You are here

نص الحكم على المدون المصري عبد الكريم نبيل سليمان

Primary tabs

أولا أفكركم أن النهاردة الأثنين 12 مارس هو جلسة الاستئناف في قضية المدون المصري عبد الكريم نبيل سليمان.

و ثانيا يا ريت تدخلوا تقرأوا بيان و لم يؤخذ الكلام الى المحكمة و توقعوا عليه.

لم يؤخذ الكلام إلى المحكمة!

ده نص الحكم على عبد الكريم اللي القاضي بيشرح فيه أسبابه لحبس عبد الكريم أربع سنوات، يا ريت تقرأوه.

مبدأيا بغض النظر عن نزاهة و عدالة المحكمة و النيابة من عدمه أنا ضد محاكمة و حبس أي فرد بسبب تعبيره السلمي عن رأيه، بغض النظر رأيه ده ايه و تعبيره السلمي ده استخدم ألفاظ و تعبيرات عاملة ازاي، لكن أهم من ده كله لازم المحاكمة تكون عادلة لأن من غير محاكمة عادلة مش هيفرق أصلا القانون عاجبني ولا لأ المسألة هتخرج خارج سياق القانون. كنت كتبت قبل كده عن التجاهل السافر للقانون و العدالة من قبل النيابة العامة، و كان واضح تماما أن السيد وكيل النيابة بيحكم دينه و مشاعره و بيحاول يعلي السكور بتاع حسناته يمكن يطلعله قصر زيادة في الجنة ولا حاجة و كل ده على حساب عبد الكريم، من أول حبسه احتياطيا بدون أي سبب مقنع و لمدة أطول من متطلبات التحقيق لحد تعمد التفتيش في معتقدات عبد الكريم بدل من التحقيق في الوقائع.

المحكمة مكانتش فجة زي النيابة لكن عندي ملاحظات على نص الحكم تخليني أشك أن القاضي توصل لقراره مبكرا و بناء على عقيدته و مشاعره برضه مش بناء على القانون، وفقا لهيئة دفاع كريم المحكمة ارتكبت أخطاء قانونية فادحة كمان لكن دي صعب علي فهمها و أتصور أننا هنعرف عنها أكثر بعد الجلسة.

هتلاقوني عملت بعض المقاطع ببنط ثقيل، و دي المقاطع اللي هعلق عليها

مما يؤدي للاضرار بالوحدة الوطنية

بعيدا عن أسطورة أن أصلا فيه وحدة وطنية، دي حتة مش مفهومة خالص بالنسبة لي، حسب فهمي للمصطلح الوحدة الوطنية دي معناها أن المسلمين يبطلوا يدبحوا المسيحيين و يحرقوا كنائسهم و أن المسيحيين يبطلوا (معرفش بصراحة يبطلوا ايه بالظبط بس ما علينا هنفترض أن فيه سلوك ما للمسيحيين بيغذي احتمال وقوع جرائم عنف طائفي و يشعلل الكراهية بين الطائفتين)، دلوقتي عبد الكريم قالك أنا ملحد و مفيش ربنا أصلا، يعني هو في ناحية و طرفي الوحدة الوطنية المزعومة في ناحية ثانية خالص، ازاي يكون نقد عبد الكريم لدين أمه له تأثير على العلاقات ما بين المسلمين و المسيحيين؟ و الأدهى ازاي القاضي يعتبر أن تعليق عبد الكريم الناقد للاسلام اللي جاء كرد فعل لطعن مسلم لراهبة مسيحية و مهاجمة عصابة من الغوغاء المسلمين لكنيسة تهديد للوحدة الوطنية؟؟؟ يعني بعد أحداث محرم بك كان فاضل شوية وحدة وطنية و جاء عبد الكريم و خلص عليهم باعلان الحاده و نقده للرسول و الصحابة؟

خد بالك ده كلام النيابة مش القاضي لكن القاضي بعد كده قال كلام يفهم منه أنه موافق النيابة على الموضوع ده، خدي بالك بقى أن عبد الكريم الوحيد اللي بيحاكم على خلفية أحداث محرم بك، يعني اللي حرق و كسر و شرع في القتل و أرهب و هدد عادي ميخصش النيابة في شيئ لكن اللي كبت مقال بيتحاكم، عادي يعني.

ولدى سؤاله عن ..... وايمانه بسيدنا محمد صلى الله عليه وسلم

دي تقريبا كده محكمة التفتيش بتاعة الأزهر اللي سألت السؤال ده مش محكمة التفتيش بتاعت النيابة، المهم ممكن حد يشرحلي ليه حد يسأل في تحقيق عن مدى ايمانه بسيدنا محمد؟ و هل يعقل أن القاضي ميلاقيش أي مشكلة في السؤال خالص؟ هل نحاكم على ما في قلوبنا الأيام دي؟

و يا ترى مسموح بالسؤال عن الله و الرسول فقط؟ و لا ممكن كمان تسأل في تحقيق عن رأيك في القرآن مخلوق أم أزلي و عرش الله كائن مادي أم استعارة و آدم نبي أم لا و الانسان مخير أم مسير و هل تؤمن بالجن أم لا و ما شابهها من الأسئلة المصيرية الملحة التي طالما شغلت عقول علمائنا و مفكرينا حتى صرنا خير أمة.

كما هاجم نظام الحكم بذكره ان الرئيس مبارك رمز الاستبداد وقاهر العباد فى مقاله بايعو الرئيس مبارك أميراً للمؤمنين

خد بالك من دي يا كابتن أنت و هو، أولا مهاجمة نظام الحكم حرام (ما هو الأزهر اللي بيسأل) و مش بس حرام جريمة و جنحة كمان (ما هو النيابة اللي بتسأل)، صحيح الحكم بيقول اهانة الرئيس، لكن التحقيق بيقول مهاجمة نظام الحكم، و كلنا طبعا عارفين أن وظيفة مجالس التأديب الجامعية و النيابة العامة و المحاكم و مصلحة السجون منع أي هجوم على نظام الحكم بصفتنا يعني في بلد ديمقراطي و كده.

اعترف بما هو منسوب اليه من اتهام

وسألته المحكمة عن التهمة المنسوبة اليه فاعترف بها

دي بقى اللي مصيبة، كل اللي فات ده تفاصيل كده مش مهمة و مش مسئولية القاضي، لكن تعالى نشوف دي و نشوف سيادة القاضي بيفكر ازاي.

نفرض مثلا مثلا مثلا أن سيادتك متقدمة للمحاكمة بتهمة القتل مع سبق الاصرار و الترصد، و قمتي سيادتك قلتي أن واقعة القتل حصلت فعلا و أنك كنتي مسئولة عنها فعلا لكنها مكانتش مع سبق الاصرار و الترصد ولا حاجة ده كان دفاع عن النفس لأن أصلا المجني عليه يا عدالة المحكمة كان بيحاول يغتصبك.

يبقى كده أنتي اعترفتي صح؟ بس اعترفتي بايه؟ هل اعترفتي بما هو منسوب اليك من اتهام؟ هل اعترفتي بالتهمة المنسوبة اليك؟

لأ طبعا أنت اعترفتي بالوقائع فقط لكن بتقوللي أنك بريئة من التهمة المنسوبة اليك، و أي قاضي نصف لبة هيفهم الفرق على طول.

طيب عبد الكريم اعترف أن الكتابات المذكورة في تحقيقات النيابة كتاباته فعلا و قال كتبتها تعبيرا عن رأيي، لم يعترف بالتهم اعترف بالوقائع، ممكن النيابة تثبت غير ذلك و ممكن القاضي ميصدقهوش، لكن مينفعش يتقال أنه اعترف بالتهمة دي تبقى استهبالة شديدة جدا.

يا ريت الاستهبال وقف هنا، القاضي بيقول اعترف بالتهم، طيب اعترف امتى؟ في تحقيقات النيابة و في جلسة سابقة على جلسة النطق بالحكم صح؟

عظيم جه القاضي يوم النطق بالحكم و غير التهم المنسوبة اليه، يبقى ازاي عبد الكريم اعترف؟ هل ينفع الواحد يعترف بتهمة ستوجه اليه في المستقبل؟ ده كده يبقى سيادة القاضي بيدعي أن كريم يعلم الغيب و كلنا عارفين أن ده شرك بالله.

موس علاء بيقولك لا يفسر بالدهاء ما يمكن تفسيره بالغباء، لكن صعب قوي قوي أفترض أن فيه قاضي مش فاهم الفرق ما بين الاعتراف بالوقائع و الاعتراف بالتهم و أن فيه قاضي مش فاهم الاستحالة الفيزيقية في الاعتراف بتهمة مستقبلية، ده ملوش غير اسم واحد لكن مش هنقوله عشان قضايا السب و القذف كثرت الأيام دي و خلينا مع الرصين أحسن.

قد اطمأنت الى أدلة الثبوت فضلاً عن إعتراف المتهم امام المحكمة

الحتة دي برضه مهمة جدا. بيقولك الدفاع طلب خبير لشكهم في أن المحكمة مختصة بالنظر في الدعوى دي بما أن في رأي الدفاع وقائعها تمت خارج البلاد، و كانوا عاوزين الخبير يشرح الموضوع ده.

طيب القاضي قالك الأدلة اللي عندي كافية و المتهم اعترف (أيوه للمرة الثالثة بيقولنا أنه اعترف، يا حاللولي).

هنفرض جدلا أن الأدلة كافية و أن المتهم أعترف، الأدلة كافية لايه؟ لثبوت حدوث الجريمة.و المتهم اعترف بايه؟ بوقائع الجريمة. ايه علاقة ثبوت حدوث الجريمة بمدى اختصاص المحكمة؟ هو الدفاع كان قالك هنجيب خبير يثبت أن الوقائع محصلتش؟ يعني الدفاع غبي؟ شايف موكله معترف بالوقائع بس بيطلب خبير يثبت أنها محصلتش؟ ما الدفاع قال لعدالتكم أن الخبير عاوزينه للنظر في اختصاص المحكمة؟ أحنا عارفين أن سيادتك قاضي في مكمة جزئية و لسه في أول الطريق بس مش للدرجة يعني؟ أكيد عدى عليك قبل كده قضية كان فيه شك في تخصكم و لا تخص غيركم.

طيب تعالى نفهمها، نفرض أن سيادتك بعد ما اعترفتي بقتل المغتصب الشرير دفاعا عن نفسك محامينك قاللوا للقاضي حضرتك حتى لو كان مش دفاعا عن النفس أصلا الحادثة حصلت موزمبيق و المحكمة دي أخرها محرم بك ملهاش دعوى باللي بيحصل في موزامبيق خالص.

ممكن يطلع المحامين غلطانين و الحادثة لم تحدث في موزمبيق لكن لازم يكون في أدلة بتحدد اختصاص المحكمة و اعترافك يكون بيحدد الحادثة وقعت فين عشان المحكمة تقول بس يا محامين بلاش تضييع وقت الأدلة باينة قدامي أهه كل حاجة حصلت في محرم بك و مفيش داعي لانتداب خبير. طبعا في قضايا القتل الاختصاص أسهل من قضايا النت لأن الجثة و السلاح بيتلاقوا في مكان معين و لأن الشهود بشوفوا الحدث في المكان ده و هكذا، في قضايا النت الموضوع أعقد بكثير و مفيهوش حتى تشريع قاطع و واضح و كان مفروض الدفاع ياخد حقه في طرح وجهة نظره، و مجاتش يعني على جلسة زيادة.

دون حاجة أن تلفت نظر الدفاع إلى ذلك

وفقا لكلام القاضي يحق للمحكمة تعديل التهم و مواد القانون من غير ما تخطر الدفاع و نحكمعليه بكلام غير اللي الدفاع رد عليه (أصلا الدفاع حرم من حقه في الترافع من كثر عدالة المحكمة). لو الكلام ده صحيح تبقى مصيبة و مسخرة و محدش يهوب ناحية محكمة أبدا بقى لحسن الموضوع طلع عوق و لو مش صحيح يبقى فيه خطأ كبير ارتكب في القضية دي.

طبعا مش بعيدة على قوانينا (ما هو بتوع الحزب الوطني و أسلافهم هما اللي كتبوها) لكن بجد بجد بجد يعني ينفع يتغير التهمة الموجهة اليك في نفس النفس اللي بينطق فيه الحكم؟ بجد بجد بجد مفيهاش حاجة لما محاميك يتبعت و يدافع عنك في تهم غير اللي هيتحكم عليك فيها؟ يعني تخيلي كده أنك محاميكي مقضي وقته كله بيرد على تهمة القتل مع سبق الاصرار و الترصد يقوم القاضي يقلبها خيانة عظمى على أساس اللي كان هيغتصبك ده طلع رئيس جهاز مباحث أمن الدولة و أنت مش واخدة بالك مثلا (أنا بقول أسيب سيناريو القتل و الاغتصاب ده لحسن بهوق قوي).

نزع القدسية النبوية عن محمد بن عبد اللاه و وصف أصحابه سالفى الذكر بأنهم سفاكى الدماء مع أنهم رموز طائفة المسلمين على الأرض ومجمع كافة المسلمين فى بقاع الأرض على هذه القدسية للرسول محمد صلى الله عليه وسلم

خد بالك يا كابتن منك ليه، محكمة محرم بك جزئية حكمت أولا أن كل مسلمي العالم مؤمنين ايمانا تاما لا شك فيه أن الرسول مقدس (و ليس مجرد بشرا أنزلت عليه رسالة) و أنه لا خلاف على كل الصحابة (بغض النظر عن الفتنى الكبرى أو غيرها) فكل الصحابة رموز فوق النقد لكل المسلمين.

أيوه أنا عارف أن كثير منكم شايف كده فعلا، بس مصدقين أن كل مسلمي العالم شايفين كده بالظبط؟ متأكدين يعني أن دي مسألة مفيش عليها أي خلاف؟

التى يستطيع الاطلاع عليها أى شخص دون رغبة ما يوفر ركن العلانية

مش عارف بقى دي فيها خطأ في الكتابة أو النقل أو يمكن انا فاهمها غلط.

لكن لو أنا فاهمها صح سيادة القاضي بيثبت هنا العلانية، أولا مقالش ده بناء على ايه، هو أصلا رفض انتداب خبير للنظر في الموقع المرفق في ملفات التحقيقات و الأدلة كانت مطبوعات عن موقع مش عرض للموقع ذاته أمام القاضي. يعني يبدوا لي أنه أقر بالعلانية بدون أي دليل فعلي.

مش بس كده، تقريبا كده بيقولك كشرط للعلانية أنك يبقى ينفع تتطلع على الحاجة دون رغبة، طيب دي حصلت ازاي يعني؟ لتقرأ مقالات عبد الكريم لازم تزور المواقع المنشور فيها مقالات عبد الكريم و غالبا لازم تبذل جهد في ده ده مش تلفزيون بتسع قناوات فقط بحيث يبقى مؤكد هتتشنكل في أي حاجة بتبث فيه؟

لكن يمكن أنا فاهم غلط، كلام القانون مش زي كلامنا، يعني يمكن يكون النص ده بينطبق على الكتب مع أنك لازم تروح تدور على الكتاب و تختاره من بين عشرات الألوف من الكتب بنفسك. لكن المقلق هو غياب الأدلة عن علانية المواقع مش يمكن يكون ناشرها في أماكم محتاجة اشتراك؟

طبعا ده مش هيفرق في حالة عبد الكريم، لكن عممها، أنت نشرت حاجة في منتدي كر على مجموعة أصدقاء ثم تسرب ما نشرت مطبوعا للنيابة و لقيت نفسك بتتحاكم، ممكن يقف قاضي يقول علانية علانية و لو طلبت خبير هيقولك ما أنت اعترف يا روح طنط.

ما يحرض الطوائف الأخرى على النيل من المسلمين وتحرض المسلمين أيضاً على النيل ممن يريدون النيل من رموزهم

مش عارف أضحك على دي و لا بجد فيه ناس بتفكر كده؟

حد يشرحلي فين التحريض للطوائف الأخرى بالظبط؟ عبد الكريم كان بيحرض طائفة الملحدين على مقاتلة المسلمين باين عليه مش كده؟ أيوه الأربعتاشر ملحد و نصف في البلد اللي كانوا بيقرأوا لعبد الكريم دلوقتي منخرطين في تنظيم جهادي مسلح للنيل من المسلمين عشان عبد الكريم قال أن أصحاب نبيهم كانوا سفاكي دماء.

و الواد عبد الكريم ده بقى طلع سهن، مش بس حرض التنظيم الطليعي الالحادي ده، راح من وراهم و قابل مجموعة من عتاولة السلفيين (في مقابلة سرية رتبها له أبوه) و حرضهم على مقاتلة الأربعتاشر و نصف ملحد الباقيين.

الحتة دي بصراحة مش مفهومة بالنسبة لي خالص، لكني متأكد أن الأخوة طلائع القص و اللصق هيشرحوللي ازاي دي بديهية تماما.

خرج فى مقاله عن حدود النقد المباح إلى المساس بشخص رئيس الجمهورية بأن وجه إليه الفاظ تمس شخصه وهو أن الرئيس مبارك هو رمز للإستبداد وقاهر العباد

أوعى وشك، واخدلي بالك يا مؤمن أنت و هو؟ من يوجه للسيد الرئيس ألفاظ مثل رمز الاستبداد و قاهر العباد هيدخل السجن سنة. أدي عدالة و نزاهة المحكمة قالتها أهوه، كله يسمع. عدوا معايا كده كام مدون و صحفي و ناشط سياسي أو حقوقي و كام واحد قاعد على القهوة و كام سواق تاكسي (و كلهم لاتنتفي فيهم صفة العلانية) قال كلام مشابه أو أشد؟

منورين يا أخواننا، كله يروح يعمل توكيلات لمحاميوا مركز هشام مبارك و يعدي بالمرة على التوحيد و النور يطلب منه شنطة السجن (هما عارفين اليه المطلوب متحملش هم أنت) عشان وارانا عدالة عاوزين نطبقها.

يا مبارك أنت وحش

يا مبارك أنت كخة

و يسقط يسقط حسني مبارك

قوللوا للكلب العادلي و سيده بكره الشعب هيقطع ايده

Comments

إزاي عبد الكريم يقدر ينزع القدسية عن الرسول؟

وهي القدسية ديه ممكن تتنزع أساسا؟

وهو بكده يعني هيخلي المسلمين يبطلوا يقدسوا الرسول؟

أعتقد الفقرة ديه أغبي فقرة في الموضوع كله لأن عبد الكريم نزع القدسية عن الرسول لنفسه ومش للمسلمين

وأما أن الدفاع كان بيدافع عن تهم و يتحكم عليه بسبب تهم غير إللي الدفاع بيدافع عنها فديه متحصلش إلا في مصر بلد اللا منطق

ma3lesh 7ad yenawarni.. so2al off-topic shwaya bs mish 2adra a3eesh min 3'er ma a3raf el 2egaba (3alaa, i think u said somethin about it earlier, but could u elaborate?) howa meen 2al en el rasool moqaddas? mish el qodseya di ma3naha "holy", i.e. she2 "2elahy" ya3ni? ezay ba2a qodseya nabaweya???

No I dont think Prophet Mohammad is holy man , meaning we Muslims do not worship him but he have his highl rank which must be respected non worshiping doesnt mean he is an ordinary man.

يعني انا بس عاوز اسال الناس الي بتدافع عن عبدالكريم دول ملت الي جابتهم ايه؟ يعني ايه ادافع عن واحد مفترض انو بيسب ديني ونبي يعني انتو متناولين الموضوع من اي جه متبنيين الموضوع من ناحيه ايه مثلا حريه التعبير خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ هقول ايه بس هتخلو الواحد يشخر وهو صايم يلا اللهم اني صائم

حيثيات الحكم دى مهذله!!!!! دوله كده بيردوا علينا و بيقولوا "أيوه الكلام بيودى السجن"!!!

فيه جمله سمعتها فى فيلم ألملنى عن معاناة المسلمين فى اوروبا بعد أحداث 11 سبتمبر ، المهم فيها واحد المانى بيقول للبطل إن مشكلة الإسلام دلوقتى إنه بيمر بنفس اللى مرت بيه المسيحيه أيام القرون الوسطى!!! أنا النهارده إتأكدت إنه الكلام ده صح و الدليل أهه، إبتدينا محاكم التفتيش!!!

هى المشكله بس أنا عايز اعرف، هى القرون الوسطى دى قعدت كام سنه؟!! يعنى غحنا فضلنا كام سنه على الحال ده؟!!

مشكلة بقي الممثل اللي بيقول كده في الفيلم إنه مش فاهم الفرق بين الإسلام وتاريخ المسلمين من جهة والمسيحية وتاريخ المسيحيين من جهة أخري.

العصور الوسطي الأوروبية يوضع لها تاريخ عشوائي كده في حدود ألف عام من القرن الخامس وحتي الخامس عشر، مسألة تقريبية فقط، وعموما التشبيه لا يقف علي أرض ثابتة اطلاقا إنما هو من قبيل القياسات الغربية الساذجة التي تضع تاريخها كنموذج علي الجميع أن يمروا به أو - في أضعف الأحوال - حتي يستطيع الأوروبي بناء نموذج إدراكي لفهم وتوقع ما يمكن أن يحدث في بلاد المسلمين وفي دينهم. مسألة تفاسيح ذهنية مش أكتر

إنما إنت اخترعت جملة "خلينا مع الرصين أحسن" دي إزاي؟؟:)) كلها ابداع ورصانة

ماعرفش الفكرة العبيطة اللي بتقول ان المحكمة والقانون وكده هي أماكن ومجالات يتم تحكيم العقل والمنطق فيه - ماعرفش إيه اللي دخل الفكرة دي في دماغي من سنين طويلة. بس طبعا أنا اكتشفت - خصوصا بعد تحليل عمرو عزت للحواشي المنطقية في قضية البهائيين - إن الأدلة القانونية التي يستخدمها القضاة في مثل هذه القضايا لا تخرج عن كونها أحد إفرازات المناخ الثقافي والتعليمي العام والمناخ السياسي بالقطع.

موضوع التحريض علي الكراهية والكلام ده أصلا مش داخل دماغي، بغض النظر عن كريم وكتاباته أو منشوراته اللي بعض الناس بيقولوا أنه وزعها في الشارع وداخل مسجد. تهمة التحريض علي الكراهية أعتقد أن قماشها استريتش ممكن يبقي مرسوم علي أي فعل مايعجبش السلطة اللي عايزة تطلع دين شعبها أفراد وجماعات، وباردو بغض النظر عن كون السلطة دي دينية أو علمانية.

هل في تعريف واضح ومحدد لتهمة التحريض؟ وهل هناك أصلا داعي لوجود مثل هذه التهمة؟

إنت عارف يا علاء المفروض بجد نعمل إيه؟

المفروض كلنا نروح للنيابة العامة ونقول لهم جميعنا ارتكبنا نفس الجرم مش هم عاملين كريم حيطة واطية وبيتنططوا على دين أمه على أساس إنه كافر وبيشتم في الرئيس؟

طيب إحنا بقى يا سيدي مؤمنين وملحدين مسلمين ومسيحيين ولا دينيين نروح نتضامن مع الواد ونعتصم قدام مكتب النائب العام ونقول جميعنا ارتكبنا نفس هذا الجرم... أقصد الشق بتاعة إهانة رمز الاستبداد وقاهر العباد

مفيش أخبار عن جلسة المحاكمة بتاعة النهاردة؟؟؟

اتفضل يا سيدي أهم أيدوا الحكم

مش عارف دلوقتي الواحد المفروض يعمل ايه، بس بقترح حملة مكثفة لاهانة الرئيس على كل القناوات المتاحة لنا و خلينا نشوف مستعدين يحاكموا كام واحد.

يا علاء خلي غربية يعمل لنا بانر الحملة القومية التدوينية لإهانة الرئيس بشكل ممنهج على جميع المدونات والمواقع الإلكترونية المستقلة بشكل ممنهج ونشتغل لأمهم في الازرق...

ونوريهم بقى الإهانة اللي على أصولها ونشوف هيعرفوا يسجنوا كام واحد فينا... النظام أثبت منتهى الغباء بحبسه لكريم

طب غباوة بغباوة نتغابى على أمهم احنا كمان

و الله العظيم فكرة جنان انا نفسي كنت احب اعملها بس مش كانت استوت لسه فى بالى الفكرة دى لو حد اتبناها هتخليهم يشدوا فى شعرهم و هيتعلموا الأدبو النبي يا جماعه خدوها بجد و فكروا فيها و يا ريت يا علاء تخلينا نطبقها علشان انا عاوز اهين سيادنه و حرمه و العائلة الكريمة

تفتكر ؟

طبعا دوام الحال من المحال و كل حاجه بتتغير و كده ...

بس برضو تفتكر ؟

طب قلنا ماشى اللى بيحصلكم من طب اعتقال و ضرب و تفعيص بس حكم ضد القانون عينى عينك ؟

ده القاضى لو شارب مستهبله باللبن عالصبح مش هايعمل كده!!!!

احا انا باعمل ايه عندى!!!

يا سيدي محدش هيقطع ايد حد و هنقعد عايشين كده بس كنت خرمان هتاف فيه اهانة يعني

خليك عندك يا عم بلاها الموكوسة، برمجلك حاجات تنفع البشرية بعد ما تموت و أنسى مصر دي خالص، دي منطقة مهددة بالانقراض أصلا.

begad very cheerful, if you guys are saying so, yeb2a ma3adsh fi fayda. gatni nila wana 7atet idi fe mayya sa23a.

يا حاج علاء في نقطة انت مش واخد بالك منها، هي نقطة قانونية عشان كده ممكن تكون فهمتها غلط

في فرق بين تغيير الوصف القانوني للواقعة وبين تعديل التهمة...تعديل التهمة هو الذي يستوجب تنبيه المتهم، اما تغيير الوصف القانوني للوقائع فهو لا يضيف أي شيء للوقائع الواردة بأمر الإحالة الصادر من النيابة ولذلك لا يستوجب تنبيه المتهم إلا في حالة واحدة فقط، وهي حالة ما إذا كان تغيير الوصف القانوني للفعل المسند الى المتهم يترتب عليه اسناد تهمة إليه عقوبتها اشد من تلك التي اقيمت بها الدعوى.

المحكمة هنا معدلتش التهمة..هي فقط غيرت الوصف القانوني للواقعة -أي ردت الواقعة الجنائية إلى أصل من نص القانون واجب التطبيق عليها- وطبقت مواد الاتهام اللي شايفة إنها تنطبق على الواقعة، وده حق المحكمة، بل واجب عليها، لأن المحكمة ملزمة بتطبيق القانون تطبيق صحيح على الواقعة بدون أن تتقيد برأي النيابة، لأن جايز جدا ان النيابة والمحكمة يختلفوا في وجهات النظر من حيث تقدير الوقائع وفهم نصوص القانون الواجبة التطبيق عليها، والمحكمة هي صاحبة الكلمة النهائية في الموضوع ده

عموما انا هكتب بوست ان شاء الله عن الحكم "التحفة" ده، وهحاول اوضح النقاط دي بشيء من الإستفاضة

تحياتي

أولا شاكرين توضيحك

أنا فاهم طبعا مسألة أنه يحق للمحكمة اعادة التوصيف، اللي معترض عليه هو عدم اتاحة الفرصة للدفاع أنه يقدم مذكرة أو يترافع في سياق التوصيف الجديد.

ده نمرة واحد نمرة اثنين بغض النظر عن كلاكيع القانون عبد الكريم اتهم باذدراء الأديان و أعترف بأنه عبر عن رأيه و أدان باذدراء طائفة المسلمين و نص القانون بيقول حاجة ثانية خالص، يعني المسألة سلطة و عيب جدا في سياق السلطة دي يتقال أنه اعترف بالاتهامات الموجهة اليه.

عموما منتظرين تحليل و رأي متخصص و فاهم أكثر و منكم نستفيد.

كمان مستنيين نص حكم الاستئناف عشان باين كده أنا فهمت موضوع الدعوى المدنية ده غلط و الدعوى اللي قبلت ليست دعوى حسبة

سؤال للتاريخ: هو لو كريم اتسجن بسبب التهم دي هيبقى أول مصري يتسجن بتهمة اهانة الرئيس، ؟ ولا في حد سبقه للشرف ده (ده طبعا غير شرف إنه أول مسري يتسجن بسبب كتاباته على الانترنت)

وسؤال للقانون: هو انا لو كتبت دلوقتي ان انا اقر واعترف انني أؤمن ايمانا صادقا ان "الرئيس مبارك رمز الاستبداد وقاهر العباد" هل ده يكفي اني اخد سنة انا كمان؟ فكرة صحيح اننا نحط البانر ده على كل المدونات

بس لتصعيب الأسئلة على القانونيين مش هاحط اسمي وعايز أعرف إيه المعاملة القانونية للانونيموس وكل من لا يكتب اسمه الحقيقي هنبتدي ندخل في مهزلة تحفة ورفع بصمات من على التدوينة واقرار بكل الدخلوا البيت اللي فيه الكمبيوتر الخرج منه الكلام وخبير خطوط يبحث الخط المستخدم، يوووووووووه دي هتبقى ليلة

كريم مش أول حد يتسجن في التهمة دي ولا أول حد يتسجن بسبب كتابته على الأنترنت.

هو أول مدون يحصل له الكلام ده و تهمة اهانة الرئيس كانت تهمة منسية لحد قريب، قبل الحكم على كريم اتحكم على ابراهيم عيسى برضه بالحبس بسب اهانة الرئيس لكن في حالة ابراهيم عيسى كان في كفالة .

أنا عارف إنه مش أول حكم بتهمة إهانة الرئيس، لكن أنا باسأل إن كان أول واحد يتسجن بسبب التهمة دي؟

بس مين تاني اتسجن بسبب كتاباته على الانترنت؟

مدام انت قليل الأدب كدة ، يبقى لازم الواحد يكلمك بلغتك اللي لا تفهم غيرها ، و غالبا حتطلع لا تفهم الا الكلام بالايد لأن اللغة ماتنفعش معاك ، أيوة يا أخويا ، احنا نظامنا كدة ، بنحكم بروح القانون ، مش ده اللي هاريننا مطالبة بيه ، طيب يا حبيبي أدينا عملناه ، يعني مثلا أنا كقاضي ، عندي قضية واحد فيها متهم باهانة رئيس الجمهورية ، الواحد ده مثلا ابراهيم عيسي ، التهمة ثابته ، لكن أنا عارف كويس ان ده انسان وطني بينقد لصالح مصر ، و هنا أنا مش بأفتش في الضماير ، لكن فيه مسائل واضحة زي الشمس ، و أنا مش كمبيوتر تحط له الوقائع يطلع حكم من الناخحية التانية أنا قاضي شغلتي أوازن الأمور ، فلما ألاقي قدامي ابراهيم عيسى مثلا ، التهمة ثابته ، لكن حأحاول أبحث له عن أي مخرج قانوني ، يمكن يكون فيه شيء مش منطبق مع نص المادة يمكن يأخذ معه براءة ، لكن لو مفيش براءة ، التهمة لابسة لابسة ، ساعتها حأعطية أقل عقوبة ممكنة ، و ده مش غلط ، ده اسمه تفريد العقاب ، يعني واقعة واحدة واحد يأخذ فيها ثلاث سنوات و آخر يأخذ فيها 24 ساعة ، و ده مش غلط ، ده أخدناه في كليات الحقوق ، و هو دجه التطبيق الصحيح لعلم العقاب ، و اسمه تفريد العقاب يعني كل واحد يأخذ اللي يناسبه ....

لكن لما ألاقي واحد ابن .... زيك كدة ، أو زي كريم ده ، طبعا مش حأحاول أشوف له مخرج ، و مش حأظلمة ، لكن فقط حأشوف ، و الله التهمة ثابته ، يعني الللي قاله ممكن يعتبر اهانة رئيس أو ازدراء أديان ، يبقى مية مية ، حأرزعة حكم زي ما تقول كدة آخر ما في ايدي ، يعني لو فيه حد أدني و حد أقصي للعقوبة ، حأنزل عن الحد لأقصي يوم واحد ليه ؟ هو أساسا يستاهل الحرق زيك كدة بس القانون بيحكمنا لكن أنزل عن الحد الأقصي ، ده حتى يبقى ميصحش ، يعني لو ده مش حيأخد أقصي حكم أمال مين يأخده ؟ يمكن انت !

و كمثال على هذا لو عرضت علي واقعة قتل عبارة عن طالب أو شخص كويس طبيعي ، جه واحد مسجل خطر و حطه في دماغه و بيعاكس أخته و بيهدده و مطلع عينه لدرجه انه مرة استجمع شحاعته و راح قتله ، هنا هو ارتكب جريمة القتل العمد مع سبق الاصرار ، يعني اعدام ، و واحد تاني مسجل خطر اغتصب بنت غلبانه و بعدين قتلها و كان كل ده علشان مرضيتش تنام معاه و تمسكت بشرفها أو علشان يسرق 30 جنية عرف انهم معاها ، يعني المفروض نفس الجريمة و العقوبة بتاعة الأول ، لكن بالله عليك الصح ان الاتنين ياخدوا حكم واحد ؟؟؟؟ لأ طبعا ، الأول لو كان هناك دفع قانوني ينهي القضية مثلا حأساعده و أقبل الدفع ، لو مفيش فايدة حأنزل بالعقوبة بالمادة 17 و أعطيه ثلاث سنوات أو حتى سنة ، في حين التاني حأعدمه و أعدم أبوه و أخلص الدنيا من شره و لو فيه دفع اجرائي حأحاول أجد فيه ثغرة ، الا لو طبعا لو دفع سليم مية في المية حأضطر لقبوله ... هي دي الحكاية

طبعا انت مش حتفهم حاجة لأنك واحد جبان مستخبي في الانترنت و عمال تشتم خلق الله و تشتم الناس الفضلاء القضاة و وكلاء النيابة في حين انت حته عيل وفي سوق الرجالة ولا تسوى أي شيء

و عموما انت المفروض تضع الكومنت بتاعي ده في برواز و تعلقه عندكم في الصالون ، ان قاضي بحاله كده عبر مخلوق زيك و رد عليه

افحمت المتفزلك علاء تسلم ايدك يا باشا

مشكله فعلا يا ناس ان منصة العدل يكون فيها ناس تفكيرهم مرضي كهذا الباشا اللي فاكر نفسه منزل من السماء او من كوكب تاني و هو حتة عيل خايب تافه كان جايب 50 % في الثانوية العامه وبسبب الكوسه بقى في النيابة و بقى قاضي وشئ غريب ان من يفترض فيهم تطبيق العدل هم نفسهم اكتر ناس متعينين بالواسطه في البلد دي او بالرشوه كمان يا من يفترض فيه ان يكون رمز العدل اتق الله فينا فكلنا لأدم و أدم من تراب يا عم القضاه كلهم. أنا عارف ان من القضاه ناس كتير كويسين و محترمين لكن ده للأسف في طريقه للأنقراض و الأجيال الجديدة أكثر أستبدادا من ضباط أمن الدوله شوف أي حد منهم في تعامله مع المرور لو حد تجرأ و أعطاله مخالفه مثلا

1- أنا مش فاكر نفسي منزل من لسماء و عارف كويس ان كلنا ولاد تسعة ، اللي فاكر نفسه منزل من السماء هو اللي نازل شتيمة و تشريح في خلق الله و كأن الدنيا دي كلها حمير و غلط و هو لوحده اللي فاهم كل حاجة

2- معاك ان كل حاجة في البلد بالواسطة ، و ده مش حاجة كويسه ، لكن بالنسبة لي أنا مش عيل خايب تافه زي ما بتقول ، أنا و الحمد لله معايا دكتوراة في القانون ، يا ترى الدكتوراه كفاية بالنسبة لحضرتك؟

3- مرة تانية أنا مش عيل خايب تافة ، لأن شغلتي ليست أني أروح المحكمة أحبس اللي مش عاجبني و أروح ، أنا بأعمل حاجات أكبر من كدة بكتير ، يعني مثلا في القضايا التجارية ياما حكمت في قضايا صعبة و معقدة بملايين الجنيهات بين شركات و بنوك و فصلت في دعاوى بالغة التعقيد من الناحية القانونية , او الحمد لله أعطيت كل ذي حق حقه ، و ياما حكمت في دعاوى قضت في المحاكم عشر سنين بل عشرات السنوات في نزاعات طويلة و كئيبة على أراضي أو عقارات بين أطراف متعدده و خصومة فيها لدد شديد ، و الحمد لله حكمت فيها بأحكام عادلة و دقيقة قانونا جدا ، أيضا في مجال الأحوال الشخصية ياما سهرت ليالي اعمل حتى أحكم بسعة في قضايا النفقة و ما الى ذلك من قضايا الغلابة ، و كلهم في الاحوال الشخصية غلابة ، و ذلك حتى يصدر الحكم في نفس الأسبوع و لا يضطروا للانتظار أكثر رغم أنني أملك أن أحجز لقضية للحكم بعد شهرين و لن يضيرني في أي شيء ، فحرام عليك تفول على عيل تافه خايب لأني لا عيل و لا تافه و لا خايب

4- و بعدين فيه واحد محترم ينشرعلى الانترنت صور لنفسه نايم على صدر مراته ، و ينشر مقال عنوانه "حينيكوا أختك" و يرضى مراته تنشر مقال عنوانه "سرتن سرتن"

5- بالنسبة لمخالفات المرور مفيش حد بيتجرأ على اعطائنا مخالفات لأن زينا زي أعضاء مجلس الشعب(حصانة برلمانية) و الدبلوماسيين الأجانب و الدبلوماسيين المصريين بره مصر(حصانة دبلوماسية) لدينا حصانة تمنع من هذا و اعطائنا مخالفة تقتضي أولا رفع الحصانة من مجلس لقضاء الأعلي و ده حقنا بالقانون و ليس بلطجة كما ذكرت

6- لن أكتب مرة أخرى هنا فأنا في المرة الأولى قد استفزني قراءة مقالاتك بالصدفة أنت و عبد الكريم و لهذا استخدمت هذه اللهجة معك و التى لا أستخدمها حتى مع عتاة المجرمين و في هذه المرة نظرت لأرى ان كان هناك رد على ما كتبته فوجدت رأيك هذا فرأيت أن أرد عليك لآخر مرة ، و شكرا

7- و هذه ملحوظة : انا مع حرية الرأي لأقصى حد ، و لعلي لو لم أكن قاضيا لكنت قد صرت من نجوم المعارضة " او من صغار المعارضين أيضا كله ماشي " لكن بالطريقة التى تكتب بها أنت أو علاء فأنتم تتبعون طريق سافل هو طريقة الاهانة المباشرة لكل من خالفك الرأي و هذه طريقة ناجحة على المدى القصير ، فاشلة جدا على المدى الطويل ، و مهينة أساسا لكاتبها لأنه هو لذي ستنسب له تهمة قلة الأدب أكثر ممن شتمهم ... و شكرا مرة أخرى

اسأل سيادة القاضى سؤال واحد , اليس دستور مصر ينص على ان المصدر الرئيسى للتشريع هو القرآن والسنه؟بالطبع... اذن فلماذا تحكم سواء انت او غيرك فى قضايا السرقات والزنا وشرب الخمر بغير ما انزل الله؟؟؟؟؟؟؟؟؟؟! اليس هذا كفر؟ (ومتفهمنيش غلط انا اقصد كفر نوع وليس عين) اليس الزانى المحصن يرجم؟ اليس البكر يجلد؟ اذا فلماذا تخالفون دستورالله قبل مخالفة دستور الدوله؟!

كل اللي أعرفه ان مش احنا المشرعين ، احنا بنحكم فقط بما وضعوا لنا من قوانين و لا نملك الحكم بغيره يعني لو أنا حكمت بالرجم فلن ينفذ حكمي

و ثانيا ليس كل القضاء جنائي ، فيه قضاء مدني و فيه قضاء تجاري و فيه قضاء شرعي و فيه قضاء اداري (مجلس الدولة) و كل ده لا تعارض بينه و بين الشريعة ، لكن على كل حال معك حق الى حد كبير ، المفروض أن يتغير هذا الأمر و لكن كيف ؟ لا أعرف

ماتزعلش يا عم القاضي الدكتور أنا عارف ان كل مهنه فيها ناس و ناس بس تواضع شويه ياسيدي و أقرأ دي كمان أولا أنا زائر للموقع و ماليش دعوه بعلاء و كل اللي عاجبني هو مناخ الحريه في موقع الأخ علاء حتى لو شتمته هو شخصيا فهو بينشر ده ولا يزيله وده حصل مع سيادتك شخصيا ياريت يكون حكامنا عندهم شجاعه زي دي ثانيا يا عم القضاه انا شخصيا اختلف مع علاء و الملعون عبد الكريم كثيرا بسبب بعدهم عن الدين و بعض الألفاظ النابيه على هذه المدونه أما حكاية الأخ علاء و صوره هو مراته فدي حريه شخصيه المهم انا مش هأدافع عن علاء رغم انني لم أقابله من قبل ولكن يجب أن تعترف أن بينكم الأن في سلك القضاء و النيابه من هم دون المستوى كثيرا من دخل بالرشوه و المحسوبية وده كان أحد الأسباب اللي خلتني اهاجر من مصر الحبيبه فأنا طبيب مصري أستشاري قلب بأنجلترا لو أحتجت اي خدمه

رغم اني قلت اني مش حأجي هنا تاني أو أرد لأن ده مش منتدى بس اللي حصل ، الفضول بأة ، و أقول لك لأ يا سيدي أنا مش زعلان و لا حاجة ، و انت معاك حق يا د kindheart فعلا ردي كان زيادة بس ده يمكن لأني أول مرة أشوف قله أدب كدة ، رغم طبيعة عملي، فاعذرني

أما سبب كلامي بتكبر فلأني لقيت الأخ علاء ده نازل يا باشا على الحكم و على القاضي ياعيني كأن هو عنده الحكمة كلها و القاضي ده واحد حمار كدة ، ده غير النيابة طبعا ، فحبيت أقول له انت مين ، و عموما هو الحكم تأييد من دائرة استئنافية مكونه من 3 قضاه يعني دلوقتي عندنا أربع قضاه مختلفين حكموا عليه لكن أنا لم أطلع على القضية فلا أعرف الحكم صح أم غلط

أما عن موضوع دخول النيابة بالرشوة و الواسطة ، بصراحة أنا عمري ما سمعت عن دخول بالرشوة لأن مين يقدر يرشي مجلس القضاء الأعلي ؟؟؟؟!! لكن الواسطة ، طبعا ، جدا ، و عموما يسعدني التعرف بك ، لكن أنا مقدرش اليوم و في هذه الظروف (الدستورية) أضع الايميل بتاعي و أنا لم أكن سأكتب و لكن كتبت فقط احتراما لك و ربنا يوفقك في لندن .... و خير ما فعلت و شكرا

انا معجب بردك جدا يا سيادة القاضى .. وباقترح عليك تعمل مدونة خاصة بيك وانا عن نفسى هاروج ليك قلت إيه ؟؟

أعجبني تعليقك وردك 00 كلام ينم عن إنسان محترم عادل 00 أنا أرفض التجريح والإهانة 00 لكن أيضا أنا مع حرية الشباب 00 الشباب معذور 00 اتخنق من الكبت والاستبداد 00 ممكن يغلط في الأسلوب 00 لكن نصيحة برفق من واحد زي سيادتك ممكن نفيد كتير وتغير كتير 000 أنا معجب جدا بسيادتك 00 انك بتدخل عالنت 00 وبتقرا للبلوجرز وتشارك 00 وحتى لو اسلوب الناس معاك مستفز لكن أخلاقك عالية وحجتك قوية 00 رجاء ماتزهقش وخليك معانا 00 وأنا زيك أتمنى اني ماأقرأش ولا أشوف حاجة تخدش الحياء أو تسيء لعقيدة أي حد 00وفي نفس الوقت مع الحرية التامة للشباب يقولوا اللي يقوله ونتناقش مع بعض بالحسنى 000 شكرا سيادة القاضي

أنا أتفق تماما مع علاء فى أن الإلتحاق بسلك القضاء تحكمه الواسطة فى المقام الأول والأخيروأتساءل كيف يلتحق طالب فاشل حاصل على تقدير مقبول بالعافية بسلك القضاء بينما تجد من هم حاصلون على أعلى التقديرات ولا يحلمون مجرد الحلم فى الالتحاق بسلك القضاء كيف لطالب من المفترض إنه نص نص فى كل حاجة أن يصبح قاضيا فى يوم من الأيام وهو بيفك الخط بالعافية لابد أن يكون هناك تكافؤ فرص كما يتشدق المسؤلون والأغرب أنك تجد أن معظمهم من أبناء السادة القضاة والله أنا أعرف نماذج منهم أقل ما يقال عنهم أنهم شوية تنابلة لماذا لاتوضع معايير محددة تسرى على الجميع تسرى على ابن الغفير كما تسرى على ابن الوزير هذا إن أردنا إصلاحا لابد أن يشعر كل مواطن أن هذه البلد بلده وليست بلد الكبار .لماذا لابد أن يصبح إبن اللواء ظابط وابن المستشار وكيل نيابة وابن أستاذ الجامعة معيد وابن الفنان فنان دون أدنى موهبة ومن الشروط التى أراها غير منطقية للإلتحاق بكليات الشرطة أو النيابة أن يكون المتقدم من أسرة كريمة وضع تحت كريمة هذه ألف خط ولاأخفيك سرا أن 90% من الشعب المصرى أسر مش كريمة وصدق رسول الله )ص( حين قال (إذا وسد الأمر لغير أهله فانتظروا الساعة) والسلام عليكم

بصرف النظر عن الحكم عامل ازاى انا شايف ان احنا رافضين مبدأ المحاكمة من الاساس و ما بنى على باطل فهو باطل

Alaa,

I know you since you were alittle kid comming to Cairo Univ. waiting for your mother to finish her work. I was also one of her students!

But to tell you the truth, I have never imagined such an amount of impolitness in a son of a Univ. teacher.

The amount of meaness you have is unimaginable. I can't even find enough words to express my exact feelings I have.

One thing I noticed in your blog shows that you do have some hidden aims behind your actions. The picture in which which you and you your friends make a sign with your fingers toward the picture of Mbarak. I have nothing against it being directed to Mubarak, though he is a symbol of Egypt no matter what we think. This sign is a western sign not our usual egyptian sign! whom are you talking to Alaa? and please tell us exactly your true aims behind your blog? Freedom to Egypt, No, you mean something personal and bigger.

I have waited a lot to judge you and your blog, and now with this picture, it is all clear now. You are not talking to us and you do not care about your home country, you are flattering others. I am sure you are doing fine now, and any country would have nothing against giving you a ploitical shelter now, aren't you an activist?

Your blog show clearly that being a man is a describtion far away from you.

This reply is an honor to you and to your blog, but it is a relieve that one will never have to reply to such writings again, and do not be happy, these reply from such respected people are not directly to you, but to those may come to this place by a coincidence.

One last point,

The way talk goes on here, proves only one thing, Mubarak regime have succeeded in destroying youngmen of Egypt by destroying our educational system.

المدون معاه أقوى سلاح 00 سلاح الكلمة 00 والكلمة بتهز الفراعنة 00 إمسك حرامي 00 عمره ماسمعها المفرعن من زمان بالحجم ده 00 كان مسيطر عالقلم واللسان 00 بيغسل بيهم مخ الشعب النايم 000 لكن لسوء حظه الشعب صحى 00 شاف فضائيات 00 وشاف الحرامي عالهوا وهو بيسرق 00 والكل قال إمسك حرامي 00 القلم أصبح مع كل مواطن 00 يدون 00 يعمل صحيفة 00 مايقدرش يسيطر عليها الفراعنة 00 وبدون رقيب 00 لكن فرعون عايز يتحكم في الهوا اللي بنتنفسه 00 فكان الحل إمسك مدون واربطه يخاف المدون السايب 00 وعايز يوصل للشعب عدة رسايل 00 إن المدونين حبة عيال مش بيحتروا مشاعر الشعب 00 ولا دينه ولا مقدساته 00 يعني لما حب يضرب مسك نقطة ضعف فينا 00 اننا من كتر عشقنا للحرية اللي اتحرمنا منها كتير قال بعضنا حاجات ماتفيدش قضيتنا - طبعا انا لا ارضى ان يحاكم واحد على اللي في قلبه ولا على رايه مهما كنت مختلف معاه - لكن بلاش ندي فرصة للجبابرة يبددوا طاقتنا 00 أو يوقعونا في عضنا وييتفرجوا علينا 000 رأي نحافظ على مشاعر بعض 00 ومانسخرش من دين بعض ولا مقدساته 00 وخلينا نركز في قضيتنا المصيرية 00 قضية التحرر من هذا النظام الاستبدادي 00 تعالوا نكشفهم ونعريهم ونفضح جرايمهم ونكره الشعب فيهم والزمن لصالحنا 00 والله كلمتنا أقوى سلاح 00

I havent seen someone with that Unplanned, stupid, random Rage ever. you call yourself someone whose against the government and against the system and someone who proves a poin through his blog? i seriously pitty you and your wife begad. you know what? i wont say alot because i believe that words of advice wont mean alot to you. just one simple pieace of advice....your voice will never be heard, through elsafala we elet eladab ely enta 3amelha felblog. many of my friends at work have very clear views and discussions about the current situation in egypt. Socially, Economically and politically but they cant post it on your blog you know why, cuz they are offended by the amount of safala and elet adab that you and your lovely wife have on the blog. if you dont care aot about loosing posts from people like that. how the hell do you try to convince me that you are provoked from whats happening in egypt nowadays???

I call myself someone who is against the government yes. one does not need a certificate of good behavior to be able to hold an opinion against the government. can't see where the contradiction is.

as for the part about your work colleagues not wanting to post on my blog, that part I don't understand. if your colleagues wanted to post something they should start their own blogs and post there. this blog is for manal and alaa to post not for your colleagues.

or did I misunderstand you? where you trying to say your colleagues would not want to participate in a discussion here on the blog?

please others before you said the exact same things before, I obviously was not convinced, either add something to what was said before, or just give up on me and pray that god would show mercy for me or something.

مهو اي واحد بيعدي مرحله الواااااااااااااااااااااء ويبدء يتكلم لازم يحصله حاجه من اتنين يا اما لسانه يتتطور التطور الطبيعي للحاجه الساقه لااما يطول لسانه ويتطاول لسانه علي مقدسات زى مثلا نبي المسلمين الي اي واحد شاذ او لامؤخذه ابو شخه يتكلم عليه من مبدأ الحريه بغض النظر عن ان اي مقدسات تانيه ليها قدسيتها انا بقول للاخ عبدالكريم الي خساره فيه الاسم ده بقله عيب تشتم واحد اكبر منك زى سياده الرئيس هههههههههههههههههههههههههههههههههههه عيب يا واد اشتمه في سرك ماشىىىىىىىىىىىىىى بس النبي اوعي احسن اقطع رقبتك وعلي فكره انا شفتللك منام جامد شفتك لابس احمر في احمر وحبل المشنقه بيلف حولين رقبتك بجد منظر شفي غليلي