You are here

خبر عاجل: القانون تعيشوا أنتم

Primary tabs

قبل ما تقرأ يا ريت تشوف الحوار المنشور على مدونة زنزانة مع روضة أحمد محامية عبد الكريم، لجنة دفاع عبد الكريم فيها محامين كبار معروفين في مجال حقوق الانسان، لكن روضة محامية شابة لسه في أول الطريق و هي اللي شالت القضية من أول التحقيقات الي اليوم، محدش من المتضامنين مع عبد الكريم منبهرش بروضة و حبها.

لسه واصلني الخبر، محكمة استئناف أسكندرية أيدت الحكم على عبد الكريم بالأربع سنين (أيوه بما فيهم السنة بتاعت اهانة رئيس الجمهورية) و مش بس كده و حكمت المحكمة كمان بقبول الدعوى المدنية (دعوى الحسبة يعني).

المذهل في الأمر أن بعد قضية نصر حامد أبو زيد تم تعديل القانون بحيث لا يحق لأحد رفع دعوى حسبة مباشرة و القانون بينص على أن دي من اختصاصات النيابة، لكن ايه دخل القانون بالموضوع أصلا؟ هو المحاكم ساحات لتطبيق القانون لا سمح الله؟!

من المقلق أيضا تجاهل القاضي لتوضيح الدفاع أن حكم محكمة الدرجة الأولى باطل لأن القاضي حكم على عبد الكريم بمادة في القانون تم تعديلها، أيوه القاضي ذكر في حكمه نص مادة مش موجود حاليا في القانون و أيوه محكمة الاستئناف اعتبرت ان ده عادي جدا.

المحامين مندهشين من سرعة الحكم، رغم تقديم أكثر من مرافعة مطولة و مركبة، يعني كان مفروض ياخد وقته يقرأ المذكرات و يراجع نصوص القانون و أوراق القضية. عموما الأمل مكانش كبير أصلا و برضه مش كبير في مرحلة النقض أحمد سيف الاسلام (محامي عبد الكريم) بيقول أن عمره ما شاف برائة في قضية اذدراء أديان واضح أن نسبة كبيرة من قضاتنا عاجزين عن الالتزام بالقانون لما الموضوع بيمس الدين. (و عاجزين عن اظهار الرحمة في تخفيف العقوبة حتى لو اللي ماثل قدامهم شاب صغير أو كهل أو مريض نفسي).

يعني محكمة استئناف أسكندرية بتقولكم ينفع يتحكم بنص غلط أو نص القاضي مش عارفه.

و ينفع يترفع عليكم قضايا من جهات غير مختصة برضه مش مهم.

و اللي يقول على مبارك أنه ديكتاتور و مستبد هيتحبس.

مبروك على الاسلام و الأمة.

Comments

القصاص للأسرى المصريين

أنا الصراحة مش عارف أقول إيه بالتحديد لكن بما إنى هاعلق يبقى هاقول : الأمر ينطوى على ظلم نوعاً ما خليط بين الظلم وبين العدل

والأولى هو تغليب الرأفة والعدل على الظلم

كان من عدل رسول الله أن يلتمس للمتهم عذراً ... أو لا يحكم على المتهم إذا خالط الأمر شبهة (مش فاكر بالضبط الحديث) بس برضه مش هدافع عنه ولا هاطالب بحقه

ألا هو مفيش حكم زى ما بيحكموا على الهاكرز فى أمريكا بمنعه من دخول النت والقعود على الكمبيوتر

انا بجد اسف على اللي حصل

لو كان عبد الكريم ده بيكتب في جرنال او مجلة في مصر مكنتش هزعل عليه

لكن انه يتحاكم عشان كتب كلام على الانترنت ده حرام

طب مهو في ارهابيين بيكتبوا على الانترنت و يظهروا الاسلام على انه دين حرب و كراهية و مع ذلك محدش بيكلمهم

كان المفروض تكون الانترنت الملاذ الاخير لحرية التعبير عن الراي

يا تري الدور الجي على مين


قبل ما تشتم

انا مش حسني بجد انا حسنى كده و كده

مش عارف اقول ايه غير حسبنا الله ونعم الوكيل هو بصحيح اللى قاله كريم مش حلو ومقرف لكن كان عيب قوى اننا نحبسه علشان هو مقرف كان لازم نرد عليه واللى بيدافع عنه فى حوار جريمته كانت مجرد كلام يبقى كان لازم العقاب يبقى برضه بالكلام مش بالحبس وده على فكرة يا علاء كان لازم تقوله فى احتفالية التضامن اللى الجزيرة عرضتها من يومين وعلى فكرة الجزيرة قطعت كتير من الحوارات ياريت حد يبقى يفرغ محتوى الحلقه ديه علشان فيهاكلام جميل جدا وبيوضح ابعاد موقف المدونين دلوقتى انا على استعداد اقوم بالدور ده بس الفيلم اللى عنده الصوت مش واضح قوى ومحتاج حد يكون حضر الاحتفالية يبين لى شويه حاجات وشكرا لو حد عمل رد هنا حابعت له الايميل بتاعى

شاكرين ليك يا فندم

مش عارف اذا كنت هعرف أساعدك لأني أكيد مش فاكر كل اللي اتقال و الحقيقة الاحتفالية كانت طويلة زيادة عن اللزوم و صعب قوي على الجزيرة يعرضوها كلها، لكن أتمنى اللقاء بتاع المدونات و التعذيب و ندوة المدونون في السجون يكونوا أفضل تنظيما و حاول تشرفنا بحضورك

شكرا لدعوتك بس ربنا يسهل انا مش من القاهرة وحاول احضر بس انت عارف علشان الواحد يقدر يدفع اشتراكات كتيرة من ضمنه الانترنت وحاجات تانية لازم طبعا يطحن نفسة فى الشغل ليل نهار وطاحونه العمل مابترحمش

انا بس بطلب منك تساعدنى بالمعلومات الفنية للانضمام الى مجمعكم وظهور مدونتى اللى ناوى اعملها وبفكر ان اول شى اعمله هو نشر القاءات اللى تمت واللى حاتم بين المدونين علشان يمكن حد يستفيد منها شوف ورد واكون شاكر

ها ها ها ها حلوة القصاص للاسرى المصريين دى... يا انسة الشعب المصرى كله اسرى و بعدين من باب اولى نطالب بالقصاص للناس اللى اتعرضوا للتعذيب على يد وزارة الداخلية قبل ما نفتح الحناجر و نطالب بمحاكمة الاسرى اللى على الاقل اتعذبوا على يد الاحتلال .. الاخ اللى بيقول ان عبد الكريم مرتد يا ريت تصلى و تصوم و مالكش دعوة بغيرك .. عبد الكريم بيفكر و بيشغل دماغه