؟

عارف يا علاء والله كان عنده حق اما قال "مافيش فايدة" .no offense meant but i'm too blue to give out any reasonable argument right now..IT ALL SUCKS.

THis is not the first or the last time. THings are getting worse..

weee lesssaaaaaa :(

انا مش فاهمة المشكلة يا علاء, يعني ايه الجامعة تخفض أساسي المرتب؟؟؟ المرتب الأساسي دا مش في ايد جهة العمل أصلا , الأساسي دا ثابت بالنسبة للدرجة و الأقدمية في كل مكان , و التنمية الادارية هي اللي تحدده مش جهة العمل , و وزارة المالية هي اللي بتدفعه ... جهة العمل تحدد بعد كدا بقى الحوافز " تحددها كل جهة بنسبة من المرتب" و المكافئات , و بالنسبة للجامعات مكافئة الامتحانات وووووو , لكن الأساسي مش تحت سلطة الجامعة لتغييره........ 134 جنيه هو أساسي موظف الدرجة الثالثة في بداية الدرجة و أغتقد زاد شوية في آخر علاوة في يوليو اللي فات , و هو ثابت في أي مكان..... فكرتني , المستشفى اللي باشتغل فيها قررت ان المكافئات "اللي محدداها الجامعة لجميع موظفيها" تكون لجميع الموظفين ماعدا الأطباء عشان مش محتاجين !!!!!!!

http://bluerose.egyblogs.com/

أنا مش عارف التفاصيل بالظبط، هل العمال دول موظفين دولة ولا معينين بعقود ولا ايه بالظبط. لكن وفقا لوالدتي و لدكاترة 9 مارس فيه تخفيض في الأجر الأساسي فعلا و التخفيض مبني على حجة أن الأجر اتحسب غلط و بيستهبلوا و يطلبوا منهم يردوا الأجر الزيادة اللي قبضوه سنين لوراء (تغيير بأثر رجعي يعني).

الحوافز بتاعة الموظفين كانت 100% بمعنى ان المرتب كان بيوصل لـ حوالي 440 جنيه وبعدين هما اصلا كانوا عايزين منهم يرجعوا راتب شهر 10 بعد ماقبضوه لانهم بيقولوا ان القرار المفروض يطبق من اول 10 وهما استلموا المرتب بالغلط عموما هو الموضوع اتحل دلؤتي ووعد عميد الجامعه بانهاء المشكله بعد ما كان رافض في الاول انه حتى يقابل العالم المضربه عن العمل . والمفترض انهم دلؤتي متحفزين ومستعدين لما يقبضوا مرتب شهر 11 يشوفوا هل حيصدق فعلا ولا كله كلام ؟

http://MaLek-x.net

طيب ليه عملوا هيك ؟ جد حرام عليهم ، الناس عايشين بفقر و غم و حاجة بدون ما يقللوا رواتبهم ، والله انه هاد اجرام ، انا مو عارفة كيف الناس بدها تعيش !