You are here

حبس انفرادي، منع من الزيارة، استمرار حبس 45 يوم رغم انتهاء التحقيقات، منع من المحامين، بس عادي أصله كافر

Primary tabs

عبد الكريم نبيل سليمان، المدون المصري الشاب اللي محبوس بقاله أكثر من شهر المفروض على ذمة تحقيق مبيحصلش أصلا اتحولت قضيته لنيابة أمن الدولة.

و نيابة أمن الدولة أول حاجة عملتها أنها حبسته 45 يوم كمان، أصل التحقيق يا عيني صعب قوي لأن الواد عبد الكريم ده لئيم و جامد و صعب عليهم يكتشفوا خبايا مؤامرته بسرعة.

عبد الكريم اللي كان بيتمني يتنقل من التخشيبة لسجن عشان تتحسن حالته حالته بقيت أسوأ، محبوس حبس انفرادي بدون سبب و منعوا أهله من الزيارة، و طبعا صعوبات في أنه يقابل محاميته.

كل ده ليه؟ عشان كتب على مدونته.

اقرأ بيان الشبكة العربية لمعلومات حقوق الانسان

طبعا ولا الهواء هيجي كام فسل يقولوا على نفسهم مسلمين و يقعدوا يشتموا في الكافر الزنديق عبد الكريم و ازاي أن الاسلام بيتحتم حرمانه من حقوقه لأن ربنا أمرنا بالظلم ما دام ضد حد مش عاجبنا و يشتموا في سنسفيل جدود اللي يتشدد للكفرة أمثال عبد الكريم، و هيطلع كام بهيمة و يقول أننا مبندافعش غير عن اللي بيشتم الاسلام و معرفش ايه.

افرحوا يا مسلمين، اسلامكم صار أقوى ببطش أمن الدولة، افرحوا يا مسلمين أمن الدولة بتكوم بفرض الكفاية نيابة عنكم (عشان كده اسمها نيابة) و لما يجي يوم الحساب اطمنوا لو ربنا سألكم عن أي حاجة قولوله شتمنا و شمتنا في عبد الكريم، شوفت أحنا مسملين جدعان و جامدين و فاهمين تعاليمك ازاي؟

افرحوا يا مسلمين الأمة في خير لأن حراسها من زبانية مبارك و مجاهيل التعليقات صاحيين و بالمرصاد لأي كافر يستجرأ يكتب كلمة في مدونته،

افرحوا يا مسلمين لأن كلمة ربنا و شريعته هي اللي شغالة فمحناش محتاجين لا قوانين ولا دساتير ولا اجرائات ولا محاكم ولا حتى محامين.

هنيئا لكم اسلامكم و ايمانكم و عزتكم و أمتكم، يا ريت تبقى تنفعكم لما يتقبض عليكم عشان اللي قلتوه أو كتبتوه.

Comments

السيد الاستاذ عــلاء

تحيه طيبه من نيويورك

انا متابع جيد لصفحتك الشيقه.. ومعظم الاوقات اتفق معك مليون فى الميه.. لكن هذه المقاله.. ليست فى محلها

لان حضرتك موجه الكلام للمسلمين وكأنهم هم النيابه وامن الدوله..

وكما تعرف ان النيابه وامن الدوله فى مصر ليس لهم دين..فهم بعداء كل البعد عن الاسلام وتعاليمه..

ومايفعلونه مع عبد الكريم ماهو الا نفاق وبلطجه تعودناها منهم منذ ايام الثوره...

مئات المسلمين الحقيقين من المدونين وغيرهم ..اعلنوا تضامنهم مع عيد الكريم رغم اختلاف الرأى.. فهو حر ان يكون كافر..لان الدين غنى عن من سيتغنى عنه..

كلنا نطالب بحريه عبد الكريم مثل ما نطالب بالحريه لايمن نور وغيرهم من سجناء الرأى تحياتى

للأسف عدد كبير من المسلمين بينسى أن أمن الدولة ملهاش دين و يشجعهم لما يظلموا حد هما مكفرينه.

أنا فاهم طبعا أن مش كل المسلمين كده، لكن راجع التعليقات اللي بتيجي على موضوع عبد الكريم، أو اللي جائت على موضوع البهائيين أو اللي جائت على مواضيع اضطهاد الأقباط، أو اللي جائت على ذكر عابر للشيعة أو اللي بتيجي عند ذكر اللي بيحصل لنساء مصر.

و ثلاث أربع الكراهية و الحقد باسم الاسلام.

بلاش نضحك على بعض، الغالبية العظمى من المسلمين لو اتفقت على كفر فلان هتتغاضى عن تعذيبه و ظلمه و لا هيصعب عليها حتى، و نسبة كبيرة منهم هتشجع تعذيبه و ظلمه، و لو حاولت تتكلم هيقوللك أمريكا معرفش مالها و الأندلس حصل فيها ايه و حاجات ملهاش أي علاقة بالموضوع.

أنا عارف أنك و غيرك مقتنعين أن مش ده الاسلام الحق، لكن مرجعيتكم نصوص و تاريخ و اعمال عقل و مبادئ و أخلاق. لو أخدنا بمرجعية احصائيا هو ده الاسلام و اللي مش عاجبه عندنا أمن الدولة جاهزة.

فعلا .. كتير من المسلمين اليومين دول عندهم عنف .. وغلظة .. و بعد عن الاسلام الحق ..

لكن ده مش بسبب الاسلام ... ده بسبب حاجات كتير .. منها الفقر والجهل .. وامن الدولة..واللي بيحصل في العراق ..كل ده بيحز في ضمير المسلمين

فلما يلاقوا واحد غلط .. بيدولوا فوق دماغه بالجامد .. بزيادة ...ده مش صح .. لكن المسلمين على مدار التاريخ مش كده .. لا تستطيع الحكم على الاسلام من خلال مسلمي اليوم .. او حتى مسلمي الامس القريب ...

اخي .. الاسلام بقالوا 200 سنة تحت الاحتلال .. اكيد اخلاق اهله اتغيرت كتير ... لكنا نأمل انها بدأت ترجع .. و بترجع بسرعة ..

والله متم نوره ولو كره الكافرون

أنا فاهمك، و أصارحك أنا لوشت استخدمت لفظة المسلمين عشان أزنق الناس اللي زيك تتكلم.

لا أقلل من دور الاحتلال لكن كمان محدش موكوس الوكسة اللي أحنا فيها دي، مش أحنا بس اللي أحتلينا و لو مبدأناش نسأل نفسنا نخلص من البلوة ازاي و ايه اللي أحنا بنعمله غلط مش هينوبنا غير استمرار الحال على ما هو عليه على أحسن الفروض.

السلام عليكم

كويس انك فاهمني ..

و أديك زنقتني واتكلمت :)

انا معاك .. احنا موكوسين .. وان مابدأناش نصحى ونفوق لواقعنا ..هاننداس .. وان كنت اظن ان مفيش اوحش من كده دوسان!

لو كنت بتتكلم عن الحضارة ... فشوف مصر وغيرها من دول المنطقة كانت فين في ظل الحكم الاسلامي علماء نوروا العالم كله .. ومفكرين ...يمكن دول بس هما اللي طلعوا أوربا من العصور الوسطى المظلمة

لو بتتكلم عن التوازن الاجتماعي والاقتصاد أحب أبشرك ان بعد اقل من 30 سنة بالحكم الاسلامي الاول .. انقرض الفقراء و بعث عمر بن عبد العزيز ينادي في الناس يسأل عن مستدين ليسد عنه من أموال الزكاة .. ثم يسأل عن الشاب ليزوجه من أموال الزكاة ..ثم ... الخ

ده لأن الزكاة -معناها تنمية وزيادة- اللي ربنا فرضها...هي الضامن الوحيد للتوازن الاجتماعي .. و من ثم ندرة الجريمة .. وازدهار اقتصادي وعلمي .. الناس راضية بحياتها .. و بدأ الابداع يظهر للعالم .. وبدأت الحضارة الاسلامية تقوم

تقدر تقوللي دلوقتي عن اي نظام اقتصادي عمل الكلام ده؟ مافيش

و خد بالك برده من الزمن اللي الاسلام حقق فيه الكلام ده

لو بتتكلم عن القوة العسكرية.. لحد منتصف القرن الثامن عشر كانت أوربا مجتمعة لا تقوى على الدولة الاسلامية -العثمانية وقتها- رغم ما بدا من الانتشار الفسادي فيها

دي بعض الاسباب ..اللي مخلياني متمسك بالاسلام كمهنج ..فكري وعقدي واقتصادي .. وكله كله

ممكن يجي في بالك ان الانجازات دي كانت في اول الاسلام .. وان خلاص الانحدار وصل للقاع و مافيش قومة تانية لينا .. لا

اقرا الحديث ده من البخاري

تكون النبوة فيكم ما شاء الله أن تكون ثم يرفعها إذا شاء أن يرفعها ، ثم تكون خلافة على منهاج النبوة ثم يرفعها إذا شاء أن يرفعها ، ثم تكون ملكاً عاضّاً ما شاء الله أن يكون ثم يرفعها إذا شاء أن يرفعها ، ثم تكون ملكاً جبرياً ما شاء الله أن تكون ثم يرفعها إذا شاء أن يرفعها ، ثم تكون خلافة على منهاج النبوة ثم سكت

احنا دلوقتي في مرحلة الملك الجبري .. لاحظ ان كل الدول العربية ..حكامها الحاليين مسكوا الحكم عن طريق ثورات وانقلابات ... بغير انتخابات او بيعة او مشورة .. او اي حاجة

أنا كمسلم مصدق الحديث ده .. ولو ماكنتش واحد من اللي هايقوموا الخلافة على منهاج النبوة تاني .. مش هاتفرق مع ربنا .. هايجيب غيري .. ولو ملعبتش دور ايجابي .. غيري هايلعبه

وهي دي الحياة

ارجو قراءة تدوينتي بعنوان نظرة للتاريخ لفهم الواقع http://eldeebs.blogspot.com/2006/11/blog-post_27.html

اخيرا .. اسف على التطويل .. وعلى الخروج عن اصل الموضوع بتاع كريم

السلام عليكم

ما يولع بجاز وسخ!!

but he must has fair trail

also lets ask who to be plamed ,his home or ELAZHAR univeristy 4 misslead his mind lets not make him a hero,and ask first u like his ideas or nooooooo

pray 2 GOD 2 guide him 2 right way

2keed el "muslimemeen" 2w el "islamyeen" mlhomsh 2y znb bele by7sl ma3 3bd el kareem ( 23tkd hwa lazm y3'yar esmo b2a w y7'leh 3bd el ensan ele by2ol eno god ) anyway

2sde la yomkn t7meel el islam 2w ilamics 7aga 3mlha 2mn el dwla . da fe benhom ma sana3 el 7dad w byd3o 3leh 2mn el el nzam "el dawla " da fe kol slah

fa yareet mtd7'lsh el islam w el islamyeen fe el klam mn 3'er my3mlo 7aga . weza kan 2sdk 3la t3le2athom 3la el blogs 2w fe 2y 7tta fa dah fe el 2wal wla el 2a7'r r2y y3ne klam w 7'las w fe mnhom daf3 3no el moshkla msh fe klamhom klamhom msh bydr karem fe 7aga el darr el 72e2e mn el 2mn

w 3n r2ye

bsra7a ana lma 3rft 3la ele 7asal ma3 kareem kont mot3atf m3ah gdn w ro7t da7'l 3la el blog bta3to w etsadmt msh 3arf ezay 7d byfakar kda w 7ta law fakar ezay etgr2 3la rbna kda w y2ol "la elah ela el ensan" 2w en ele yrtad 3n el islam by7terem nfso .... klam sa3b gdn kan sa3b 3lya 7tta ene 2krah . tb3n fe m2at fakaro zyo wla 7tta ertdo bs ana brdo msh 3arf ezay byfkro kda w b7es en el deen dah ftra w goz2 mnna 7ta law m7dsh 3lmna 2w m2arenash feh 2w mltzmnash be frodo kolaha lakn byfdl 3keda gwana byde m3na lel7yah w byfahm flsft wgode 2sasn

lakn dah msh m3nah ene mwaf2 3la el zolm lazm eza kan ele byktbo da fe 3'lat yb2a yt3akb 3la 2d 3'lto

w fe r2yokom meen ele y7dd 3'er elmot7'sesen

w fe el 2a7'r m7dsh yz3al mne hwa law dah msh kofr yb2a eh hwa el kofr b2a

اللي بلغ عن عبد الكريم و سلمه للنيابة أساتذة من الأزهر مش أمن الدولة

الشهر الأول من التحقيق أمن الدولة مكانتش طرف خالص، قضاة و وكلاء نيابة عاديين هما اللي اختاروا أنهم يرموا القانون في الزبالة و ينتهكوا حقوق عبد الكريم عقابا ليه على كفره و ده متمش بأوامر حكومية مركزية ده كان من واعز ديني داخلي عندهم.

عند محاولة تعريف الناس بمحنة عبد الكريم تفضل عدد كبير من "المسلمين" بالتهليل و الشماتة متجاهلين تماما الانتهاك التام للقانون و الدستور.

علاء ..انت قلت انك ضد حبس كريم بدون تهمه , ويا إما يحكموه يا يطلقوا سراحه ...طيب لو حاكموه أمام قاضى طبيعي وأدانه وقضى بحبسه ..يا ترى هترضى بالحكم بعد ما يبقى نهائي.. وإلا برضه هتقعد تشتم في القضاء كمان وتقول انه عنصري وجزء من منظومة التخلف ؟ أنا حاسس يا علاء انك بتعارض للمعارضة نفسها.. ساخط على كل حاجه وعاوز تتحرر من كل حاجة ..أنا حاسس إن المشكلة مش في النظام المصري ..يعنى لو مفيش نظام مصري برضه هتخترع حاجه تسخط عليها ..زى عبد الكريم اختار ربنا عشان يسخط عليه ..أنا مش شايف إن فيه ثوابت عندك ولا فيه حاجه مقدسه ..لا فيه حاجه اسمها عيب ولا حرام ..الغريبة إن المجتمع الغربي نفسه فيه قيم وفيه برضه منظومة احترام ..ورغم كل حريته فيه حدود ...يعنى كل قوانين العالم بما فيها أمريكا تعرف الفرق بين حرية التعبير وبين السب والاهانه والتجريح..الفكرة اللي ممكن توصلها بأدب تبقى متعسف لو وصلتها بقلة أدب ...يعنى انت مثلاً لما واحد ببقول رأيه فيك بصراحة علطول بتقول عليه بهيم ..وراجع كل مدوناتك اللي بتكلم الأخر فيها بتعالي وبتوصف فيها رأيه بالعبط وتصفه بأنه بهيم ..الموضوع يا علاء ملهوش دعوه بحرية الرأي ولا إرادة التغيير ومتوهمنيش انك بتحب العدل والحريه وانك عاوز الخير لهذا الوطن.. لان الحكاية ببساطة سخط عام من شباب كتير بسبب فشلهم في إنهم يكونوا حاجه ..وأوعى تقولي النظام مش سامح لك انك تكون حاجه.. لان فيه عمالقة كتير في مصر وخارجها من المصريين قديما وحديثا بقوا حاجه كبيره في ظل أسوأ النظم الشمولية لكن هي حجةال..............طبعا هترصلى وصلة نقد تنتهي بشتمتى

انت محتاج تقرأ كلامي ثاني.

أظن أني وضحت أكثر من مرة أن فيه أكثر من مشكلة في اعتقال كريم، و قلت بشكل مفيهوش لبس أني مش شايف أن المفروض يكون فيه حدود لحرية التعبير و أن القانون المصري سيئ السمعة و يمكن حتى في محاكمة عادلة يحبس ناس في رأيي مرتكبوش أي ذنب.

لكن في نفس الوقت قلت أني متفهم أن فيه ناس كثير مش هتوافقني و شايفه أن المفروض يكون فيه حدود لحرية التعبير (بما فيها عبد الكريم شخصيا).

و بعدين فيه مستوى ثاني و هو المستوى الأهم في رأيي و ده انتهاك حقوق عبد الكريم كمتهم موجهة اليه تهمة، و دي قلت بوضوح أني شايف أن الكل المفروض يوافقني عليها لأن ملهاش علاقة بهو مذنب ولا لأ.

مفهومة دي؟ يعني مش بخبي ولا حاجة أن ضد حبس عبد الكريم تماما ولا حتى بمحاكمة عادلة، لكن بما أن مطلب محاكمة عادلة ده مطلب أساسي و ممكن يوافقني عليه ناس كثير و يمكن يكون كافي لاطلاق سراح عبد الكريم بطالب بيه أولا و بدعوا الناس تتضامن من غير ما أستهبل و أخبي أني في الأصل شايف أن حرية التعبير مطلقة و معترض على حبس عبد الكريم على الاطلاق.

أخيرا التحليل النفسي لعلاء عبد الفتاح موضوع ميهمنيش، لو هيسليك أنك تقضي وقتك فيه اتفضل لكن متتوقعش مني مساعدة.

معرفش ايه دخل المجتمع الغربي في المناقشة، سمعتني بقول أن المجتمع الغربي هو المثال اللذي يجب أن يحتذى بيه؟

ثانيا في أمريكا حرية التعبير مطلقة، بمعنى أنه لا يمكن حبسك بسبب ما تنشره حتى السب و القذف عقوبته مش الحبس.

أما وصفي لبعض الناس بأنهم بهايم فده لأنهم بهايم، متفتكرش أني من دعاة احترام الآخر و احترام كل الآراء، في طيف الآراء و المعتقدات فيه حاجات كثيرة لا تستحق الا الاحتقار، فيه فرق بين تقبل فكرة وجود رأي آخر و حرية الآخر في التعبير عنه و بين احترامه.

يعني مثلا الهبل اللي أنت كاتبه في تحليلي ده أنا شايفه هرتلة و كلام فارغ و معنديش أي غصة أخلاقية في أني أقولك أنه هرتلة و كلام فارغ.

tyb w 3shan kam wa7d mn el 2zhar bl3'o 3no t7ml el muslmeen znbo leh tyb mnta btdaf3 3no w enta muslim w kteer 3'erk ya 3m w7yat waldk tla3 el muslmeen mn el ksa de

w b3den 7ryt el t3beer motlaka ezay y3ne msh fe 7aga esmaha mokdsat tyb mho lma 7d yse2 lele ana w 1.3 billion person bnkadasoh yb2e byse2 lena kolna w byz3lna w bysta7'ef be mo3takdatna

7oryt t3beer fe kol 7aga ela el deeen

اه عشان كام واحد من الأزهر بلغ و كام قاضي افترى و كام واحد علق بشماتة، فيه حاجة؟

و مين قال أني مسلم؟ أو أني حتى لو شايف نفسي مسلم باقي المسلمين هيحسبوني مسلم؟ مش حسبوا شريف عبد العزيز بهائي لمجرد أنه دافع عن حقهم في استخراج بطاقة شخصية؟

فيه حاجة أسمها مقدسات اه، كل كام نفر عندهم مقدسات تختلف عن الباقيين و كل كام نفر مقدساتهم بتتشتم منذ فجر التاريخ و لسه الدنيا ماشية. ايه بقى الضرورة في تحديد و قمع حرية التعبير؟ مش ممكن أن أنت و ال1.3 بليون من التفاهة بحيث أنكم بتتوجعوا كل ما حد يتكلم في أي حتة في العالم، و بعدين الاسلام بينتشر و بيدخل فيه ناس جداد كل يوم حتى في البلاد اللي بتسمح باهانة مقدساته و نبيه يعني مش فارقة.

أخيرا لما يبقى أغلبية المسلمين بتحترم مقدسات الجميع (مش مجرد مقدسات الأديان السماوية الثلاثة) نبقى نكمل كلامنا.

أنت بجد مسكين ربنا يهيدك دينك هو رأيك لو حد قال مفيش حرية رأية تهاجمة و تشتمة و لو حد هاجم دينك وربك يبقي حرية رأيي أنت اصلا لا يهمك دين و لا بدافع عن دين كل دينك هو حرية الرأي و حرية التعبير يا أخي خاف من ربك و خاف من أخرتك و طبعا هتقولي أت مالك و ديني بيني و بين ربي و بدل ما تقول ان كريم بيقول كدة أحسب ما يبقي منافق لا طبعا الافضل أنه لاي قول كدة و لا يبقي منافق الافضل انه يرجع لربة دينة و لعلمك أنا ليي معرفة بكريم لحد ما و ياما كلمته شخصيا علي النت من 4 سنين أو اكثر و ارائهة دي فعلا معفنة و كفاية احكيليكم علي موقف أو اتنين حصلوا ما بنا علشان تعرفوا مين هو التافة ألا لعنة لاله علي الظالمين

أخيرا لما يبقى أغلبية المسلمين بتحترم مقدسات الجميع (مش مجرد مقدسات الأديان السماوية الثلاثة) نبقى نكمل كلامنا

ياعنيى عليك إنت هاتستنى كتير أوى

امممممم

حكاية عبد الكريم بااااااااااشاااااااا أتفق مثلما إتفق معك آخرون عن أنه طبعا اللى حصله ظلم بس من مين من ناحية دولة إنت نفسك بتحبها بس مش بتحب اللى فى السلطة بس أفكاره عبد الكريم مسممة أو مدسوسة تسئ للجميع ليس المسلمين فقط يعنى لو إفترضت انك ملحد بلاش ملحد دى عشان ماتزعلش يعنى خليها إن الدين عندك حاجة ثانوية فأهم حاجة عندك هاتبقى الحررررررررررررررييية حرية الرأى والكلمة إتخيييييييل لو إتنقلت مرة واحدة لعالم تانى مافيش حاجة فيه إسمها دين ولا وجع دماغ والكلام ده كل واحد بدماغه عايش كل واحد مايعرفش لا هوا مسلم ولا مسيحى ولا يهودى-دى الأديان السماوية وسماوية تعنى إنها جاية من السماء من عند ربنا يعنى يا باااااااااشااااا لو إنت مؤمن بيه وبوجوده-أو حتى بهائى ولا حتى جاموسى وبقرى أكيد هانبقى مشتركين فى حاجة أننا كلنا نووووو دين ساعتها هاتبقى مستريح وكله تمام بس فيه مشكلة كل واحد هاتلاقيه طالع بفكرة أو أفكار عن خلاصة تجاربه وحياته وبمرور الأجيال والزمن وتناقل الخبرات هانتفق على مسمى معين قريب من حاجة إسمها قواعد عن حياتنا أو الحياة نفسها يعنى تدريجيا هاتلاقى نفسك بتخترع أهم شئ الديــــــــــــــــــــــــــــن أو الإعتقاد فى شئ معين هو خلاصة تجاربك وأفكارك الخاصة على شوية أفكار من ناس تانية برضه بنلف وندور حول أن اللى بيألف هوا إحنا فرد أو اتنين مليييييييييييييييووووووووووووووون واحد برضه بشرررررررررررر بنغلط مافيش حاجة إسمها كمال ولا حتى جمال إتخييييييييييييييييييييييل معلش تانى مرة إن ربنــــ الله ــــــــــــا إختارك إنت عشان تكون رسول ليه للبشر لأنهم غارقين فى الأخطاء والتفكير -مش كل الناس كدا طبعا- المهم وعشان يكلمك وإنت عبد له يرسل لك الوحى بأى طريقة بقى ممكن تقولى إزاى هاتنشر الدين فى عصر زى دا اللى عايشينه بكل اللى بنعانيه فيه طبعا هاتبدأ بالأقرب ليك واللى هايصدقك أو اللى تقدر تقنعه بكلامك اللى منزل عليك إتخيييييييييييييييييييييييييييييييل بقى إن كل ده حصل خلاااااااااااااااص وإن آخر الرسل جاء ورحل عنا محمد صلى الله عليه وسلم يعنى البشر كانت قبليه فى حالة أصعب مننا كمان يا راجل هل يعقل أنك تسجد لصنم أنت اللى عامله وعلى آخر الليل لما تجوع تاكله رب إيه ده ودى مش من الفيلم دى حصلت فعلا شوف الرسل دى تعبت قد إيييييييييييييييييييييييه مع الناس عشان توصل رسالة واحدة بس وهى لا إله إلا الله وبتعاقب الرسل ورحيلهم عنا بقى الناس كما هم بذات الداء الذى يوسوس فيه الشيطان ليعظمه وهو الكـــــــبـــــر اللى أخرجه من الجنة كل واحد عايز يبقى هوا اللى صح على طول الخط او منفض للدنيا وعايش لوحده وده ما ينفعش ولا هاينفع ونسى كل منا دينه وغرتنا الحياة الدنيا بفتنها حتى تطاولنا على الأديان بل على الله عز وجل كل هذا من أنفسنا الأمارة بالسوء ومن اللعين إبليس عليه لعنة الله بوسوسته فى صدورنا حتى إبليس سينكر هذا ويقول يوم الدين "إن أخاف الله" حتى هو يخاف لكنها مهمته أن يفسدنا ويفتنا ويأخذ ما إستطاع منا معه إلى الجحيم إلا عباد الله المخلصين فليس له عليهم سلطان خلاصة القول إتق الله وتذكر أن من واجب كل ذى حــــــــــــق أن يدافع عنه وليس هناك أحق من الــــــــــحق-اسم من اسماء الله عز وجل-ولكن أكثر الناس لا يعقلون يعنى بالبلدى كدا اننا لما نسينا الدين وسبناه ربنا سلط علينا ناس مننا من أنفسنا يعنى لحد ما نرجع تانى

ونصيحة إقرأ القرآن أو حتى إسمعه بس أكنه منزل عليك وبيكلمك إنت وشوف هاتفهم إيه وإبقى قولى

ولك الله يا مصر

محمد عبدالله

>اخي .. الاسلام بقالوا 200 سنة تحت الاحتلال .. اكيد اخلاق اهله اتغيرت كتير ... لكنا نأمل انها بدأت ترجع .. و بترجع بسرعة ..

والله متم نوره ولو كره الكافرون

ياريت فعلا كل الكبوات اللى حصلت وبتحصل دى تمهيد لوقفه نرجع معاها قيم واخلاق كتير ضاعت و اتشوهت على مر الزمن .. عارف ..انا ببقى حزين جدا لما أقرأ كلام زى اللى كتبه كريم وبكتبه ويقوله غيره كتير بكل مافيه من تجريح واهانه و لكن برجع وبقول العيب جوانا احنا و جوا مجتمعنا المشوه،عشان كده هيطلع مليون كريم ومليون أبو اسلام وهنفضل تايهين على طول ... بس أنا شايف انك متفائل حبتين ؟

):

حل مشكله كريم انه يدعي الله انه ينصره ويخرجة من الحبس والظلم دة ويا ريت يدعي الدعاء دة(لا اله الا انت سبحانك اني كنت من الظالمين) وان شاء الله ربنا يرفع عنه الظلم وينصره

اتفق معك يا علاء واؤيدك بشده واحترم حماسك للدفاع عن من تخلى عنه الجميع بدعوى كفره فالأختلاف هو كفر

ولا تناقش ولا تجادل يا أخ على

طبعا في ناس بتشمت علي أساس : اللهم أهلك الظالمين بالظالمين وأخرجنا من بينهم سالمين. بس يارب بقي نفهم أن أمن الدولة مش بيفرق بين مسلم وكافر ومؤمن وسلفي وشيوعي ومسيحي وبهائي... كلنا في عيونهم كلاب أو أقل شوية. أيام عبد الناصر باردو كان الاخواني والشيوعي واليهودي والمسيحي في زنزانة واحدة . طبعا مش معقول حد هيبقي فاهم ان أمن الدولة يهمه الاسلام وبيحميه من كريم اللي كلامه مش فارق أصلا مع 90% من اللي بيقروه والباقي ما بيصدق يلاقي أي شتيمة في القران والرسول والصحابة بلا بينة.

بس باردوا لازم نعرف ان في اعتراض كمان قوي علي كريم وهو أنه محتكر الحرية لنفسه ويؤيد اعتقال أبو اسلام. للأسف هو كتب الكلام ده عند عمرو وأنا بحاول أقول لأ مش هوه. باسأل نفسي ازاي أطلب سراحه وهو أصلا مش فاهم الحرية غير انها حريته وبس، وانهاردة أدافع عنه وبكره لما اتسجن أو عصام العريان يتسجن ألاقي كريم بيقول يللا في داهية.

أنا ضد اعتقاله بسبب كتاباته ومستعد للمطالبة باطلاق سراحه لكن متردد - بكره هو اللي هيقدم بلاغ لأمن الدولة عشان أنا أصولي ولو ماقدمش بلاغ هيكون علي الأقل بيؤيد اعتقالي بسبب كتاباتي أو لحيتي.

علاء، في مشكلة كبيرة في موضوع كريم مش عشان كتاباته ضد الاسلام ، لأ، عشان دماغ كريم نفسها. وأتمني وأنت بتكتب أو ترد في الموضوع ده أنك تعمل فرق بين المواقف التي يتخذها خصوم كريم. في ناس تتمني أنه يفضل معتقل ويتفشخ كمان لأنه كافر، وناس تانية مش عارفين يدافعوا عنه بقوة - مترددين يعني زيي كده - ليه؟ للأسف باقولها بناءا علي الرد اللي هوه كتبه عند عمرو علي موضوع أبو اسلام.

يعني مثلا في ناس أمريكان معترضين علي ضرب العراق من منطلق ان العراقيين بشر ، وناس تانية معترضة علي ضرب العراق عشان الأحسن أن ادارة بوش توفر الفلوس دي لاصلاح التعليم والصحة في أمريكا. موقفين بيطالبوا بحاجة واحدة بس المنطلقات مختلفة. ده مجرد مثال قد يوضح فكرتي نسبيا. في ناس مش متحمسين للدفاع عنه بس لأسباب مختلفة باردوا

حلوة أهلك الظالمين بالظالمين، على أساس أن ايه الظلك الفزيع اللي ارتكبه عبد الكريم بقى؟

الموضوع أنه كافر لا مؤاخذة و هو ده التحقيق اللي بيحصل معاه و هو ده اللي حارق البهايم اللي بتعلق، أسف الموضوع ملوش أي علاقة لا بظلم ولا باهانة ولا بأي كلام من ده.

لكن عموما أنا مش بلوم من لم يدافع عنه لأن لوم حد لأنه لم يتضامن ده من أحقر الحاجات اللي ممكن الواحد يعملها، القضايا كثير و ثلاث أربع جهودنا بلا نتيجة أصلا و الناس حرة تعمل اللي هي عايزاه و تختار أولوياتها أو حتى تكبر.

اللي مضايقني هو اللي شمتان و مبسوط و عاجبه اللي بيحصل، مضايقني أولا غبائه لأنه مش شايف خطورة تقبل ده و لو مرة واحدة، و مش شايف قد ايه الكل معرض ليه و طبعا مضايقني مدى الكراهية و الحقد و قالقني مدى عدم الثقة بالنفس اللي تخلي بهيمة يفترض أن ديانة يدين بيها فوق البليون و عمرها فوق الخمستاشر قرن مهددة بسبب كتابات عبد الكريم (طب على ايه وجع الدماغ بقى، متغيروها لما هي خيخة و مسوسة كدة).

أخيرا مدخل عبد الكريم لرفض الدفاع عن أبو اسلام للأسف مدخل دارج على مستوى العالم و له قبول أوسع من كلب و راح و كافر و زنديق و الكلام ده. للأسف حتى كثير من الحقوقيين متفقين على اعتبار الخطاب المحرض على الكراهية (و دي بتترجم للخطاب المعبر عن الكراهية في أغلب الأوقات) خارج نطاق حرية التعبير، طبعا ده خرم يعدي منه فيل، و كل حد يقولك حرية التعبير ولكن يبقى بيتعولق و لو حلفولي على راوندا.

في تقديري الشخصي خطاب عبد الكريم لا يحرض على الكراهية و خطاب أبو اسلام فعلا يحض على الكراهية،

لكن دي تفاصيل عبد الكريم لما يشمت في أبو اسلام يبقى بيتعولق و كون أن دي علوقية دارجة و فيه حقوقيين محترمين متمسكين بيها ميقللش أنها علوقية.

أخيرا لا ألومك، صحيح أنا لوشت في المسلمين عشان أجتذب أمثالك يتكلموا لكن مفيش لوم لمن سكت، أنا سعيد كمان بمن اكتفى بالمطالبة بالعدالة لعبد الكريم (حتى في ظل قوانينا سيئة السمعة).

طول ما الأمن بيتدخل فى كل حاجه فى حياتنا وخصوصا قضايا الرأى مش هنتقدم خطوه واحده ... عندى اقتناع كامل ان الأمن ميهموش حقيقى الدفاع عن الاسلام لان ببساطه لو كان هما فعلا بيطبقوا تعاليم الاسلامه الحقيقه مكانوش اعتقلوا كريم او طلبة الأخوان او ألاف السجناء السياسيين وطبعا كلنا عارفين ايه اللى بيحصل لكل حد بتخطفه امن الدوله ... يعنى الأمن معندوش غير اجندته السوده اللى بيطبقها مع أى حد وكل حد

رغم انى مش متعاطف شخصيا مع كريم بعد ما قرات مدونته ولكن هذا امر أخر ولا يمنعنى من أن أعارض بشده مايحدث له الأن، لان اللى بيحصله دلوقتى بكره يحصلى ويحصلك ياناصح .... مفيش داعى بقى نخلط الأمور وبلاش العنصريه اللى بقت ماليه كل تفصيله فى حياتنا

يالله يا كيمو .. شد يا كيمو

مش هو عامل فيها الشاب الملحد الجامد و(العنصري المحرض) .. يشرب بقى و يبطل عياط .. الأبطال عادة يتحملون من أجل قضاياهم و لا ايه يا سيد علاء

الموضوع لو كان الحاد كنا قلنا هو حر يقول اللي هو عايزه .. كنا قلنا حرية اعتقاد و حرية تعبير و الكلام اياه ده .. بس السيد كيمو بيحرض و بيشتم المسلمين اللي هم اغلبية في هذا البلد و في كثير من البلدان و حتى لو أقلية فلا يحق له ان يقل ادبه على اتباع دين معين و لا هي شعارات .. فا مش كل كلب عمال ينبح يبقى له حرية النباح .. في حاجة اسمها صيادين الكلاب .. و صيادين الكلاب عادة أشخاص لا رحمة في قلوبهم وعايزين الحرق هم كمان .. بس بعض الكلاب أيضا تستحق الحبس

العنصريين أمثال كريم أو عبد الكريم (و الاسم خسارة فيه)لا يستحقون اي تعاطف و أتمنى شخصيا أن يأخذ القضاء مجراه (بالعدل و بالأدب و بالقانون) و يعرف ان الله حق أو حتى ما يعرفش .. ياكش يولع بجاز .. كلب و راح

أنا أصلا متكلمتش عن حرية التعبير خالص، و مركز على باقي المظالم.

المقلق في الأمر أن الناس مش قادرة تفرق ما بين محاكمته على ما فعل لو كان فعل حاجة تستاهل و ما بين اللي بيحصل دلوقتي.

ده أولا، ثانيا مش فاهم موضوع محاكمته على ما فعل ده في دماغ "المسلمين" فايدته ايه بالظبط، فيه ناس رأيهم من رأيه بالألاف و بيكتبوا و ينشروا في ألاف المنابر المختلفة و أغلبهم خارج سيطرة القضاء و الأمن المصري تماما، يبقى استفدنا ايه؟

و بعدين ايه الضرر اللي مسببه عبد الكريم بالظبط؟ أهانك؟ طيب ايه عقوبة الاهانة في ٍرأيك مش مفروض العقوبة تكون متناسبة مع الجريمة؟

أيوه أهانني موضوع العقوبة موضوع آخر تماما .. و لكن الفكرة هل يستحق كريم العقوبة أم لا و بعدين مش كل حاجة نقول علشان هو يعني تحت طائلة النظام المصري .. طيب .. اللي يقع تحت طائلة النظام المصري و يشتم أغلب الشعب يستاهل بقى

و بعدين مش أحسن ما حد متخلف عقليا يروح يطخه عيارين؟

و الله انا شايف انه ينطس حكم ظريف كده احسن ما ينطخ عيارين مش حلوين

موضوع تحت كائلة النظام المصري ده مكانش مكالبة بالافراج عنه لمجرد أنه تحت طائلة النظام، ده كان توضيح لأن في ألاف زيه و أن وقوع عبد الكريم تحت طائلة النظام المصري مش هيقلل من الاهانات اللي بتوجه ضد المسلمين كل يوم.

أولا أنا مقلتش عشان هو تحت طائلة النظام المصري، قلت عشان هو محروم من حقوقه الأساسية كمتهم.

أنت بتدعي أنه ارتكب جريمة اسمها أنه أهانك، حلو هل اللي حاصل دلوقتي أنه بيحاكم في التهمة دي؟

اللي أنا بتكلم عليه أن بأي مقياس حتى لو أنت شايفه مذنب هو مظلوم، مش فارق معاك عادي، لكن تيجي تهلل و تفرح لأنه مظلوم و تقول كمان أن هو ده الاسلام؟

و بعدين يا ريت ترد علي، عقوبة أنه أهانك ايه؟

و كيف تضمن أن وجود تهمة زي اهانة المسلمين لا يمكن تستخدم كباب واسع لقمع ناس كثير (لاحظ مثلا ازاي قوانين ادانة خطاب الكراهية تستخدم لقمع خصوم الصهيونية).

وانا اضعهم كلهم في سله واحده............................. انا جديد هنا لسه بستفقد المكان وشايف حجات غريبه شايف ناس بتدافع عن واحد بيشتم النبي وبيقول علي النبي محمد كلام سافل يعني لو انا شتمت مثلا سيدنا عيسي واليعاذ بلله طبعا عمرى ما اعمل كده انا مؤمن بيه صلي الله عليه وعلي نبينا محمد افضل الصلاه والسلام هيحصل ايه طبعا مش محتاجه كفايه الكلاب الي بره الي كل ما يحصل حاجه عاملين زى اليهود بلظبط وعندهم الاضهاد زى الهلوكست عموما عادي بقي مهو اي كلب عاوز يتكلم علي المسلمين يتكلم مهو احنا بردو الي رخسنا نفسنا ويجعله عامر

الأخ علاء : اذا كان كريم فى زنزانة حبس احتياطىأو انفرادى .. ففى الزنزانة اللى جنبة معتقلى شمال سيناء .. برضو حبس انفرداى .. والزنزانة اللى بعدها طلبة جامعة الأزهر .. برضو حبس احتياطى .. واللى بعدها عشرين الف معتقل أو يزيد .. حبس انفرادى .. القصة مش ده كافر وده مسلم .. القضية أن الكل محبوس .. النيابة اللى انت شايفها بتمثل المسلمين هى نفسها اللى بتحبس المسلمين .. وبتمنع طلبة الاخوان المسلمين من الامتحانات .. كريم يسلم ولا يكفر دى مش قضيتنا .. واللى خلقه يحاسبه .. القضية أن كلنا معتقلين وكلنا محبوسين امبارح أنت والنهاردة كريم وبكرة طلبة الأزهر .. سيبك من رأى المسلمين .. لا حايقدم ولا حايأخر .. ولا هو اللى بيحبس ولا هو اللى بيفرج .. المهم الشعب رأيه ايه .. الشعب ملوش رأى .. لانه خايف .. أو نايم .. أو عامل نفسه نايم .. الله المستعان !!!

ما هو علاء واحنا مبندافعش بس عن عبكريم بندافع عن كل محبوس فس تهمة رأي

بندافع عن الإخوان وبندافع عن أبو إسلام اللي بيحض على الكراهية

وبندافع عن أيمن نور

وعن طلعت السادات

وعن حق البهائيين في بطاقة شخصية

بس البوست دا سعادتك تحديدا عن عبكريم الكافر

لو عايز تدافع عن الإخوان المش كافرين برضه موجود

ارجع بوستين لورا عند علاء وهتلاقي دفاع عن الإخوان وقشطة الله ينور

ما يولع بجاز وسخ!! I think we have lot of problems and issues need to be discussed more than defending him. My point is we shall support and defend who really respect our believes regardless if he's Muslim or not Muslim, it really doesn't matters. What are really matters is the mutual respect, and then we can talk about support and defend. Otherwise we can defend on Israelis or anti-Arabs or our enemies. If Alaa doesn't consider 'el khawal dah' an idiot and doesn’t really worth writing, then its alaa's problem, but for me and for many other people, he is an enemy and doesn't worth our support or even mentioning him.

كان زمان فيه واحد كافر اسمه فولتير قال : أنا لا أتفق معك على ما تقول، لكني سأدافع حتى الموت عن حقك في أن تقوله.

بصراحة كل ما أقرأ تعليق فيه شماتة في عبد الكريم كنت بأحس بغيظ شديد. مش حبا في عبد الكريم ولكن زعلا على مدى التخلف اللي احنا فيه.

الموضوع ببساطة إن المؤمن بأي مبدأ أخلاقي لازم يكون متسق مع نفسه. يعني لو احنا شايفين إن التعذيب في السجون، مثلا، ممارسة لا أخلاقية يبقى المبدأ ده لازم يطبق على الجميع سواء احنا بنحبهم أو بنكرههم.

ولو احنا متفقين على إن الاعتقال التعسفي بدون تحقيق ولا محاكمة عادلة غلط يبقى لازم كلنا ندين أي ممارسات من النوع ده.

عايز اقول للشمتانين في عبد الكريم إنكم لو شايفين إنه يستاهل السجن لأن الأغلبية في مصر مش موافقة على آرائه، يبقى مش من حقكم يا حلوين تعترضوا على منع الحجاب في أوروبا لأن أغلبية الأوروبيين ما بيحبوش الحجاب ومش من حقكم تعترضوا على سجن جوانتانامو أو اعتقال الاخوان المسلمين.

في عرض دين النبي بلاش تناقضوا نفسكم وحددوا موقفكم. عايزين حرية وديمقراطية وحقوق إنسان والا عايزين تنضربوا بالجزمة على دماغ أمكم؟؟؟

تعليق بسيط بس، فولتير ماكنش كافر بالمعني المفهوم انهاردة يعني انه كافر بالله وكده، لأ. هو كان خارج علي الكنيسة وكان من أشد المعارضين لها ولعله أكثر فلاسفة جيله هجوما علي الكنيسة.

لكن معروف ان تصنيف "كافر" ده كان شغال عمال علي بطال لأي حد بيكتب ما يتعارض مع الكنيسة لدرجة أن الخروج علي الآداب العامة والسلوكيات غير الأخلاقية كانت ممكن يتم تصويرها علي أنها "مروق من حظيرة الدين". تهمة الهرطقة كانت عاملة زي الشوال الوااااسع اللي ممكن تعبّي فيه أي مخالفين للكنيسة. الخلاصة ان فولتير لم يكن كافرا بالله بل كان من دعاة المذهب الألوهي.

يا أخ علاء احنا شايفين الي بتعمله أمن الدولة غلط ومش موافقين عليه بس في نفس الوقت مش متعاطفين مع كريم حديلك مثال لو واحد شتمك او شتم أهلك ولقيت واحد تاني بيضربه او بيموته حتروح تدافع عنه؟ انت عارف ان الي بيضربه غلطان بس مش حتروح تدافع عنه الفكرة انك مش قادر تتعاطف معاه رغم انك مش موافق على الي بيحصل

أولا موضوع عبد الكريم للأسف بدأ من الأزهر و النيابة العامة و قضاة استئناف قبل ما تدخل فيه أمن الدولة.

ثانيا أتفهم عدم قدرتك على التعاطف و أحترمها، معرفش هعمل ايه في المثال اللي أنت طرحته لكن اللي أنا عارفه أني بدافع عن ناس بتشتم أهلي كل يوم (فأمي متبرجة تدخن السجائر و والدي شيوعي).

لكن ما علينا من ده كله، اعتراضي ليس على من سكت فده حقك لكن على من تشفي و شجع اللي بيحصل.

الأستاذ علاء

قبل كل شئ ابدي لك إعجابي الشديد بك وبحبك لهذا الوطن والمستضعفين والمضطهدين فيه وما أكثرهم

أولا إنا لست مثلك في ثقفتك ولا كثرة اطلاعك وانفتاحك علي ثقافات عدة ولكن شخص بسيط جدا ممكن أكون مكون نظرتي الأشياء اقل منك بحكم اطلاعك ولكن أريد أن اسأل سؤال

لو مجموعة من اليهود الصهاينة واقصد الصهاينة وليس كل اليهود اجتمعوا وقاموا بشراء قطعة ارض كبيرة في القاهرة وكل يوم يشتروا ويوسعوا ويستغلوا حاجة الناس الغلابة ويغروهم بشتي الاغرائات ماذا نفعل

هل سوف نقف مكتوفي الأيدي أم نحاربهم

إذا حاربناهم هل هذا يكون ضد الحرية فهم أناس وبشر عاديين لهم مطلق الحرية مثل غيرهم

إذا كان رأيك هو الواجب محاربتهم واعتقد ذلك

أليس أولي من الدفاع عن الوطن إن ندافع عن الدين ولا الدين مالوش صاحب يدافع عنه

الأستاذ عبد الكريم في مدونته التي اطلعت عليها يسب الدين ويقول علي شهر رمضان شهر النفاق ولا يؤمن بالقدر وغيره من الأشياء التي في مجملها تسب الدين

انتظر ولا تغضب وأرجوك أن تكمل معي ولا تتعصب الحوار هو وسيلة المتحضرين أمثالك

هل سوف يحدث للإسلام أي شئ لو خرج مليون واحد أقول لك لا

ولكن واجبنا الذي خلقنا الله من اجله هو الدفاع عنه لأنك عبد له وهو سيدك وخالقك

المشكلة ليست فيك ولا أمثالك من المثقفين المطلعين

المشكلة في ناس غلابة ممكن أن يؤثر فيهم هذا الكلام

الم تري أن بعض الدجالين ممن تضحك ونضحك علي كلامهم وأفعالهم ولكن نجد أن لهم أتباع

أن عبادة الأصنام في الأرض بدأت بطريقة مضحكة ممكن لو قيلت هذه الأيام لنضحك عليه ونقول ايه الهبل ده ولكنها انتشرت وبشكل كبير جدا

لماذا نلوم علي من يقفون ضد من يسب الدين ونقول أن ذلك حرية رأي

لو إنني م قمت بنشر مقالة تقول فيها عن والدك انه رجل سئ وزاني وبتاع نسوان وحرامي ماذا سوف تفعل ابسط شئ سوف ترفع قضية سب وقذف

أليس الأهم أن ندافع عن الدين قبل الأب وقبل الوطن وقبل العرض

انتظر رد منك يمكن تصحح لي هذه الأفكار واكرر أن لم اكتب للهجوم ولكن للحوار

أنا هحاول أرد عليك و نشوف.

فيه أكثر من نقطة فيما يخص موضوع عبد الكريم.

أول نقطة أظن كلنا ممكن نتفق عليها، و هي أن العدالة حق للجميع، بما فيهم قاتل أبي و الصهيوني.

واخدلي بالك؟ العدالة معناها أنه لو ارتكب جريمة لازم يحاكم و لازم محاكمته تكون عادلة و ياخد فرصته في الدفاع. المبادئ القانونية اللي بتضمن عدالة و نزاهة المحكمة هي أن المتهم برئ حتى تثبت ادانته و أن المتهم له الحق في الدفاع و أن المفروض يكون محكمة غير استثنائية يحق له فيها استئناف الحكم و الكلام ده.

طيب ايه اللي حاصل؟ أولا عبد الكريم يتم معاقبته بالحبس الاحتياطي، يحرم من رؤية محاميته و لو اتحول لمحكمة هتكون محكمة أمن دولة يعني محكمة استثنائية. المحققين غير محايدين بالمرة و مبيحققوش في التهم من أساسه لكن بيفتشوا في ضميره و يسألوه هل هو مؤمن ولا لأ و بيصلي ولا لأ.

حلو لغاية كده؟ طيب أنت ميفرقش معاك عبد الكريم أو كارهه لكن المفروض يفرق معاك الظلم ده لأنه نفس الظلم الواقع على الأخوان و نفس الظلم اللي كان واقع علي لما اتسجنت مع 700 آخرين و نفس الظلم اللي ممكن يقع عليك في أي لحظة و أنت فاهم ده كويس أكيد.

أنا شخصيا ضد محاسبة أي شخص على معتقده و على تعبيره عن معتقده، لكن متفهم أن فيه ناس كثير مش موافقيني، زي ما قلت قبل كده دول كثير و نشطاء حقوقيين كثير شايفين أن الخطاب المحرض للكراهية لا يقع ضمن حرية الرأي و التعبير، و واضح أن فيه مسلمين كثير معتبرين أي تعرض للاسلام و مقدساته على أنه خارج حدود حرية الرأي و التعبير.

لا أظن أني هقدر أقنعك بموقفي، لكن هحاول أشرحهولك.

في موضوع الدفاع عن الدين، راجع كده تاريخ مصر و تاريخ الدول الاسلامية و عد الناس اللي اتهمت بالخروج عن الدين و الكفر و شوف فيهم كام شخص أنت مش موافق على تكفيره. فيه أئمة كفرت و الأمثلة عديدة.

يبقى أول سبب لرفض المبدأ هو خوفا من استغلاله لقمع فكر و رأي أنا مش شايف أنه تعدى الحدود خصوصا و أن الحدود دي صعب تعريفها و الاتفاق عليها.

من نفس المنطلق أرفض فكرة تجريم الخطاب العنصري، مش حبا في العنصرية لكن عمليا الحجة دي بتستخدم لقمع معارضي الصهيونية و تحجيمهم.

ثانيا في مدى جدوى الدفاع بالقمع و الحبس و محاولة اسكات الأصوات، ايه يا ترى فائدة حبس عبد الكريم؟ أولا المفروض أن العقوبات عندنا ليست انتقاما طيب هل حبس عبد الكريم غير رأيه و فكره؟ بالعكس المتابع يعرف أنه مصر على أرائه، الراجل حتى متوقفش عن الكتابة رغم الحبس، و أكيد مناش متخيل أن فيه حد من المقتنعين بكلامه تراجع بعد الحبس ولا أن فيه حد من اللي بيكتب أو هيكتب زيه بطل خوفا من العواقب.

الفكر لا يحارب بالسجن، و الا كان زمان مفيش حاجة في مصر اسمها اخوان بما أنهم أكثر حد بيقمع.

يعني في رأيي قبول مبدأ معاقبة شخص على تعبيره عن رأيه (أيا كان هذا الرأي) بيفتح الباب لقمع أي فكر و ملوش أي نتائج ايجابية.

أنت ذكرت الدجالين، دول مش مثال كويس قوي لأن في الغالب الدجال غرضه أنه ياخد فلوس من الناس و المفروض تكون تهمته النصب، لكن بغض النظر عن ده، تابع الدجالين يا سيدي، بيدخلوا السجن مريديهم يزيدوا (و ينضم اليهم شوايشة و ظباط)، القمع لا يقتل أي فكرة حتى لو كانت شعوذة.

أنت سألت عن لو حد سب و قذف والدي و دي بالصدفة سؤال مناسب جدا، والدي محامي حقوق انسان يرفض رفع قضايا سب و قذف مهما كان الموضوع لحين الغاء عقوبة الحبس فيها لاقتناعه التام بأن مش مفروض حد يتحبس بسبب كلمة حتى لو كانت سب و قذف و لأنه فاهم أن تهمة السب و القذف بوابة يتم عن طريقها قمع الصحفيين اللي بيكشفوا الفساد.

و ده مش كلام نظري، مؤخرا طلع لواء من الداخلية في التلفزيون و ادعي أني حكم علي في قضايا جنائية و ده سب و قذف و مع رغم أنه كلب من كلاب الداخلية لا تجوز عليه الشفقة ولا الرحمة مفكرتش أصلا في اختصامه بسبب المبدأ.

أخيرا أنا مش مقتنع أن عبد الكريم أهان المسلمين، هو قال ايه؟ أن رمضان شهر النفاق؟

بالله عليك حتى الشيوخ بيشتكوا من الصيام الظاهري فقط، يا ترى الرشوة و السرقة و الغش الظلم قلوا في شهر رمضان؟ هل الناس لسانها و ايدها بقيت عفيفة وقت صيامها؟ يعني أنت شخصيا مشتكتش من من يتظاهر بالخشوع و الايمان في الشهر؟ أنا أوعى على الدنيا و الناس تشتكي من اللي بيتمنظر بعمرة رمضان و مائدة الرحمان و من من يهمل علمه بحجة الصيام و من يهمل فلتان أعصابه بحجة الصيام و من الازدواجية العجيبة ما بين الصيام و المأدب اللي بتتعمل على الفطار. و و و و و و

و بعدين نيجي للحظة العيد و يحصل حفل تحرش جماعي في وسط البلد.

يبقى أخطأ حين وصفه بشهر النفاق؟

و بتقولي القدر؟ يا ريت حد من اللي دارسين فلسفة اسلامية يدينا فكرة عن كمية السجال ما بين الفلاسفة و رجال الدين في موضوع مثل القدر و هل أجمع المسلمون يوما على فهم واحد للقدر؟

عزيزي علاء، انا واحد من الناس زيك بالضبط اؤمن بالدفاع عن ضحايا هذا النظام، وبالذات كريم الذي لايشكل خطر على الأمن الاجتماعي، ولم يقوم باستعراض للقوة، او هدد بقتل من يختلف معه في الرأي. على اني أصبت بأحباط شديد عندما وجدت ان معظم المدونات تؤيد ما يحدث لكريم لمجرد انهم مش عاجبهم كتاباته. الأحباط نابع من أحساس بما ينتظر هذا الوطن لو تحول الي ثيوقراطية ستكون أشد فتكاً بالحريات من النظام الديكتاتوري الحالي. ان من يدعون البكاء على الحريات حالياً، هم نفسهم من ينكرون على كريم، وعلى البهائيين، والليبراليين حقوقهم الأساسية وهذا وهم لم يتسلموا زمام الأمور بعد!! فما بالك لو امسكوا بالحكم(وهو غالباً ما سيحدث!!!

على فكرة انا غيرت أسم مدونتي الي نهضة مصر http://nahdetmasr.blogspot.com

Does any body really know Kareem? who he is? what is his back ground? why are these his ideas? how was he brought up? you can find a few words about it in his writtings, but it i svery clear that kareem grew up in a strictly religious family, I know a lot about kareem and i am not at telling what i know, but kareem is a human being, who deserves to be defended no matter what he said.

If you walk in teh streets every day you wil find people "beysebo el deen"all the time. who is worse. Kareem who is merely expressing his opinion and ideas or the Torbeeny who killed and raped only God knows how many children? or is he a criminal as those people who robbed billions and fled out of the country? or is he as dangerous as terrorists? when are we going to wake up and realize that all the problems we have arise from our ignorance, and disrespect for others? do you know that there are men who do not fast delibertly? what about people who do not pray? are we going to chase them too and call then "kafara", what about a man who does not want his wife to wear a veil? why don't we chase him and hunt him down too.

are we going soon to get "gama3at el amr bel ma3roof"like in KSA who would chase people in teh streets? what is going on people? wake up

مش قلتلك هتشتم ..هي عادتك وألا هتشتريها... ياترى ليه لما حد يهاجمك مابتسمهاش حرية تعبير ليه وتحترمها بدل ما تطلق عليها أوصاف بتدل على عدم احترامك للأخر ..طيب ماهو أنا كمان من حقي محترمكش ولا احترم كلامك ومن حقي أشوفه مرض نفسي بس الرد عليه ياسى علاء ميكونش بوصفه هبل وبس لكن بتقديم حيثيات موضوعيه لاعتباره هبل ..يعنى تقولي أنت فعلا ناجح في إيه في حياتك بدل ما تدارى على الخيبة بأوصاف مثل الهبل...وبعدين ليه دايما بتتكلم على انك الصح الوحيد ..مفكر تش مره إن غيرك ممكن يكون هو الصح ..مش الإطلاق اللا محدود لقدرات الاستيعاب وإدراك الأمور كان محل اعتراضك ضد أطلاقات الآخرين ..ياريت تبقى أمين مع نفسك ...ده إن كنت بتؤمن بوجوب الأمانة أصلاً

مين قال أني مش بسميها حرية تعبير؟

حرية التعبير هي المناخ اللي بيسمح للناس بالتعبير عن أرائهم ملوش أي علاقة بتقييمي لأراهم.

كلامك كان في نظري هرتلة لكنه نشرك ليه جزء من حرية التعبير، أنت ليه شايف أن فيه تعارض ما بين الاثنين؟

محدش طلب منك تحترم كلام عبد الكريم.

مرديتش عليك عشان مش مهتم بمحاولتك لتحليلي نفسيا (خصوصا في تعليقات تدوينة عن موضوع ثاني)، مش شايف أنها تفرق في حاجة أنا ناجح في ايه و فاشل في ايه (و مش فارق أصلا مين اللي كاتب الكلام، الكلام موجود و تقدر تحكم عليه و على منطقه و تسأل أسئلة بغض النظر عن صاحبه)، لكن مش موضوع صعب أنك تكتشف شوية معلومات عني و تعرف اجابة السؤال لو فارقة معاك قوي.

و بعدين مين قال أني أنا بس اللي صح، فيه ناس كثير قوي صح أنت بس مش منهم.

مفهمتش الحتة بتاعت الاطلاق اللا محدود اشرحها ثاني.

اطلاق بمعنى انك دايما تحس انك انت اللى فاهم بس واللى مخالفك فى الرأى مبيفهمش حاجه والدليل انك برضه كررت نفس النغمه فى اخر رسالتك لما قلت فيه ناس كتير صح بس انت مش منهم تقصد انا يعتى طيب منين جالك التاكيد المطلق ده اذا كان اصلا مفيش حاجه مطلقه فى نظرك وكل حاجه قابله للنقد يبقى مش منطقى انك تطلق الحكم بالخطأ على مخالفينك بس وطبعا الناس اللى صح اللى انا مش منتهم هما اللى بيوفقوك فى اللرأى بس مش كده

جبت منين أن مفيش حاجة مطلقة في نظري؟ أنا قلتها في حتة قبل كده و لا أنت بتخمن؟

و ايه علاقة أن مفيش حاجة مطلقة بأن مفيش حاجة مش قابلة للنقد؟

خد مثلا، أنا شايف أن حرية التعبير المفروض تكون مطلقة، مش شايف أن فيه أي مناقشة ممكن تقنعني بعكس كده، ايماني بحرية التعبير المطلقة مطلق و مبني أساسا على ايمان و موقف مش على حسابات جدوى.

في نفس الوقت مش معتبرها كفر أن حد ياخد موقف مخالف لي، رغم أني رافض أي موقف يقلص من حرية التعبير مبدأيا و من غير ما أسمعه ولا أعرف تفاصيله.

اذن أنا قابل أنك تنتقد حرية التعبير رغم ايماني المطلق بيها.

ده شيئ طبيعي جدا، المؤمنين غالبا ايمانهم بالله مطلق و نابع من جواهم و غالبا لا يمكن تثبت لمؤمن عكس ايمانه لكن في نفس الوقت مش كل المؤمنين شايفين أننا المفروض نحبس اللي يكفر بالله، و مش كل المؤمنين شايفين أننا المفروض نمنع الناس من نقد الايمان و تعاليم الدين و رموز الدين و مقدساته.

لما قلت أنك غلط مكنتش أقصد على طول الخط، كنت أقصد أن الكلام اللي أنت كاتبه في التعليقات غلط، عرفت ازاي أنه غلط؟ طيب ما أنا رديت على كلامك و وضحتلك ازاي أنه غلط في وجهة نظري و برد على كلامك أهه و أوضحلك برضه ازاي أنه غلط في وجهة نظري.

الحكم بالخطأ بطلقه على اللي بحس أنه خطأ، مش داير أسجلهم في دفتر و بالتالي صعب شوية أرد على هل كلهم معرفش عاملين ازاي.

لكن المؤكد أن هيبقى فيه شيئ مشترك بيني و بين من أظن أنه صح و شيئ مختلف بيني و بين من أظن أنه غلط.

انت بقى عاوز ايه؟ عاوزني أجيبلك حد فيه تقارب أيديولوجي بيني و بينه و في نفس الوقت أنا مغلطه؟ ولا عايزيني أجيبلك حد فيه تباعد أيديولوجي كبير بيني و بينه و في نفس الوقت أنا شايفه صح؟

و ايه أصلا الغرض من الهيصة اللي أنت عاملها دي؟ يعني فيه حاجة أنت عايز تعرفها؟ ولا فيه حاجة عايز توصلهالي؟

يبدو انى معرفتش أوصلك المطلق وغير المطلق ..لكن أحاول مره تانيه..انت فى افكارك واراءك بتشوف كل حاجه تخصك مطلقة , يعنى اقرب مثال انك بتقول انك شايف حرية التعبير بلا حدود لغاية كده حلو..لكن انك تصادر وتقول ودانك معندكش استعداد تغير رأيك اياً كانت المناقشات حتى قبل ماتقرأها أهو ده الاطلاق...طيب دى قناعاتك فيما يتعلق بمصالحك انت , لكن التناقض هنا هو بقى نظرتك تجاه اراء وقناعات الاخرين ..انت فى اسلوب ردك عليهم بيبان انك لاتعتبر اراء الاخرين أوحتى الحقائق المستقرة التى يؤمنون بها مطلقه , وكل رأى مخالف لك قابل للنقد عندك اياً كانت المسلمات الموجوده به ..مش شايف ان طريقة التناول بتاعتك بالشكل ده ممكن تتحط تحت عنوان( الحقيقه الوحيدة هى شخصك وبس وان ماعداك عدم ومشكوك فيه)

أما ايه الهيصه اللى انا عاملها وغرضها ايه ..فهو امر مستغرب منك..انت نسيت ان دى مدونات هدفها التعبير عما فى الصدور وان احنا كنا بناقش حرية التعبير بتاع المدون عبد الكريم والفرق بين حريته فى التعبير وبين سب مقدسات الاخرين فى حين انه يقدر يعبر عن عدم قناعته حتى بعدم وجود الله بدون مايضطر الى اهانة مقدسات الاخرين بأن يقول ان كل واحد بيحترم نفسه لابد ان يتراجع عن صيام رمضان , وان كا المدونات اللى قبلى فى هذا الباب كانت بتتكلم على كده , يعنى مش هيصه أنا عاملها ولا حاجه ..لكن انت طبعا مكينفعش ترد بأدب من غير مت تحاول تسفه اللى قدامك طيب ماتقول رأيك من غير التعالى والسخرية هو مش هيوصل من غير كده؟ وبالمناسبه نسيت أقولك انى ضد كل اللى بيحصل لعبد الكريم أو غيره ..لكن احنا كنا بناقش الامرين معا حدود حرية التعبير وكمان حق المجتمع فى محاكمة الخارج عن هذه الحدود باجراءات سليمه ومشروعه , علشان كده سألتك المره اللى فاتت لوعبد الكريم اتحاكم محاكمه عادله والمحكمة حكمت عليه وأصبح الحكم نهائى ها ستقبل والا برضه هتعارض وتقول مصادره لحرية التعبير علشان أعرف اللى بيشاركنى رفضى لما يحدث لعبد الكريم حدود رفضه ايه ؟ ورفضه ده نابع من ان اللى بيحصل غلط والا هيفضل يرفض حتى لو اتعمل الصح ؟ وماتزعلش ياسيدى مش هشارك فى الرد على أى مدونه علشان تريح دماغك من الهيصه اللى انا كنت عاملها وهامارس حرية التعبير فى مدونه اخرى

الهيصة هنا أقصد بيها تحليلي نفسيا و مناقشة شخصي و سلوكي، ده اللي أنا مش فاهم هامك ليه. مش الكلام عن قضية عبد الكريم.

طيب ما أنا قلت بنفسي أن موقفي من حرية التعبير فيه اطلاق فعلا. و بعدين أنت برضه مصر تكلمني عن موضوع ميهمنيش أنا معترضتش على أن قناعات فلان مطلقة ولا لأ موضوع ميخصنيش في شيئ.

المهم أني برضه مش فاهم ليه أنت رابط ما بين غير قابل للنقد و مطلق، أنا قلتلك حرية التعبير عندي مطلقة لكنها قابلة للنقد ، بمعني أني لن أطالب بحبسك لو نقدتها و يمكن أحاول أتناقش معاك (و وقتها هحتاج أقولك حجة غير أني شايفها مطلقة). هارش؟ و نفس الشيئ فيه ناس بتتقبل نقد دينهم و ربهم رغم أنه بالنسبة ليهم حقيقة مطلقة لا جدال فيها، مفيش أي ترابط و مش فاهم أنت شايفها أزمة ليه.

يمكن تكون طريقة التناول بتاعتي هي أن الحقيقة شخصي بس و ما عداه عدم و مشكوك فيه، و بعدين؟ ده يفرق ايه في عبد الكريم يحاكم ولا لأ؟ يعني ده علاقته ايه بالموضوع؟

ماش يا سيدي هو يقدر يعبر عن قناعته بطريقة لا تهين الناس (مش مقتنع لأن بصراحة المسلمين بيتلككوا بدليل التشنج الفظيع في التعامل مع موضوع البهائيين رغم أنهم لحد علمي مأهانوش حد لكن ما علينا) برضه ده يفرق ايه؟ هو هل لمجرد وجود وسيلة ألطف في التعبير ده سبب كافي للحبس؟

أنا فاهم طبعا أن التعالى و السخرية اختيار، و أنا بختاره كثير لما أرد على ناس أنا مستحقرهم، الموضوع واضح تماما و مفيهوش أي لبس و مش بعمله من تحت لتحت.

أظن أني رديت عليك في سؤالك الوحيد اللي له علاقة بالموضوع رد واضح.

سلام عليكم يا استاذ علاء اتفقت او اختلفت معك لا انكر على الاطلاق اعجابى الشدييييد بك انت والعزيزة منال وهذه اول مرة اكتب فيها على اى مدونة:انا متدينةاو بحاول اكون متدينة , لست مثقفة لدرجة ناس كتير بتكتب هنا لكنى اعلم شىء سواء كنت انامتدينةوانت شيوعىوفلان ماركسى لااحد فينا يملك الحق فى الطعن للاخر لمجرد الطعن يعنى ببساطة محدش فينا رضى الله عنه وارضاه وهو الفرقة الناجية والباقى يعنى كويسين بسسسسسسسسس : ربنا يهدى .

انا معرفش كريم ولاعمرى دخلت على المدونة بتاعته بس اللى اعرفة انه انسان مظلوم , الناس بقه اللى شمتانة فيه عايزة اقولهم حاجتين :

اولا :مرة واحد تاجر عرف ان فى واحد امين اسمه محمد ف مكة فذهب اليه و قاله ان ابو جهل اخد منه حقه فى تجارة ماوانه عايز مساعدته فى استرداد هذا الحق ذهب النبى معاه ورجع له حقه من ابو جهل والراجل رجع بلده والى يومنا هذا لا يعرف اسم الراجل ولا ملته ولا النبى - صلى الله عليه وسلم- اصلا عرض عليه الاسلام . هذا الموقف ممكن لاى حد بيقراه شوية فى الدين انه يعرفه يعنى النبى اللى انتم المفروض بتتبعوه دافع عن حق ماااادى واكرر مادى مالى لواحد غير مسلم ما بلكم بانسان مظلوم و مسجون ومنتهكة حقوقة الادمية يااااااااااااااااااااااااااا اساتذة المسلم بيدافع عن المبدا للمبدا مش للاشخاص اللى داخلين مزاجة والباقى يبقوا داخلين النار وحلال فيهم السجن ده تهريج ده رايكم انت احرار لكن مش تتكلموا بقى باسم الدين.

ثانيا:كلنا مسلم وشيوعى وقبطى وكل بنى ادم حتى الخمورجية فى سلة واحدة مليانة بيض يعنى اللى يتحرك غلط البيض كله يتكسر وبعدين ماهو واضح قوى انهم عايزنة نكره بعض و نخبط فى بعض مش صعبة يعنى مش محتاجة معادلات ولا كيميا ولا ايه وبعدين عشان اكون وضحت كلامى معنى الدفاع عن المبدا للمبدا قصدى لو مسلم اتعمل فيه كده هيكون رد الفعل ايه ؟

ثالثا : واعتذر عن التطويل ولكنها كلمة لعلاء ولو يسمح لى هى عتاب , انت حد فاهم و قارىء وعارف ان وعى الناس لسه بيقوم حتى لو بانوا من بعيد فاهمين كفاية طريقة تعاملهم مع الاخر عشان يبان قد ايه لسة شوية ارجوك فهم الناس دى بلاش تنزل لطريقتهم فى الكلام انت ارفعهم ليك و انا وانت نعلم تماما انك تعرف وتقدر تعمل ده و على فكرة انا بقول كده لان فرات لك ردود فهمت منها انك حقيقى تقدر ترفع الناس لمرحلة ما فى قبول الاخر وافهم ان ردك العنيف على من شمتوا بكريم عشان عدم الحساسة اللى هما فيها وعشان عاطفتك ناحية كريم والظروف الصعبة اللى هو فيها ربنا يفرجها عليه , بس انا بتكلم عموما اسمحى اصلا اللى فاهمين مش كتير واللى عارفين انه لايمكن صب الناس فى قالب واحد وهو ده وخلاص اقل وان لازم اى مكان على الارض يكون فيه متدين مسلم وغير مسلم ومسيحى ويهودى وشيوعى وملحد وانهم لازم يعيشوا ويراعوا بعض اقل القليلين فلما انت تبقى واحد مهنم ارجوووووووووووووووووووووووووووووووووووووووووووووك لاتنزل الى مستوى الناس التانية واعتقد انك فاهم ما اعنى

اعتذر عن طول الرسالة وارجو قراتها فهى الاولى لى

نهى

عمت مساء يا علاء بيه يبدو ان سيادتكم وحرمكم المصون؟؟؟؟؟؟؟؟؟؟؟؟؟؟؟؟؟؟؟؟؟ لاتعرفون معنا للحرية سوى الغوغائية والسعار الجنسى الذى تتهمون به القاصى والدانى وهو صفتكم المتأصلة فيكم ان الحرية لاتعنى التهكم والاستهزاء بمقدسات الاخرين كما فعل أخوكم فى ايه فى ابليس عبد كونك كافر ومرتد فى مجتمع علمانى فهو حرية؟؟؟؟؟؟؟؟؟؟؟؟؟؟؟؟ولكن من حق المجتمع ان يدافع عن قيمه وثوابته اذا حاول أحد السفهاء ان يهزأ منها وعلى قدر الجرم يأتى العقاب أخيراأود ان أذكرك بمعنى الكلمةلتنتبه لكلماتك وكلمات أعضاء مدونتك يقول أمل دنقل ان الكلمة ان تكتب لا تكتب من أجل الترفيه ويقول عبدالرحمن الشرقاوى ان الكلمة مسؤلية وفى الاثر تكلم حتى اراك ولقد رأينا منك ومن حرمك الكثير