Welcome to @Manal And @Alaa's space, where we record our thoughts and feelings, keep in touch with friends and upload the occasional file.

Every now and then we write a post in English, you can find them all under the English Posts category.

عاجل: التحقيق مع أحمد سيف الاسلام و عمرو غربية و جمال عيد و التهمة ابتزاز

تحديث

حضر مع "المتهمين" وفد من الأساتذة المحامين على رأسهم منتصر الزيات مقرر لجنة الحريات بنقابة المحامين و عضو مجلس النقابة. و طالب المحامين بالاطلاع على أوراق البلاغ و التحريات و صرحت لهم النيابة بالاطلاع يوم السبت القادم.

على هذا الأساس تم تأجيل التحقيق و سيحدد له ميعاد لاحق بعد الاطلاع، المتهمين الثلاثة في بيوتهم و بخير.


اليوم الخميس 10 مايو، يتم التحقيق مع أحمد سيف الأسلام المحامي و مدير مركز هشام مبارك للقانون، و جمال عيد المحامي و مدير الشبكة العربية لمعلومات حقوق الانسان و المدون عمرو غربية أمام نيابة شمال القاهرة (العباسية)، بتهمة ابتزاز القاضي عبد الفتاح مراد رئيس محكمة استئناف الأسكندرية.

هذه القضية من ضمن سلسلة قضايا ملفقة مقدمة من القاضي عبد الفتاح مراد ضد مجموعة من المدونين و نشطاء حقوق الانسان انتقاما منهم لفضحهم اعتدائه على حقوق الملكية للشبكة في كتابه "الأصول العلمية و القانونية للمدونات على شبكة الإنترنت":

  • قضية حجب عدة مواقع و مدونات (مقدمة ضد الدولة، و لكن معظمها مواقع جمعيات حقوق انسان و بعض المدونات)
  • قضية سب و قذف (ضد جمال عيد، و علاء عبد الفتاح و منال حسن)
  • و ما خفي كان أعظم...

جدير بالذكر أن أحد شهود قضية السب و القذف اللي شهدوا زور على منال رغم وجودها بمقر عملها أثناء الواقعة هو المدافع عن الاسلام الذي طالب برفع قضية الحسبة ضد عبد الكريم نبيل سليمان. أيضا تصادف استدعاء مباحث الانترنت للمدون عمرو غربية للتحقيق معه في نفس يوم التحقيق في قضية السب و القذف 4 أبريل الماضي.

منال و علاء و جمال قضوا يوم كامل في اجراءات الافراج عنهم و كان ممكن تبقى أطول و يباتوا ليلة و للا ليلتين في القسم، مع انهم كان بيتحقق معاهم بس .. يا ترى ايه اللي هيحصل لعمرو و سيف و جمال؟؟

يا تري المحامين دول، اللي دافعوا عن طوب الأرض من هوايدا طه للمتهمين في تفجيرات طابا لعبد الكريم لحقوق ضحايا محرقة بني سويف لفلاحي سارندوا لحزب التحرير الأسلامي لكل النشطاء اللي اعتقلوا لتضامنهم مع القضاة، و اللي بيعتقلوا بعد أي مظاهرة أو حتى عشوائيا ... هيتحبسوا بكرة؟؟

يا ترى عمرو غربية اللي شارك في حملات الأفراج عن عبد المنعم و عبد الكريم و معتقلي كفاية و ... جه الدور عليه؟

منعم ومجموعة المعهد الزراعي يبدأون إضراباً مفتوحاً عن الطعام

عبد المنعم محمود ورفاقه في قضية معهد التعاون الزراعي يبدأون اضراباً مفتوحاً عن الطعام بسجن المحكوم

من مدونته أنا اخوان

كل سنة و أنت طيب

زي النهارده من سنة اتقبض على علاء، و بقيت انا من زوجات المعتقلين (و قال ايه كنت بستتقل كلمة مدام)، المهم عشت تجربة مختلفة خالص بس مكتبتش عنها مع أن علاء طلب مني أن اكتب أكتر من مرة، لكن بما أني باخد تلات ساعات علشان أكتب تدوينة صغيرة، و بما إني كنت مشغولة جدا في تفاصيل الأكل و الغسيل و الطلبات و الجوابات و النيابة و الزيارة و الطبلية (أول مرة سمعت ان لميا جايبة لوائل طبلية، أفتكرتها جايبله طبلية بجد ..

من تحت لتحت

أعتذري للي هيجي بعدي
خليه يسامحني أصل أنا
أخدت كل حاجة في عهدي
و شوفي بقى عهدي كان كام سنة

دي كلمات أغنية للمطرب الفلتة تامر حسني سمعتها في التاكسي النهارده (هو احنا ليه مابنستخدمش الليلده؟؟)

طبعا ممكن الواد يطلع فلتة بجد و يبقى كلام الأغنية جاي على لسان حسني مبارك لمصر

أنت فين يا عزرائيل

من يوم ما بدأ المدونون يتابعوا كفاية و يتكلموا عن مبارك ظهرت تجارب لطيفة لعمل مادة سمعية و بصرية هذلية تتمقلس على فرعونا مبارك و الباشا ابنه، نشر منها عندنا ثلاثية القناع الأسود و اللعبة التي حاذت على اعجاب الجماهير طاو طاو يقدم مبارك و عصابة البنزين. و طبعا مننساش في هذا الصدد ابداعات محمود توفيق زي باطل و نصف.

لكن للأسف في كل مرة لقينا حد بيطلع بحاجة و لا اثنين و بعدين يتوقف. لحد ظاهرة أحمد شريف.

أحمد انتاجه غزير لدرجة أني مش قادر أتابعه، كل يومين تقريبا تلاقيه عمل فيديو أو موسيقى جديدة، متابع لكل الأخبار و مغرق المدونين و النشطاء مجاملات و كلام حماسي أكثر مما يستحقوه بكثير. الشغل بروح مصرية جدا لكنه فاهم برضه ازاي يعمل رسالة تخاطب الأجانب وقت الحاجة. و طبعا بسبب غزارة الانتاج المستوى بيتذبذب أحيانا لكن بيفضل أغلبه حلو جدا.

و بمناسبة تجاهل عذرائيل لدعوات و آمال عموم المصريين سنة كمان تعالوا نغني مع أحمد الشريف

سنة حلوة يا جميل سنة حلوة يا زعيم سنة حلوة يا ... مزور يا جبان يا فاشل يا قاتل سنة حلوة يا حرامي و بالمرة برضه نشكر سيادة الرئيس على جمايله اللي مغرقانا و نغني مع أحمد الشريف

الاستقلال التام أو الموت الزؤام

و أحنا في بيروت حضرنا عرض مسرحي أسمه الزائدة للفنانة اللبنانية لينا صانع بناء على نصيحة للأستاذ بيار أبي صعب اللي تحدث عن العرض على أنه حاجة ثورية جدا جدا.

بغض النظر عن رأيي في العرض (كان ممل نييييك) أكثر نقطة خبطتني مش العرض نفسه لكن سياقه، العمل بسيط جدا عبارة عن واحدة قاعدة على كرسي و جوزها واقف بيتكلم، مع ذلك العمل ممول من قبل جهتين أجنبيتين على الأقل. ثاني حاجة خبطتني كانت الجمهور. العرض المفروض أنه صادم، بيخبط في الدين و معرفش ايه لكن كل جمهوره كان فنانين،

للأسف الظاهرتين مسيطرين على مجتمعات الفنانين عندنا في مصر برضه، خد عندك مثلا ما يسمى بالسينما المستقلة. نسبة كبيرة من الأفلام له تيترات طوييييييييلة بغض النظر عن مدى بساطة الفيلم، و كثير منهم متكلف مبالغ كبيييييرة في حين أنك تقلب في يوتيوب تلاقي ناس عملت حاجات مشابهة ببلاش تقريبا. (بلغني أن فيه ناس بتملى التيترات عشان مش منظر يعني الفيلم يبقى عليه اسم واحد بس).

حتى مهرجان أفلام الموبايل اللي عاملاه فرقة المفروض أنها فرقة شارع كان متمول من جوود نيوز.

أما موضوع الجمهور فالفن عندنا فعل استنمائي الفنانين بيعملوا مع نفسهم في الضلمة و المناديل و الصابون قريب منهم.

قارن ده بتجربة زي Tarnation مثلا، فيلم شارك في ساندانس و كان و حاز على جائزة أفضل فيلم تسجيلي في مهرجان لوس أنجليس، و مع ذلك مهواش فيلم مهرجانات فقط دور عليه في شبكات تبادل الملفات و التورنت و ما شابه و هتلاقيه منتشر جدا. الفيلم تكلف تحت 220$ و تقريبا متعملهوش أي دعاية. لا تمويل ولا حبسة في تجمعات استنمائية ولا حتى اهتمام بجودة الصورة و التكنيك، فن و خلاص (و ده تورنت للفيلم لو حد مهتم)

أصلا أنا مش مدون

أرجع من السفر في دماغي حواديت كثيير ، يجي في بالي المدونة، مش يبقى لطيف لو كتبت عن بيروت، دأنا حتى شفت الضاحية الجنوبية و الاعتصام و مخيم شاتيللا و عاصرت اللبنانيين و هما عايشين القلق من العودة للحرب الأهلية.

بس مش عارف أجيلها منين، مفيش كتابة عايزة تيجي، أصلي لما بسافر لازم لما أرجع أحكي كل الحواديت لكل الناس اللي بقابلهم و باين كده الحدوتة اللي اتحكت باللسان مينفعش تتحكي بالكيبورد.

طيب بلاش بيروت أنا راجع محمل كوميكس لطيفة جدا، أغلبها مش معروف و دي بقى أصلا مبلاقيش حد أحكيله عليها، طيب ما تيجي أخبطلي تدوينة كده عن الناس اللي بتكتب سيرتها الذاتية في صورة كوميكس، من سبايجلمان لمارجان ساترابي لصديقتنا لينا مرهج.

كل ماجي أفكر في مدخل للحدوتة ألاقي خبر منيل يشتتني، منعم اتقبض عليه، الباشا الفاضي عبد الفتاح مراد ملفقلي قضية، نواب أخوان بيتقبض عليهم، ضرب نار في سينا، مركز الخدمات النقابية بيتقفل، القضاة معرفش مالهم.

بلاش هبل، أنت هتصدق الهيلمان اللي معمول و تحس أنه واجب أنك تدون؟ أنك بتناضل بالكيبورد؟ لا أنت تنفع ولا أنت عايز. و بعدين لو هتكتب في الكلام ده ايه الجديد اللي هتقولله؟ ما الجرائد بتحكي فيه و الأمور واضحة و مفقوسة و مش عرضة أصلا لاختلاف الرأي. طيب منعم ضروري حاجة تتعمل لمنعم ده برضه صديق و كمان يمكن بكره تكون مطرحه و تحتاج اللي يقف معاك، سيبك من الكوميكس و الحوارات و أكتب عن منعم.

كتبنا عن منعم ما تيجي بقى نجرب الموضوع اللي بيقولوا عليه نعبر عن نفسنا ده، هاه أي حدوتة لطيفة كده. تليفون "محدش بيدون عن تحويل التأمينات لشركة قابضة ليه" يادي النيلة. باظت.

طيب أكتبلكم عن ثانية اعدادي؟ أصل أنا عندي امتحانات ثانية اعدادي بعيد عنكم، ما هو كبارات العيلة صحتهم مش مساعداهم فالبت أختي الصغيرة محدش فاضيلها و شكلها هتسقط في ثانية اعدادي، فالمهم تفتق ذهني أنهم يبعتوهالي فترة الامتحانات أذاكرلها، أنا أصلا ثانية اعدادي دي كانت بداية فشلي الدراسي و لحد قريب كان مدرس الدراسات بتاع اعدادي بيجيلي في الكوابيس، لكن تعمل ايه في الاحساس بالذنب، احساس بالذنب عشان مش بساعد في مشاكل الشيخوخة اللي بتواجه العيلة و احساس بالذنب عشان من جواية فرحان بالبت سناء اللي ملهاش في العلام ولا المدارس و عرفت تربي أهلها و مدرسينها و تخليهم يستسلموا و يتقبلوا الفشل الدراسي. المهم عندي ثانية اعدادي و ده موضوع يستاهل تدوينات من أول ذكريات المدرسة لحد نوادر سناء (و يا سلام بقى لما تعمل اسقاطات سياسية على نوادر سناء) و اشي بقى شتيمة في المناهج و نظام التعليم و يلعن أبو مبارك على اللي جابو مبارك و كده يعني.

Free Monem - الحرية لمنعم

early morning sunday the 15th of April 2007 state security arrested Egyptian blogger Abdol Monem Mahmoud, Monem was on the run for two days after receiving news of special forces breaking into his home in Alexandria and intimidating his parents. he has been detained for 15 days under temporary custody while the prosecutor investigates his case, in practice the prosecutor is likely to renew his custody for weeks if not months without facing trial.

link.net blocks ikhwanweb.info

scroll down for english text

بعد اعتقال عبد المنعم محمود بلغني أنه موقع اخوان وب اللي كان محرره عبد المنعم اتحجب في مصر.

حاليا الحكومة المصرية معندهاش قانون صريح يسمح لها بحجب المواقع و بالتالي الحجب بيتم بتواطئ موفري خدمة الاتصال و غالبا بيكون عن طريق تسميم بيانات الdns الخاصة بالموقع. و دي حاجة بتتم عند كل موفر خدمة اتصال على حدة.

لأن أحيانا بسمع أخبار خاطئة عن حجب مواقع حاولت اتأكد بنفسي و جربت أشوف عنوان http://www.ikhwanweb.info بيشاور على ايه عند تشكيلة من موفري الخدمة، جربت راية و ياللا و تي اي داتا و نايل أن لاين و لينك دوت نت.

في كل اللي جربتهم لينك دوت نت الوحيدة اللي عاملة حجب للموقع

أظن كده يبقى المفروض ندين شركة لينك دوت نت، يا ريت كل المشتركين عندهم يتصلوا بالدعم التقني و يسألوا ليه ikhwanweb.info مش شغال و لو مطلعش الموضوع خطأ تقني و اتحل بسرعة يبقى نبدأ حملة ضدهم.

ده شرح مبسط كان كتبه عزبي زماااان لموضوع تسميم بيانات الdns للي مفهمش الكلام اللي فات

س: لماذا لم تشارك في مظاهرة الأمس

ج: عشان أنا جبان ابن وسخة و خايف على نفسي لدرجة أني بعمل على روحي كل ما أسمع كلمة مظاهرة

و بعدين أنا بايع القضية و متواطئ مع الأمن كمان

و يا ريت محدش يطلب مني أنشر تنويه أو اعلان عن مظاهرة ثاني أبدا ﻷن بصفتي عميل جبان متخاذل لا يصح أني أشارك في التحريض على التجمهر.

لو حد منكم شافني في مظاهرة ثاني يبقى أنا يا أما جاي بالغلط يا أما جاي أقضي مصلحة يا أما أمن الدولة باعتيني أراقب عليكم.

Monem arrest timeline

You might have heard about the arrest of Egyptian blogger Abdol Monem Mahmoud, since this particular story was being reported while it was happening some conflicting/confusing information got disseminated, this is my attempt to piece together the sequence of events.

if you spot any mistakes please post corrections. I can probably find out exact time that each of these events happened, but eh too lazy, the order is the important thing

  1. fri 13 feb - dawn : state security arrests several muslim brotherhood members
  2. Monem receives a phone call from his mother informing him that special forces raided their alexandria home and he is wanted
  3. fri 13 feb - early morning: Monem decides to turn himself in in order to spare his parents any hardships
  4. in preparation for his arrest monem sends emails and SMSs informing people he is about to turn himself in and posts a couple of posts on his blog that can be used as a seed for a campaign
  5. fri 13 feb - morning: not able to reach Monem bloggers assume he already turned himself in and got arrested
  6. Monem contacts his lawyers who tell him to wait until they find out more details
  7. fri 13 feb - noon: lawyers find out there is no legal arrest warrant and advice monem not to turn himself in
  8. fri 13 feb - afternoon: news that Monem is still free and on the run reaches the blogosphere
  9. Monem hears his father's health is deteriorating and he needs to be hospitalized, monem is now confused and starts contemplating hiding for a longish period
  10. fri 13 feb - evening: Monem shoots two videos, one about his father's health that gets posted on youtube (is this the first time a wanted political prisoner on the run posts videos on youtube? I'm sure state security appreciated this touch), the other is an interview with Al Hewar TV (his current employer)
  11. sun 15 - dawn: Monem judging that since there are no legal arrest warrants he is technically allowed to travel and decides to try and leave the country on a pre-shceduled business trip
  12. Monem passes passport control and boards the plane but gets arrested before plane takes off
  13. sun 15 - afternoon: hours later Monem shows up in front of shobra prosecutor is charged with silly charges that can put him in jail for a very long time, Monem will spend 15 days in custody then appear before the prosecutor again, prosecutor will most probably send him back to jail when th 15 days are over. this can go on for 6 months (enough time to cook up a good anti-terrorism law?). his arrest is now legal (or as legal as it gets in the land of the pharaohs)
  14. mon 16: Link.net blocks ikhwanweb.info website
  15. wed 18: Monem's father hospitalized and in intensive care

عبد المنعم و أبوه و عبد المنعم و أبوه

فاكرين عبد المنعم جمال الدين؟

اللي مش فاكر يشوف الفيديو ده

والد عبد المنعم جمال الدين اللي شفتوه في الفيلم ده توفي الشهر اللي فات، مات من غير ما يشوف ابنه حر و يا عالم آخر مرة قدر يشوف فيها ابنه كانت امتى. و والدته اللي شفتوها في الفيلم برضه رجل في الدنيا و رجل في الأخرة، ادعولها تعيش لحد ما تشوف ابنها حر.

طيب عارفين عبد المنعم محمود؟

شوفوا بقى الفيديو ده

والد عبد المنعم في حالة صحية حرجة و منعم قلبه ملهوف على والده و نفسه يطمئن عليه و بعدين يسلم نفسه لكلاب مبارك

قولوا لمهدي عاكف أن بين صفوف جماعته منعم

معلق مجهول أشار لتدونية منعم الأخيرة عن أحداث جامعة الأسكندرية في 9 أبريل 2003 و مقتل الطالب الشهيد محمد السقا على أنها ممكن تكون السبب وراء محاولة اعتقاله

رغم أني أشك أن ده السبب الوحيد لكن التدوينة فعلا شهادة مهمة عن اليوم ده، و أنا بقرأها لاحظت تعليق منعم بيرد فيه على تعليقات محبطة تعاملت مع الحدث كأنه حدث أخواني صرف، شوفوا التعليق كده

طبعا أنا شايف ان نظرة عبدالرحمن ونظرة محمد السيد سلبية للغاية احنا اللي بنعمل في العمل العام اللي بنصدر شعور الخوف طلاب الاخوان في اسكندرية ومشرفيهم صدروا شعور الخوف للصف ومنه للطلاب يبقي مينفعش بأه نذكر تاريخ عبدالحككم الجراحيومطصفي كامل ونضال المصريين من اجل الحرية ونمسح التاريخ عشان نضحك علي الناس وميخفوش ويقوموا يخرجوا تاني للمظاهرات

ياسلام ده مش منطق ابدا حدث ذي ده مبقاش ملكنا ده ملك الامة اللي صنعته يبقي حق علي اللي شاركوا فيه وعندهم شهادات ورويات تملاء كتب انهم يعرفوا الناس التاريخ ده واجب وفرض علي اللاخوان وطلابهم اللي بيصدروا نفسهم في العمل العام انهم يكسروا حاجز الخوف عن الناس عشان تتحرك لكن للاسف رجعت جامعة اسكندرية الف سنة وراء وبقي الشباب بتعها حكماء العصر احنا خايفيين علي الناس لا وبصدر ليهم مشاريع مهمة لتحركهم شنطة الخير وجمع الملابس الشغل اللي يتحرك فيه اي حد ومش محتاج من الاخوان او غيرهم انهم يقوموا بالدور ده

الدور المطلوب منكم حس الناس علي الحركة بس روح القوة والمطالبة بالحرية

أنا معرفش منعم كويس لكن بعتز بمعرفته جدا، و التعليق ده يلخص هو مين بالنسبة لي و ليه أي حد يعرفه لازم يعتز بيه و بمعرفته، المذهل في منعم مش بس قدرته على تقبل النقد، لكن قدرته على نقد الذات بصراحة تامة و دائما،

أفرجوا عن عبد المنعم محمود

تصحيح

أسف جدا على نشر معلومات خاطئة، عبد المنعم متقبضش عليه و مسلمش نفسه، هو كان بيفكر يسلم نفسه بعد اقتحام منزله و تحرش الأمن بوالده المسن لكن بما أن مفيش أي قرار من النيابة بالقبض عليه يبقى الاقتحام ده كان بغرض اختطاف غير مشروع، منعم حاليا مطارد و أنا بصراحة قلقان عليه و على والده جدا.

عشان تفهموا خطورة الموضوع يا ريت تقرأوا تعليقه على مدونة ياللا مش مهم


الكلاب ولاد الكلاب قبضوا على صديقي المدون الأخواني عبد المنعم محمود.

أنا لسه عارف الخبر دلوقتي من عبد المنعم نفسه، اقتحموا بيته و ملقهوش، فيا دوبك أخطر الناس أنه هيتقبض عليه و بعدها سلم نفسه لأمن الدولة و معنديش أي تفاصيل غير ايميل سريع بعته منعم نفسه قبل القبض.

فيه تعريف بعبد المنعم على مدونة انسى

ضروري المدونين المهتمين يبدأوا حملة تضامن.

سبق أن اعتقل عبد المنعم على خلفية قضية i2 و كان من القلة اللي تم تعذيبهم وقتها

منعم له دور رئيسي في الحملة ضد المحاكمة العسكرية لقيادات الأخوان و غالبا القبض عليه الغرض منه اسكات الحملة، أظن أقل واجب أننا نوريهم أن القبض على شخص واحد مش كافي لاسكات حملة زي دي.

مفيش حاجة أسمها 30 فبراير

فعاليات المؤامرة الدولية - 4

امبارح ختم بجلسة عن آسيا، كلمة رانابير سامدار كانت كويسة جدا، فكك فيها تماما التصور الحالي عن نجاح مشروع الهند التنموى عن طريق مقارنته ببداياته و مش بالوضع بعد انتهاء الاحتلال مباشرة. صعب ألخص كلامه لأنه كان مليان تفاصيل و معلومات عن صناعات محددة في ولايات محددة و تحليله كان مبني أساسا على التعامل مع كل ولاية هندية على أنها وحدة لوحدها. حهاول ألقطه بكره و اسأله عن كتب أو مواقع عن الموضوع.

يمكن أهم تنظيره طرحها البروفيسور كانت تنظيرة مرتبطة بسلطة القانون، بدأ الأول في شرح ازاي أن الديمقراطية متطلب أساسي لتحقيق مناخ يسمح بظهور أي جماعات منظمة تنظيم مستقل، و الديمقراطية بالأساس هي عملية طرح مطالب، لكن أغلب الدول منظمة بطريقة تفترض أن فيه أساليب لطرح المطالب دي مقبولة و الأساليب دي فئة محدودة و معدودة (بمعنى أن أغلب حكومات العالم مشابهة للحكومة المصرية اللي بتقول أنها معندهاش مشكلة مع التظاهر لكن أحنا اللي مش حضاريين و بنتظاهر غلط).رانابير رأيه أن تصور أن فيه أساليب مقبولة للاعتراض و طرح المطالب و الضغط فكرة منافية تماما للديمقراطية. و مثاله كان عن تجمع فلاحين في قرية قرب كالكاتا صعد في مظاهراته لدرجة أنه قفل القرية تماما و منع دخول أي ممثل للحكومة (من أي نوع) أو للأحزاب (من أي حزب مشارك في الحكم) و ازاي الحكومة الهندية اعتبرت ده خروج عن قواعد الديمقراطية السليمة و أخدت رد فعل عنيف.

بيوصل بالمسألة لمداها بأنه بينقض أصلا القانون كمرجعية، في كلمته دعا لأن نتعامل مع القانون على أنه مرجعية للدولة و السلطات المختلفة و ليس مرجعية للأفراد و لا للعمل السياسي.

وقت العشاء قابلت يوري جوردون الاسرائيلي الثاني في القعدة، عضو فوضوويون ضد الجدار. و عرضنا فيلم "بالعين حبيبتي" عن النضال السلمي المشترك (فلسطينيين و اسرائيليين و دوليين) في قرية بالعين الفلسطينية ضد بناء جدار الفصل العنصري على أراض القرية. و أنا بتفرج على الفيلم فهمت أكثر نقطة رانيبار عن سلطة القانون و طبعا كالعادة لما بشوف حاجة عن فلسطين أول فكرة بتيجي في دماغى هي عدم جدوى نبذ العنف في الصراع ده.

النهاردة بدأ اليوم بجلسة عن الولايات المتحدة. شدني جدا كلام ستانلي أرونوفيتز عن سوق العمل في الولايات المتحدة مؤخرا و طبيعة الديون المتراكمة على الطبقة المتوسطة، أول مرة أفهم أهمية نقابة United SteelWorkers (اللي عضويتها مش حكر على عمال الحديد ولا حاجة) و الدور اللي لعبوه في سياتل. للأسف مقدرتش أكمل الجلسة عشان كان عندنا اجتماع تحضيري لجلسة الشرق الأوسط، أظن السكة اللي كانت ماشية فيها الجلسة هي توضيح أولا عمق تأثير سياسات الليبرالية الجديدة السلبي على المجتمع الأمريكي بما فيها الطبقة المتوسطة و بعدين الكلام عن صعود الراديكالية مرة ثانية في أوساط الشباب مع نقد لأداء الحركات الراديكالية الحالية و عجزها عن قراءة التحول الاقتصادي اللي هو بيقول عليه و تعاملها مع المواضيع على أنها مستقلة عن بعضها أو تركيزهم على نقد الادارة الحالية كأن الديمقراطيين هيفرقوا في حاجة.

جلسة الشرق الأوسط

بلا فخر أظن أنها كانت أفضل جلسة على الاطلاق، اتفقنا بدل ما نحكي للناس عن "الوضع في الشرق الأوسط" أننا نكثف كلامنا و نوجهه أكثر في اتجاه دور اليسار الراديكالي العالمي ايه.

فعاليات المؤامرة الدولية - 3

جلسة أمريكا اللاتينية مملة شوية، رغم أن المتحدثين ناس شغالة في حركات مهمة و ليها شغل حقيقي و أكيد عندهم خبرات مهمة، و مع ذلك أغلب كلامهم ممكن ألاقيه على النت أو مليان شعارات و خلاص.

طبعا ممكن يكون انطباعي ده متأثر بالترجمة الفورية، الأداء لما كان الكلام بالطلياني كان أحسن بكثير. على العموم أغلب الحضور مبسوط.

عموما أهم نقطة انطرحت هي علاقة الحركة بالمؤسسة الديمقراطية النيابية و تقييم أداء حكومات اليسار الجديد المختلفة.

دي من المناقشات الأزلية طبعا اللي الواحد بيفوت فيها في أي تجمع يساريين، حكومة لولا حكومة تقدمية ولا حكومة ليبرالية جديدة متخفية، حكومة شافيز سلطوية ولا ديمقراطية الخ.

فعاليات المؤامرة الدولية - 2

تصحيح: كل الأماكن الشبيهة اسمها مركز اجتماعي بغض النظر عن اطار الملكية، و البتاع اللي أنا فيه ده متاخد وضع يد فعلا مش مملوك قانونا.

تخليلوا في اجتماع دولي بالشكل ده الناشط الوحيد اللي مقدرش يشارك بسبب تعنت حكومته ناشط أمريكي!! عضو سابق في الفهود السوداء و قبل سفره بيومين حكومة الولايات المتحدة قررت تعيد فتح واحدة من قضايا الفهود السوداء و منعته من السفر.

الجلسة الأولى مخصصة للكلمات الافتتاحية.

فيه شبه اتفاق أن حركة مناهضة العولمة بصورتها ما بين أحداث تشياباس 1994 و جنوة 2001 مرورا بسياتل 1999 انتهت و أن الحركة بصورتها الحالية في أزمة و محتاجة تعيد بناء نفسها بصورة مختلفة (البعض رأيه أن ده بدأ فعلا و أننا ابتدينا نشوف صور جديدة من العمل و التنظيم).

مسلي جدا أنك تشوف الناس دي كلها بتتكلم على أن أهم خطوة الحركة العالمية وصلتها هي أنها عدت خلاص الصور التقليدية للديمقراطية و تخلت تماما عن المؤسسات اللي من نوع البرلمان و القضاء على أساس أن دي مؤسسات مفقود الأمل منها. في نفس الوقت تبص في بلادنا تلاقي ثلاث أربع الصراع مبني على محاولة لانقاذ أو اعادة بناء المؤسسات دي.

المتحدثين من أجيال قديمة و بالتالي ثيمة اعادة تعريف الطبقة العاملة أو على الأقل التجمعات اللي أحنا معنيين بيها بحيث تكون واسعة و شاملة أكثر متكررة كثير، فهل نشمل كل من يعمل أيا كان العمل؟ ايه موقف العامل في عمل ذهني بحت الخ.

U left me on Pause

Every time u travel without me, I know that I'll have plenty of free time.. I can do all the delayed mashaweer, visits and tasks.. I start planning my busy schedule and write notes with events, calls, dates.. spend a lot of time trying to fit all these things in the few days u r not here..

And as soon as u leave, I just lose interest in doing anything, in going out, attending meetings or concerts, shopping, watching movies, ..

Even afraid of seeing friends.. I think I'll feel more lonely when doing the things we do together without u.

فعاليات المؤامرة الدولية

أول حاجة اكتشفت أني انبعت، الاجتماع في ضاحية قريبة من فينيسيا يعني مش هشوف المياة ولا هركب الأتوبيس النهري، و بما أن كثير من راديكاليي اليومين دول بيعتبروا السياحة شر مش هقدر أعبر عن خيبة أملي.

الاجتماع هيتم في مركز اجتماعي مستقل، واضح أن فيه مراكز عديدة من دي في أيطاليا (خصوصا في الشمال)، بعد طرد و اخلاء الكثير من ال(squats) ابتدوا يكرروا التجربة لكن على أراضي مملوكة بشكل قانوني (أكيد الصراع على مدى ثورية النقلة دي كان ضاري). المراكز الاجتماعية مستقلة تماما، ملهاش تسجيل أو صفة قانونية و ممولة ذاتيا بتبرعات (مفيش تمويل) و شوية أنشطة رابحة (مكتبة و بار و مطعم). و طبعا العاملين كلهم متطوعين.

لسه مفهمتش قوي أنشطة المركز لكن واضح أن دي بتختلف من مكان لمكان.

النهاردة أول يوم في الاجتماع و الناس بدأت توصل، الكوفيات الفلسطيني موجودة بكثافة شديدة لكن طبعا ملابس و علامات حركة الزاباتيستا الجدد و EZLN أكثر انتشارا، الانتفاضة الفلسطينية فقدت صورتها الثورية الرومانسية خلاص.

المباني مزينة بالجرافيتي و المكان مرقع بوسترات و لافتات، مش فاهم منها غير البوسترات اللي عن ثورة الانترنت اللاسلكي و البرمجيات الحرة و مناهضة الملكية الفكرية. الأممية السادسة رقمية يا جدعان.

و طبعا في كل حتى Ya Basta! و دي معناها كفاية للي ميعرفش

Catch me if you can

seems I'll be having fun

تحديث عن المعتقلين

تحديث: أطلق سراح الجميع في وسط الصحراء و هما بخير، كفارة

بعد ما المعتقلين قضوا ليلة كاملة في عربية ترحيلات واقفة في قلب الصحراء بالقرب من التجمع الخامس بلغنا أنهم أفرجوا عن عمر سيزر .

عمر اترمى في الصحراء (حرفيا، سابوه على الرمل) و هو دلوقتي تائه بيحاول يوصل للطريق.

تضامنوا مع وزير الداخلية و وزير العدل و النائب العام و رئيس الوزراء

تنويه

هذه التدوينة خالية من البذائات و منزوعة الدسم ، مش حبا منا في الأدب لا سمح الله لكن تقية و حماية لشخصنا من خطر قضايا السب و القذف، أستسمح جمهوري العريض اللي تعود منا على مستوى أداء معين أنه يعذرني المرة دي، صدقوني أنا زيكم شايف أن في طرف من أطراف القضية الشتيمة فيه تبقى مديح لكن ما باليد حيلة.

أيوه أنا فعلا بأناشدكم تتضامنوا مع السادة وزراء العدل و الداخلية و الاتصالات و كمان رئيس الوزراء (ياللا يمكن نشيلهم جمايل تنفعنا في يوم أسود)، أصل المسألة أن سيادة القاضي المبجل عبد الفتاح مراد رافع قضية ضدهم و ضد الدولة كلها في محلس الدولة على أساس أن السادة الوزراء دول فشلوا في حماية الوطن من المواقع الارهابية الشريرة و بيطالب بحجم المواقع دي.

مين بقى المواقع الارهابية الشريرة؟ مدونة بنت مصرية، مدونة صاحب الأشجار، مدونة الله الوطن فاطمة، مدونة الصعيدي، موقع الشبكة العربية لمعلومات حقوق الانسان، موقع مركز هشام مبارك للقانون، موقع مركز النديم لتأهيل ضحايا التعذيب الخ.

شفتوا ازاي بقى؟

دلوقتي عدالة القاضي عبد الفتاح مراد رافع القضية دي مش خوفا على الوطن من المواقع الارهابية زي ما بيقول لكن كمحاولة للضغط و الانتقام من الناس اللي كتبت عن فضيحة (أسف عن احتمال فضيحة يعني) نسخه لمحتوى تقرير الشبكة العربية و تدوينة لبنت مصرية في كتبه عن المدونات بدون الاشارة لأصحاب العمل الأصلي.

عارف الولية اللي لما تختلفوا مع بعض تروح خابطة نفسها في الحيطة لحد ما راسها تجيب دم و تروح القسم تتهمك انك ضربتها مع أنك مقربتش ناحيتها أصلا؟ أهي الولية دي ملهاش أي علاقة بالقضية بتاعتنا ولا حاجة.

أخر الأخبار عن المعتقلين

الناس اللي اختطفت امبارح و هما بيحاولوا يعتصموا في ميدان التحرير اعتراضا على التعديلات الدستورية لسه لحد دلوقتي محتجزين في عربيات ترحيلات، يعني قضوا ليلة كاملة في العربية و لحد دلوقتي مش باين هيعملوا فيهم ايه.

الاحتجاز في عربية ترحيلات لا فيها مكان للنوم ولا تهوية ولا اضاءة ولا حمامات و من غير توفير رعاية صحية (معاهم أحمد دروبي المصاب بالسكر) ده صورة من صور التعذيب.

أيام الاعتصام

كالعادة ناوي أرسل أخبار الاعتصام اول بأول من تليفوني المحمول، تقدروا تتابعوا الأخبار دي هنا

لاحظوا أني مش هقدر أشارك فيا الاعتصام من بدايته.


Sun, 2007/03/25 - 20:34

Alaa Abd El Fattah: waelabbas: hossam el hamalawy posted pictures of the arrests on his blog http://arabist.net/arabawy/ and a video will be posted shortly

Alaa Abd El Fattah: waelabbas: kareem el sha'er and adham were arrested too, shymaa hasabo was released

Sun, 2007/03/25 - 20:31

Alaa Abd El Fattah: waelabbas: kareem el sha'er and adham were arrested too, shymaa hasabo was released

Alaa Abd El Fattah: waelabbas: hossam el hamalawy is free

Sun, 2007/03/25 - 20:31

بالمناسبة

قدك المياس ياعمري .. يا غصين البان كاليسرِ
انت أحلى الناس في نظري .. جل من سواك يا قمري

قدك المياس مذ مالَ .. لحظك الفتان قتالا
قال لي واصل ..قلت لا لا لا ..فاقطع الآمال وانتظرِ

أنا وحبيبي في جنينة .. والورد مخيم علينا
طلب مني وصاله ... يا رب تستر علينا

كفاية سلبية، هنقول لأ

Organizers: 
المصريين
Location: 
في دائرتك الانتخابية

دعوة حركة كفاية لمقاطعة الاستفتاء على التعديلات الدستورية خطأ شديد و استسهال غير مفهوم، فرغم أن مفيش أمل في استفتاء نزيه لكن مشاركتنا بادلاء الأصوات و الرقابة الشعبية خطوة ايجابية ضرورية و أظن خبرات المعارضة مع انتخابات مجلس الشعب و النقابات المهنية و اتحادات الطلاب و النقابات العمالية و الغرف التجارية و حتى مشاركة حزب الغد في معركة الانتخابات الرئاسية كانت كلها محطات مهمة في الصراع من أجل الديمقراطية كسبت المعارضة المصرية فيها الناس اللي شافت بنفسها ازاي النظام الحاكم بيتلاعب بصوتها.

أن تدعوا شعب لا يشارك أصلا أن يفضل في بيته ده هبل و تأصيل للسلبية، للأسف مفيش وقت نتناقش نقنع بعض، الاستفتاء على تعديل الدستور يوم الأثنين القادم.

دي دعوة شخصية مني لعدم المقاطعة، روحوا دوائركم الانتخابية و ارفضوا التعديلات الدستورية.

مواليد ما بعد 1982 المفروض أن كلهم مسجلين بالجداول الانتخابية تلقائيا و يحق لهم الانتخاب بالبطاقة الشخصية في دائرتهم.

اللي يروح مينساش يقعد مدة أو يفضل اليوم كله في دائرته عشان يرصد بنفسه ايه اللي بيحصل و يرصد بنفسه حجم و كثافة الحضور لازم نبتدي نتعود على موضوع المراقبة الشعبية بما أن مبارك ناوي يحرمنا من رقابة القضاء على الانتخابات.

اختطاف مالك مصطفى

تحديث : أفرجوا عن مالك و أنا لسه مكلمه دلوقتي، منتظرين أخبار عن محمد عبد القدوس و جيمي هوود

كفارة يا شهيد مالك يا أسد 30 فبراير

تحديث العربية لسه قدام ماكلدونالدز الجامعة الأمريكية و محتجز فيها حوالي 7 أفراد. (السبعة كانوا مخبرين، مالك مش قليل)


مالك اتخطف من ميدان التحرير و هو في طريقه للمشاركة في وقفة أمام مجلس الشعب للاعتراض على التعديلات الدستورية و التضامن مع نواب الشعب المعتصمين.

آخر الأخبار أن مالك محتجز في سيارة ملاكي القاهرة نمرتها 865171 العربية كانت واقفة أمام ماكدونالدز الجامعة الأمريكية و اتحركت تجاه ميدان التحرير من خمس دقائق، للأسف لم نتكمن من متابعتها.

اتقبض كمان على محمد (جيمي هوود) جمال و الأستاذ محمد عبد القدوس و مفيش أي معلومة عن مكانهم و فيه ناس كانت اتمسكت و اتسابت زي الصحفي عصام فضل.

المظاهرة اتفضت بالعنف و المتظاهرين تقهقروا و متواجدين دلوقتي في نقابة الصحفيين، يا ريت اللي يقدر ينزل يشاركهم لحد ما نسمع أخبرا عن المعتقلين.

عاجل: المعتقلين بدأوا اضراب عن الطعام و اعتصام أمام قسم الظاهر

بما أن استهبال أمن الدولة ملوش حدود لم يفرج عن أي من معتقلي كفاية لحد دلوقتي رغم أن النيابة أمرت باخلاء سبيلهم كلهم، مأمور و ظباط قسم الظاهر أظهروأ أنهم مخصيين و غير قادرين على تنفيذ قرار النيابة بدون أوامر مباشرة من مباحث أمن الدولة و طبعا أمن الدولة سايقة في الاستهبال.

المعتقلين بدأوا اضراب عن الكعام احتجاجا على استمرار احتجازهم اللي ملوش أي مبرر و مأمور قسم الظاهر الجبان رفض يعمل محضر يثبت فيه الاضراب.

كمان فيه اعتضام أمام قسم الظاهر تضامنا مع المعتقلين و من أجل تشكيل ضغط على ظباط المباحث و مأمور القسم، يا ريت اللي يقدر يشارك، القسم قريب من ميدان السكاكيني بمنطقة الظاهر (قريب من محطة مترو غمرة و منزل كوبري أكتوبر بتاع غمرة برضه و اللي يسأل ميتوهش).

و أكتب على حيطة الزنزانة حكم مبارك عار و خيانة

تحديث عن تحقيقات النيابة مع معتقلي كفاية

تحديث: أدي النهار عدا و لسه محدش أفرج عنه، يعنى قمة الاستهبال، لما أنتم مش ناويين تسيبوهم اديتوهم اخلاء سبيل ليه؟

رغم قرار اخلاء سبيل الجميع برضه محدش أفرج عنه لحد دلوقتي، و آخر الأخبار المأمور كان بيقول للمحامين أنا دلدلول مليش لازمة و بتاع أمن الدولة ده هو اللي في أيده كل حاجة، شكرا سيادة مأمور قسم الظاهر على صراحتك، الراجل اعترف أن رغم أنه مأمور ملو شنباته غير قادر على تنفيذ أمر نيابة و يا عارف بيعرف يدخل الحمام لوحده ولا بيحتاج أمن الدولة تشطفه برضه.

شكلها كده محدش خارج قبل بكره.


هيييييييييه مبروك يا جماعة الكل خد اخلاء سبيل

طبعا محدش فاهم حاجة خالص، ده تضارب في الأوامر مثلا ولا ايه اللي بيحصل، ما علينا المهم دلوقتي أن يتم الافراج الفعلي عنهم بسرعة و من غير بهدلة. و أدينا مستنيين الأخبار

تحديث: تم ترحيل المعتقلين من النيابة الى قسم الظاهر و المفروض أنهم دلوقتي في اجرائات الكشف عن اي قضايا سابقة ممكن يكونوا مطلوبين فيها و بعدها يتم الافراج عنهم


قائمة الأسماء النهائية (لاحظوا أن كان فيه أخطاء في كل القوائم السابقة)

  1. وليد صلاح
  2. محمد عادل
  3. خالد عبد الحميد
  4. بهاء صابر
  5. كريم رضا
  6. مصطفى سيد اسماعيل
  7. أحمد عبد الجواد
  8. ناجي رشاد
  9. محمود الورداني
  10. أحمد علاء
  11. عمر ابراهيم
  12. عصام شعبان
  13. جاد الاسلام جمال
  14. فيكتور نجيب
  15. أحمد أبو ستيت
  16. أحمد اسلام وحيد
  17. حمادة رجب محمد عبد اللطيف
  18. نائل يحي
  19. عمرو مصطفى عبد العظيم
  20. محمد عبد المالك
  21. رامي توفيق

التحقيقات في أخرها خلاص و متوقع صدور قرار النيابة بعد قليل

هنوافيكم بالأخبار أول بأول

التحقيقات معتمدة على محضر تحريات لمباحث أمن الدول اتعمل يوم 10 مارس 2007 الساعة العاشرة و أشر عليه المحامي العام لنيابة أمن الدولة معطيا المباحث الحق في القبض على الناس في حالة التلبس فقط بعدها بساعتين (يعني العملية دي كان بيتخطط لها قبل المظاهرة بخمس أيام على الأقل). الكلب اللي حرر المحضر أسمه محمد الأنوار

التحقيق تم في نيابة قصر النيل لكن بصلاحيات نيابة أمن الدولة، اتقدم للتحقيق 21 معتقل (هنوافيكم بقائمة الأسامي النهائية قريبا) بعضهم رفض التحقيق لعدم دستورية نيابة أمن الدولة و بعضهم قبل التحقيق.

رقم القضية 1754 اداري قصر النيل لعام 2007 و التهم

  1. الاشتراك في تجمهر مؤلف من أكثر من خمس أشخاص الغرض منه تعطيل تنفيذ القوانين و اللوائح و التعدي على رجال الشرطة و بث دعايات مثيرة و تعطيل حركة المواصلات العامة و تعريض حياة الأشخاص للخطر.
  2. بث دعايات مثيرة و اذاعة أخبار من شأنها تكدير الأمن العام و الحاق الضرر بالمصلحة العامة
  3. حيازة و احراز محررات و مطبوعات معدة للتوزيع و اطلاع الغير عليها تتضمن موضوع الاتهام سالف ذكره
  4. التعدي بالقوة و الاشارة على موظفين عموميين و كان ذلك أثناء و بسبب تأدية وظيفتهم (مفيش مجني عليهم)
  5. تعريض سلامة النقل البري للخطر عمدا و تعطيل سيرها

جدير بالذكر أن التهمة الثالثة بتذكر أحراز و في محضر أحراز رقمه 425 لعام 2007 و مع ذلك مفيش أي أحراز قدمت للنيابة!!!!

على نفس النغمة التهمة الرابعة بتذكر موظفين عموميين تم التعرض ليهم و مع ذلك مفيش قائمة بأسماء المجني عليهم الموظفين العموميين الغلابة اللي أحنا خرشمناهم و صبعنالهم دول.

المحامين على خلاف هل النقل البري اللي تم تعريض سلامته للخطر هو خط النقل البري اللي تحت بلكونة التجمع أم اللي تحت بلكونة الغد.

باركوللي يا ولاد أنا اترقيت من مجرد متظاهر لمحرض و عنصر اثاري مرة واحدة، بيقولك اسمي ذكر ضمن قائمة ب19 محرض مطلوب القبض عليهم (مفيش خوف حقيقي من القبض علينا بسبب المحضر ده لأن كان مفروض يتقبض علينا تلبس، ده ميمنعش أن يكون فيه محضر أخرى طبعا لكن مستبعد).

Pages

Subscribe to Manal and Alaa's bit bucket RSS