You are here

الزراف الغشيم، و البوم الحكيم، و العصافير أم سيم

Primary tabs

صلي على النبي يا ست نعامة

العصافير في الغابة بتاعتنا رغاية شوية و بتنم كتير، و دي حاجة بيفوتوها لبعض لأن كلهم رغايين، لكن باقي الحيوانات لما بتعرف أن العصافير بتنم عليها بتزعل.

قامت العصافير اتفقت أنها ما تنمش الا لما تبقى واقفة على شجر عالي بس، و كده الحيوانات ما تسمعش بيقولوا ايه. و محدش يزعل.

لكن المشكلة أن الأسد ملك الغابة (اللي كان أصله جربوع بس سبحان الله صار أسد) غلس و بيحشر نفسه في كل حاجة، و كان بيحب يسمع نم العصافير عشان يعرف كل أسرار أهل الغابة، طبعا لما العصافير قررت تزقزق من فوق الشجر بس الأسد قفش، و اتفق مع الزرافة أنها تستخبي و تتسحب ببطء و ترفع رأسها فوووق قريب من الشجرة و تسمع نم العصافير و تبلغه.

الزرافة غشيمة حبتين، و عشان تضمن ما تنساش اللي بيتقال بتقعد تردده، العصافير سمعتها و هرشت الموضوع.

العصافير قعدت تشتكي، لفوا على الغابة كلها و بلغوا الحيوانات، قالولهم انتم كنتوا بتزعلوا مننا لمجرد أننا بندردش و نجيب سيرتكم، انما الأسد ده قاعد ينخور و يدور و عايز يعرف أسرار الغابة كلها، الكلام وصل للزرافة و الزرافة استهبلت و عملت أن هي اللي مزاجها تسمع و قالت و الله أنا ربنا خلقني رقبتي طويلة و اللي مش عاجبه ما يزقزقش.

العصافير قعدت تفكر في حل، ما هو مش ممكن هيسكتوا، يقضوا يومهم في ايه يعني غير قعدات النميمة؟ قعدوا يفكروا في حل، يفكروا في حل، و في الأخر قرروا أنهم يلخبطوا زقزقتهم و محدش يفهم الكلام غير اللي حافظ نشيد سري، فرق النوت اللي بيغنوها عن النوت الأصلية للنشيد السري هي زقزقة النم، و بكده محدش يفهم حاجة غير العصفور اللي حافظ النشيد.

الزرافة غشيمة بس مش على الأخر، قعدت تسمع زقزقة ملخبطة شوية لحد ما فهمت ايه اللي بيحصل، و فكرت أن الحل هو أنها تتابع العصافير الصغيرة اللي لسه في الحضانة، و تستنى لحد ما تسمعهم و هما بيتعلموا النشيد السري، و بكده تعرف العصافير بتقول ايه، بس برضه كانت غشيمة و قعدت تردد الكلام، و العصافير برضه هرشت.

المهم العصافير جابت البوم أحكم حكماء الطيور و عرضوا عليهم المشكلة، البوم قاللهم أنتوا محتاجين طريقة للخبطة الكلام أحسن عشان يبقى مفيش داعي للاتفاق على نشيد سري، و افتكس البوم لعبة معتمدة على الهارموني المعقد جدا بين نشيدين، و ألطف حاجة أن النشيدين دول ممكن يكونوا معروفين للكل، لأن فك الشفرة مش بس محتاج النشيدين ده كمان محتاج السلم و الكورد الأساسي بتاع أي نشيد منهم و دي بقى بتبقى معلومات سرية، و الأذكى بقى أن أي عصفور عايز ينم مع عصفور تاني في السر مش محتاج يشاركه في سلمه الموسيقي و كورده السري محتاج بس يشاركه في النشيد و كل عصفور هيستخدم سلمه الموسيقى و كورده في أنه يفك زقزقة العصفور التاني.

و بكده يبقى مهما الزراف اتخابص مش ممكن يفهم اللي بيتقال لأن مفيش عصفور محتاج يقول لأي حد السر بتاعه، كل اللي محتاجه أنه يسمع النشيد العلني و ده مش كفاية لفهم السيم بتاع العصافير.

قوم ايه، العصافير مخها صغير و مبتعرفش تفتكر الهارموني المعقدة، كل عصفور كتب السلم و الكورد السري بتاعه على ورقة شجر و قاللك لو ضاعت أو انسرقت مني الورقة دي نبقى نغير النشيد و نغير معاه السلم و الكورد السري و نبلغ كل العصافير بالتغيير ده.

و أنا بصفتي تنين بجناحات بيطير أقنعت العصافير أني طائر زيهم و انضميت لمجموعتهم و بقى عندي نشيد علني و سلم و كورد سري، بس الكلاب بتوع الأسد ضربوني مرة لما كنت أعزل و بوجيهي بايظ و مش عارف أعمل شعلة عشان أنفث نار و أدافع عن نفسي، و سرقوا مني الورقة بتاعت السلم و الكورد السري، و طبعا كان مفروض أبطل أستخدم النشيد بتاعي و أشوفلي نشيد جديد بس أنا مبعرفش ألحن لوحدي و كنت محتاج أعمل رحلة لشجرة العصافير بس ملقيتش وقت.

و من يومين بقى أبو منجل قفش علي و قاللي أنت كده مبوظ السيم اللي بيننا فضي نفسك و اطلع على الشجرة قوام قبل ما تخربها على كل الطيور، فعلا فضيت نفسي و طرت للعصافير و لحنولي نشيد جديد له سلم و كورد جداد فقلت أخطر الغابة كلها عشان تبطل تستخدم النشيد القديم اللي احتمال ابن اللبوة يكون فاقسه.


و ده يا ست نعامة الموضوع كله، و بما أن النظام ماشس مظبوط خالص أنا شايف أن ممكن الطيور اللي مش بتطير زيك تستخدمه برضه، المشكلة الوحيدة أن الوصول للفروع العالية في الشجرة صعب شوية، بس معلش هو مجهود هيتعمل مرة واحدة بس.

أما العبرة الأخلاقية من القصة دي أن البوم أسيادكم في الغابة و الكل معتمد عليهم فعاملوهم باحترام لحسن تلوصوا. و أنا شايف كل طير يجدد عشه و أحسنله يبني بالتنقيط زي البوم البوم ما بيعمل.

Comments

للحيوانات اللي بتنتمي للفصيلة العجيبة اللي فرعت من القردة العليا بعد النيزك ما ضرب الغابة الرابط ده ممكن يكون مفهوم أكتر

و ان كان مش مهم قوي، أنا شايف الفصيلة دي ملهاش مستقبل خالص، مفيش حيوانات بالغباء ده ممكن تعمر كتير، فاكرين الدودو؟

It's all about Intelligent Design and not Evolution. :) mafeesh 7aga 2etfara3it men 7aga.

well you live in Egypt and you start doubting the intelligence of the designer, or maybe she just has a cruel sense of humor.

يا معشر العصافير حذارمن الغربان لنها منكوابس مش معاكوا اناصحيحلسه عصفور صغير بس ممكن يجى منى

الصراحة يعني افتكرت ان علاء بدأ يكتب قصص اطفال و قلت ده تطور برضه بس لقيت كلام كتير قوي و حاجات بتودي لمحتاجات و تواريخ فقلت اسلم و امشي عشان ما بفهمشي قوي في التكنولوجيا لكن فهمت شوية من مغزى القصة

ذهب الليل طلع الفجر و العصفور صوصو

جات القطة قالها بسبس قالتلوا نونو

يا حلاوتك يا تنين وانت بتتكلم عن الحيوانات، ايه ده كله انت فين من زمان يا سيدي وسايبني كده افهم في المخلوقات اللي بره الغابة ومش عارفة اوصلهم المعلومات، انا هاستعين بك بقى بعد كده.

يا فندم التنانين و البوم كلهم تحت أمرك

no comment

Gameel ya 3la2 bas enta neset moshkelet anfelwanza el toyour

فشتك عايمة والله يا علاء

يابو علاء المثل بيقول الطريق إلى جهنم مفروش بالنوايا الحسنة، و إنت شكلك نيتك حسنة بس معلهش الكلام اللى أنت كاتبة يودى فى داهية. تذكر دائما حاجتين: الأولى إن سلومة الأقرع ما يعرفش أبوة الثانية ما حدش يلعب فى بيضان الأسد و بعدين يزعل لما الأسد يطلع دين أمة. وإلا إية رأيك ؟؟؟؟؟؟؟؟؟؟؟

الاسد و بيضانة

الاسد رغم انة مك الغابة الا انة ابن لبوة واللبوة لا مؤاخذة هى انثى الحيوان الوحيدة اللى برضة لامؤاخذة تطلب العشار حتى وهى حامل يعنى مبدأها الجنس للجنس هواية - مزاج- لبونة - ماتعرفش ودة الى خلا الشعب المصرى يميزها ويميز سلوكها ويطلق وصفها على لامؤاخذة هواة الجنس من غير المحترفات

اما الاسد وبيضانة فشعبنا المؤدب المستحى ادرج عنة مثلا مشهورا: الاسد لما يعجز.... الكلاب تلعب فى بيضانة

وطبعا الغرض كلة فى وصف الحالة الى يصل اليها اسد عجز ولم يعد قادر على اشباع احتياجات لبوة- ولامؤاخذة- فيظهر كلاب ليقوموا بالواجب بدءا باللعب فى بيضانة وتدرجا الى اللعب فى اللبوة ولامؤاخذة

وربنا يجعل كلامنا خفيف على الاسد اللى عجز والكلاب اللى بتلعب فى بيضانة

خمسة لامؤخذه ....طب لو انته مكسوف كده يبقى لمؤخذه.... ايه